Luk 23

Və vì nə̀ Yesò a shɨ Bilate

1Ntsèntə̀ viʼi nsoʼ vyi no vətsèm lù ə lyɨ̀ Yesò ə dyʉ̀ nə̀ wen a shɨ Bilate, 2mù zìtə̀ sə̀ zuʼu nyʉ̀ a wen a wèn gaʼa la “Yes tə̀ ghaʼ wìʼ ghèn ghə̀ dìʼsə̀ jì byɨ a viʼi vəghəŋ, tensə la kə vəwenə a loʼ kənsè a fòyn ghoʼo a Lum. Ghə̀ be gaʼà la ghə̀ diʼ Klistò a diʼ fòyn tsen.” 3Bilate mù bèm a wen la “wu bè diʼ fòyn viʼi Islel?” Yesò bwènsə̀ gaʼa wen la “A gàʼ wu alì” 4Bilate mù gaʼa tʉtʉ vəpfèm və Nyìngòŋ vyi bènə̀ nòynə ayi la ma ko yèn kənyʉ̀ kəbyɨkə wìʼ ghèn. 5Vəwenə bè sə̀mtə̀ gàʼ tò gàʼ la “Ghə̀ bosə viʼi la və dyʉ̀ a jì byɨ, a loʼ Judiyà no vətsèm, ghə̀ tə̀ zìtə̀ fa ntə̀ʼ Galìlì, luwèn ghə̀ sə̀ diʼ a shə̀.”

Və vì nə̀ Yesò a shɨ Elod

6Ando Bilate nzhʉ gàʼ ghenə, ghə̀ mù bèm əkɨ la Yesò nlu fa loʼ Galìlì lo? 7Ghə̀ nè zhʉ la ghə̀ lu fa shyə a Elod soʼo, ghə̀ bwènsə̀ tɨm Yesò a Elod a ghə̀ ndiʼi a loʼ Jelusalèm a zhʉ a ghèn. 8A ndiʼ a zhʉ a Elod n-yenə Yesò, ghə̀ ndiʼ nə̀ saŋlə ghoʼo ghə̀ byiʼè ghə̀ lutə̀ sù kəŋ ə yenə wen byìʼe ndo ghə̀ nzhʉli byìʼì wen mù ghʉ la yi lu yèn wen, ghə̀ nè nyʉ̀ kaynə və yì yen. 9Elod mù bèmtə̀ tʉ nyʉ̀ no ghoʼo a Yesò, ali kò ghə̀ lə̀ bwènsə̀ kənyʉ̀. 10Tʉtʉ vəpfèm və Nyìngòŋ bènə̀ ndìʼsə̀sə təsoʼ Nyìngòŋ a və nti a kəshi ayì sə̀ sə̀mtə̀ zuʼu nyʉ̀ a wèn Yesò. 11Elod wenə̀ ve sugyèʼ və wen sə̀ chəʼə wen be gaʼà nyʉ̀ zafə və a wen. Vəwenə mù moʼ dàlə a moʼo tò təfòyn a wen a wèn, bwènsə̀ təmə wen a Bilate. 12Əlù fa kətsi a ghèn, Elod wenə̀ Bilate sə̀ diʼ viʼi ndoŋsə byìʼe a ndiʼ a mbì vəwenə ndiʼ viʼi kəbàyn.

Və bè gìsə̀ vì nə̀ Yesò a shɨ Bilate

13Ando Yesò ə bwènə̀ vì, Bilate mù dzàŋ tʉtʉ vəpfèm və Nyìngòŋ nə̀ viʼi a və soʼo loʼ bènə̀ viʼi vətsen və, 14ə gàʼà vəwenə la “Ghə̀ŋ tə vì nə̀ wìʼ ghèn a mò gàʼà la ghə̀ diʼì jìsə byɨsə a viʼi. Ma soʼli wen a ghə̀ŋ ashɨ kò ma lə̀ yèn kənyʉ̀ kə̀ shwe kə wen a ntyìntyìn nyʉ̀ a ghə̀ŋ gaʼà byìʼì wen. 15Ndə̀ŋndəŋ ando Elod ko yi yèn bè mù bwènsə̀ təmə wen a vəghəŋ. Nkàyntə̀ ghə̀ŋ yènli la ghə̀ ko nè no kənyʉ̀ kətsenkə a kə diʼi la ghə̀ diʼ pfʉ. 16Ma li a gàʼa və ghòmə wen ə ghʉsə wen.” 17A ndiʼ ntsìnə̀ vəwenə la no məzaʼsə̀ ko Bilate diʼi shisə wu muʼ fa nfɨŋ a viʼi kòŋə̀. 18Ando ghə̀ gaʼà alì vəwenə zɨmə tò ntàŋ muʼ la zhwi wìʼ ghèn ə shisə Bàlabàs à yès. 19Bàlabàs ghèn ndiʼ wìʼ a zìtə̀ sòyn a loʼ zhwi wìʼ. 20Bilate bè gisə̀ gaʼa vəwenə, ando ghə̀ nkəŋ jì ə moʼtə̀ Yesò, 21ali vəwenə bè zɨmə la “Və bayntə wen, və bayntə wen a kəntò.” 22Bilate bè gìsə̀ gàʼ a ghan a taʼ à vəwen la byìʼì ghò, ma ko yèn kənyʉ̀ kəbyɨkə wen a kə diʼì la və diʼi zhwi wen byìʼì kəwenkə,ma diʼ gàʼ və ghòmə wen ə ghʉsə wen. 23Vəwenə sə̀ sə̀mtə̀ zɨmə tò zɨmə la və bayntə wen a kəntò. Fa bàm a tsu gə̀ vəwenə zhɨ. 24Bilate mù byɨmə la və bayntə Yesò ando viʼi venə nkəŋ. 25Ghə̀ mù shìsə̀ wìʼ yì a və we a nfɨŋ byìʼì mə sòyn bènə̀ mə zhwi ando vəwenə bèmə̀. Ghə̀ mù bè ku Yesò a vəwenə la vəwenə nè no ghò nə̀ wen a vəwenə nkəŋ.

Və bayntə Yesò a kəntò

26Vəwenə mù lyɨ̀ Yesò ə lù nə̀ wen, sə ndyʉ̀ a jì bwùmtə̀ wùtsen a və ndzàŋ wen nə̀ Simon a ndiʼi wù Silen. Ghə̀ lu fa tyì Loʼ sə̀ vì, vəwenə ghaʼa wen ə nè ghə̀ byèʼè kəntò kə Yesò sə̀ dyʉ̀ fa wen a bàm. 27Nòynə viʼi sə̀ dzɨ̀mtə̀ Yesò, a vəwenə à ntyìntyìn kyi vətsenvə ndiʼ tsu a və ndì bè kusə̀ shinsə a wen. 28Yesò fuʼtə̀ gàʼ a vəwenə la “kyi Jelusalèm kə ghə̀ŋ a dì byìʼì mò, alì ghə̀ŋ dì byìʼì ngə̀ŋ kətʉ ghə̀ŋ bènə̀ vunə vəŋə. 29Ghə̀ŋ zhʉtə̀ a! byìʼe ando mətsi mə sə̀ vì a viʼi a ne gàʼ la ‘mbwaʼmə diʼ a və də̀m bènə̀ a kyi a və ko bwi kò nyòŋsə̀ wàyn.’ 30A zhʉ ayì vəwenə ne ngàʼà pfèn sə la ‘Biymə a yes a kətʉ, bè gaʼà bàmsə la Chiʼ yes.’ 31Byìʼe a zhʉ a vəwenə zì və nè nkì nyʉ̀ vènə a mò a ma diʼi tò nə̀ fəkoʼ fəzhʉfə kə ne ndiʼ alə̀ à fəzɨmfə a?” 32A ndiʼ a zhʉ a və ndyʉ̀ nə̀ və bè ndyʉ̀ nə̀ viʼi vətsenvə vəbò a vəwenə kwaʼtə təsoʼ. 33Vəwenə nè dyʉ̀ ə zaʼa kəshi kətsenkə a və ndzàŋ nə̀ kəwuʼlə kə kətʉ ə bayntə wen bènə̀ viʼi kwaʼtə təsoʼ vyi tsu a kəntò və bayntə ghə̀ muʼ a kəntò à wenə̀ kwòŋ to ghə̀ nə̀ ghə̀ tsen a wen kwòŋ nàkwè. 34Yesò laʼtə̀ ə gàʼ la “Tìʼ! maʼa lè nyʉ̀ vəwenə byiʼè vəwenə ko kɨ kənyʉ̀ a vəwenə nè.” Vəwenə laʼtə mù zìtə̀ sə̀ tem baʼ ndì yèn wìʼ a ghə̀ a ghə̀ a zhɨ ndisə Yesò. 35Viʼi tɨmə sə̀ lyè, tʉtʉ vəwenə sə̀ telə wen gàʼà la “Ghə̀ tə bwòŋsə̀ viʼi vətsenvə ghə̀ bwòŋsə̀ li wenə wen luwèn a zhʉ a ghə̀ diʼ Klistò yì a Nyìngòŋ ntsuʼli” 36Və sugyèʼ bè sə̀ telə wen bè vì ku kəmbas kə məlyʉ̀ʼ a wen, 37“a zhʉ a wù diʼ fòyn viʼi loʼ Islel wù bwòŋsə wen wu.” 38Vəwenə bè nyòʼ Gàʼà tsen ghə̀ bayntə à wen a kətʉ kə kəntò la “Ghèn diʼ fòyn və Jus” 39Wìʼ muʼ fa ntyìntyìn viʼi vyi a və mbayntə wen Yesò sə̀ telə̀ wen gàʼà la “Gaʼa kò wù diʼ Klistò yì bwòŋsə̀ wenə wu ə̀ bè bwòŋsə̀ yes,” 40Ali ghə̀ tsen yì kənkə̀ wen ə bèm la “Wu bè ko fàyn Nyìngòŋ tə a zhʉ a wu pfʉ tò nə̀ wen? 41Yo wu nəmwèʼè byìʼì nyʉ̀ byɨvə a yo wu nèli, byiʼè ando yowù kiʼi lòʼ ə nyʉ̀ byɨvə a yowù nèli, alì wìʼ ghèn ko nè no kənyʉ̀ kə byɨkə kətsen.”

42Ghə̀ bè dyʉ̀ mbì əgàʼ la “Yesò kwòʼtə̀ mo a zhʉ a wù sə̀ soʼo fòyn wu.” 43Yesò bwènsə̀ gàʼ a wen la “Nəmwèʼè, nəmwèʼè, ma shə̀ʼtə̀ à wù la wù a ndiʼ yowù layn a kəshi kəbwòŋ Nyìngòŋ.”

Yesò Pfʉ̀

44A sə̀ ndiʼ a ntyìntyìn nə̀nchwì shi fen ə chiʼtə nse yì no tsèm əzaʼa fa kəlyɨŋ kə mbwaʼà kəbəŋ. 45Kə sə̀ ndiʼ alì chwìchwì lɨmə, ndisə ghoʼsə a və ngə̀tə̀ ngə̀ŋ tsu à ghan à bò bàymə̀ wàŋ bò. 46Yesò mù dì a gɨ to la “Tiʼi ghom! Mà weli kəzhwì kom à wù kəvu.” A ndiʼ a zhʉ a ghə̀ ngaʼà mwètə̀ ghə̀ pfʉ. 47A ndiʼ a zhʉ a kətʉ və sugyèʼ n-yenə kənyʉ̀ a kə nlyɨ̀ kəshi, ghə̀ ghoʼsə Nyìngòŋ ə gàʼ la “Nəmwèʼè, nəmwèʼè wìʼ ghèn nko kiʼi le nyʉ̀.”

48A ndiʼ a zhʉ a viʼi no vətsèm a və ntsentə̀ əyen kənyʉ̀ a kə a lyɨ̀ kəshi n-yenə nyʉ̀ venə̀, vəwenə sə̀ pfwo nə̀ kusə shinsə ghoʼo ghə̀. 49Viʼi ndoŋsə wen no vətsèm bènə̀ kyì a və ndzɨ̀mtə̀ wen fa Galìlì ntɨmə kəghaf ə yenə nyʉ̀ a venə no tsèm.

Və bvɨ̀mə̀ Yesò

50Wutsen ndiʼ a və ndzàŋ wen nə̀ Josèf a ghə̀ nlu fa ntə̀ʼ Alimàtya a loʼ və Jus. Ghə̀ ndiʼ wìʼ fa ntsèntə̀ tʉtʉ, a ghə̀ ndiʼ wùjuŋə bè diʼ wù kənyʉ̀ kə tɨmə kə. 51Ghə̀ nko byɨmə a kwòʼtə̀ bènə̀ kənyʉ̀ a vəwenə nè. Ghə̀ nkə̀ʼtə̀ soʼ fòyn Nyìngòŋ. 52Ghə̀ ndyʉ̀ a Bilate ə̀ bèm bvenə Yesò 53Bilate byɨmə ghə̀ mù shiʼsə bvenə Yesò lemtə nə̀ ndisə ə̀ nyòŋsə̀ a tyì sè tsen ghə̀ a və ntyuŋ a nguʼ. A ndiʼ sè a və ko ntɨmə̀ bvɨ̀mə̀ wìʼ tsu.

54A ndiʼ kətsi a tʉʼ ndiʼ layn à ndiʼ kətsi kəzhʉtə kə. 55Kyì vyi a ghə̀ nvì wen vəwenə fa Galìlì, dzɨ̀mtə̀ dyʉ̀ yèn sè ayì bè yèn ando və nyòŋsə̀ bvenə wen. 56Vəwenə mù bwènə̀ dyʉ̀ ə̀ shɨtə̀ njʉ̀sə̀ bènə̀ məzhiʼì əzuʼ a wèn Yesò.

A sə ndiʼ kətsi kəzhʉtəkə, vəwenə zhʉtə̀ ando soʼo ndiʼì.

Currently Selected:

Luk 23: bbkDBLnt

Highlight

Copy