Mark 1

NAKATA 1

John Baptaiektim unipkaa

(Mt. 3:1-12; Lk. 3:1-7)

1Jesus Christim, Godim engningata unipkanga imaatun-ithimayuk. 2Hivullengmik nalautaiyyi Isaiah tiitigakhimangman,

“Ilaa uniuyyiga hivunengnun tiliyaga apkutikhangnik upalungayakuvlugu,

3Inuilgulmi tukhulauktum nipaa tuhaanaktuk – Atangum apkutaa upalungayakhiuk nalguektilugu.' ”

4John Baptaiekti inuilgulmi-itpaktuk ukauyyivluni baptainengmik huinekiyun ihumaliukiktukhaumata ihumagiyauyunaekuvlugit. 5Talva Judeamiut Jerusalemiullu tamangmik Johnmungaktun, tapfumunga baptaiektauvlutik kugagmi Jordanmi huinekutitik ukautigivlugit.

6Johnlu annugakhimayuk camelim amianik tapfikakhuni ayyikutaanik amingmik. Negivaktuk milugiayuanik egutamlu ukhuinik. 7Ilihauyyiyuk ukakhuni, “Kingunipkun inuk uvamnin ataniukiak kainiaktuk. Aahin uvanga kanguhitikhakakpallaagama kamiektakhagingitagaluagalunin tamna. 8Ilaa uvanga baptaiekpagipfi imengmun, tapfumali baptaiegniaktaahi Anengnimik Naguyumik.”

Jesus baptaiektauyuk

(Mt. 3:13-17; Lk. 3:21-22)

9Tapfumani Jesus Nazarethmin Galileemitumin tikinami baptaiektauyuk Johnmun Jordami. 10Kugagminlu kakivluni tayyainak tautuktuk kilangmik angmakhimayumik Anengnimik Naguyumiglu atkaktillugu inminun tingmiaktun. 11Nipilu kilangmin tuhaanaktuk ukakhuni, “Ilvit engnigigapkin nagugiyagin akhun kuviahutigivlutillu.

Jesus Uktuktauyuk

(Mk. 4:1-11; Lk. 4:1-13)

12Tayyainak Anengnim Jesus aullaktitaa inuilgulmun 13inuilgulmilu Jesus uvlivaktuk 40nik uktuktauvluni Satamun negyutit naiyuktigivlugit. Ihalgulgilli kivgaktuktagaluangat.

Jesus ukauyyinahualektuk

(Mt. 4:17; Lk. 4:14-15)

14Talva John piyaukaaktillugu, Jesus Galileemun tikittuk ilihauyyivluni Godim unipkautainik 15ukakhuni, “Pivikhak tikittunektuk, Godim atanguvia kaglilengman, ihumaliukigitti ukpekpagluhilu unipkangmun naguyumun.”

Jesus maligutiminik hivullengnik kaitkuiyuk

(Mt. 4:18-22; Lk. 5:1-11)

16Galileem tahiata hinaatigun pihukami Jesusim tautuktaik Simon, tapfumalu nukaa Andrew kuvyaktuktillugik, ikalukhiuktiugamik tapkuak. 17Jesusim ukallautiyaik, “Maliktinga iliptik inukhiuktinguktiniagaptik.” 18Tayyainaglu kuvyaktik kimakhugit maligahualektaak.

19Kanilgulmun aullamigami tautuktaik James, Zebedeem engniga, Johnlu tapfuma nukaa, umiangmitillugik kuvyatik havakhugit. 20Tayyainaglu Jesusim kaitkumagik tapkuak angutik Zebedee, kivgaillu umiangmi kimaktait malikuvlugu.

Jesus agiuktulingmik ikayuktuk Capernaumi

(Lk. 4:31-37)

21Tapkualu Capernaumun tikinamik Sabbathiutillugu tayyainak Jesus atugvingmun itegami ilihauyyiyuk. 22Inuillu tapfuma ilihauyyutain agligutautigiyain ilihauyyingnangman hakugignekaktutun-ilivluni, allauvlunilu tiitigaktinin. 23Tapfumanilu inuk agiuktukaktuk atugvingmiituk, 24kukuaktuklu tamna ukakhuni, “Kanuiliugniakkin uvaptingnun Jesus Nazarethmiutak? Kaivit piektitkuvluta? Godim pilluagmatin ilihimayagit” 25Jesusimli ihuakhaktaa ukakhuni, “Nipahuegin umanga anitguit.” 26Agiuyuktum aulayaaktitugu inuk kimaktaa igialaakpiakhuni. 27Inuillu agligutakpiakhutik ingmingnik apekhiyun ukakhutik, “Huna tamna? Ilihauyyiva nutaamik? Agiuktunlunin anipkakpagit tuhaavigiyaat.” 28Tayyainaglu Galileemi nunami inuit tamangmik Jesusim havaangit unipkautigiyain.

Jesusim Simonim hakia inuillu allat naguhipkaktain

(Mt. 8:14-17; Lk. 4:38-41)

29Tayyainaglu atugvingmin anigami Simonim Andrewmlu igluangnun pulaaktuk, James Johnlu ilagivlugit. 30Talva Simonim hakia angnak kiiyyakpiagami aaniaktuk, tapfuminga uniutiyaat Jesus. 31Upagamiuk alganga tiguyaa makiktitugu. Talva aaniagutata kimagmani kivgaktuktuk tapkuninga.

32Unungmanlu hikenek nipingman, inuit aaniaktun agiuktulgillu kagitiyain Jesusmun. 33Iglukagvigmiut tamangmik ukuam hilataaniitun katimalekhutik. 34Tapfuma aaniakhimayun amigaitun naguhipkaktain, agiuktullu anipkakhugit. Aahin agiuktun ilitagimayyuk Jesus ukaktailiyain.

Jesus Capernaumin aullagami kengagniaktuk

(Lk. 4:42-44)

35Akagugunmanlu kaulgaktinagu Jesus tupaktuk iglukpailgulmunlu aavungaugami kengaktuk. 36Simonimlu allatalu maliktaat. 37Pakinamitkulu ukallautiyaat, “Inuit tamangmik kenilektaatin.” 38Kiuyait, “Iglukagvingnun kanittunun aullakta tapkunani ilihauyyikuvlunga, taimaliukuvlunga kaithimayunga ilaa.” 39Talva Galileemi tamaini aullainakpaktuk atugvingni ilihauyyivluni agiuktunlu anipkakhugit.

Kilakhimayuk naguhipkaktauyuk

(Mt. 8:1-4; Lk. 5:12-16)

40Talva inuk kilakhimayuk Jesusmun tikittuk hitkuvigigamiuk ukallautiyaa, “Piyumaguvin kilaektiniaktangma.” 41Tapfuma nagligigamiuk ihaktuk aktukhugu ukakhuni, “Piyumagama; kilaekhiguit.” 42Tayyainaglu tapfuma aaniagutata kimaktaa kilaekuvlugu. 43Jesusimlu pitkuyaa akhun aullakuvlugu tayyainak, 44ukallautivlugu “Uminga uniuyyitailutin inungnun, takkili angayyuvikpagyuakunungauguit ilingnik takupkaikuvlutin. Aahin aitukpaglutin naguhiyyutikhangnik inuit ilihimakuvlugit naguhivagavin, taima Moses pitkuvangman.” 45Tamnali anigami tayyainak uniuyyiyugaluak inungnun kuyagingnakhuni. Talva Jesus iglukagvingnun tikilimaektuk talvangaanin, inuilli tapfumunga akuiyugaluit aahinin iglupailgumiitillugu.

Currently Selected:

Mark 1: Sperry

Highlight

Copy