Mak 1

Yohanes Kuni yo Ɔkpɛkpɛɛ yɛ Kupaniɔ

1Yesu Kristo Aya Yebi ye, yɛ su Liboe Gbã nɛ lilɛ ya. 2Likpese ŋwisi kiliɛ gi Aya yɛ oboedoplɛɛ Yesaya aŋwlimi nɛ kinɛ si:

“Aya apani si, ‘Maakpɛ mɛ ɔxwɛdzɛɛ ní wɔ ɔtɔ nɔ

tɔ aadra kudeo ki wɔ.’

3Ɔniliɛ klɔ ɛɛkpɛ ozi ní ɔyaya klɔ si,

‘Mlalulɔ kudeo plɛ aki Ɔkaɛ;

mlebu kude gyɔgyɔɔ aplɛ ki yɛ tɔ aaga!’ ”

4Lɛ loso e, Yohanes aba gi azɛɛkpɛ kuni yo aki banima a, lɛ azɛɛkla Aya yɛ liboe le ní ɔyaya klɔ si, “Mlekyi kedea kpɛ mlɔ eboe zimizi na tɔ mlaki tɔ bakpɛ kuni aki mlɔ, tɔ Aya ɔkɔ mlɔ eboe zimizi na kukyɛ mlɔ.” 5Banɔ glegle ní Yudea kesea mɛ ni Yerusalem ɔma nɔ mɛ bedo etrɛ si tɔ bianu Yohanes yɛ liboe le. Bɛdra ba ina nɛ mɛ ní ba eboe zimizi na su, lɛ Yohanes akpɛ kuni aki ba ní Yordan Onipe lo me e.

6Yohanes yɛ bidɔkpɛkpɛ ʋɛ bize kposɔ sipi liwu; anya yɛ kasɛa mɛ ni kagaplekpa ɔgɛmi, lɛ yɛ bidɔŋaŋa ʋɛ bize akikli la nì liŋwafu mɛ kibú. 7Apani asi banima sì, “Ɔniliɛ gi aaba mɛ kede e, ekeme kura sani mɛ. Lɛ mágbɛ gi maaze yɛ ɔxwɛdzɛ ní kapɛa tɔtɔ mɛ ɛ. 8Makpɛ kuni aki mlɔ, pɔ̀ yɛ kɔ, aakpɛ Aya yɛ Ɔfuɛfuɛ nɔ ki mlɔ.”

Bɛkpɛ kuni ki Yesu lɛ befeke ye edi i

9Ni ewe ala klɔ mɛ ɛ, Yesu ádɔ Nazaret ní Galilea kesea mɛ aba a, lɛ Yohanes akpɛ kuni aki yɛ ní Yordan Onipe lo me e. 10Kiliɛ gi Yesu eedo eemu dɔni kuni yo me ko e, amɔ si lifunu ne lizɛɛdra, gi Aya yɛ Ɔfuɛfuɛ nɔ eeple dɔ yɛ aʋa ŋwisi abronuma kinɛ na a. 11Ko lɛ ole ɔtɔ eyi dɔni lifunu ne si, “Wɔ wonu mɛ obi ye gi malɔ ɔ, lɛ wɔ liboe liiku me aŋu u.”

12Kyɔŋ niklɔ ko e, Ɔfuɛfuɛ nɔ ɛgbani yɛ tsinɔ ní ɔyaya klɔ. 13Eze niklɔ ewe avitene lɛ Satana efeke ye edi i. Liŋwafu nɛ mɛ baga ʋa kyɛ beze ní klɔ, lɛ Aya yɛ baxwɛdzɛ ba bɛba esumu ye xe bɛkpɛ yɛ kigagla ɛ.

Yesu axwa bakpábu tiene

14Lipoe lɛ gi bevu Yohanes ikpɛ ligba pɔ́ ɛ, Yesu atrɛ ní Galilea gi azaapani Aya yɛ Liboe Gbã nɛ ɛ. 15Yesu yɛ liboe le linu si, “Lipoe le lina ablɔ kɔ; lɛ Aya yɛ Kaʋaŋaa ketipɔnɔ ɔ! Mlekyi kede akpɛ mlɔ eboe zimizi na, tɔ mlazi Liboe Gbã nɛ aʋa ŋa!”

16Gi Yesu azɛɛga Galilea Limu ne kutu i, amɔ bakpábu tiaʋa. Ba beze Simon nì yeneminyime Andrea gi bɛzɛɛta ba dzikle e. 17Niklɔ Yesu axwa ba si, “Mleku nì mɛ kude, tɔ maabasɛ mlɔ kiliɛ gi mlaabù banima ɛ.” 18Lɛ onu klɔ ko e, bɛyurɔ ba dzikle ʋa ko lɛ bekuni ni yɛ kude e.

19Aga atrɛ ɔtɔ nɔ taʋɛ ko lɛ amɔ beneminyime tiaʋa dzedze e, Yakobo nì Yohanes. Beze Zebedeo yɛ bebi. Beze ba katapokpaa mɛ gi bɛzɛɛlulɔ ba dzikle ʋa a. 20Kiliɛ gi amɔ ba nite ko e, axwa ba. Bɛyurɔ ba ɔkaɛ Zebedeo ni apaa yɛ bebi ʋa ní katapokpaa me ko lɛ ba kɔɔ bɛsɛ xe bekuni Yesu kude e.

Yesu akpikpini Ɔfuɛfuɛ zimizi idono ní onyime ɔtɔ mɛ

21Yesu nì yɛ badɔkpasi ba bɛtrɛ ní Kapernaum ɔma nɔ mɛ. Gi Lizemɔniwe le lina ɛ, Yesu atrɛ ní Yudanɛ ma ɔtsa klɔ; lɛ ekpese bidɔ mɛ kubasɛ ɛ. 22Banama gi bɛta yɛ bidɔbasɛbasɛ ʋɛ kutu i, ba inugu itse, lɛ ese linu si yɛ kiniɛ kiga lidze ní Ɔsã nɔ badɔbasɛ ba bidɔbasɛbasɛ ʋɛ su. Yesu xunyɔ ɛ, abasi bidɔ mɛ ni kigagla.

23Kyɔŋ klɔ ko e, onyime ɔtɔ gi ɔfuɛfuɛ zimizi eze yɛ mɛ ɛ, akpɛ ozi tatata ní kutsatsaa mɛ si, 24“Wɔ Yesu Nazaret ɔnɛɛ, liboe woli wɔɛpɛ ní blɔ su u? Blɔ ɔkyurɔ kɔ wɔba niya putɔ ɔ? Mete ɔniliɛ gi wonu i. Wɔ wonu Aya yɛ ɔxwɛdzɛ dradra yɛ.”

25Yesu akpɛ ozi ní ɔfuɛfuɛ nɔ aʋa si, “Gɔ tsriɖi! Do báza ní ɔnɔɛ mɛ!”

26Ɔfuɛfuɛ nɔ esugu onyimee gaglaa, ɛkpɛ ozi tatata, lɛ edo eza ní ɔnɔɛ mɛ ɛ. 27Banima pɔ́ ba inugu itse, lɛ bekpese ba ahanuglɔ ba kuʋi si, “Liboe woli lɛ ya a? Bidɔbasɛbasɛ vuvu woli lu bɛ ya a? Onyime liɛ kɔ kigagla kilɛ yɛ awla gi izɛɛki ifuɛfuɛ zimizi ɔsã a, lɛ izeenu kutu yɔ fɛ ɛ.”

28Niteme si Yesu yɛ linyi ne lihle eku ní ɔkɔ kakaa ní Galilea bidɔ mɛ mɛ̀.

Yesu ayɔ ni banyanya glegle

29Lipoe lɛ gi Yesu nì yɛ badɔkpasi ba bɛsɛ ní Yudanɛ ma ɔtsaklɔ ɛ, bɛtrɛ ní Simon ni Andrea kepea mɛ laa; Yakobo ni Yohanes fɛ beze ba kusi. 30Simon yɛnadzee, kuwe kwivu ye plɛ ɔtɔsi aʋa, lɛ gi Yesu eku kepea mɛ ko e, bɛki yɛ kutète kyɔŋ. 31Eti eku ní ɔdzɛɛ aʋa, lɛ evu yɛ kawlakpɔa lɛ apɔni yɛ xe ayɔ ɛ. Lɛ onu klɔ ko e, kuweo kwití yɛ aʋa; lɛ ayɔ xe ekpese ba aʋa kudi i.

32Agi liwe le liku xe ɔlagɔ lɔ ɛna ɛ, banima bɛkɔ ba banyanya ba petee ni banama mɛ gi ifuɛfuɛ zimizi ne ize e, manɔ ní Yesu klɔ. 33Ɔma nɔ pɔ́ ɛkpɛ likpɔ ní kepea kevunu ya. 34Yesu ayɔni banyanya ba dɔni ba bànya ede ede na mɛ, lɛ akpikpini ifuɛfuɛ zimizi glegle edo no ní banima mɛ ɛ. Pɔ ɔ́ki lɛ kudeo si ipani i, lɛ ese linu si ifuɛfuɛ nɛ ite ɔniliɛ gi Yesu onu i.

Yesu apani liboe le ní Galilea

35Liwe ʋla lɛ ɔlezatɔ tsitsi no e, Yesu ayɔ, lɛ edo kepea mɛ ɛ. Edo ní ɔma nɔ mɛ lɛ atrɛ ní okpokpo kɔ ɔ, niklɔ axwa Aya ɛ. 36Pɔ̀ Simon nì yɛ ɔha lɔ bɛzɛɛklanɔ gi bɛzɛɛpɛ́ yɛ ɛ. 37Lɛ gi bɛmɔ yɛ ɛ, bɛsi yɛ si, “Ɔnɔ kakaa ɛɛpɛ wɔ.”

38Pɔ̀ Yesu ebu lɛ onu si, “Lilɛ si kutrɛ ní kumami uliɔ klɔ gi kwiklani blɔ mɛ ɛ. Liziã si mipani liboe le ní niklɔ fɛ, lɛ ese linu si lɛ ya loso maba a.”

39Lɛ loso e, aga Galilea kesea petee me, lɛ apani liboe le ní ba itsaklɔ ɛ. Kɔpɔnɔ ɛ, akpikpini ifuɛfuɛ zimizi ne ebu ní banima mɛ.

Yesu ayɔ ni onyime ɔnyanya ɔtɔ

40Onyime ɔtɔ azɛɛnya kunya kyikyĩ yɔ. Lɛ aba Yesu klɔ ɛ. Edu aklamasi kesea lɛ aki yɛ litukpo si ɔpɔni yɛ ɛ. Asi Yesu si, “Xegi linu wɔ kupɛpɛ ɛ, wɔatani kubitɛ gi mɛ isu ya iadra a.”

41Asigaga la ɛga Yesu nì onyimee; anina yɛ ɔwla lɔ, lɛ agbɔni onyimee e. Lɛ Yesu asi yɛ si, “Linu mɛ kupɛpɛ; wɔ isu ya idra a!” 42Lɛ onu klɔ ko e, yɛ isu ya ilulɔ; kunyaa fɛ kwilila ní yɛ su. 43Niklɔ Yesu akpɛ onyimee kude ni ɔsã gagla si, 44“Ta kutu, di lɛ aʋa si wódo liboeboe si ɔnɔnɔ ní kibitɛɛ liɛ ya su u. Boŋu i, ga laa tɔ trɛ ní Yudanɛ ma kusumu yo ɔkaɛ klɔ; ki tɔ ɔtapo wo odi. Lɛ kede e, tɔ ɔnɔ kakaa ɔmɔ si wɔnya ahaya ɛ, zeeyi ligoʋi lɛ klɔ gi Mose ɔsã nɔ eʋi i.”

45Pɔ̀ gi onyimee asɛ ɛ, azeekpese liboe le kufuflu ní ɔkɔ kakaa a. Onyimee yɛ onugu haha lɔ ɛki si Yesu ɔ́zɛɛtani kudo ní ɔha kusi ní ɔma tɔtɔ mɛ ɛ. Kɔ ɛ, ebu isu ya lidze dzaa ní banima su, pɔ̀ banima bɛzɛɛba yɛ klɔ dɔni ɔkɔ kakaa a.

Currently Selected:

Mak 1: avn

Highlight

Copy