Axwɛ 9

Saulo ekyi evu Yesu

1Ni lipoe lɛ klɔ mɛ ɛ, Saulo atrɛ ní yɛ anɔyeboe la ni lifu kpɛkpɛ lɛ aʋa ní banama gi beze ni Ɔkaɛ kude e su. Atrɛ ní Kusumu yo Ɔka ʋidi ye klɔ. 2Lɛ azeeʋi i, xe bɛŋwlimi kuplekpa gi kwibu ye basɛ kusumu yo baka ba a, ní Yudanɛ ma ɔtsaklɔ ní Damasko, si xegi yɛ amɔ banɔatɔ gi bekuni Ɔkaɛ kude niklɔ ɛ, aatani ba kuvu, benyime ni badzɛ dzini manɔ ní Yerusalem.

3Gi Saulo eze ní kudeo aʋa a, xe eti apɔni Damasko e, kyɔŋ klɔ ko e, kuklekle dɔni lifunu ne kwikle klani yɛ. 4Egleʋe adɔ kesea lɛ enu ole ɔtɔ gi ɛɛxwa yɛ si, “Saulo, Saulo! Ege lɛ loso wɔɛyɔ kedu ní mɛ su u?”

5Lɛ Saulo eʋi si, “Wɔ wonu nyaŋwɛ, Ɔkaɛ ɛ?” Lɛ ole lo ɛpani si, “Mɛ menu Yesu gi yɛ su wɔyɔ kedu ya, 6pɔ̀ yɔ tɔ trɛ ní ɔma ʋidi no me e, níklɔ biasi wɔ kidiliɛ gi lilɛ si bitɛ ɛ.”

7Benyime ba klɔ gi bani Saulo bɛzɛga ɛ, bɛlɛɛ gi onugu óyi ba a, benu ole lo pɔ̀ bámɔ ɔnɔnɔ ɔ. 8Gi Saulo ayɔ ní kesea a, xe adra yɛ bimbi ʋe e, ɔ́tani kididɔ kumɔ ɔ. Lɛ loso kivu bevu yɛ ɔwla lɔ, xe bɛgbani yɛ tsinɔ Damasko ɔma nɔ mɛ ɛ. 9Kɔki ewe tata ɛ, ɔ́tani kididɔ kumɔ ɔ, lɛ ní lipoe lɛ klɔ mɛ ɛ, ɔ́ŋa lɛ ɔ́ŋwɛ kididɔ ɔ.

10Ɔʋaziŋa ɔtɔ eze ni Damasko gi bɛzɛxwa si Anania, yɛ amɔ kububasɛ gi Ɔkaɛ axwa yɛ si, “Anania!” ebu le onu si, “imɔ mɛ ní ya Ɔkaɛ.”

11Lɛ Ɔkaɛ asi yɛ si, “Bla tɔ trɛ ní ablɔ liɛ gi bizɛxwa si Ɔgyɔgyɔɛ aʋa a, ní Yuda kepea mɛ tɔ ʋi onyime ɔtɔ gi ádɔ ní Tarso litukpo o, yɛ linyi ne linu Saulo, ɛɛxwa Aya, 12lɛ amɔ ní kububasɛ mɛ si wɔ Anania wɔbatrɔ awla ní yɛ aʋa a, tɔ ɔtani bidɔ kumɔ dzɛ.”

13Lɛ Anania ebu le onu si, “Ɔkaɛ, banɔ glegle bɛpani ní onyime liɛ ya su isi mɛ ní litukpo me gagla lɛ gi abitɛ ní wɔ baʋaziŋa ba su ní Yerusalem i. 14Lɛ aba Damasko ni kigagla dɔni kusumu yo baka ʋidi ba kɔ ɔ, si tɔ yivu banama petee gi beesumu wo e.”

15Lɛ Ɔkaɛ asi Anania si, “Trɛ lɛ ese linu si makya yɛ tɔ osumu me, atɔ ɔki tɔ bete mɛ linyi ne ní banama gi bénu Yudanɛ ɛ, ni bekusi ba ani Israelbanɛ ma kusi. 16Lɛ mɛ ɔtutɔ maabasɛ yɛ kiliɛ gi linu si ɔmɔ kini ní mɛ litukpo e.”

17Lɛ loso Anania atrɛ, eti eku kepea lia mɛ gi Saulo ɔlɛ ɛ, lɛ atrɔ awla yɛ aʋa a, xe apani si, onemi Saulo, Ɔkaɛ yɛ akpɛ mɛ, Yesu ɔtutɔ gi yɛ ebu isu abasi wɔ ní kudeo aʋa a gi wɔtraba ní ya ɛ. Yɛ akpɛ mɛ si tɔ wɔamɔ dzɛ atɔ wɔazɛ Aya yɛ Ɔfuɛfuɛ nɔ. 18Kyɔŋ ko e, kiditɔ ŋwisi siklui kinɛ kiwɔli ní Saulo yɛ bimbi ʋe aʋa lɛ atani bidɔ kumɔ dzɛ ɛ. Ayɔ lɛ bɛkpɛ kuni kí yɛ ɛ. 19Lɛ gi aŋa bidɔ pɔ́ ɛ, yɛ kigaglaɛ kidzi kú yɛ mɛ.

Saulo asɔli ní Damasko

Saulo eze ní baʋaziŋa ba kusi ní Damasko ewe klakla atɔ. 20Eti eku ní Yudanɛ ma itsaklɔ lɛ azaasɔli si Yesu yɛ onu Aya Yebi ye.

21Banama petee gi benu yɛ liboe le e, ba inugu itse lɛ beʋi si, “Aní yɛ onu ɔniliɛ gi azeeye banama gi bezeesumu onyime liɛ klɔ Yesu ní Yerusalem na a? Lɛ aní kiba aba ní ya niteme ke si yivu banɔaklɔ ba dzini tsini kusumu yo baka ʋidi ba na a?” 22Pɔ̀ Saulo liboe le kudodoo kwize kifu, lɛ yɛ likla trɔtrɔ lɛ ní lɛ aʋa si Yesu yɛ onu Kristo ye e, liku aŋu gbɛgbɛ nite si Yudanɛ ba ya gi bali ní Damasko e, bátani yɛ onu kulɛɛ ɛ.

23Ewe glegle atɔ kede e, Yudanɛ ma bɛtsa lɛ bɛtrɔ si biaye ye e, 24pɔ̀ bɛga ba batrɔtrɔ ʋa ese si yɛ ɛ. Elesi ni kemize bezeni aŋu ní ɔma ʋidi no kuvunu yo tɔ beye ye. 25Pɔ̀ elesiatɔ ɛ, baʋaziŋaa ba klɔ kɔ gi Saulo eze e, bɛgbani yɛ, lɛ bɛkpɛ yɛ kasɔʋi mɛ gani yɛ ní liwuitɔ ní ligli le me pleni kpɛ kesea ɛ.

Saulo aba Yerusalem

26Saulo aba Yerusalem lɛ ekeni edi si yize ní baʋaziŋa ba kusi i. Pɔ̀ bázɛ yɛ aʋa aŋa si onu ɔʋaziŋa a, lɛ ba petee bezese ye e. 27Pɔ̀ Banaba apɔni yɛ ɛ, lɛ agbani yɛ atsini Aya yɛ banɔkpɛkpɛ ba a. Ebu lɛ mɛ aki ba kiliɛ gi Saulo amɔ Ɔkaɛ ní kudeo aʋa a, xe Ɔkaɛ egu kunugu aki yɛ ɛ. Asi ba kiliɛ gi Saulo apani liboe le ní Yesu linyi ne me ní Damasko lifumose e. 28Lɛ loso e, Saulo eze ní basu, lɛ aklani Yerusalem petee e, xe azaapani liboe le ní Ɔkaɛ linyi ne me lifumose e.

29Ehe eboe ni Yudanɛ ba klɔ gi benu si Hela sɛ ɛ, pɔ̀ bekeni edi si beye ye e. 30Gi baʋaziŋa ba benu le e, bɛgbani Saulo tsini Kaisarea lɛ bɛtsisi yɛ ní Tarso e.

31Lɛ liki si baʋaziŋa ba ɔha lɔ ní Yudea, Galilea ni Samaria petee bɛmɔ kusuyɔ ɔ. Gani Aya yɛ Ɔfuɛfuɛ nɔ kupɔnɔɔ mɛ ɛ, ɔha lɔ ɛmɔ kigagla lɛ etsi ní kisrɛsrɛ mɛ ɛ, gi beze Ɔkaɛ kusese me e.

Petro atrɛ ní Lida ni Yopa

32Agi Petro aklanɔ ní kesea petee me e, adzɛ si yizeedi Aya yɛ banima ní Lida. 33Niklɔ atsani onyime ɔtɔ gi bɛzɛxwa si Ainea a, gi aklɔʋi i, xe ɔ́zɛ tani kuyɔ ní yɛ ɔtɔsi lɔ aʋa agɔ ɔgɔtaʋa a. 34Petro asi yɛ si, “Ainea, Yesu Kristo ayɔ ni wɔ, yɔ tɔ klɔʋi wɔ ɔtɔsi lɔ.” Kyɔŋ ko lɛ Ainea ayɔ ɛ. 35Banama petee gi beze ní Lida ni Saron bɛmɔ yɛ ɛ, lɛ bekyi vu Ɔkaɛ ɛ.

36Ɔdzɛ ɔtɔ eze ní Yopa gi eze ɔʋaziŋa, yɛ linyi lize Tabita gi lɛ ese linu si Klatsa loo Dɔkas ní sì Hela sɛ mɛ. Akɔ yɛ lipo le me petee apɔni bepiplinete ba gani eboe gbã kubitɛ mɛ. 37Ní lipoe lɛ klɔ mɛ ɛ, adɔ kunya lɛ etse e. Bewlo ni yɛ okpo ye lɛ bɛplɛ yɛ ní abaa la ligba ɛtɔ mɛ ɛ. 38Gi Yopa ɔ́sadze ní Lida su loso e, gi baʋaziŋa ba ní Yopa benu si Petro aba Lida ɛ, bɛkpɛ benyime tiaʋa tsisi yɛ ni ole si, “Kwiki wɔ litukpo kɔsi tɔ ba blɔ klɔ kyɔŋ.” 39Petro abla lɛ ekuni ba kude e. Gi aba eku i, bɛtsini yɛ ní abaa la aʋa, niklɔ gi batrɛtrɛ ba bedze ba petee bɛklani Petro ni kube e, xe bɛbasɛ yɛ ewu la ni bidɔ kpɛkpɛ kakaa gi Dɔkas akami aki ba ní yɛ ligbã́ nɛ mɛ ɛ.

40Petro ebu ba petee ní ligba lɛ mɛ, lɛ eze ní aklamasi aʋa a, xe axwa Aya ɛ, lɛ gi ekyi edi okpo ye e, apani si, “Tabita, yɔ!” adra yɛ bimbi ʋe, lɛ gi amɔ Petro e, ayɔ eze. 41Petro evu yɛ ɔwla lɔ lɛ apɔni yɛ xe ayɔ ɔlɛ ɛ. Lɛ axwa baʋaziŋa ba petee, kɔpɔni batrɛtrɛ ba bedze ba a, lɛ akɔ yɛ akpɛ ba awla ɛ. 42Liboe lɛ ya likaka eku ní Yopa petee lɛ banɔ glegle bɛzi Ɔkaɛ aʋa ɛɛŋa ɛ. 43Lɛ loso Petro eze ní Yopa ewe glegle ní Simon kugaplekpa su ɔxwɛwa yɛ klɔ ɔ.

Currently Selected:

Axwɛ 9: avn

Highlight

Copy