Mat 18

Yesu abasɛ ɔniliɛ gi yɛ onu oʋidi ye ní lifunu ne Kaʋaŋaa mɛ ɛ

1Ní lipoe lɛ klɔ mɛ ɛ, badɔkpasi ba bɛba Yesu klɔ, lɛ beʋi ye si, “Nyaŋwɛ onu oʋidi ye ní lifunu ne Kaʋaŋaa mɛ na a?”

2Lɛ Yesu axwa ɔnuvɔ ɔtɔ amanɔ lɛ aki yɛ ɔlɛɛ ní ba kusi yo e, 3lɛ apani si “Sugba sugba, xegi mlékyi ní mlɔ ina nɛ mɛ edzì ŋwisi banuvɔ kinɛ ɛ, mlátrati iku ní Aya yɛ Kaʋaŋaa mɛ liweewe e. 4Ɔnɔ ʋidi ye ní Aya yɛ Kaʋaŋaa mɛ ɛ, yɛ onu ɔniliɛ klɔ gi eple ni isu ya xe edzì ŋwisi ɔnuvɔ liɛ ya kinɛ ɛ. 5Lɛ ɔniliɛ gi azɛ banuvɔ ba ya elu ba mɛ tole ní mɛ linyi ne me e, mɛ azɛ.

Aŋu mɛ kukaka ki ɔniliɛ gi aaki si ɔnutɔ aabitɛ liboe zimizi i

6“Xegi ɔnutɔ aaki si banuvɔ ba ya gi bɛzi mɛ aʋa ɛɛŋa biakyi kede kpɛ mɛ ɛ, liapɛ ɔki ɔniliɛ klɔ sanɔ xe bɛka kuhɔ ʋidi ní yɛ ole lo xe bɛkɔ yɛ ɛŋwia kpɛ ní axu la odzudzu klɔ ɛ. 7Babaa ki kelea, lɛ ese linu si bidɔ bɛ klɔ gi biaki si banima biabitɛ eboe zimizi na ɛ bilɛ. Lɛ linu si eboa la klɔ elu aaba la mɛ lipoe kakaa. Pɔ̀ babaa ki ɔniliɛ klɔ aʋa gi biaga ɛ! 8Xe wɔ kawlakpɔa loo wɔ ɔkli aaki si wɔata kese e, tsa lɔ tuʋe. Liapɛ ɔki wɔ si tiku ní ligbã moblo le me ni kawlakpɔ tiele, loo ɔkli tole sani si tɔ iwla loo ikli tiʋa ize wo, pɔ tɔ bakɔ wɔ aŋwia akpɛ ní kifumoni ye me e. 9Lɛ xe wɔ kimbi ye kiaki si wɔata kese e, kpaʋi kɛ tuʋe. Liapɛ ɔki wɔ si tiku ní ligbã moblo le me ni kimbi tile sanɔ si tɔ bimbi tuʋa bize wo pɔ̀ tɔ bakɔ wɔ aŋwia akpɛ ní kifumoni ye me e!

Yesu ebu abee ní oʋesi gi ɛlila su u

10“Mlakímɔ banuvɔ sisami ba ya si bénu kididɔ ɔ. Lɛ ese linu si ba baxwɛdzɛ ba ɛ, balɛ Mɔka ni lifunu ne yɛ aŋu mɛ lipoe kakaa. 11Lɛ ese linu si Ɔnɔɛ Yebi ye e, kiba aba si yibu banama gi bɛlila ɛ. 12Mlegyo le edi si, iʋesi alafa tole ilɛ ní onyime ɔtɔ awla a, lɛ lɛ mɛ tole ɛlila ɛ. Kɔ ɔ́trayurɔ iʋesi avi ɔgɔtole ni ɔgɔtole le ní siwa sɛ ɔtaklɔ xe iipɛ lɔ klɔ gi ɛlila na a? 13Kikaka elu i, xegi amɔ lɔ ɛ, onyimee aamɔ isami glegle ní lɔ su sani iʋesi avi ɔgɔtole ni ɔgɔtole le gi ílila su i. 14Nite ke línu mlɔ Ɔkaɛ ní lifunu ne kupɛpɛ si banuvɔ sisami ba ya mɛ ɔtɔtɔ ɔlila a.

Kiliɛ gi biabitɛ onemi ɔʋaziŋa liɛ gi ata kese e

15“Xe wonemi abitɛ liboe zimizi amani wɔ su i, wɔ tètè tipɔni yɛ tɔ bu le kubasɛ yɛ ní mlɔ tiaʋa kusi. Xe enu kutu i, tɔ mleku likpɔ. 16Pɔ̀ xegi ónu kutu i, gbani ɔnɔ tole, tiaʋa pɔni isu ya ‘tɔ ɔʋatrɔ oze ní wɔ awla ní liboe kakaa gi mlaapani su u ŋwisi kiliɛ gi Aya liboe le libasɛ kinɛ ɛ.’ 17Lɛ xegi ɔ́zɛ ba liboe le e, zɛ kɔ wɔ liboe le plɛ ní ɔsɔli ha lɔ aŋu mɛ. Niteme si, xegi ónu kutu ki ɔhalɔ kyɛ ɛ, kɔ yɛ kudeo kí yɛ tɔ oze ɔki wɔ ŋwisi ɔbubitɛ loo ɔtumonu kinɛ ɛ.

Badɔkpasi ba bɛmɔ kigagla si biatsi kude loo biaki kude ni eboe su

18“Lɛ mɛɛsi mlɔ pɔ́ si: xe mletsi kude ɛki kiditɔ ní kesea aʋa ɛ, biatsi kɛ onu ní lifunu ne, lɛ xe mlɛki kude ní kiditɔ su ní kesea aʋa ɛ, biaki kɛ kude ní lifunu ne.

19“Lɛ mɛ ɛɛpani ipɔnɔ si, xegi mlɔ mɛ banɔ tiaʋa mlaakpɛ mlɔ begyodi ʋa likpɔ ní kidɔ kakaa su ní kesea aʋa xe mleʋi ke e, mɔka ní lifunu ne aabitɛ kɛ ɔki mlɔ. 20Lɛ niklɔ gi banɔ tiaʋa loo tiata biakpɛ likpɔ ní mɛ linyi ne me e, malɛ ní ba kusi.”

Abee Ní ɔnɔsumu ye gi ɔ́kɔkyɛ ɛ yɛ su

21Lɛ Petro aba Yesu klɔ xe eʋi ye si, “Ɔkaɛ, tasɛ mɛ ɔhanɛ ɔʋaziŋa aabitɛ liboe zimizi mani mɛ su xe maakɔ kyɛ yɛ na a? Tegloele na a?”

22Lɛ Yesu ebu le onu si, “Owo, mápani si tegloele pɔ̀ avitegloele ede tegloele, 23lɛ ese linu si lifunu ne kaʋaŋaa kalɛ nite e: ɔʋaŋa ɔtɔ eze e; lɛ liwe etɔ lɛ ɛ, atrɔ si yɛ aga kibɔɛ eboe la mɛ ni yɛ banɔsumu ba. 24Kiliɛ gi ekpese ko e, lɛ yɛ banɔsumu ba bɛgbani ba mɛ tole gi adɔ liʋɛ kibɔ ʋidi itɔ ní yɛ ɔʋaŋaɛ su amanɔ ní yɛ aŋu na mɛ ɛ. 25Pɔ̀ gi kibɔ kíze ní ɔnɔsumu ye awla xe akɔ tsa liʋɛ nɛ gi adɔ onu i, lɛ ɔʋaŋaɛ asi si badà yɛ ŋwisi ɔnɔ dzidzi kinɛ ɛ, yɛ nì yedze, yɛ bebi ba kɔpɔni kidɔ kakaa elu gi kiliɛ yɛ awla ɛ, tɔ bakɔ atsa liʋɛɛ nɛ gi adɔ ɛ. 26Lɛ ɔnɔsumu ye adɔ́ yɛ aklamasi na aʋa aki ɔʋaŋaɛ si “Maki wɔ litukpo, plɛ litɔ kese ki mɛ; tɔ maatsa liʋɛ kakaa gi madɔ ní wɔ su i!’ 27Yɛ liboe le liga ɔʋaŋaɛ asigaga, nite si akɔ liʋɛɛ nɛ gi adɔ ní yɛ su i, akɔ lɛ akyɛ yɛ, lɛ ayurɔ yɛ ɛ.

28“Pɔ̀ gi onyimee asɛ ní ɔʋaŋaɛ aŋu mɛ ɛ, atsani yɛ ɔhanuglɔ ɔnɔsumu dzedze ɔtɔ gi adɔ kibɔ liʋɛ sisami itɔ ko ní yɛ su i. Asɔli yɛ ka, lɛ evu yɛ ole lo apɔ ɛ. Lɛ asi yɛ si, ‘Tsa liʋɛ nɛ gi wɔdɔ mɛ su ɔki mɛ ɛ!’ 29Lɛ yɛ ɔhanuglɔ ɔnɔsumu ye adɔ yɛ aklamasi na aʋa, xe aki yɛ litukpo si i, ‘Plɛ litɔ kese ki mɛ ɛ; maatsa liʋɛɛ nɛ gi madɔ ɛ!’

30“Pɔ̀ ɔ́zɛ lɛ ɔki yɛ ɛ. Boŋu i, aki bɛkpɛ yɛ ligba kɔzɛna ni lipoe lɛ klɔ gi aatsa liʋɛ nɛ ɔki yɛ pɔ́ ɛ. 31Agi banɔsumu dzedze ba bɛmɔ eboa la gi ɛtrɛ la ʋa nite e, limi ba aʋa koŋ. Nite si bɛtrɛ ní ɔʋaŋaɛ klɔ, lɛ bɛsi yɛ liboe kakaa gi liba lɛ mɛ ɛ. 32Liki si ɔʋaŋaɛ axwa ɔnɔsumu ye amani yɛ klɔ. Lɛ atɛni yɛ si, ‘Wɔ ɔnɔsumu litukpo me gagla onete wonu. Makɔ wɔ aʋɛ na petee akyɛ wɔ lɛ ese linu si wɔki mɛ litukpo si mikɔ la kyɛ wɔ, 33wo gyeni wɔ ɔhanuglɔɛ asigaga kudi ŋwisi kiliɛ gi medi wɔ kyɛ asigaga la kinɛ ɛ?’ 34Nite si ɔʋaŋaɛ amɔ kusuyeʋi nyani nyani, lɛ aki bɛkpɛ yɛ ligba tɔ bawa yɛ nyɔnyɔɛ kɔkpɛni lipoe lɛ klɔ gi aatsa liʋɛ kakaa gi adɔ ɛ.”

35Lɛ Yesu agù yɛ liboe le si, “Nite ɖii mɔka ní lifunu ne aabitɛ mlɔ mɛ kakaa liɛ gi ɔ́kɔ kyɛ yɛ ɔhanuglɔ ɔʋaziŋa dɔnɔ ní yɛ ɔna mɛ ɛ.”

Currently Selected:

Mat 18: avn

Highlight

Copy