Havaangit 3

NAKATA 3

Tukhiakti niuluktuk naguhipkaktauyuk

1Peter Johnlu angayyuvikpagyuamungaulektuk angayyunakhilegman uvlailgulmi 3mungaktillugu. 2Tapfumani inuk niulukhimayuk nutagauneminin tigumiaktaulektuk. Uvluk taman tugumiaktun ilingnakpiaktaat tamna angayyuvikpagyuam ukuangata, taiyauyum Pinektumik, tunganun, tukhiakuvlugu atugiaktuktunin itektillugit angayyuvikpagyuamun. 3Niuluktum Peter Johnlu itegalualegmanik angayyuvikpagyuamun takugamigik tukhiagvigiyaik manimik. 4Tamangmik tamna iigigamikku Johnlu Peterm ukallautiyaa, “Tautuglain uvaptingnun.” 5Talva iigiyaik aituhiagnahugivluni tapkunanga. 6Peter ukaktugaluak, “Silvanik goldniglunin pikangngitpiaktunga, tamnali pihimayaga aitutiginiagiga ilingnun; Jesus Christin Nazarethmiutam atiagun, pihugin!” 7Peterm talekpiagun tigugamiuk nangektitaa. Tayyainak itigaik hingnegningillu naguhiyun. 8Makinami nangekpiaktuk pihukhuni itikatigikhugik angayyuvikpagyuamun, pihukhuni, mihitakhunilu God kuyagivlugu. 9Tamna pihuktillugu kuyagitillugulu God, inuit tamangmik tautuktaat, 10tamna ilitagivlugu tukhiakpangman angayyuvikpagyuam ukuangata taiyauyum Pinektumik tungani; aahin ikayuktauman agligutakpiaktun kuglukpiakhutik.

Peter ukauyyiyuk angayyuvikpagyuamiitillugu

11Talva angutim Peter Johnlu tigutillugik, inuit tamangmik Solomonim tukhuaniitun upaktait akpakatigikhutik. 12Peterm tamna takugamiuk inuit ukallautiyain, “Israelmiuyuhi, hug una agligutautigivihiuk? Hug iigilekpitigut, uvaguk pihuktigaptigu tamna hakugigniptigun ukpegniptigunlunin Godmun? Uvagaungitpiaktuk; 13umuna Abraham, Isaacimlu Jacobimlu hivulliptalu Godingata kivgani Jesus naunaekpaga alianaktumik, ilipfili tunivagaluakhi piyumangitkuvlugulu Pilatemun, tamna anititumagaluaktillugu. 14Ilipfili piyumangngitpiaktakhi inuk ilumukpiaktuk nagutpiakhuni, inuakhimayuk piyumagapfiuk ilipfingnun. 15Tamna inugutikaktuk ilipfi inuktagiyakhi, Godimli tukungayunin makiktitagaluanga, tapfumingalu uvagut ilihimayiuyugut. 16Ilaa tapfuma atia, ukpengneglu atianun naguhipkaiyuk inugmik uminga, ilihimayuhi tautukhugulu, ukpegnillu Jesuskun inuk tamna naguhipkakpagaa tautukapfi.

17“Tayya, katangutitka, ilihimagaluaktunga taimaliukpaktuhi nalulektilluhi, atanihitauk pivangmata. 18Taimatun, Godim ukakhimayain nalautaiyitigun tapkununa hivungani ilumukpaktun, Christinga naglihaktitauyukhauman. 19Talva ihumaliukigitti Godmun utegluhi huinekutihi piiyakuvlugit. 20Ikayuktikhakhi kaitaukuvlugu Atanengmin, taima tilikuvlugulu Jesus Christiuyuk pilluakhimayuk, 21kilaum piyakhagiyagaluangali tamaita inektinagit, Godim tapkua ukautigihimayain kangagaaluk nalautaiyitigun naguyukun. 22Moses ukaktuk, 'Atanipfi Godipfi katangutipfingnin pilluakhunguyaa nalautaiyi uvaptun. Tamna ukagagan tuhaaniaktakhi. 23Inuilli nalautaiyi tamna tuhaangitkumitku tapkua nungutitauhunguyugaluit inungnin.' 24Nalautaiyillu tamangmik, Samuel inukaktillugu talvangaanin ukakhimavaktuk ukautigivagain hapkua uvlut. 25Nalautaiyit ilaa ilipfi kitungagiyaahi, Godlu ukagiyakhimagami hivullipfingnun Abrahapkun imaatun, 'Kingullingnin inuit nunamiitun tamangmik naguguktitauhunguyun', ukagiyaktuktauk ilipfingnun. 26Hivullengmik ilipfi pivluhi Godim kivgani makiktitpagaa tilivlugu naguguktikuvluhi utektiluhi huinekutipfingnin.”

Currently Selected:

Havaangit 3: Sperry

Highlight

Copy