Mark 2

NAKATA 2

Tumangayuk naguhipkaktauyuk

(Mt. 9:1-8; Lk. 5:17-26)

1Takanani uvlikaaktillugu Capernaumun Jesus utektuk, aivangmanlu inuit tuhaayat. 2Amigaitunlu katimalegamik iglu innikhaekpiaktuk ukuam hanianilunin. Jesusli tapkununga ilihauyyiyuk. 3Talva inuit allat tikittun kagitivlugu inuk tumangayuk, angutit hitamat tigumiakhugu. 4Tapkualu Jesus upaglimainamitku, inugiegmata, tapfumani iglum kilanga angmaktaat kaangatigun. Aahin angmakaaktillugit tumangayuk kipikhimayuk ningititaat. 5Jesusimlu tapkua ukpegningat takugamiuk tumangayumun ukallaktuk, “Engniga huinekutitin ihumagiyauyunaektun”. 6Talvani tiitigaktit ilait ikhivalektun apekhivlutik umatimingni imaatun, 7“Hug una inuk ukakka taimatun? Ukaniluktuk Godmun. Kia Godmin alla huinekinit ihumagiyunaekpagit?” 8Tayyainaglu Jesus umamini ilihimagami, tapkua ingmingnik apekhimata, ukautiyait, “Hug umatipfingni taima ihumalukpihi? 9Nalliak aiyungnaitkiak, ukagluni tumangayumun 'Huinekutitin ihumagiyauyunaektun,' imaatunlunin, 'Makittin, kipkit tigukaalugu pihugiagin'? 10Ilihimakuvluhili inum engniga hakuginikangman nunami ihumagiyunaeglugit huinekinit” – tumangayuk ukallautiyaa – 11“Ukautigipkin, makittin kipkit tiguguk aigiaginlu.” 12Tamna makittuk tayyainaglu kipini tigugamiuk aniyuk inuit takuangni. Tamangmiglu agligutakpiagamik God kuyagiyaat ukakhutik, “Imaatumik hivungani tautukhimaitgaluaktugut.”

Levi kaitkuyauyuk

(Mt. 9:9-13; Lk. 5:27-32)

13Jesus talva anigami tahium hinaanungaktuk. Inuit amigaitun upagmayyuk ilihautiyain. 14Talva aahinungaugami Alphaeusim engniga, Levi, tautuktaa tamna manilekhiyikagvigmi ikhivainaktillugu. Jesusim ukallautiyaa, “Malinga”. Tamna nangektuk maligahuakhugu.

15Tapfuma igluanilu Jesus negitillugu manilekhiyit amigaitun, huinekiyunlu negikatigiyain, amigaitun tapkuanaatun maligamitku. 16Tiitigaktillu Pharisekut takugamitku, Jesusim huinekiyun, manilekhiyillu negikatigimagit, ukallaktun maligutainun, “Hug manilekhiyit, huinekiyullu negikatigivagit?” 17Aahin tamna Jesusim tuhaagamiuk ukallautiyain, “Inuit naamaktillugit daktinik takuyumangngitpiaktun, aaniaktun kihimi, kaithimangngitunga ilumuktun inuit kaitkukuvlugut, huinekiyun kihimi.”

Apekkut negitailiyukhaumangata

(Mt. 9:14-17; Lk. 5:33-39)

18Tapfumani John Baptaiektim maligutait Pharisekullu negitailingnagmata inuit upagamitku Jesus apegiyaat, “Hug Johnim maligutait, Pharisekut maligutaillu negitailivat ilvit maligutitin negitailiyuitillugit?” 19Jesusimli ukautiyain, “Tapkua katuhekhektunun pulaakuyauyun negitailiniakkat uikhak ilagitillugu? Uikhak tapkunaniitillugu tapkua negitailiyukhaungitun. 20Kakugulunin uikhak tapkunanga aullautiyautpan talva negitailihunguyun.

21Annugak alikhimayuk ilaahakaktukhaungituk nutaamik, tamna alikatagnakhavuk angikiyamik ilaahak nutaak utukangmin ilaa. 22Imektautinun utukangnun wainmik nutaamik ilahiyukhaungitpiaktuk imektautit aheguknakhavun wainlu kuviniaktun. Inuk wain nutaat imektautinun nutaanun ilahivaglugit.”

Apekkut Sabbathkun puiguktaukunagu

(Mt. 12:1-8; Lk. 6:1-5)

23Ilaani Sabbathiutillugu Jesusim maligutaillu nauttivit mukpauyakhaglit apkutigiyain. Pihuktillugit maligutait mukpauyakhainik ilangingnik ungavaktun. 24Pharisekut ukallautiyaat, “Tautuk hug maligutitin pilekkat piyukhaungitumik Sabbathmi?” 25Kiuyain, “Taigugngitkaluakpihi Davidim huliyaanik inungitlu, tapkua aiyukaktillugit kaalekpiakhutik. 26Godim igluanun itegami negivaktuk mukpauyamik Godim piyutaanik, Abiathar angayyuvingmi ataniutillugu. Tapfuminga negiyukhaungitkaluaktillugu, angayyuvikut kihimi, David negivaktuk negipkakhugit naiyuktinilu?” 27Aahin ukallautiyain, “Ilaa uvluk Sabbath tuniyauhimavaktuk inungnun, inuilli tuniyauyukhaungitugaluit Sabbathmun. 28Taima inum engniga ataniuyuglu Sabbathmuntauk.”

Currently Selected:

Mark 2: Sperry

Highlight

Copy