Luk 8

Kyi vətsenvə dzɨ̀mtə̀ Yesò

1Fa bàm a tsu Yesò sə jèʼè shə̀ʼtə̀ ntɨm jùŋ byìʼì soʼ fòyn Nyìngòŋ a ntə̀ʼ sə ghoʼkə sə nə̀ sə tyetəsə. A ndiʼ alì ndzɨ̀mtə̀sə bàm wen shì njʉ̀sə̀ bò diʼ wenə vəwenə, 2boʼsə nə̀ kyi vətsenvə vyi a ghə̀ ndzɨ̀mə̀ zhwì byɨvə fà vəwenə təwèn. A ndiʼ Mèli wu Magdala yì a Yesò nlù dzɨ̀m zhwì byɨvə la sòmbo a və nku ngəʼ à wen. 3A ndiʼ Jowanà, wì wù shyèʼ Helòd yì a və ndzàŋ nə̀ Chuzà, nə̀ Sùsana bènə̀ kyi vətsenvə no və ghoʼo. Vəwenə ngyàmtə̀ tuʼmə nə̀ Yesò wen ndzɨ̀mtə̀sə bàm wen.

Ngàyn kùmə̀ tì sɨm

(Mat 13.1-9; Mak 4.1-9)

4Viʼi sə fʉ̀ vì fa ntə̀ʼ a ntə̀ʼ, nòyn vi no ghoʼo. Yesò mù mò ngàyn ghèn a vəwenə la:

5“Wùtsen nlù fʉ̀ əmoʼ ngwaʼ wen ə sə moʼò, ghətsen fəŋkə a kəghʉ̀ kə ji ando ghə̀ nchò fa sɨm, viʼi tuʼlə, mənyin be vì tsɨbtə ə pfiʼ no tsèm. 6Ghətsen nfəŋkə a təwu, ə fʉ̀, alì bwènsə̀ zɨm byìʼàndo nse zhʉtə nko diʼ. 7Ghətsen nfəŋkə a toʼ kəzòyn, ghə̀ fʉ̀ wenə̀ kəzòyn tò ghayn mùʼ. Kəzòyn kə taʼsə. 8Ghətsen nfəŋkə a nse jùŋ, ə̀ fʉ̀ ə kuʼ ə fosə ə bi, və sə fʉ̀ pfì. No kətʉ kə asaŋ kə kò sə ku ashɨ asaŋ, ghə̀ ghoʼo zaʼa a ghɨ.”

Yesò gàʼ alì ə be mù gàʼ no a gɨ̀ to la, “No məndo a ghə̀ tofə, ghə̀ tùʼù zhʉtə.”

Kwòʼtə kùmə̀ ngàynsə

(Mat 13.10-17; Mak 4.10-12)

9Ndzɨ̀mtə̀sə bàm Yesò mù sə bèmə̀ a wen la, “Ngàyn a ghèn ə ku kwòʼtə̀ la ghò lo?” 10Yesò bwènsə̀ la, “Nyìngòŋ kuli tof à ghə̀ŋ la ghə̀ŋ nzhʉ be kɨ nyʉ̀ lyomtəvə vyi a və diʼì kùmə̀ soʼ fòyn Nyìngòŋ, alì a viʼi vətsen və, mà gàʼà tò ngàynsə ndi vəwenə nki shi alì kò vəwenə lə yenə kəfo, bè zhʉ nyʉ̀ kò vəwenə lə kɨ la və gàʼà la ghò lo.

Yesò gàʼ laynsə ngàyn kùmə̀ tì sɨm

(Mat 13.18-23; Mak 4.13-20)

11“Kènkə diʼ kənyʉ̀ a ngàyn ghèn ziʼì. Ngwaʼ ayì diʼ tò nə̀ kənyʉ̀ kə Nyìngòŋ. 12Ngwàʼ yì a ghə̀ nfəŋkə a ji diʼ tò nə̀ viʼi vyi a və zhʉ kənyʉ̀ kə Nyìngòŋ, Deblə̀ vì shisə fà vəwenə tətyɨm la kə vəwenə byɨmə ə bwòŋ. 13Ayi a ghə̀ nfəŋkə a təghu diʼ tò nə̀ viʼi vyi a və zhʉ kənyʉ̀ akì, və zaŋsə byɨmə tò a fəshitə̀ fə zhʉ alə̀, mwòmsə vi, vəwenə nfɨŋ tò fa zhʉ. 14Sətsensə shì a sə nfəŋkə a kəzòyn diʼ tò nə̀ viʼi vyi a və zhʉ kənyʉ̀ akì, sə tsitə tò alə̀, ashɨ vəwenə boʼtə, vəwenə sə kəŋ ghoʼ, nyɨŋ fa bàmə fo nse, nyʉ̀ kaynə və taʼsə la kə vəwenə tɨmə a vəwenə tyì byɨmə. 15Sətsensə shì a sə nfəŋkə a nse jùŋ diʼ tò nə̀ viʼi vyi a və zhʉ kənyʉ̀ kə Nyìngòŋ, ə ghaʼ no nəmwèʼè nə̀ tətyɨm tə jùŋtə, sə mwòmsə̀ əzaʼa fa zhʉ a ghə̀ a kumə ashɨ a vəwenə ntsìnə̀sə.

Əbayn ati nkyè

(Mak 4.21-25)

16“Wìʼ ko zì ghə̀ dyàyn kənkàʼtə̀ ə chiʼtə nə̀ kəfo kò tom a ti kwen, alì ghə̀ diʼi dyàyn ə tom a kəshi kə ŋaŋtəkə ndi no məndo a ghə̀ kwenə n-yenə bayn yi.

17“No ghò a və sətsèn nlyòmtə̀, və lù kəŋ ə vì nə̀ wen a ndayn, a nlyòmtə̀ tè kənyʉ̀ kə kò, kò kə lə faŋ ke fʉ̀ a ndayn.

18“Ghə̀ŋ tùʼmə̀ li nə̀ jì a ghə̀ŋ zhʉtə fa tsu byìʼì no məndo, a ghə̀ kiʼi, və a ku kwùʼsə̀ a wen, no məndo, a ghə̀ ko kiʼ və a shi tè kətyetə kyì a ghə̀ kwòʼtə̀ la ghə̀ kiʼi.”

Lì Yesò wen nə̀ və lèmə və wen vì a wen

(Mat 12.46-50; Mak 3.31-35)

19Tò a zhʉ ayì, lì Yesò wenə̀ vəlèmə və wen vì əyen wen. Jì nko ndiʼ byìʼì nòyn viʼi a və ndiʼ tsu. 20Wutsen shə̀ʼtə̀ a wen la, “Lì wu wenə vəlèmə vyə ti a kəbəŋ kəŋ əyen wù.”

21Yesò gàʼ à vəwenə la, “Lì ghom bènə̀ vəlèmə vwomə diʼ viʼi a və zhʉ kənyʉ̀ kə Nyìngòŋ, nè ando ghə̀ gàʼà.”

Yesò kàyntə̀ nyʉ̀ à fwofə ghə̀ tyinə

(Mat 8.23-27; Mak 4.35-41)

22A sə ndìʼ kətsi kətsen kə, Yesò kwen a nkanuʼ wenə ndzɨ̀mtə̀sə bàm wen ə gàʼ à vəwenə la, “Vəghəŋ dyàŋ dyʉ̀ a ndzèn mo tsen yì.” Vəwenə lù mù sə dyʉ̀. 23Ando vəwenə ndyaŋə̀ dyʉ̀, Yesò sə bʉnə. Fwof toghə zìtə̀ sə chò, mu sə nə̀ʼə̀, bè mù kwen a tyì nkanuʼ yì. Nkanuʼ ayì mù sə kəŋ shwemə. 24Vəwenə dyʉ̀ ə zhòmə wen gàʼà la, “Tìʼ, Tìʼ, lu, yès dìʼ a mə pfʉ!”

Ghə̀ lù ə kənkə fwof bènə̀ mu a myì, ghə̀ tyinə ə shi chɨmə la moŋ. 25Yesò mù bèm à vəwenə la, “Byìʼì ghò a ghə̀ŋ ko kiʼi byɨmə a?”

Vəwenə mù sə dìʼ nə̀ kàynə bè fàynə, sə bèmə à vəwenə a ntìntìn la, “Ghèn lè diʼ no ndò lo? Ghə̀ kənkə fwof nə̀ mu, və zhʉ wen a?”

Yesò dzɨ̀mə̀ zhwì byɨvə

(Mat 8.28-34; Mak 5.1-20)

26Fa bàm a tsu, Yesò wen ndzɨ̀mtə̀sə bàm wen dyàŋ dyʉ̀ a loʼ Gelasenes ghə̀ diʼi a dyàŋsə Galìlì. 27Yesò ne sə fʉ̀ vì a mbyɨ̀ àmù ə bùmtə̀ wen nə̀ wìʼ mu ghə̀ lù fa ntə̀ʼ tsen tsu. Wìʼ ayì kiʼ zhwì byɨvə mu və ntsi li no kəghaf, kò ghə̀ mòʼ kəfo a wenə a wèn kènla ghə̀ tsi a ngə̀ŋ, tsi tò a mbvɨməsə. 28Ando ghə̀ n-yenə Yesò ghə̀ ku nkəʼ dì ə fəŋ a wen ashɨ ə zɨmə no gɨ to gàʼà la, “Wù kəŋ ghò fa mò a Yesò, Wàyn Nyìngòŋ ghoʼo? Mà sensə̀ wù la kə wù a ku ngəʼ à mò.” 29Ghə̀ ngàʼa alì byìʼàndo Yesò sə nkəŋkə kəzhwì kəbyɨkə kyì la kə fʉ̀ fa wenə a wèn. Kəzhwì akyì nku ngəʼ a wen tò mənzhʉ̀ a mənzhʉ̀. No a zhʉ̀ kò a kə nku ngəʼ à wen, və ghaʼ kwìʼ akwoŋ wen bènə̀ afwen wen nə̀ mpfɨŋsə ə ghʉ wen a kəshi. Və nè ghʉ alì, ghə̀ tyintə mpfɨŋsə ashì tò tyintə, kəzhwì kə byɨkə akyì lyɨ̀ wen ə dyʉ̀ nə̀ wen a nse zɨm.

30Yesò mù bèm à wìʼ ayì la, “Zhiʼi wu diʼ ndo?”

Ghə̀ bwènsə̀ la, “Zhiʼi ghomə diʼ ‘Tənòyn’,” byìʼàndo zhwì byɨvə ndiʼ mu və kwenli a wen a wèn no ghoʼo. 31Zhwì byɨvə a vyi sensə Yesò la kə ghə̀ à dzɨ̀mə̀ shìsə̀ vəwenə ə nè la vəwenə tsoʼkə a tyì nkwòŋ a ghə̀ shwemə shiʼi.

32A ndiʼ alì nòyn və ankwʉnyàm ghoʼo tsen ghə̀ zhɨ a we pfen. Zhwì byɨvə a vyi sensə Yesò la ghə̀ ghʉsə vəwenə dyʉ̀ kwen a təwèn və ankwʉnyàm a vyi. Yesò mù ghʉsə. 33Zhwì byɨvə a vyi fʉ̀ fa wèn wìʼ ayì ə dyʉ̀ kwen a təwèn və ankwʉnyàm a vyi, vəwenə nyɨŋ shiʼi fa bàm ayì ə tsòʼkə a mù ə pfʉkə.

34Viʼi vyì a və nkiʼi və ankwʉnyàm a vyi ne yen kənyʉ̀ a ke ncho,vəwenə nyɨŋ pfwo dyʉ̀ shə̀ʼtə̀ soʼgho ayì a ntə̀ʼ be jèʼè shə̀ʼtə̀ a tyì loʼ no tsèm. 35Viʼi zhʉ alì ə fʉ̀ ədyʉ̀ yen kənyʉ̀ a ke nchò. Vəwenə vì yen Yesò bè yen wìʼ yì a zhwì byɨvə nfʉ fa wenə a wèn, ghə̀ ŋwʉʼ a wen ashɨ, mu ghə̀ moʼli ndisə bè dìʼ a wenə tof. Viʼi a vyì yen alì sə diʼ nə̀ fàynə. 36Viʼi a və n-yenə kənyʉ̀ kyì ando kə yì nchò, shə̀ʼtə̀ a vəwenə ando və chʉʼ wìʼ ayì. 37Viʼi və tsèm a mbyɨ̀ loʼ Gelasenes gàʼ à Yesò la ghə̀ lu fa vəwenə a ntìntìn byìʼàndo vəwenə fàynə no nànto. Yesò kwen a nkanuʼ mù sə kəŋ lù. 38Wìʼ yì a zhwì byɨvə yì fʉ̀ fa wenə a wèn dyʉ̀ sensə Yesò ədyʉ̀ wenə wen.

Alì Yesò tensə ə gàʼ à wen la, 39“Bwènə̀ pfwo ə shə̀ʼtə̀ nyʉ̀ vyi a Nyìngòŋ nèli a wù.”

Wìʼ ayì lù pfwo sə jèʼè kaʼa a ntə̀ʼ sətsèm, shə̀ʼtə̀ kənyʉ̀ kyì a Yesò nèli à wen.

Yesò chʉʼ wùwì ə be lùsə wàyn Jailùs fa pfʉ

(Mat 9.18-26; Mak 5.21-43)

40Ando Yesò bwènə̀ dyàŋ a shə̀ lò yì a ghə̀ nlu fa tsu, nòyn viʼi shisə wen byìʼàndo vəwenə sə nkə̀ʼtə̀ wen. 41Wulɨm tsen, a ndiʼì kətʉ kə ngə̀ŋ ntsèntə̀, zhiʼ wen diʼ Jailùs, vì fəŋ ashɨ Yesò ə sensə wen la ghə̀ vì à wen a ngə̀ŋ, 42byìʼàndo ghə̀ nkiʼ wàyn wùwì wen tò mùʼ, ghə̀ diʼ ngwʉ̀ʼsə njʉ̀sə̀bò, mu ghə̀ sə pfʉ.

Ando Yesò nlu sə dyʉ̀ wenə wen, nòyn viʼi sə fosə wen. 43A ndiʼ a ntìntìn nòyn ayì, wùwì tsen diʼ tsu, a ghə̀ nlaʼtə tò alə̀ yenə zhʉ wen, kwaʼa ayì ndiʼ mu ghə̀ tsili a wenə a wèn a ngwʉ̀ʼsə njʉ̀sə̀bò, kènla no wù kəfʉ̀ muʼ diʼ a ghə̀ zì ghə̀ chʉʼ wen, ghə̀ to. 44Wùwì a ghèn fosə dyʉ̀ jì fa bàm Yesò ə kùmsə̀ su ndisə wen, no a zhʉ kò, zhʉ wen yì tyinə la kəŋ. 45Yesò bèm la, “A kùm ndo mò a?”

No məndo sə tensə la yì ko kùm. Bità mù gàʼ a wen la, “Tìʼ, gaʼa ko viʼi kaʼli wù sə zəʼtə̀ wù?”

46Alì Yesò gàʼ la, “Wìʼ kùmsə̀li mò byìʼàndo ma zhʉli la kədyòʼ kə fʉ̀li fa mò a wen.” 47Wùwì a ghèn yen la və kɨli la a kùmsə̀ yì, ghə̀ fʉ̀ tsəŋtə vì fəŋ ashɨ Yesò ə shə̀ʼtə̀ kənyʉ̀ kì a kə yì nè la ghə̀ kùmsə̀ Yesò. Viʼi vətsèm zhʉ. Ghə̀ be gàʼ la yì kùmsə̀ wen no a zhʉ kò ə nto tò fa zhʉ. 48Yesò mù gàʼ à wen la, “Wàyn ghom, byɨmə wu nèli, wù nto. Pfwo tò nə̀ mbwaʼmə.”

49Ando Yesò mbu gàʼà, wìʼ vì mu ghə̀ lù fa ngə̀ŋ kətʉ kə ngə̀ŋ ntsèntə̀ kì ə gàʼ à wen la, “Wàyn wù yì pfʉ li kə be a ku ngəʼ à ndìʼsə̀.”

50Yesò zhʉ alì ə gàʼ à Jailùs la, “Kə a fàynə, ghaʼ tò byɨmə wu ndi ghə̀ to.”

51Yesò dyʉ̀ zaʼa a ngə̀ŋ ayì sə kwen tsu ə̀ kàyn la kə wìʼ à kwen a ngə̀ŋ əchò Bità nə̀ Joyn nə̀ Jems nə̀ tìʼ bènə̀ lì wàyn ayì. 52Viʼi və tsèm a və ndiʼ tsu nkusə nshinsə byìʼì wàyn a ghèn. Yesò gàʼ à vəwenə la, “Ghə̀ŋ chɨmə, kə ghə̀ŋ be dì. Ghə̀ ko pfʉ pfʉ, ghə̀ bʉnə bʉnə.”

53Vəwenə zhʉ mù sə chəʼə wen tò chəʼə, lyɨ̀ wen a kəndzɨ̀ŋtə̀, byìʼàndo vəwenə sə nkɨ la wàyn ayì pfʉli. 54Yesò mù kwen ə ghaʼ kəvu kə wen ə gàʼ no a gɨ̀ to la, “Wàyn, lu!” 55Kəzhwì kə wen ke bwènə̀ vì tò a zhʉ ayì, ghə̀ lù, Yesò gàʼ la və kəŋ kəfo ə ku ghə̀ zhɨ. 56Tìʼ wàyn ayì wenə lì wen sə diʼ nə̀ kàynə, alì Yesò tensə la kə vəwenə à shə̀ʼtə̀ kənyʉ̀ a kə yì chò à wìʼ.

Currently Selected:

Luk 8: bbkDBLnt

Highlight

Copy