Mak 15

Yudanɛ ma bɛgbani Yesu i manɔ ní Pilato klɔ ɔ

1Keletitia livlɛ lɛ fififĩ i, kusumu yo baka ba, Yudanɛ ma banɔtsitsi ba, ɔsã nɔ badɔbasɛ ba, ani Yudanɛ ma betsixwa Ʋidi ba pɔ́ bɛkpɛ likpɔ kise ise niteme si bɛtrɔ likla ní liboe tile aʋa. Bɛkpɛ Yesu bibɔ ʋɛ, lɛ bɛgbani yɛ ɛsɛnɔ; lɛ bɛkɔ yɛ ɛkpɛ awla ɛki Pilato e. 2Pilato eʋi ye si, “Wɔ wonu Yudanɛ ma okusi ye na a?” Yesu ebú le onu si, “Ee, kiliɛ gi wɔɛpani lɛ ɛ, nite lilɛ.”

3Kusumu yo baka ba bɛkɔ eboe glegle ní Yesu su u. 4Lɛ loso e, Pilato eʋi ye dzɛ si, “Wɔtrabu isu ya onu lò o. Dani wɔenu kiliɛ gi bɛɛtsa wɔ onu i?”

5Pɔ̀ Yesu ɔ́pani liboeboe, nite si litu Pilato kugyɔ ɔ.

Pilato atsa kutsépia akí Yesu

6Ní Kutseolidɔzawe kakaa aʋa ɛ, lize ligoʋi ki Pilato si ɔyurɔ ɔnɔ tole gi ɔlɛ ligba a, gi banima biaʋi i ɔki ba. 7Ni lipoe lɛ klɔ mɛ ɛ, onyime ɔtɔ gi bɛzɛxwa si Baraba ɛ, eze ní banɔatɔ gi bɛyɔ kedu u, xe beye banɔ ɔ, xe lɛ loso bɛkpɛ ba ligba ɛ, ba kusi. 8Linɔkpi le litsa lɛ banima beʋi idɔnɔ Pilato awla si ɔbitɛ kiliɛ gi izɛbitɛ ɛki ba a. 9Lɛ eʋi ba si, “Mlɛpɛ si miyurɔ Yudanɛ ma okusi ye ki mlɔ na a?” 10Etè mɔmɔmɔ si kusumu yo baka ba bɛkɔ Yesu ikpɛ yɛ awla kɔkpɛ gi bɛkɔ kaŋuzã ní Yesu su loso o.

11Pɔ̀ kusumu yo baka ba bɛfuɛ ɛkpɛ linɔkpi le me si, beʋi si, Pilato tɔ ɔyurɔ Baraba boŋu ɔki ba a. 12Lɛ Pilato eʋi linɔkpi le dzɛ si, “Kɔ ege mlɛpɛ si mibitɛ ni ɔniliɛ gi mlɛɛxwa si Yudanɛ ma okusi ye e?”

13Bɛkpɛ ozi lo si, “Ku ye ní ose lo su!”

14Lɛ Pilato eʋi dzɛ si, “Liboe zimizi woli abitɛ ɛ?”

Bɛkpɛ ozi lo gaglaa ɛsanɔ si, “Ku ye ní ose lo su!”

15Gi Pilato apɛ si yibitɛ ní linɔkpi le kupɛpɛɔ aʋa loso e, ayurɔ Baraba aki ba a. Aki si bekusi Yesu, lɛ akɔ yɛ akpɛ awla si bazekú ye ní ose lo su i.

Baguta ba bɛkpɛ Yesu kakpaa

16Baguta ba bɛgbani Yesu itsinɔ ní Roma banɛ ma ɔʋaŋaɛ yɛ kepea mɛ, lɛ bɛxwa baguta ba lihakpɔ gɔgɔ lɛ ɛkpɛ likpɔ ɛ. 17Bɛkɔ liwu kyíkyĩ ikpɛ ɛki yɛ, lɛ beyo bibu ʋe likusikuto ekume ɛki yɛ ɛ. 18Lɛ bekpese yɛ kukpɔ̀ si: “Yudanɛ ma Okusi Ʋidi ye e, oze ligbã gblamadza!” 19Bɛsa yɛ ose lo ní litukpo le; lɛ bebu sita sɛ ɛbali yɛ aʋa a; lɛ bedu aklamasi na kesea a, xe bɛkpɛ etukpo kesea ɛki yɛ ɛ. 20Agi bɛkpɛ yɛ kakpaa pɔ́ ɛ, bebu liwu kyíkyĩ nɛ ní yɛ su, lɛ bɛkɔ yɛ ɔtutɔ yɛ liwu le dzini kpɛ ɛki yɛ ɛ. Lɛ bɛgbani yɛ dono etsinɔ si beezeku ye ní ose lo su i.

Bekú Yesu ní ose lo su u

21Agi bɛzɛtrɛ ɛ, bɛtsani onyime ɔtɔ gi bɛzɛxwa si Simon i. Simon aga ádɔ ní kumami yɔ mɛ xe azɛatrɛ ní Yerusalem ɔma nɔ mɛ ɛ. Lɛ gi baguta ba bɛtsani yɛ ɛ, bemi yɛ aʋa si ɔzɛ Yesu yɛ ose lo kutu. Simon ɔtutɔ lɔ ádɔ ní Kirene; lɛ yɛ bebi ba beze Alɛksanda ni Rufus i. 22Bɛgbani Yesu itsinɔ ní ɔkutɔ gi bizɛxwa si Golgota ketokpaa aʋa a. Golgota lɛ ese linu si, “Litukpoxwa ozekɔ.” 23Lɛ bɛki yɛ wain gi bɛpisa ni kuwa tiitii kutɔ gi bizɛxwa si mire e, pɔ̀ Yesu ɔ́ŋwɛ yɛ ɛ. 24Lɛ bekú ye ní ose lo su xe bɛta exoeʋi la ɛki yɛ bidɔ kpɛkpɛ ʋɛ ɛ. Nite si bɛlɛ yɛ bidɔ mɛ ɛ. 25Lipoe lɛ gi bekú Yesu ní ose lo su i, lize livlɛ lɛ inyɔ ɔgɔtole. 26Lɛ kunutsatsaa liɔ klɔ gi bɛŋwlimi iku ní yɛ litukpo le onu i, kwipani si: “Yudanɛ ma Okusi Ʋidi ye.” 27Bekú beze tiaʋa kyɛ ní ise le su ipɔni Yesu; oze tole eze ní yɛ kaŋaa mɛ, lɛ ɔʋlaɛ eze ní yɛ kabaa mɛ ɛ. 28Liki si Aya liboe le liba lɛ mɛ si, “Beye ye ŋwisi eboe zimizi ɔbitɛbitɛ onu kinɛ na a!”

29Banama gi bɛzɛɛga ɛza ɛ, besugu ba etukpo la, lɛ bezeebu onugu me ní Yesu su si i, “Ɛhɛ̃ɛ! Aní wɔ wɔ si, wɔtrayaʋi Lisɔligba lɛ, tɔ wɔadzini le kuwa ní ewe tata mɛ ɛ? 30Ple ní ose lo su tɔ bu isu ya!”

31Niteme ke kusumu yo baka ba ni ɔsã nɔ badɔbasɛ ba fɛ bɛkpɛ Yesu kakpaa ní ba tsali kusi si, “Ebu banɔ dzedze ba, pɔ̀ ɔ́tani isu ya kubu u! 32Xegi yɛ onu Mesiya yɛ ɛ, gi onu Israel Okusi Ʋidi ye e, kɔlɔ ople ní ose lo su ablahate tɔ kwiazi yɛ aʋa ŋa a!”

Lɛ banɔ tiaʋa ba klɔ gi beku ní ise le su ipɔni Yesu kyɛ ɛ, bekpini ye e.

Yesu yɛ Kutseo

33Agi inyɔ liɔfɔ ni tiʋa isa ɛ, litumu ne lidɔ ní kesea petee aʋa inyɔsasa tita. 34Agi inyɔ tita isa ɛ, Yesu akpe ozi tatata si, “Eloi, Eloi, lama sabaxtani!” Gi lɛ ese linu si, “Mɔka, Mɔka, ege lɛ loso wɔyurɔ mɛ ɛ?”

35Banɔ batɔ gi beeze ní klɔ ɛ, benu yɛ ozi lo, lɛ bɛpani si, “Mlata kutu, ɛɛxwa Eliya!” 36Banɔ baklɔ ba mɛ tole ese, lɛ azɛɛkɔ ɔsapo lo o, lɛ akpɛ lɔ ní kuda nyagba nyagba mɛ ɛ, lɛ ete lo ní ose gblamadza ɔtɔ onu, lɛ akɔ kɔ aki Yesu si ɔŋwɛ ɛ. Lɛ apani si, “Mlaplɛ litɔ kese tɔ kudi xe Eliya aaba pleni ye ní ose lo su i!”

37Gi Yesu akpɛ ozi lo gaglaa dzɛ ko lɛ ada onugu lo e.

38Lɛ onu klɔ ko e, kusaa gi bɛkɔ ɛlɛ Lisɔligba lɛ mɛ ɛ, kwikyĩ idɔni kaʋaa gakɔ nani kesea! 39Baguta ba ɔka ɔtɔ gi eze ní osetsase lo ɔtɔ nɔ ɔ, gi amɔ kiliɛ mɛ gi Yesu akɔ etse e, lɛ apani si, “Sugba sugba ɛ, Onyime liɛ, Aya Yebi ɔnyaa nu u!”

40Badzɛatɔ bɛlɛɛ ní ɔdzage no gi bezeedi eboa la gi ɛzɛɛba la mɛ ɛkpɛ ɛ. Maria Magdaladzee, ni Maria gi eze Yakobo nuvɔɛ ni Yose ba onee e, kɔpɔni Salomɛ, ba fɛ beze ní badzɛ ba ba klɔ kusi. 41Lipoɛ lɛ klɔ gi Yesu eze ní Galilea ɛ, badzɛ ba klɔ beze ni yɛ kude, xe bɛzɛpɔni yɛ ɛ. Badzɛ dzedze gi bezeni yɛ kude eba Yerusalem kyɛ beze níklɔ.

Bevive Yesu

42Lize Lisɔpa kulagɔ, liwe lɛ gi bizɛbla ɛplɛ ɛki Lizemɔniwe le e, 43Yosef gi ádɔ Arimatia ɛ, aba eku. Eze banɔtsitsi ba likpɔkpɛkpɛ lɛ mɛ ɔnɔ gi kubùbù kwize ní yɛ su u. Lɛ yɛ fɛ azeepe Aya yɛ Kaʋaŋaa kubabaa a. Edo igyi le atrɛ ní Pilato aŋu mɛ lɛ eʋi si bakɔ Yesu okpo ye aki yɛ ɛ. 44Pɔ̀ litu Pilato kugyɔ gi enu si Yesu etse kyikya te e. Axwa baguta ba ɔkaɛ, lɛ eʋi ye si Yesu anya etse na a. 45Lɛ gi enu baguta ba ɔkaɛ yɛ kunutsatsaa si Yesu anya etse e, Pilato ayurɔ okpo ye aki Yosef. 46Yosef edzi aklala evu, lɛ gi eple nì okpo ye ní osetsase lo su i, axla yɛ akpɛ ní aklala yɛ mɛ lɛ akɔ yɛ akpɛ ní ɔdrɔ ɔtɔ gi aki si bebu ní likla nɛ mɛ̀ mɛ ɛ. Lɛ kede e, aki si bemli likla ʋidi itɔ etsi ɔdrɔ lɔ onu. 47Maria Magdalene ni Maria Yose yene bɛmɔ ní niklɔ gi bɛplɛ Yesu yɛ okpo ye e.

Currently Selected:

Mak 15: avn

Highlight

Copy