Yohan 11

Lazaro yɛ Kutseo

1Onyime ɔtɔ gi bizɛxwa si Lazaro, gi adɔ Betania ɛ, ádɔ kunya. Betania eze ɔma lɔ klɔ mɛ gi Maria ni yenemidzɛ Marta beze e. 2Maria liɛ, yɛ onu ɔniliɛ klɔ gi enye kumu flafla abali ní Ɔkaɛ yɛ kuklikpɔ ɔ xe etsoli ko nì yɛ siya sɛ ɛ; yeneminyime onu Lazaro gi azeetse e. 3Lɛ loso e benemidzɛ ba bɛtsisi Yesu ole si, “Ɔkaɛ, wɔʋiɛ gi wɔlɔ́ ɛ eetse.” 4Agi Yesu enu liboe le e, apani si, “Kunya liɔ gi Lazaro ɛɛnya ɛ, aní kutsenya a, pɔ̀ liba lɛ mɛ tɔ Aya yɛ kigaglaɛ kiaŋwi lɛ gani Aya aʋa ɛ, Aya Yebi ye aazɛ kukpɔ̀kpɔ̀ ɔ.” 5Yesu alɔ Marta ní yenemidzɛ ani ba oneminyimee Lazaro. 6Pɔ̀ fɛ ɛ, gi ole lo ɛna yɛ si Lazaro eetse e, eze ní klɔ gi eze ewe taʋa apɔnɔ ɔ.

7Lɛ kede e, asi yɛ badɔkpasi ba si, “Mlaki tɔ kudzi trɛ ní Yudea.”

8Badɔkpasi ba bebu le onu si, “Ɔdɔbasɛ yɛ, Lipoe kpekpemi itɔ ko lɛ ya gi Yudanɛ ma bɛpɛ si bɛɛsa wɔ akla a; pɔ̀ lɛ wɔɛtrɔ si wudzitrɛ niklɔ na a?”

9Yesu apani si, “Inyɔ sasa liɔfɔ ni tiʋa ili ní liwe tile me putɔ aníte na a? Loso e, ɔniliɛ gi izɛɛga kemize e, ɔ́tramlima, lɛ ese linu si ɛɛmɔ kelea lia mɛ kuklekleo.” 10Pɔ̀ xe ɛɛga elesi me e, izɛɛmlima lɛ ese linu si ɔʋí mɔ kuklekle e.

11Gi Yesu apani eboa la ya ɛ, apɔnɔ si, “Blɔ ɔʋia ɛ Lazaro ɛɛdɔ sra, pɔ̀ mɛɛtrɛ tɔ mizeenyime ye e.”

12Yɛ badɔkpasi ba bebu le onu si, “Ɔkaɛ xegi sra ɛɛdɔ ɛ, kɔlɔ aayɔ ɔ.” 13Nya Yesu kɔ azaapani si kitse Lazaro etse, pɔ̀ yɛ badɔkpasi ba kɔ begyodi si sra ko azaadɔ ɔ.

14Lɛ Yesu adra lɛ mɛ asi ba si, “Lazaro etse e, 15pɔ̀ kɔkpɛ mlɔ loso e, lize mɛ ole si, méze ni klɔ xe etse e, tɔ mlaazi ŋa. Mlaki tɔ kutrɛ ní yɛ klɔ.” 16Lɛ Toma gi bizɛxwa si tiaʋa ba obi ye e, asi yɛ ɔha lɔ badɔkpasi ba si, “Mlaki tɔ blɔ kyɛ kutrɛ nì Ɔdɔbasɛ yɛ tɔ blɔ pɔ́ kwiatse ni ye!”

Yesu ayɔ ɔna aki Lazaro yɛ benemidzɛ ba

17Agi Yesu azeeku i, amɔ si Lazaro eze ni ɔdrɔ lɔ mɛ ewe tene koko. 18Betania ɔlɛ ŋwisi itiplɛkɔ tita kinɛ ɛ dɔnɔ ní Yerusalem, 19lɛ Yudanɛ glegle bɛba Marta ni Maria klɔ si bɛɛyɔ ba ina ní ba oneminyimee kutseo su u. 20Agi Marta enu si Yesu atrába ɛ, edo azɛɛtsani yɛ pɔ̀ Maria awɔ kepea mɛ ɛ.

21Marta asi Yesu si, “Ɔkaɛ, atɛsi woze ní ya ɛ, nya monemi ye ótse e! 22Pɔ̀ mete si ablate fɛ ɛ, Aya aaki wɔ kidɔ kakaa gi woʋi ye e.”

23Yesu asi yɛ si, “Wɔ oneminyimee aadzi ligbã́.”

24Marta ebu le onu si, “Mete si aadzi ligbã́ ní liwe gɔgɔ lɛ aʋa.”

25Yesu asi yɛ si, “Mɛ mizɛɛyɔ ni banɔ ɛdɔni bekpo ʋa mɛ xe mizɛɛki ba ligbã́ a. Ɔnɔ kakaa gi azɛ mɛ aʋa aŋa ɛ, xe etse fɛ ɛ, aaze ligbã́; 26lɛ ɔnɔ kakaa gi ɔlɛ ligbã́ a, xe azɛ mɛ aʋa aŋa ɛ, ɔ́tratse liwewe e. Wɔzɛ lɛ ya aʋa aŋa na a?”

27Ebu le onu si, “Ee, Ɔkaɛ! Mazi lɛ aʋa aŋa si wɔ wonu Kristo ye, Aya Yebi ye gi aaba kelea mɛ ɛ.”

28Agi Marta apani nite pɔ́ ɛ, edzi atrɛ lɛ azeebu yenemie Maria kuka le asi yɛ si, “Ɔdɔbasɛ yɛ aba lɛ eeʋi wɔ litukpo o.” 29Gi Maria enu liboe le e, ayɔ lɛ akɔsi azɛɛtsani yɛ ɛ. 30Yesu oʋíku kamamia mɛ ɛ, pɔ̀ edzi alɛɛ niklɔ gi Marta atsani yɛ ɛ. 31Yudanɛ ama gi beze ní kepea mɛ ɛ, xe bɛzɛyɔ Maria ɔna nɔ ɛ, bekuni yɛ kude gi bɛmɔ si ayɔ zia a, xe akɔsi edo e. Begyo edi si ɛɛtrɛ ní ɔdrɔ lɔ su si yizebemi.

32Gi Maria azeeku niklɔ gi Yesu ɔlɛ ɛ, xe amɔ yɛ ko e, adɔ yɛ ikli lɛ onu lɛ apani si, “Ɔkaɛ, atɛsi woze niya ɛ, nya moneminyimee ótse e!”

33Gi Yesu amɔ yɛ gi eebemi i, xe amɔ kiliɛ gi banima ní yɛ su fɛ bezeebemi i; limi yɛ aʋa lɛ atani i. 34Lɛ eʋi si, “Nifɔ mlevive ye e?”

Bebu le onu si, “Ɔkaɛ ga ba tɔ ga di.” 35Lɛ kube kwiwɔli ní Yesu aŋu mɛ ɛ.

36Lɛ Yudanɛ ma bɛsi ba ahanuglɔ ba si, “Mledi kiliɛ gi alɔ yɛ ɛ!”

37Pɔ̀ ba mɛ batɔ beʋi ba hanuglɔ ba si, “Aki si kaŋupoa kɛ mɔ, aníte e? Kitani ɔ́tratani kuki si onyime liɛ ɔ́tratse na a?”

Yesu ayɔ ni Lazaro adɔ ni bekpo ʋa mɛ

38Limi Yesu aʋa lɛ atani kuʋla dzɛ ɛ, lɛ atrɛ ni ɔdrɔ lɔ su i. Ɔdrɔ lɔ onu kuke gi bebu ikpɛ ní liklakpɔ mɛ ɛ, xe bɛkɔ likla ʋidi itɔ ɛda ní lɔ onu i. 39Yesu apani si, “Mlemli likla nɛ azanɔ!”

Marta, gi onu okpo ye yenemidzɛ, ebu le onu si, “Ɔkaɛ, ɔfũ nyaninyani ɔtɔ aaze. Bevive ye ewe tene la ya a!”

40Lɛ Yesu asi yɛ si, “Mási wɔ si wɔamɔ Aya yɛ kigaglaɛ xegi wɔzi ŋa na a?”

41Bemli likla nɛ ɛzanɔ. Lɛ Yesu edi lifunu ne lɛ apani si, “Kakaa Aya, medo wɔ ɖase si wuzɛɛta mɛ kutu xe maxwa wɔ ɛ. 42Mete si wuzeenu mɛ eboe la, pɔ̀ mapani nite kɔkpɛ banama gi bali ní ya loso o, tɔ biazɛ lɛ aʋa ŋa si wɔ́ wɔkpɛ mɛ.”

43Gi axwa Aya pɔ́ ɛ, axwa nì ole gagla si, “Lazaro do ba!” 44Okpo ye edo aba, bɛxla yɛ iwla lɛ ni ikli lɛ ni yɛ aŋu na mɛ ni basa ba gi bɛkɔ evive ye e.

Yesu asi ba si, “Mleble ye tɔ ɔsɛ.”

Yudanɛ ma bɛbitɛ kunyanya si biaye Yesu

45Yudanɛ glegle gi bɛba si bedi Maria a, xe bɛmɔ kidiliɛ gi Yesu abitɛ ɛ, bɛzi yɛ aʋa ɛɛŋa. 46Pɔ̀ batɔ bedzitrɛ ní Farisianɛ ma klɔ lɛ bɛsi ba kidiliɛ gi Yesu abitɛ ɛ. 47Lɛ Farisianɛ ma ni kusumu yo baka ʋidi ba bɛtsa nì Yudanɛ ma baka ba lihakpɔ lɛ, lɛ bɛpani si, “Ege kwibitɛ ɛ? Mledi enugutseboe ala gi onyime liɛ ɛɛbitɛ ɛ! 48Xe kwiki yɛ kudeo onu si ɔtrɛ lɛ aʋa te e, ɔnɔ kakaa aazi yɛ aʋa ŋa, lɛ Roma banɛ baka ba biayɔ ní blɔ su u, lɛ biayaʋi blɔ Lisɔligba lɛ kɔ bɛzi blɔ kesea ɛ!” 49Ba mɛ tole gi yɛ linyi si Kayafa a, gi eze Kusumu yo Ɔka ʋidi ye ni ligɔɛ lɛ klɔ mɛ ɛ, apani si, “Mléte liboe lɛ gi liiba koŋ u! 50Futɔ mléte si lipɛ sanɔ si mlaki tɔ ɔnɔ tole otse ní banima petee litukpo, si tɔ kesea petee kakyrɔ na a?”

51Sugba ɛ, ɔ́pani liboe lɛ ya ní yɛ ɔtutɔ yɛ isu wla mɛ ɛ; pɔ̀ gi eze Kusumu yo Ɔka ʋidi ye ni ligɔɛ lɛ klɔ mɛ ɛ, azeedo liboe aplɛ si Yesu atrátse ní Yuda kesea petee litukpo. 52Lɛ aní kí ba tete e, pɔ̀ tɔ ɔkpɛ Aya yɛ banama petee gi behle eku kelea mɛ likpɔ ɔ. 53Dɔni liwe lɛ klɔ aʋa kɔtsinɔ ɛ, Yudanɛ baka ba bɛ́nya nɛ lɛ bɛzɛpɛ́ kudeo liɔ onu gi biaga a, xe biaye Yesu i.

54Lɛ loso Yesu ɔ́zeedo ní Yudanɛ ma kusi tɔ ɔ, pɔ̀ asɛ lɛ atrɛ níklɔ gi eti ipɔni ɔyaya kɔ ní Efrayim kamamia mɛ ɛ, niklɔ eze ni yɛ badɔkpasi ba.

55Lipoe le lina pɔ́ ki Kutselidɔzawe le kuŋaŋaa, lɛ banɔ glegle bɛdɔ ní ba izeklɔ lɛ bemu itrɛ ní Yerusalem tɔ bezeexo kusuplo ligoʋi le kpɛ ɔtɔ ɛki liwe le e. 56Bɛzɛɛpɛ́ Yesu, lɛ gi bɛkpɛ likpɔ ní Lisɔligba lɛ mɛ ɛ, beʋi ba ahanuglɔ ba si, “Kitɛ wogyodi i? Atrába liwe le me, futɔ ɔ́traba na a?” 57Pɔ̀ Kusumu yo baka ba ni Farisianɛ ma bɛki ɔsã ɛplɛ si, xe ɔnutɔ ete niklɔ gi Yesu ɔlɛ ɛ, lilɛ si ɔga ki kutète, tɔ biavu ye.

Currently Selected:

Yohan 11: avn

Highlight

Copy