Matthew 21

NAKATA 21

Jesus tikittuk Jerusalemun nagugiyauvluni

(Mk. 11:1-11; Lk. 19:28-40; Jn. 12:12-19)

1Jerusalemun tikilegamik Bethphagekukhutik, manilgulmun Olivesmik taiyauyumun, talva Jesusim maligutini malguk tiliyaik 2ukautivlugik, “Iglukagluangitumun hivuniptingni-itumun tavungaugittik tautugniagapfiuk kenmekpak hiutekuktuyuk ipikhimayuk nugangalu. Ipiekaalugik kagitihigik uvamnun. 3Inum pitailivaatik ukainaglutik imaatun “Atangum atugumangmagik, tayyainak aullaktiniaktaik.” 4Taimalivaktuk nalautaiyyim ukauhiit ilumukuvlugit ukakhimangman,

5“Zion inungit ukautihigit, ilaa atanekhi ilipfingnun kailektuk kenmekpaktukhuni hiutekuktuyumi anangayangitkivluni nugaglu atukhugu.”

6Maligutiglu tapkuak tuhaagamik Jesusmun pivaktuk pitkuyaugamik, 7kagitivlugik kenmekpak hiutekuktuyuk nugangalu, kaanganun annugatik ilimatigik Jesusim atuktaa. 8Talva inuit amigaitkiak annugatik apkunmun ihivilektain allatauk napaaktun kihektutain kipigamitigik ihiptektain apkunmun. 9Inuillu amigaitun hivullit, maliktingillu pihukhutik tukhulauktun, “Hosanna Davidim engningaanun, nagugiyauli tamna tikittuk Atangum atingani, Hosanna kingikiyauyumi.”

10Jerusalemun tikinman iglukagvigmiut tamangmik kuglukpiaktun ukakhutik, “Kina una?” 11Inuit kiuyun, “Tamna nalautaiyiuyuk Nazarethmiutak Galileemin atikaktuk Jesusmik.”

Jesusim inuit Angayyuvikpagyuagmiitun ihuakhaktain

(Mk. 11:15-19; Lk. 19:45-48; Jn. 2:13-22)

12Talva Jesus Godim angayyuvikpagyuangaanun itegami niuvaayit, niuvekpaktunlu iluani anipkaktain, manilekhiyit ikpatain ulgutitugit, kupanualgitlu ikhivautain. 13Ukallautiyain, “Tiitigakhimayuk, 'Igluga taiyauyukhak kengauvingmik'; ilipfili kukivinguktitagaluakhi.”

14Jesuslu angayyuvikpagyuagmiitillugu takpiitun niugluktunlu upagmayyuk naguhipkaktain. 15Angayyuvikpagyuakulli ataningit tiitigaktillu tautukamik, Jesus aglingnaktumik havangman, tuhaagamiglu nutakat tukhulaugmata 'Hosanna Davidim engningaanun' angayyuvikpagyuagmi, ihuigiyaat, 16ukautivlugu, “Hapkua nutakat ukauhingit tuhaangitpigit?” Jesusim kiuyain, “Ilaa taigugngilahi imaitumik, 'Nutakat nutaganuillu kuyakhukuyauyun naguyumik ilingnin'?” 17Aahin kimagamigit aullaktuk iglukagvingmin Bethany tikittugu naiyugumavluni talvani.

Napaaktuk ahiakaktukhak ahiakangngituk

(Mk. 11:12-14, 20-26)

18Akagugunman Jesus iglukagvingmun utiutillugu kaalektuk. 19Talva tautukami napaaktumik ahiakaktukhamik fignik upaktaa. Tamna ahiakangngitugaluak kihektutikaktuk kihimi. Tapfuma napaaktuk ukagvigiyaa imaatun, “Ilaa ahianikfaayunaektutin talvangaanin.” Tayyainaglu napaaktuk panektuk. 20Maligutaita takugamitku agligutaktun ukakhutik, “Napaaktuk kanuk tukuliva tayyainak?” 21Jesusim kiuyain, “Ilumun ukautigipfi, ilipfi ukpengnekakupfi ukpeguekhimaitumik ayyikutaanik piniaktuhi napaaktumun, aahintauk manilguk ukagvigigupfiuk imaatun, 'Nutin taununga tagiugmun igitaukuvlutin' taimaliukhunguyuk. 22Humillikalunin piyumagupfi kengaunipfigun, pikangiaktuhi ukpegupfi.”

Jesus hakugigmanganlunin inuit apekhiyun

(Mk. 11:27-33; Lk. 20:1-8)

23Jesus angayyuvikpagyuagmun itegman, angayyuvikpagyuakut, ataningit, inuit ataningillu tapfumunga upangniktun ilihauyyitillugu ukakhutik, “Kia havakuyaatin hapkuninga kia pitkuyaatin? 24Jesusim kiuyain, “Uvangatauk apeginahualegapfi atauhengmik, uminga kiugupfinga ukautiniagipfi havakuiyimnik. 25Johnim baptaiegutaa nakin piva, Godmin inungninlunin?” Tapkua kangutiyun ingmingnik ukakhutik, Ukagupta, 'Godmin' ukangniaktuk, 'Talva hug ukpegingitpakpihiuk?' 26Ukaguptali 'Inungnin' ekhigiyavut inuit tapkua tamangmik John nalautaiyiunahugivagmayyuk.” 27Talva kiuyaat Jesus, “Naluyugut”. Tapfuma ukautiyain, “Uvangalu havakuiyiga ukautigiyunaitaga taimaliukuvlunga hapkuninga.

Hivuniunek nukagikun

28“Kanugli ihumavihi? Inuk engnikaktuk malgunik, hivullengmunlu upautiyuk ukakhuni, 'Engniga ahiakagvimnun havagiektuklutin uvlumi.' 29Kiuyuk, 'Imanak', uatiagunguman ihumaliukigami havagiektuktugaluak. 30Talva engnilgum aipa upaktaa ayyikiitumik ukautivlugu. Aipa kiuyuk, 'Havagiektuktunga ilaa' tamna havagiektugngitugaluak. 31Tapkuak nalliata anguni tuhaavauk?” Ukaktun, “Hivullik ilaa”. Jesusim ukallautiyain, “Ilumun ukautigipfi, tapkua manilekhiyit angnallu ingmingnik niuvgutigiyun Godim atanguvianun tikilutik kinguliutiniaktaahi. 32John tikihimagaluaktillugu ilihauyyikuvlugu ilumugnim apkutaanik ilipfingnun ukpegngitpiaktakhi, manilekhiyilli angnallu ingmingnik niuvgutigiyun ukpekpaktugaluit tapfumunga. Aahin ukpengmata tapkua ilihimagapfi ihumaliukigngituhi ukpekuvluhi tapfumunga.

Hivuniunek ahiakagvikun

(Mk. 12:1-12; Lk. 20:9-19)

33Hivuniunek alla tuhaakhiuk. Nunami nauttivilik ituk ahiakagvikhaminik havaktuk avalugivlugulu. Aahin ipteyavikhamik hanayuk nappagialiugamilu angutit havaktit munakhikuyain ungahiktumun aullakhuni. 34Talva ahiat nauhimavingat kaglilengman nauttivilgum kivgani tiliyain havaktinun ahianiktukuvlugit. 35Havaktilli kivgain tiliyauyun tigugamitigit ilangat kektuktaat, alla tukutpagaat, millukhugu ugayanik allatauk. 36Aahintauk nauttivilgum kivgani allat tiliyain, amigaikiyanik; tikinmatali havaktit ayyikutagiyain hivulliktitun. 37Kinguagun nauttivilgum engnini tiliyaa tapkununga ukakhuni, 'Engnimnun kanuiliyunaitunakhiyun.' 38Havaktilli engniga takugagamitku ingmingnik ukaktun, 'Tamayya kinguvaghekhiyi, takki tukulakput tapfuma kinguvakhainik piyukhaugapta.' 39Talva tamna tigugamitku ahiakagvingmin anipkaktaat tukuvlugu. 40Talva ahiakagvilik tikitkumi havaktinun huliniakka?” 41Ukautiyaat, “Ilaa tukuniaktait tapkua nagligutakhimaitumik ahiakagvia munagiyaukuvlugu havaktinin allanin naguyunin tapkunangalu ahianiktugniaktuk ahiat nauhimavingat tikikagan.” 42Jesusim ukallautiyain, “Godim ukauhiani taigugngilahi imaatun

“Uyagak igitauhimayuk igluliuktinin iglukpaum kiglingata ataani iliyauyugaluak. Atangum pimagu tamna alianakpiaktuk iyiptingnun'?

43Talva ukautigipfi, Godim atanguvia tamaktitauniaktuk ilipfingnin tuniyaukuvlugu nunakatigingnun allanun ahianikhungumata tapfumuna.”

44Inuk kinalika iiyukagumi uyagagmun umunga ahigugniaktuk; aahintauk uyagak tamna katakpan inugmun, navingniaktuk inuk.

45Angayyuvikpagyuakun ataningit Pharisekullu tuhaagamitigit Jesusim hivuniuningit ilitukhiyun tapfuma tapkua ukautigimagit. 46Aahin tapkua tiguyumainaktaat inuilli ekhigiyagaluangit, tapkua nalautaiyiunahugimayyuk.

Currently Selected:

Matthew 21: Sperry

Highlight

Copy