Mat 19

Yesu abasi bidɔ ní onyime ni yedze ba ahanuglɔ ba kugbegbe su

1Agi Yesu agù yɛ kupaniɔ ɛ, asɛ ní Galilea lɛ atrɛ ní Yudea kesea ní Yordan onipe lo kede e.

2Anɔkpi ʋidi eku ni yɛ kude, lɛ ayɔ ni ba ní niklɔ ɛ,

3Farisianɛatɔ bɛba yɛ klɔ lɛ bɛpɛ si bɛɛpunu yɛ ni kuʋíʋi si, “Dani blɔ Ɔsã nɔ ɛki kude si wɔagbe wodze ní kude kakaa onu gi wɔpɛ na a?”

4Lɛ Yesu ebu le onu si, “Kikla mlákla ní Aya liboe le me si ní okpese klɔ ɛ, Aya ebu ba onyime ni ɔdzɛ na a? 5Lɛ Aya apani si, ‘lɛ loso onyime aayurɔ yɛka ni yene tɔ yɛ nì yedze biakpɛ likpɔ ɔ, lɛ ba tiaʋa biadzi kisugya tile na a.’ 6Lɛ loso bénu banɔ tiaʋa tɔ ɔ, pɔ̀ kisugya tile. “nite si kidiliɛ gi Aya akpɛ likpɔ ɛ, ɔnɔnɔ ɔ́ki lɛ kɛ mɛ ɛ.”

7Lɛ beʋi Yesu si, “ege lɛ loso, Mose aki kude si onyime ɔki yedze kegbegbeplekpa tɔ ɔkpɛ yɛ kude na a?”

8Lɛ Yesu ebu le onu si, “Mose aki mlɔ kude si mlegbe mlɔ bedze ba lɛ ese linu si mlɔ batu ba mɛ bali i gagla. Pɔ̀ lize nite ní kelea okpese klɔ ɔ. 9Abla ɖii, mɛɛsi mlɔ si, xe onyime ɔtɔ egbe yedze ni kude dzedze onu gi aní enyimeboe alɔ ɛ, xe agbani ɔdzɛ dzedze e, kɔ onyimee liɛ klɔ alɔ ádzɛboe e.”

10Yɛ badɔkpasi ba bɛsi yɛ si, “Xegi nite kudzɛgbanɔɔ kulɛ ni ɔdzɛ ni onyime kusi i, kɔlɔ ɔ liapɛ ɔsã nɔ xegi wɔ́gbani ɔdzɛ ɛ.”

11Lɛ Yesu azɛ liboe le si, “Ani ɔnɔ kakaa yɛ aanu liboe lɛ ya ese e, pɔ̀ banama gi Aya aki kesenunu i, ba linɛ. 12Mlenu lɛ ese si, eboe glegle alɛ gi la loso onyime ɔ́tratani ɔdzɛ kugbanɔ ɔ: benyimeatɔ ɛ, bɛpɔ ba si bawɔ ɔdzɛ mɔgbanɔ ɔ; batɔ ɛ banɔ bɛbitɛ ba nite; lɛ benyimeatɔ fɛ bágbani badzɛ kɔkpɛ Aya yɛ Kaʋaŋaa loso o. Ɔniliɛ gi aatani lɛ ese kunu i tɔ ɔzɛ lɛ.”

Yesu akrira banuvɔ ba

13Banɔatɔ bɛgbani banuvɔ ba ɛ mani Yesu klɔ tɔ ɔtrɔ awla ní ba aʋa ni tɔ ɔxwa Aya ní ba litukpo, pɔ̀ yɛ badɔkpasi ba bɛtɛni banɔaklɔ ɔ. 14Pɔ̀ Yesu egbe liboe aki ba si, “Mlaki tɔ banuvɔ ba baba mɔ klɔ; mlakítsi kude aki ba, lɛ ese linu si Aya yɛ Kaʋaŋaa ɛ, ba elu kanɛ kenu u.”

15Lɛ atrɔ awla ní ba aʋa a, lɛ asɛ.

Lilii gagla ɛki bexonete ba si beti eku ni Aya yɛ Kaʋaŋaa mɛ

16Lipoetɔ kede e, onyime ɔtɔ ɛba Yesu klɔ lɛ eʋi ye si, “Ɔdɔbasɛɛ, kidɔ gbã woli lu lilɛ si mibitɛ xe maamɔ ligbã moblo le e?”

17Lɛ ebú le onu si, Ege lɛ loso wɔeʋi me liboe ní kidɔ gbã su u? Koŋu i, ɔnɔ tole ko ɔlɛ gi yɛ apɛ ɛ. Ga ní isã nɛ aʋa xe wɔpɛ si wutiku ní ligbã́ moblo le me e.”

18Lɛ onyimee eʋi si, “Isã woli lɛ klɔ ɔ?”

Yesu ebu le onu si, “Wukíye ɔnɔ ɔ; wukílɔ enyimeboe ni ádzɛboe; wukízuru; wukísɛ asia akpɛ ɔnɔ awla a; 19Bù wɔka ni wone; tɔ dimɛni wɔ ɔhanuglɔɛ ŋwisi wɔ tutɔ lɔ wɔ isu ya kinɛ ɛ.”

20Lɛ onyimee ebu isu ya onu si, “Maga ní isãɛ nɛ klɔ pɔ́ aʋa. Ege kigɔ dzɛ gi linu si mibitɛ ɛ?”

21Lɛ Yesu asi yɛ si, “Xe wɔpɛ si wuflɔ ɛki ligbã moblo le e, trɛ tɔ zɛɛda wɔ bidɔ mɛ petee atɔ kɔ kibɔɛ kí bepiplinete ba. Liaki si exo aaze ní wɔ awla ní lifunu ne; Atɔ wɔ pɔ̀ ɛ, ga kuni mɛ kude.”

22Agi onyimemi ye enu liboe le e, asɛ ní asigaga mɛ, lɛ ese linu si oxonete ʋidi onu u.

23Lɛ Yesu asi yɛ badɔkpasi ba si, “Mɛɛtrɔ likla ní lɛ aʋa ɛki mlɔ si, liaze gagla ki bexonete ba si beti eku Aya yɛ Kaʋaŋaa mɛ. 24Meedzini le epani si: liaze gagla ki oxonete si oti oku Aya yɛ Kaʋaŋaa mɛ sani si kposɔɛ ɔga trɔ̀ni yɛ liwu le me odo.”

25Agi badɔkpasi ba benu liboe le e, ba inugu itse mɔmɔmɔ, lɛ beʋi si, “Kɔ abla ɛ, nyaŋwɛ koŋ aamɔ kububu i?”

26Lɛ Yesu edu aŋu na ní ba aʋa a, lɛ ebu le onu si, “Ɔnɔ gbagbe ɔ́tratani ɔnɔnɔ kubu u, pɔ̀ Aya kɔ ɛ, kidɔ kakaa kiatani kɛ mɛ kuba ki yɛ ɛ.”

27Lɛ Petro ebu le edo si, “Dike, ɔka! kwiyurɔ kidɔ kakaa, lɛ kwikuni wɔ kude e. Ege kwiamɔ obu ní lɛ mɛ ɛ?”

28Lɛ Yesu asi ba si, “Sugba mɛsi mlɔ si, xe Ɔnɔɛ Yebi ye aaze ní yɛ likusigbo le aʋa ní isami mɛ ní kele vuvu ya mɛ gi Aya aabitɛ ɛ, kɔ́ mlɔ liɔfɔ ni tiaʋa ba gi mlalɛ ni mɛ kude e, mlɔ fɛ mlaze ní ekusigbo aʋa, gi mlaaŋa kukusi ní Israel akpɔ liɔfɔ ni tiaʋa la aʋa a. 29Lɛ ɔnɔ kakaa gi ayurɔ kupe loo, beneminyime, loo benemidzɛ, loo ɔka, loo one, loo bebi, loo inyɔɔ kɔkpɛ mɛ loso e, aamɔ bɛ elu ede alafa kɔ sanɔ, lɛ Aya aaki ɔniɛ ligbã mobloe le e. 30Pɔ̀ banɔ glegle gi benu batɔpu i, biaze bagɔgɔ, lɛ banɔ glegle gi benu bagɔgɔ abla ɛ, biadzi batɔpu u.

Currently Selected:

Mat 19: avn

Highlight

Copy