John 4

NAKATA 4

Jesusim angnak Samariamiutak ukagvigiyaa

1Pharisekut tuhaavangmata Jesus baptaiekhilengman malikuivluni inungnik amigaikiyanik Johnmin– 2Jesus inmi baptaiekhiyuitugaluak, maligutait kihimi– 3tuhaagami Judeamin aullaktuk utiuvluni Galileemun. 4Samariakuktukhaugamilu 5iglukagvik taiyauyuk Sycharmik Samariamiituk tikittaa, tamna nuna hivungani Jacobim aitutigivagaa engniminun Josephmun kanituk. 6Aahin Jacobim imektagvia takananiiman Jesus pihugiamigun unagukpallaagami haniani ingiyuk, uvluk kitkaniitillugu.

7Tapfumani angnak Samariamiutak tikiman imektagahuakhuni, Jesusim ukallautiyaa, “Imektilanga” 8maligutait iglukagvigmungaumata niuvegiaktukuvlugit nekimik. 9Angnam Samariamiutam kiuyaa, “Hug ilvin Jewmiutaugavin imengmik tukhiaviginga angnaugama Samariamiunin?” (Jewmiut Samariamiullu ukakatigiyuitpiangmatalunin) 10Jesusim kiuyaa, “Ilitagigungni Godim aitutaa kinaumanganlu ukaktuk ilingnun, 'Imektilanga', tukhiagviginiaktan, tapfumalu tuniniaktaatin imengmik inugutilengmik.” 11Angnam ukallautiyaa, “Ilaa kallutikhainavin, imektagviglu itengman, nakin imengmik inugutilengmik piniakkin? 12Hivullipta Jacobim tunivagaatigut uminga imektagmik, umangalu inmi, kitungaillu negyutingillu imekpaktun, Jacobmin ataniukiyauvin ilvin?” 13Jesusim kiuyaa, “Kinalika imegumi uminga imekiniangmiyuk 14kinalikalunin imegumi imengmik tuniniaktamnik tamna imekilaituk, tamna imek tuniniagiga inungmi-iniaktuk anialiktun hagvainaktutun-ilivluni inuhengmun nungulaitumun.” 15Angnam Jesus ukallautiyaa, “Ilaa imengmik uminga tuniviginga imekikunanga kaitfaayunaekuvlungalu hamunga imektaglunga.” 16Jesus ukaktuk, “Taki uin kaitkuguk kaitfaayyavutinlu.” 17Angnak kiuyuk, “Uikangngitgaluaktunga”. Jesusim ukautiyaa, “Ukagavin 'Uikangngitunga' itkumayumik ukakkutin, 18uikakpagavin talimanik, aahin tamna angun naiyulektan tayya katiyyutigingitagaluagan naguyumik. Ilaa itkumayumik ukakkutin.” 19Angnam ukallautiyaa “Ilaa nalautaiyiugavin ilingnik ilitakhiyunga. 20Uvagut hivullivut taikani manilgumi angayyuvaktun ilipfili ukainakaluaktuhi Jerusalemi kihiani inuit angayyuyukhauyugaluit.” 21Jesusim ukallautiyaa, “Angnak ukpeginga ilaani angayyuyunaitgaluaktuhi Angutipfingnun pikani manilgumilunin, Jerusalemilunin. 22Ilipfi angayyuningnaktuhi naunaktumik, uvagulli angayyuvigiyakkut naunaituk, annautikhak kaitauman Jewmiunin. 23Ilaanili tayyalunin, inuit angayyuyuktun Angutikput angayyuviginiaktaat ilumuktumik anengnimiglu, Angutipta angayyukumagit inuit taimatun. 24God Anengniuyuk, inuillu angayyuyumagumik tapfumunga angayyuvigiyakhagiyaat anengnimik ilumuktumiglu.” 25Angnam ukallautiyaa, “Tamna Messiah (Christmik taiyauyuk) kailengman ilihimayunga. Tikitkumi tapfuma takupkaihunguyuk tamainik uvaptingnun.” 26Jesusim ukallautiyaa, “Uvanga ukagvigilektagin tamnauyunga.”

27Tapfumani Jesusim maligutait utektun kuglukpiakhutiglu tapfuma angnak ukagvigilengmagu, ukangngitugaluit, “Humik piyumavin?” imaalunin, “Hug ukagvigilekiuk angnak?” 28Aahin angnam imektautini kemakhugu angilgaktuk iglukagvigmun inuit ukautivlugit, 29“Kaigiagitti takuyaktughiuk inuk uvamnun pivaktatka ukautigimagit. Christiuva tamna?” 30Tapkualu iglukagvigmin avungaktun tikittumavlugu.

31Talvalu maligutaita Jesus negikuyaat akhun, ukakhutik, “Rabbi negiyumaaktutin” 32Tapfuma ukautiyain, “Ilaa nekihagliuyungali naluyapfingnik.” 33Maligutait ingmingnik ukakatigiktun, “Inum uma nekhautain agyaktain?” 34Jesusim ukallautiyain, “Tiliyima ihumangit maligupkit, pitkuyainiglu havaguma tapkua uvamnun nekihaptun-iliyun ilaa.

35“Ukaktailuhi, tatkekhiutit hitaman nungutpata katihivik tikingniaktuk'? Ukautigipfi uititti nauttivit inilengmata tayya katihivingmun. 36Tayya ilaa katihiyi akiliuhialektuk katihivluni inuhengmun nungulaitumun, nauttiyekhiyi katihiyilu kuviahukatigikuvlugik. 37Ukaktauyuk imaatun ilumuktuk 'Aipa nauttiyekhiyuk, aipangali katihiyugaluak'. 38Uvanga pitkuyapfi katihikuvluhi tapkuninga havangngitapfingnik, allat ilaa havakpaktun tapkualu havagingnin ikayuhiakaluaktuhi.”

39Tapfumanilu Samariamiut amihut iglukagvimiitun Jesusmun ukpektun angnam uniuyyiman ukakhuni, “Tapfuma uvanga pivaktatka tamaita ukautigiyain”. 40Samariamiullu tikinamitku Jesus uvlikuyaat ingmingni, talva uvliyuk tapkunani malgunik. 41Allatauk ukpektun ukauhiagun Jesusim, 42angnak ukautivlugu, “Tayya ilvin uniutigaptigut tapfumuna ukpegunaektugut ukpekaluaktugut tayya uvaptingnik tuhaagaptigu ilihimavlugu ilumun tamna annauyyiuman inungnun.

Jesusim naguhipkaktaa atangum Galileemiitum anguyaktingata engniga

43Uvluglu malguk nungumanik Jesus aullangmiyuk Galileemun, 44inmi ukainagami nalautaiyiguk kinalika maliktaungituk nunaminiitillugu. 45Talva Jesus Galileemun tikinman, Galileemiut kuviahutigiyaat, havaangit pivaktain Jerusalemi kangiutivinguktillugu, tapkuatauk takanani Kangiutivikakpakamik.

46Aahintauk Jesus tikimiyuk Canamun Galileemiitumun, takanani imiinak wainguktitain hivungani. Takananilu atangum inua ituk, tapfuma engniga aaniakpiaktuk. 47Tamnalu inuk tuhaagami, Jesus tikihimangman Galileemun Judeamin, upangniktuk tapfumunga kaitkuvlugu naguhipkakuvlugulu engniga tukuyukilengman tamna. 48Talva Jesusim ukallautiyaa, “Naunaikutaanik, aglengnaktuniglu takungitkupfi ukpegunaituhi.” 49Atangum inuata ukallautiyaa, “Atanek, kaigiagin engniga tukunakhavuk.” 50Jesusim ukautiyaa, “Aigiagin engnin inuhimangniaktuk.” Taima Jesusim ukautimani, inuk ukpegluaktuk angilgakhuni. 51Angilaktillugulu kivgaita upaktaat ukallautivlugulu inuhuktuk tukuyunainman. 52Tapfuma apegiyain kanga engniga naguhilektilakhaanik. Kiuyaat, “Ikpakhak, uvluk kitkaniitillugu 1mungaktumi aaniagutaata kimaktaa.” 53Inuhuktum angutaa talva ilihimayuk engniga naguhivaktuk atauhektun Jesus ukaktillugu, “Engnin inuhimangniaktuk”, talva inmi, iglumiukataillu ukpektun.

54Taima Jesus havakfaamiyuk naunaikutamik tikihimaktillugu Galileemun Judeamin.

Currently Selected:

John 4: Sperry

Highlight

Copy