Havaangit 4

NAKATA 4

Peter Johnlu kaitkuyauyuk katimayunun

1Inungnun ukaktillugit, angayyuvikpagyuakut, angayyuvikpagyuam amekhiyit ataningallu, Sadducekullu tikittain, 2ihumalukpiakhutik tapkua ilihautimatigit inuit ukautigivlugu tukungayun makiyyutangat Jesuskun. 3Tapkua tigugamitigik piyait unulektillugu. 4Tapkuali amihut tuhagamitigit ukauhit ukpektun, 5000guktun tapkua.

5Akaguguman ataningit inuin, atanekpaillu, tiitigaktillu Jerusalemi katimayun, 6ilagivlugit Annas, angayyuvikpagyuakut ataninga, Caiaphaslu, Johnlu, Alexanderlu tapkuatauk allat ilagiyauhimayun tapkununga. 7Talva tapkua Peter Johnlu nangektitain akungani apekhukhugik, “Kia pitkupatik imailiukuvlutik, kia atiagun pivaktakhi tamna?” 8Talva Peter, ilumektauvluni Anengnimik Naguyumik, tapkununga ukallaktuk, “Inuin ataningit, atanekpaillu, 9uvlumi aaniakhimayuk naguhipkaktauman apekhuktaulegamnuk, 10ilipfi Israelmiut tamangmik tuhaalit, piyauman Jesus Christim Nazarethmiutam atiagun. Tamna ilipfi kikiaktutkpagakhi, Godimli makiktimagu tukungauyumin una inuk hapfingni nangektuk naguyumik. 11Uyagaktun tamna, ilipfili igluliukaluaktilluhi nagugingitpiaktakhi, igluhamli kiglingani iliyauyugaluak. 12Aahin allakun annautikhaitpiaktuk, atikagngitpiaktugullu inungni allamik; tapfumalu atiagun annauyyauyukhauyugut.”

13Tapkualu tautukamigitik Peter Johnlu kamahungngimanik hikulhimaitgaluaktillugik ilihauyititun, kuglukpiaktun ilitagivlugik Jesusmiitpagmanik. 14Aahin tapkununga kangutilimaitpiaktun takugamitku inuk naguhipkaktauhimayuk nangekataulegman tapkunani. 15Talva pitkuyait anikuvlugik ingmingnik katimayun ukakatigikuvlugit, 16ukakhutik, “Huliniakkita ukununga? Ilaa ukununa naunaikutak hapengnakpiaktuk tautugnakpiaktuk Jerusalemiunun tamainun; tamna ikutigilimaitakkut uvagut. 17Kihimi inuit tuhaavallaakunagit tapfuminga uvagut akhun pitaililaptigik ukakfaakunagik tapfuma atiagun.” 18Talva kaitkugamigik pitkuyait akhun ukakunagik ilihauyyikunagillu Jesusim atiagun.

19Peterm Johnimlu kiuyain, “Nalliak nagutkiyaumangan tuhaagumnuk ilipfingnun, Godmunlunin; ilipfi ihumayukhaugaluaktuhi. 20Uvagugli takuyaptingnik, tuhaayaptingniglu uniuyyiyumaaktuguk nipliyuilimainamnuk.” 21Talva katimayun akhun pitailigamitigik anititait. Anullakhaaktingitagaluagait inuit kuyagimayyuk God tapfumuna. 22Inuk tamna naguhivaktuk naunaikutagun, ukiukangman 40nik.

Peter Johnlu utektuk ilannaminun

23Tapkuaglu anititaukaktillugik ilannaminun utektuk uniutivlugit tamanik angayyuvikpagyuakut ataningita, atanekpaitalu ukagvigivagmatigik. 24Tapkualu tapkuninga tuhaagamik kengakatigiktun tuhaanaktumik Godmun ukakhutik, “Atanek, ilvit kilangmik, nunamiglu, tagiugmiglu tapkua iluaniitunik hanavaktutin. 25Anengnikun Naguyukun ukakpaktutin kivgangnun Davidmun,

'Hug Jewmiungitun mamiahukpiaktun,

inuit ihumaliukpakpat hungitunik?

26Nunaum ataningit kaiyauyun, atanekpaillu katimalektun hugiyukuvlugit Atanengmun Christingaanullu.'

27Ilumun Herod, Pontius Pilatelu, Jewmiungitullu, Israelmiullu hamani iglukagvingmi katimavaktun hugiyukuvlugu kivgan naguyuk Jesus, pilluakpagan. 28Tapkua katimavaktun taimaliukuvlugit ilvit pipkagapkit ihumaliugavin taimatun. 29Tayyalu, Atanek, nalaugupkin ukauhiit, ekhinaktun ikayukit kivgatin ukauhingnik uvagut uniuyyikuvluta kanguhukhimaitumik, 30ilvit naguhipkaitillutin naunaikutanik hapengnaktinuglu havaktautillugit kivgakpit naguyum Jesusim atiagun.” 31Talva kengagmata, iglu katimavigiyangat ingutakpiaktuk, tamangmiglu ilumektauyun Anengnimik Naguyumik; tapkuatauk Godim ukauhiit ukautigilektain kanguhukhimaitumik.

Ukpekatigiktun piyutain pinagialgit

32Talva ukpekatigiktun tamangmik katimayun atauhektun-ilivaktun umatimingni ihumakatigikpakhutik; tapkua nanminigiyain nanminigiyakhainik taiyuitugaluit tamaiyatik avittugit tunipkaikuvlugit allanun. 33Apostlellu talvangaanin naunaektaat Jesus Christim makiyyutaa hakugiktumik, ikayuktauvlutik akhun Godmin tamangmik. 34Ilaa tapkunani tamangmik naamainaktun munagiyauvlutik iglulgit, nauttivilgillu pikutitik niuvgutigimatigik maninikhutik. 35Aahin manit tuniyaumata apostlenun, tapkua tunipkaiyun tapkuninga tamainun aiyukalekkata.

36Talva inuk, atikaktuk Jospehmik, Barnabasmik apostlet attiktagaluangat atik tapfuma itkumayyuta imaatun – “Ikayuktiuyum engninganik”. Levitiuyuk tamna Cyriotmiunin kaithimayuk, 37nauttivikakagamilu niuvgutigiyaa tunivlugit apostlet maninik.

Currently Selected:

Havaangit 4: Sperry

Highlight

Copy