Axwɛ 8

1Saulo eze ní klɔ gi bɛzɛɛsa Stefano akla na ɛ, lɛ atrɔ awla ní yɛ kuyeyeo aʋa a.

Saulo Ayɔ kedu ní baʋaziŋa ba su

Dɔni liwe lɛ klɔ ke aʋa ɛ, banima bekpese kini zimizi kubu ki baʋaziŋa ba ní Yerusalem. Baʋaziŋa ba petee behle ku ní Yudea ni Samaria bidɔ mɛ mɛ̀, banɔkpɛkpɛ ba ko bɛgɔ. 2Banɔatɔ gi bizese Aya ɛ, bezevive Stefano yɛ okpo ye, lɛ bebemi ye fɔ̃ɔ.

3Pɔ̀ Saulo atrɔ lɛ si yiyaʋi baʋaziŋa ba likpɔkpɛkpɛ lɛ; etiku kupeo me, lɛ ehe banama gi bɛziŋa ɛ, badzɛ ni benyime akpɛ ligba.

Filipo edo liboe gbã nɛ ní Samaria

4Banama gi bɛziŋa ɛ, besehle lɛ bɛzɛpani liboe le ní ɔkɔ kakaa gi bɛtrɛ ɛ. 5Filipo kɔ ɛ, atrɛ ní ɔma ʋidi ɔtɔ mɛ ní Samaria, lɛ asɔ̀li Kristo aki banima níklɔ ɛ. 6Linɔkpi le lita liboe lɛ gi Filipo apani kutu mɔmɔmɔ ɔ, gi bezeenu yɛ kupaniɔ ɛ, lɛ bɛmɔ eboe mamɔ edi ala gi abitɛ ɛ. 7Ifuɛfuɛ zimizi ne ido eza ní banɔ glegle me ni izí gagla, lɛ banɔ glegle gi ba kapɛ tiele ketse e, ni banɔ gi bɛklɔʋi i, ba petee bɛyɔ. 8Lɛ loso isami glegle ize ní ɔma ʋidi ɔlɔ klɔ mɛ.

9Onyime ɔtɔ gi bɛzɛxwa si Simon eze ní klɔ ɔ, lɛ kɔki lipoetɔ ɛ, aki Samaria banɛ ma inugu itse nì yɛ bawa ʋa. Izefeke isu ya si yenu ɔnɔ ʋidi, 10lɛ ɔnɔ kakaa ní ɔma ʋidi no me dɔni kilɛlɛ kakaa mɛ ɛ, izɛta yɛ kutu, lɛ izɛpani si, “yɛ onu Aya yɛ kigaglaɛ kapɛa lia klɔ gi bizɛxwa si ‘kigagla ʋidi ye.’ ” 11Bizɛta yɛ kutu lɛ ese linu si kí lipoe gblamadzaɛtɔ ɛ, aki ba inugu itse ni yɛ bawa ʋa. 12Pɔ̀ gi bɛzi Filipo liboe le aʋa ɛɛŋa ní Aya kukusi ŋaŋa ni Yesu Kristo liboe gbã nɛ su i, bɛkpɛ kuni kí ba, benyime ni badzɛ. 13Simon ɔtutɔ fɛ aziŋa, lɛ gi bɛkpɛ kuni kí yɛ pɔ́ ɛ, amìnì ni Filipo lɛ bize linugutseboe kí yɛ gi amɔ eboe mamɔ edi ʋidi ala gi ɛzɛba la mɛ ɛ.

14Gi banɔkpɛkpɛ ba ní Yerusalem benu si banima ní Samaria bɛzi Aya liboe le e, bɛkpɛ Petro ni Yohanes tsisi ba. 15Agi bezeku i, bɛxwa Aya ní banama gi bɛziŋa litukpo o, tɔ bazɛ Aya yɛ Ɔfuɛfuɛ nɔ 16lɛ ese linu si bamɛ ɔ́tɔtɔ ɔʋízɛ Aya yɛ Ɔfuɛfuɛ nɔ sukɔ ɔ, kuni ko bɛkpɛ kí ba ní Ɔkaɛ Yesu linyi ne me. 17Lɛ Petro ni Yohanes bɛtrɔ awla ní ba aʋa a, lɛ bɛzi Aya yɛ Ɔfuɛfuɛ nɔ ɛ.

18Simon amɔ si bɛki banama gi bɛziŋa ɛ Ɔfuɛfuɛ nɔ gi banɔkpɛkpɛ ba bɛtrɔ awla ní ba aʋa ɛ. Lɛ azɛɛki Petro ni Yohanes kibɔ ɔ, 19lɛ apani si, “Mlaki mɛ kyɛ kigaglaɛ liɛ ya, tɔ ɔnɔ kakaa aʋa gi maatrɔ awla ɛ, tɔ ɔzɛ Ɔfuɛfuɛ Dradra nɔ ɔ.”

20Pɔ̀ Petro ebu le onu aki yɛ si, “Atɔ wɔ ni wɔ kibɔɛ mlatrɛ ní kifu moni ye me, gi wogyodi si wɔatani Aya yɛ bidɔkɔkɔ ʋɛ kudzi ni kibɔ ɛ! 21Ɔbitɛkɔ loo ɔŋakɔ ɔma ní wɔ awla ní blɔ axwɛwawa la mɛ ɛ, lɛ ese linu si wɔ ɔna mɛ ɔ́dra ní Aya aŋu mɛ ɛ. 22Lɛ loso kyi ɔna mɛ ní wɔ kutrɔtrɔ zimizi uliɔ gi wɔ̀trɔ su u, tɔ xwa Ɔkaɛ nyafɛ akɔ wɔ begyodi zimizi ʋa ya kukyɛ wɔ. 23Lɛ ese linu si mamɔ si kaŋuzã tiitii kalɛ ní wɔ mɛ, lɛ wonu ɔnɔdzidzi ki eboe zimizi i.”

24Lɛ Simon asi ba si, “Maki litukpo o, mlaxwa Aya ní mɛ onu tɔ eboa la ya gi wɔpani i, la mɛ litɔtɔ likí ba mɛ aʋa.”

25Gi Petro ni Yohanes bɛŋa katsalia ɛki ba pɔ́ ɔ, xe bɛpani Ɔkaɛ liboe le e, bedzitrɛ ní Yerusalem. Ní ba kudeo aʋa ɛ, bɛpani Liboe Gbã nɛ ní Samaria kumami glegle me.

Filipo apani aki Ethiopia ɔnɛɛ

26Ɔkaɛ yɛ ɔxwɛdzɛ ɔtɔ asi Filipo si, “Bla tɔ trɛ ní kaala kudeo gi kwidɔ Yerusalem i trɛ ní Gaza aʋa,” gi kunu ɔyayakɔ kude e. 27Lɛ abla xe atrɛ ɛ, lɛ ní kudeo aʋa ɛ, atsani Ethiopiaɔnɛ ɔdɔaʋadi ɔtɔ gi bebu ye agùaza ɛ, xe azeedi Ethiopia okusidzɛɛ Kandake yɛ kepimia petee aʋa a, aba Yerusalem Aya ɔxwa kɔ, 28lɛ gi edziisɛ trɛ ní kepea ní yɛ kìke loo tasiaɖam yɛ mɛ ɛ, azɛɛkla oboedoplɛɛ Yesaya yɛ keplekpaa. 29Lɛ Aya Ɔfuɛfuɛ nɔ ɛsi Filipo si, “Tipɔni kìke ye tɔ ze ní yɛ su.”

30Gi Filipo ese atsani kìke ye e, enu gi onyimee ɛɛkla oboedoplɛɛ Yesaya yɛ keplekpaa; lɛ Filipo eʋi ye si, “Woenu liboe lɛ gi wɔɛkla ese na a?”

31Ɔka ʋidi ye ebu le onu si, “Kitɛ maanu lɛ ese e, xe ɔnɔnɔ óbu lɛ ese ɔ́ki mɛ ɛ?” Lɛ eʋi adɔ ni Filipo kɔ si omu oku ní kìke yɛ mɛ tɔ oze ní yɛ su u.

32Liboe lɛ gi azaakla ní kuŋwlimi dradra mɛ ɛ, lɛ linu si,

“Bɛgbani yɛ ŋwisi oʋesi gi bɛtreye e,

lɛ kiliɛ gi keʋesibi ya kizɛlɛɛ kpoo ní ɔniliɛ gi izɛha yɛ sipi se aŋu mɛ ɛ,

nite ke yɛ fɛ ɔ́yaka onugu u.

33Bɛkpɛ yɛ kakpaa, lɛ ɔnɔnɔ ɔma gi azɛ yɛ onu u.

Ɔnɔnɔ ɔ́tratani kupani ní yɛ besoebi ba su u,

lɛ ese linu si yɛ kesea aʋa ligbã nɛ lidu.”

34Lɛ Ɔka ʋidi ye eʋi Filipo si, “Si mɛ, nyaŋwɛ su oboedoplɛɛ ɛɛpani eboa la ya a? Yɛ ɔtutɔ su loo ní ɔnɔ dzedzeɔtɔ su na a?” 35Lɛ Filipo ekpese kupani dɔni kuŋwlimi yɔ kapɛ alia ya aʋa a, xe asi yɛ liboe gbã nɛ ní Yesu su í.

36Gi bɛzɛɛtrɛ ní kudeo aʋa ɛ, bɛzɛna ɔkutɔ gi kuni kutɔ kwize e, lɛ ɔka ʋidi ye apani si, “Di kuni kuliɔ ya. Ege kiatsi kude kí kuni kpɛkpɛ kimɛ ɛ?” 37Filipo asi yɛ si, “Xegi wɔziŋa ni wɔ ɔna nɔ petee e,” Onyimee apani si, “Mazi aŋa si Yesu Kristo Yɛ onu Aya Yebi ye.” 38Lɛ ɔka ʋidi ye aki si kìke ye ɔtɔ ɔ. Lɛ ɔka ʋidi ye ni Filipo beple eku ní kuni yo me e, lɛ Filipo akpɛ kuni aki yɛ ɛ. 39Gi bedo ni kuni yo me e, Aya yɛ Ɔfuɛfuɛ nɔ efeke Filipo esɛnɔ. Lɛ ɔka ʋidi ye ɔ́mɔ yɛ tɔ ɔ, pɔ̀ atrɛ ní yɛ kudegaga aʋa ni isami. 40Pɔ̀ Filipo kɔ azeedo ní Azotus lɛ atrɛ ní Kaisarea ɛ, lɛ ní kudeo aʋa ɛ, edo liboe gbã nɛ ní ɔma kakaa mɛ.

Currently Selected:

Axwɛ 8: avn

Highlight

Copy