Yohan 12

Maria asra kumu flafla aki Yesu ní Betania

1Agi bigɔ ewe teglo tɔ baŋa Kutseolidɔzawe le e, Yesu atrɛ ní Betania, Lazaro, onyime liɛ gi Yesu ayɔnɔ adɔ ni bekpo ʋa mɛ ɛ, yɛ ɔma nɔ mɛ. 2Bɛtɔ bilagɔdɔ ɛki yɛ níklɔ, Marta esumu ní ɔkplɔ nɔ su; Lazaro fɛ eze ní banama gi beze ɔkplɔ nɔ su ni Yesu kusi i. 3Lɛ Maria akɔ nad kumu flafla gi kwizi kedzi i, tukpa likpe akɔ abali ní Yesu kuklikpɔɔ xe akɔ yɛ siya sɛ etsoli i. Kumu yɔ ɔfũ nɔ ɛzi kepea petee me.

4Yesu yɛ badɔkpasi ba mɛ tole, Yuda Iskariot, ɔniliɛ gi yɛ atrábu ye kɔ ɛ, apani si, 5“Ege loso xe báda kumu liɔ ya gi kwiazi kibɔ pititi alafa tiata a, xe biakɔ kɛ ɔki bazianete ba na a?” 6Apani nite, aní si akɔ lɛ mɛ aki bazianete ba pɔ̀ lɛ ese linu si onu oze. Yɛ klɔ kibɔɛ kepimia kalɛ lɛ izɛɛkpɛ awla kɛ mɛ ɛ.

7Pɔ̀ Yesu apani si, “Mla yurɔ yɛ! kidiliɛ gi abitɛ ɛ, abitɛ kɛ aki mɛ livive we le. 8Bazianete ba kɔ bali ní mlɔ su lipoe kakaa, pɔ̀ mátraze mlɔ su i tsinɔ ɔ.”

Yudanɛ ma bɛnya ni Lazaro su

9Gi Yudanɛ glegle benu si Yesu ɔlɛ ní Betania ɛ, bɛtrɛ níklɔ aní Yesu tete loso pɔ̀ tɔ bɛɛmɔ Lazaro gi Yesu ayɔnɔ dɔni bekpo ʋa mɛ ɛ. 10Lɛ Kusumu yo baka ʋidi ba bɛbitɛ batrɔtrɔ tɔ beye Lazaro fɛ ɛ, 11lɛ ese linu si, kɔkpɛ yɛ loso o, Yudanɛ glegle beekyi kede kpɛ ba xe bɛɛzi Yesu aʋa ɛɛŋa a.

Yesu eti eku ní Yerusalem ŋwisi ɔʋaŋa kinɛ

12Keletitia mɛ ɛ, linɔkpi ʋidi itɔ gi liba Kutseolidɔzawe le me e, linu si Yesu ɔlɛ kudeo me gi atrába Yerusalem. 13Lɛ bɛkɔ siwlawla sɛ ɛ, xe bɛzɛtsani yɛ nì ozi si, “Hosana! Aya ɔkrira ɔniliɛ gi atrába ní Ɔkaɛ linyi ne me e! Aya ɔkrira Israel Okusi ye!” 14Yesu amɔ tedzi obi lɛ emu atrɔ yɛ aʋa ŋwisi kiliɛ gi kuŋwlimi dradra kwipani kinɛ ɛ si, 15“Mlakíse lifu u, mlɔ Zion bebi ʋa a! Mledi ke! mlɔ okusi ye atrába, ɔtini ní tedzi obi ye aʋa a.” 16Yɛ badɔkpasi ba bénu le ese ní lipoe lɛ klɔ mɛ ɛ; pɔ̀ gi bɛyɔni Yesu ní yɛ kuklekleo me e, bɛplɛ aŋu si kuŋwlimi dradraa kwipani nite ní yɛ su lɛ eboa la ya bɛbitɛ ɛyurɔ yɛ ɛ.

17Banama gi beze ní Yesu su u, xe axwa Lazaro edono ní ɔdrɔ lɔ mɛ ɛ, xe ayɔni yɛ adɔ ni bekpo ʋa mɛ ɛ, bɛzeehle liboe lɛ klɔ gi liba lɛ mɛ ɛ. 18Lɛ loso linɔkpi le lizɛɛtsani yɛ, lɛ ese linu si benu si abitɛ linugutseboe lɛ ya. 19Lɛ Farisianɛ ma bɛpani ki ba ahanuglɔ ba si, “Mlɛ mɔ, kuʋíbu kakli koŋu! Mledi, kelea petee kalɛ ni yɛ kude!”

Hela banɛ batɔ bɛpɛ si bɛɛmɔ Yesu

20Hela banɛ batɔ beze ní banama gi bɛtrɛ ní Yerusalem si beezesumu Aya ní liwe le me kusi i. 21Bɛtrɛ ní Filipo gi ádɔ Betsaida ní Galilea ɛ, klɔ lɛ bɛpani si, “Ɔka, kwipɛ si kumɔ Yesu.” 22Filipo kyɛ azɛɛsi Andrea lɛ batiaʋa bɛzɛsi Yesu i.

23Yesu ebu le onu aki ba si, “Lipoe le lina gi Ɔnɔɛ Yebi ye aazi kuklekle ʋidi i. 24Mɛɛsi mlɔ anukwarɛɛ si; limlɔbi tile e, nite ko liaze xe béglu le e, xe lítse e. Pɔ̀ xe litsé e, lɛ kɔ liayo ebi ní kisrɛsrɛ mɛ. 25Ɔniliɛ gi adimɛ ni yɛ ligbã nɛ ɛ, aalila lɛ; ɔniliɛ gi ɔ́dimɛ ni yɛ ligbã nɛ ni kelea lia mɛ ɛ, abla lɛ ɔki ligbã́ moblo le. 26Ɔnɔ kakaa gi apɛ si yiwa mɛ lixwɛ nɛ ɛ, lilɛ si okuni mɛ kude tɔ mɛ ɔnɔsumu ye aaze ni mɛ su níklɔ gi malɛ ɛ. Lɛ Mɔka Aya aakpɛ kubùbù ní ɔnɔ kakaa gi aawa mɛ axwɛ na su.

Yesu apani ní Yɛ kutseo su

27“Yesu apani si, “Abla ɛ, mɛ ɔna nɔ ɛxixa lɛ liboe woli pani i? Mipani si, ‘Kaka Aya kitɔ ɔnyɔsasaa lɔ ya ɔdɔ mɛ ɔza na a?’ Pɔ̀ lɛ loso maba atɔ miga ɔnyɔsasa lɔ ya kini mɔmɔɛ mɛ.” 28Kaka Aya, Kpɛ kukɔ́kɔ́ ní wɔ linyi ne su!

Lɛ ole ɔtɔ eyi idɔni lifunu ne si, “Makpɛ kukɔ́kɔ́ ní lɛ su, lɛ maakpɛ kukɔ́kɔ́ lɛ su dzɛ ɛ.” 29Linɔkpii lɛ gi lize níklɔ ɛ, linu ole lo, lɛ batɔ bɛpani si dzeni eegu u, batɔ fɛ si Aya ɔxwɛdzɛ yɛ egu kunugu aki yɛ ɛ!

30Pɔ̀ Yesu asi linɔkpi le si, “Aní mɛ loso ole lo egu kunugu yo, pɔ̀ mlɔ loso o. 31Abla kɔ ɛ, lipoe le lina gi Aya axwa litsi ni kelea mɛ banima a, lɛ aabu ba lipɔ ɔ; able lipoe le lina gi Aya aatí kelea lia ka ɔʋaŋa ɛ. 32Xegi bemuni me ní lifune e, maahe ɔnɔ kakaa pɔni isu ya.” 33Gi apani nite e, abasi kutse uliɔ elu gi atrátsé e.

34Linɔkpi le libu le onu si, “Blɔ Ɔsã nɔ ɛsi blɔ si, Kristo ye aaze ligbã́ moblo. Kitɛ wɔasi blɔ si, ‘lilɛ si bemuni Ɔnɔɛ Yebi ye e’? ‘Nyaŋwɛ onu Ɔnɔɛ Yebi liɛ ya a’?”

35Yesu ebu le onu si, “Kuklekleo kwiaze ní mlɔ kusi kɔna ni lipoe kpekpemi itɔ. Mlatrɛ ní mlɔ kudeo aʋa gi kuklekleo kulɛ ɛ, tɔ kele kakíblo ni mlo o. Ɔnɔ gi ɛɛga litumu ne me e, óʋite niklɔ gi ɛɛtrɛ ɛ. 36Mlazi kuklekleo aʋa aŋa, ni lipoe lɛ mɛ gi mlɛmɔ kɔ ɛ, tɔ mlaaze kuklekle me banɔ.” Gi Yesu apani nite pɔ ɛ, asɛ lɛ azeekpo isu ya ní ba su i.

Yudanɛ ma kumɔziŋaa

37Lilɛ lɛ mɛ si Yesu anya abitɛ enugutseboe la ní ba aŋu mɛ, pɔ̀ bázɛ yɛ aʋa aŋa a, 38tɔ liboe le gi Aya yɛ oboedoplɛɛ Yesaya apani aplɛ liba lɛ mɛ si,

“Ɔkaɛ, nyaŋwɛ azɛ wɔ liboe le gi kwipani aʋa aŋa a? Nyaŋwɛ Ɔkaɛ ebu yɛ kigaglaɛ abasɛ ɛ?”

39Lɛ loso bátani kuzi ŋa a, lɛ ese linu si Yesaya apani ní ɔkutɔ kyɛ si,

40“Aya eni ba bimbi ʋe

lɛ aki si ba begyodi ba mɛ bá dra,

tɔ ba bimbi ʋe biki mɔ

lɛ bátranu eboe ese ni ba begyodi ʋa kyɛ ɛ,

lɛ batrá kyi ba mɔkɔ ɔ

xe maayɔni ba a.”

41Yesaya apani te lɛ ese linu si amɔ Yesu yɛ kuklekleo lɛ apani ní yɛ su i.

42Pɔ kyɛ ɛ, Yudanɛ baka glegle bɛzi Yesu aʋa ɛɛŋa; pɔ̀ kɔkpɛ Farisianɛ ma loso e, bápani lɛ su ní banɔ kusi i, ni lifu si biabu bá ya ní Yudanɛ ma itsa klɔ. 43Lɛ ese linu si bɛdimɛ ni kukpɔ̀kpɔ̀ dɔni banima kɔ sani dɔni Aya kɔ ɔ.

44Yesu apani ni ole gagla si, “Ɔniliɛ gi azɛ mɛ aʋa aŋa ɛ, aní mɛ tete aʋa azɛ aŋa a, pɔ̀ azɛ ɔniliɛ gi yɛ akpɛ mɛ kyɛ aʋa aŋa a. 45Ɔniliɛ gi amɔ mɛ ɛ, amɔ ɔniliɛ gi akpɛ mɛ kyɛ ɛ. 46Maba kelea mɛ ŋwisi kani kinɛ ɛ, tɔ ɔnɔ kakaa gi azɛ mɛ aʋa ŋa ɛ, ɔki wɔ litumu ne me e.

47“Xe ɔnutɔ enu mɛ eboe la pɔ̀ ɔ́bitɛ ní la aʋa ɛ, Mátraxwa litsi ni yɛ ɛ, Mába kelea mɛ si míbu banima lipɔ ɔ, pɔ̀ tɔ míbu ba a. 48Ɔniliɛ gi egbe me xe ɔ́zɛ mɛ liboe le e, ɔnutɔ ɔlɛ gi axwa litsi ni yɛ ɛ. Eboa la gi mapani i, la ɛtrabu yɛ lipɔ ní liwe gɔgɔ lɛ aʋa! 49Lilɛ lɛ mɛ, lɛ ese linu si mápani eboe la ní mɛ kigagla mɛ ɛ, pɔ̀ Kaka gi yɛ akpɛ mɛ ɛ, yɛ aki mɛ eboa la gi maapani i, ni kiliɛ gi maado la a. 50Lɛ mete si yɛ ɔsã nɔ izɛɛmani ligbã́ moblo le e. Liboe lɛ gi mapani i, lɛ linu lɛ klɔ gi Kakaa Aya asi mɛ si mipani i.”

Currently Selected:

Yohan 12: avn

Highlight

Copy