Yohan 6
6
Yesu aki Banɔ akpe tietsu kiŋaŋa
1Lɛ kede e, Yesu atsa Galilea limu ne atrɛ ní oge lɔ kɔlɔ; bizɛɛxwa lɛ kyɛ si Tiberia limu ne. 2Lɛ linɔkpi ʋidi itɔ likuni yɛ kude e, lɛ ese linu si bɛmɔ enugutseboe ala gi akɔ ayɔni banyanya ba ɛ. 3Yesu emu ketokpa katɔ, lɛ yɛ ni yɛ badɔkpasi ba beze kesea ɛ. 4Yudanɛ ma Kutseolidɔzawe le liŋa nɛ litiipɔnɔ.
5Agi Yesu efeke yɛ aŋu na ɛ, amɔ si linɔkpi ʋidi itɔ litrába yɛ klɔ ɔ, lɛ loso eʋi Filipo si, “Nifɔ kwiamɔ kiŋaŋaɛ ní kisrɛsrɛ mɛ gi kwiadzi kí banɔ ba ya petee e, xe biaŋa a?” 6Eʋi liboe lɛ ya tɔ yikɔ efeke Filipo edi: lɛ ese linu si ete kidiliɛ gi atrábitɛ ɛ koko.
7Filipo ebu le onu si, “Tɔ ɔnɔ kakaa ɔmɔ sisami ɔkpɛ onugu me e, biazia kibɔ ŋwisi ɔxwɛwa tole yɛ badzidzi ɔgɔtiaʋa liʋɛ kinɛ ɛ, pɔ̀ fɛ kítrana a.”
8Yɛ badɔkpasi ba mɛ ɔtɔ gi yɛ linyi linu si Andrea a, gi onu Simon Petro yeneminyime e, apani si, 9“Ɔyasɔʋi ɔtɔ ɔlɛ ní ya gi evu anasi aklã tetsu ni akpa taʋa, pɔ̀ atrána banɔ kisrɛsrɛ liɛ ya onu u.”
10Lɛ Yesu asi ba si, “Mlaki tɔ banima beze kesea.” Siwa sɛ sisrɛ ní niklɔ. Lɛ banima beze kesea ɛ; benyime ba kisrɛsrɛ mɛ kize ŋwisi akpe tietsu kinɛ ɛ. 11Yesu akɔ aklã na, lɛ edo Aya ɖase e, xe akɔ la akɔ si balɛ akí banama gi beze ní niklɔ ɛ. Nite ke abitɛ nì akpa la fɛ, lɛ ɔnɔ kakaa amɔ kiliɛ onu gi apɛ ɛ. 12Gi ba pɔ́ beke e, asi yɛ badɔkpasi ba si, “Mlakpɛ kupɛ gɔgɔɔ likpɔ, mlakíki tɔ kutɔtɔ kudɔ ofu u.” 13Lɛ bɛkpɛ kugɔgɔɔ likpɔ ɛ, niteme si dɔni anasi aklã tetsu la gi banima bɛta mɛ ɛ, kupɛ gɔgɔɔ kwiyi kusɔʋi liɔfɔ ni tuʋa.
14Agi banima bɛmɔ enugutseboe la gi Yesu abitɛ ɛ, bekpese kupani si, “Sugba iliɛ ya onu Aya yɛ Oboedoplɛɛ gi atrába kelea mɛ ɛ!” 15Yesu ete si bɛɛpɛ si beevu ye du kukusi ni kigagla; lɛ loso e, alila ba kusi lɛ edzi atrɛ ní eto la mɛ dzɛ yɛ tete e.
Yesu aga Kuni yo aʋa
16Gi kulagɔ kwina ɛ, Yesu yɛ badɔkpasi ba bɛtrɛ ní limù ne kutu, 17lɛ bemu iku ní katapokpa atɔ mɛ ɛ, xe bɛtsa limu ne e, gi bɛɛtrɛ ní Kapernaum i. Kɔna ni lipoe lɛ ya ɛ, kelea keblo pɔ̀ Yesu ɔ́ba oku ba kusi i. 18Ní lipoe lɛ klɔ mɛ ɛ, liwɔ gagla ɛtɔ likpese kufu gi kuni yo kwizɛɛpisa a. 19Badɔkpasi ba beku katapokpaa ŋwisi itiplɛkɔ titsu loo tiglo kinɛ ɛ, lɛ gi bɛmɔ Yesu u gi ɛɛga kuni yo aʋa a, xe atrába ní katapokpaa su i, belulu. 20Lɛ Yesu asi ba si, “Mlakíse lifu u, mɛ mlɛmɔ!” 21Lɛ bɛdimɛ xe bɛzi yɛ ɛkpɛ ní katapokpaa mɛ ɛ, kyɔŋ ko ɛ, katapokpaa ke ku niklɔ gi bɛzɛtrɛ ɛ.
Linɔkpi le lizepe Yesu
22Agi kelea kɛti i, linɔkpi lɛ gi liwɔ limu ne kedea ɛ, livu aŋu lɛ limɔ si katapokpa tiele ko keze níklɔ ɔ. Bete si Yesu ɔ́sɛ ni yɛ badɔkpasi ba a, ba tete ko bɛsɛ. 23Kutapokpa dzedze gi kwidɔ Tiberia ɛ, kwiba eku oge no gi eti ipɔni niklɔ gi linɔkpi le lita aklã na gi Ɔkaɛ edo ɖase e ní la litukpo pɔ́ ɛ. 24Gi linɔkpi le limɔ si Yesu ni yɛ badɔkpasi ba báma niklɔ ɛ, beku kutapokpaa klɔ lɛ bɛtrɛ ní Kapernaum gi bɛzɛɛpɛ yɛ ɛ.
Yesu Yɛ onu ligbã́ nɛ liklã̀ nɛ
25Gi bɛmɔ Yesu ní limu ne kapɛ ʋla ɛ, beʋi ye si, “Ɔdɔbasɛ yɛ, lipoe woli wɔba eku ni ya a?”
26Yesu ebu le onu si, “Mɛɛsi mlɔ anukwarɛɛ, mlɛɛpɛ mɛ lɛ ese linu si mlɛtà aklã na lɛ mleke e, aní si mlenu mɛ enugutseboe la ese e. 27Mlakíwa axwɛ akí kiŋaŋaɛ klɔ gi kiazizi i; boŋu i, mlawa axwɛ akí kiŋaŋaɛ klɔ gi kiaze kí ligbã moblo le e. Bɛ binu kiŋaŋaɛ klɔ gi Ɔnɔ Yebi ye aaki mlɔ ɔ, lɛ ese linu si Kaka Aya, akɔ yɛ liklatrɔtrɔ lɛ gyesi ye atrɔ ní yɛ aʋa.”
28Lɛ beʋi ye si, “Ege lilɛ si kubitɛ ɛ, xe kwiawa axwɛ ana gi Aya apɛ si kuwa na a?”
29Yesu ebu le onu si, “Kidiliɛ gi Aya apɛ si mlabitɛ ɛ, kɛ kinu si mlazi mɛ ɔniliɛ gi akpɛ aʋa aŋa a.”
30Lɛ beʋi ye si, “Linugutseboe woli wɔabitɛ si kumɔ tɔ kwiazi wɔ aʋa ŋa na a? Ege wɔtrabitɛ ɛ? 31Blɔ bakatsitsi ba bɛŋa kiŋaŋaɛ gi bizɛxwa si mana yɛ ní ɔyaya klɔ ɔ, ŋwisi kiliɛ gi bɛŋwlimi kpɛ ní Aya yɛ liboe le me e si, ‘Aki ba aklã na dɔni lifunu ne tɔ batà.’ ”
32Yesu apani si, “Mɛɛsi mlɔ anukwarɛɛ. Aní Mose yɛ aki mlɔ, aklã na gi ɛdɔ lifunu ne e; pɔ̀ Mɔka Aya yɛ izɛki mlɔ aklã na ɔtutɔ lɔ gi ɛdɔ ní lifunu ne e. 33Lɛ aklã na gi Aya izɛkɔ ɛ, la enu mɛ ɔniliɛ gi eple adɔ ni lifunu ne e, xe izɛki kelea ligbã́ nɛ ɛ.”
34Lɛ bɛsi Yesu si, “Ɔka, dɔni abla kɔtsinɔ ɛ, ki blɔ liklã̀ nɛ ya lipoe kakaa.”
35Niklɔ Yesu asi ba si, “Malɛ ŋwisi kiŋaŋa gi kizɛki ligbã́ kinɛ ɛ, Ɔniliɛ gi aba mɔklɔ ɛ, kuʋɛ kútraku ye e; ɔniliɛ gi azɛ mɛ aʋa aŋa ɛ, olile ɔ́traku ye e. 36Pɔ̀ ŋwisi kiliɛ gi masi mlɔ kinɛ ɛ, mlɛmɔ mɛ pɔ̀ mlázi mɛ aʋa aŋa a. 37Ɔnɔ kakaa gi Mɔka Aya aki mɛ ɛ, aaba mɔ klɔ. Mátrakpikpini ɔniliɛ gi aaba mɔklɔ liwewe e. 38Lɛ ese linu si madɔ lifunu ne aba kesea aʋa, aní si tɔ mibitɛ mɛ kupɛpɛɔ aʋa a, pɔ̀ tɔ mibitɛ ní Aya gi yɛ akpɛ mɛ ɛ, yɛ kupɛpɛɔ aʋa. 39Lɛ linu ɔniliɛ gi akpɛ mɛ ɛ, yɛ kupɛ́pɛ si; mikílila ɔ́tɔtɔ ní banɔaklɔ pɔ́ gi aki mɛ kusi i, pɔ̀ tɔ miyɔni ba pɔ́ dɔni bekpo ʋa me ní liwe gɔgɔ lɛ aʋa a. 40Lɛ kidiliɛ gi Mɔka apɛ́ ɛ, kɛ kinu si; banama pɔ́ gi bɛmɔ Obi ye xe bɛzi yɛ aʋa ɛɛŋa ɛ, bamɔ ligbã́ moblo le. Lɛ maayɔni ba pɔ́ dɔni bekpo ʋa mɛ ní liwe gɔgɔ lɛ aʋa a.”
41Yudanɛ ma bekpese kutɛ̀ gi Yesu apani si, “Mɛ menu liklã̀ nɛ gi lidɔ ní lifunu ne eba a.” 42Lɛ bɛpani si, “Aní onyime liɛ onu Yesu u, Yosef yebinyime na a? Kwite yɛka ni yene. Lɛ kitɛmɛ ɛɛpani abla si ‘madɔ ní lifunu ne aba kesea aʋa na a’?”
43Yesu ebu le onu si, “Mlamɔni kutɛ̀ ní mlɔ atsali kusi i.” 44“Ɔnɔnɔ ɔ́tratani mɔkɔ kuba a, xe aní Mɔka gi yɛ akpɛ mɛ ɛ, yɛ etini ye apɔni mɛ; lɛ maayɔni yɛ dɔni bekpo ʋa mɛ ní liwe gɔgɔ lɛ aʋa a. 45Aya beboedoplɛ ba bɛŋwlimi si, ‘Aya aabasɛ ɔnɔ kakaa bidɔ.’ Ɔniliɛ gi ata Kakaa Aya kutu u, xe akpasi bidɔ dɔni yɛ kɔ ɛ, izɛɛba mɔklɔ. 46Lɛ ya líbasɛ si ɔnɔnɔ ɔ́mɔ Kaka Aya oʋídi i; mɛ gi madɔ Aya klɔ aba ɛ, mɛ ko mamɔ Kaka a. 47Mɛɛsi mlɔ anukwarɛɛ: ɔniliɛ gi azɛ mɛ aʋa aŋa ɛ, ligbã́ moblo le lilɛ yɛ awla. 48Mɛ menu liklã̀ nɛ gi lizɛki ligbã́ nɛ ɛ. 49Mlɔ bakatsitsi ba bɛŋa mana yɛ ní ɔyaya klɔ pɔ̀ fɛ betse e. 50Pɔ̀ liklã̀ ɛnɛ klɔ gi liba kesea aʋa dɔni lifunu ne e, lilɛ nite me si, xe ɔnɔ atà nɛ ɛ, ɔ́tratse e. 51Mɛ menu liklã̀ nɛ gi lizɛɛki ligbã́ a, gi lidɔ ní lifunu ne eba a. Xe ɔnutɔ atà likla lɛ ya ɛ, aaze ligbã́ moblo le. Liklã̀ ɛnɛ gi maaki yɛ ɛ, lɛ linu mɛ kisugyaɛ gi maakɔ tɔ kelea mɛ banima biadzi ligbã́ a.”
52Lɛ ya limani kusuyeʋi ni kuŋwlɛŋwlɛ ní ba kusi i. Lɛ beʋi si, “Kitɛ onyime liɛ ya aakɔ̀ yɛ kisugyaɛ kí blɔ si kuta na a?”
53Yesu asi ba si, “Mɛɛsi mlɔ anukwarɛɛ: xe mláta Ɔnɔɛ Yebi ye yɛ kisugyaɛ ɛ, xe mlaŋwɛ yɛ ika lɛ ɛ, ligbã́ litraze ní mlɔ mɛ ɛ. 54Ɔnɔ kakaa gi aata mɛ kisugyaɛ ɛ, xe aaŋwɛ mɛ ika lɛ ɛ, aamɔ ligbã́ moblo le, lɛ maayɔni yɛ dɔni bekpo ʋa mɛ ní liwe gɔgɔ lɛ aʋa a. 55Lɛ ese linu si mɛ kisugyaɛ kinu kiŋaŋa ɔtutɔ, lɛ ika lɛ inu biŋwɛŋwɛ ɔtutɔ ɔ. 56Ɔnɔ kakaa gi aata mɛ kisugyaɛ ɛ xe aaŋwɛ mɛ ika lɛ ɛ, ɔlɛ likpɔ ni mɛ, lɛ mɛ fɛ malɛ likpɔ ni yɛ ɛ. 57Kiliɛ gi mɔka Aya gi yɛ awla ligbã́ nɛ lilɛ ɛ, akpɛ mɛ xe malɛ ligbã́ nɛ ɔkpɛ yɛ loso e, nite ke ɔniliɛ gi aata mɛ kisugyaɛ ɛ, aaze ligbã́ kɔkpɛ mɛ loso. 58Mɛ menu liklã̀ ɛ nɛ gi liba kesea aʋa dɔni lifunu ne e; mlɔ bakatsitsi ba bɛŋa mana yɛ pɔ̀ kyɛ ɛ betse. Banɔaklɔ gi biatà likla ɛ nɛ ya ɛ, biaze ligbã́ moblo le.” 59Yesu apani eboa la ya gi azaabasɛ bidɔ ɔ ní Yudanɛ ma ɔtsaklɔ ni Kapernaum.
Yesu yɛ eboe la izɛɛki ligba moblo le
60Gi banɔ glegle e, gi bezeni yɛ kude e, benu eboa la gi apani i, bedo si “Kudɔbasɛ uliɔ ya kwisa ɛgagla. Nyaŋwɛ aatani kɔ ese kunu u?” 61Yesu ete si yɛ badɔkpasi ba bɛzɛtɛ ní liboe lɛ ya su, lɛ eʋi ba si, “Eboa la ɛkpɛ mlɔ kunugu gi mlɛɛpɛ si mlɛɛki litukpo na a? 62Kɔ xegi mlɛmɔ mɛ Ɔnɔɛ Yebi ye e gi medzi emu niklɔ gi meze xwɛ ɛ? 63Kidiliɛ gi kizɛɛki ligbã́ nɛ ɛ, kɛ kinu Aya yɛ Ɔfuɛfuɛ nɔ; ɔnɔ gbagbe kisugyaɛ kínu liboeboe. Eboa la gi mapani akí mlɔ ɛ, enu Ɔfuɛfuɛ gi izɛki ligbã́ a. 64Pɔ̀ mlɔ mɛ banɔatɔ bázɛ aŋa a.” Yesu ete adɔ ni okpese kɔ banama gi batráziŋa a ni ɔniliɛ gi aakpɛ yɛ awla ɛ. 65Lɛ atrɛ lɛ aʋa si, “Kɔkpɛ eboa la ya loso e, Masi mlɔ si ɔnɔnɔ ɔ́tratani mɔkɔ kuba sani si Mɔka aki yɛ kudeo onu.”
66Dɔni lipoe lɛ ya aʋa ɛ, banɔ glegle gi bezeni Yesu kude e, bɛdɔ edzini yɛ kude.
67Lɛ eʋi yɛ badɔkpasi liɔfɔ ni tiʋa ba si, “Mlɔ fɛ mlɛpɛ si mlasɛ na a?”
68Simon Petro ebu le onu akí yɛ si, “Ɔkaɛ, nyaŋwɛ kɔ kwiatrɛ ɛ? Eboa la gi izɛɛki Ligbã́ moblo le e, wɔ kɔ́ alɛ. 69Lɛ abla ɛ, kwizi lɛ aʋa ɛɛŋa lɛ kwite si wɔ́ wonu Ɔdradra yɛ gi ádɔ Aya klɔ ɔ.”
70Yesu ebu le onu si, “Mɛ makya mlɔ liɔfɔ ni tiaʋa ba, putɔ aní mɛ na a? Pɔ̀ mlɔ mɛ tole onu ozimizi ye ɔnɛ.” 71Azɛɛpani ní Yuda, gi onu Simon Iskariot yebinyime su u. Lɛ gi Yuda anya eze badɔkpasi liɔfɔ ni tiaʋa ba mɛ tole kyɛ, yɛ atra kpɛ Yesu awla lɛ kede e.
Currently Selected:
Yohan 6: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
