Axwɛ 3

Petro ayɔni onyime ɔtɔ gi ɔ́zɛtani kuga ɛ

1Liwe etɔ lɛ ɛ, Petro ni Yohanes bɛzɛtrɛ ní lisɔligba lɛ mɛ ní kemize inyɔ tita mɛ, Aya lixwapoe le. 2Onyime ɔtɔ gi bɛpɔ bafa a, xe ɔ́zɛtani kuga yɛ ligbã́ nɛ mɛ petee e, eze ní kevunu ya lia gi bizɛɛxwa si kevunu u gi Kepeedi i onu. Bezeefeke ye manɔ ní kevunu ya liwe kakaa si tɔ ɔzeeʋi kibɔ ní banama gi beetiku ní lisɔligba lɛ mɛ ɛ awla. 3Agi amɔ Petro ni Yohanes gi beetiku i, eʋi ba si baki yɛ kibɔ. 4Bedu aŋu ní yɛ aʋa, lɛ Petro apani si, “Di blo!” 5Lɛ edi ba ɛ, ni kugyodi si bɛtráki yɛ kiditɔ.

6Pɔ̀ lɛ Petro asi yɛ si, “Kibɔ ɛ tɔtɔ kíma ní mɛ awla a, pɔ̀ maaki wɔ kidiliɛ gi kilɛ ní mɛ awla ɛ; ní Yesu Kristo Nazaret ɔnɛɛ linyi ne me e, mɛɛsi wɔ si yɔ tɔ ga!” 7Lɛ petro evu yɛ ɔŋawla lɔ kawlakpɔa lɛ apɔni yɛ xe ayɔ ɛ. Ní lɛ onu klɔ ko e, kigagla kiku onyimee yɛ kuklikpɔ ni yɛ aklamasi na mɛ. 8Lɛ ayɔ lixu le e, xe ɔlɛɛ ní yɛ ikli lɛ aʋa ɛ, ko lɛ ekpese kuga klanɔ ɛ. Lɛ eti eku ní lisɔligba lɛ mɛ ni ba a, gi azaaga a, xe azaayɔ exu la a, xe azakpɔ Aya ɛ. 9Gi banima petee niklɔ bɛmɔ yɛ ɛ, gi ɛga a, xe ɛɛkpɔ Aya ɛ, 10bɛmɔ yɛ egyesi si yɛ eze ɔdɔʋi ye gi eze lisɔligba lɛ kevunu ya a, gi bizɛxwa si kepeedi onu u, litu ba kugyɔ lɛ ba petee inugu itse ní liboe lɛ gi liba lɛ mɛ ɛki yɛ su u.

Liboe lɛ gi Petro asi banima ní Lisɔligba lɛ mɛ ɛ

11Gi onyimee asu ní Petro ni Yohanes su ní Salomo ɔviva nɔ ɛ, lize linugutseboe kí banima lɛ bese ba exogo ní basu i. 12Gi Petro amɔ banima ɛ, asi ba si “Israelbanɛ ma, ege loso mlɔ inugu itse ní liboe lɛ ya su u, lɛ ege loso mledu aŋu blɔ aʋa a? Kigyo mlegyo edi si gani blɔ kigagla mɛ loo gani blɔ Aya kuseseo me kwiki onyime liɛ ya ɛɛga na a? 13Abraham, Isak ni Yakob Aya, blɔ bakatsi ba Aya yɛ emuni yɛ osumubi Yesu. Pɔ̀ mlebu ye kí Yudanɛ baka ba, lɛ mlɛdzi kede ní yɛ su ní Pilato aŋu mɛ ɛ, gi nya apɛ si yiyurɔ yɛ xe e. 14Eze ɔnɔ dradra ni ɔnɔ gbã pɔ̀ mlɛdzi kede ní yɛ su u, boŋu i, mleʋi Pilato si tɔ ɔyurɔ ɔnɔyee ɔki mlɔ. 15Mlɛki beye ɔniliɛ gi izɛɛki banima ligbã́ nɛ ɛ, pɔ̀ Aya ayɔ ni yɛ dɔni bekpo ʋa mɛ ɛ, lɛ kunu katsalia aki lɛ. 16Yɛ linyi ne kigaglaɛ kɛ kiki bafa liɛ ya kigagla. Kidiliɛ gi mlɛmɔ ɔ, xe mlete e, kɛ kiba kɛ mɛ gani kuziŋaa ní yɛ linyi ne me aʋa; kuziŋaa ní Yesu me e, kɔ kwiyɔni yɛ, kiliɛ gi mlɔ pɔ́ mlɛɛmɔ ɛ.

17“Lɛ abla ɛ, mɛ benemi ba, Mete si kidiliɛ gi mlɔ ni mlɔ baka ba mlɛbitɛ mani Yesu su i, mlɛbitɛ kɛ ní kumotemote me. 18Aya edo le aplɛ kooko gani beboedoplɛ ba aʋa si, yɛ Kristo ye aamɔ kini, lɛ aki liba lɛ mɛ ní kudeo liɔ klɔ aʋa ɛ. 19Lɛ loso mlekyi ɔna mɛ tɔ mlekyi evu Aya tɔ aakɔ̀ mlɔ eboe zimizi na kyɛ mlɔ. Xegi mlékyi i, 20Ɔfuɛfuɛ nɔ mɛ kigaglaɛ lipoe le litrába dɔni Ɔkaɛ klɔ, lɛ aakpɛ Yesu gi onu Kristo ye e, gi ebu aki mlɔ koko e. 21Linu si oze ní lifunu ne zɛkɔna ni lipoe lɛ gi Aya aabitɛ kidɔ kakaa vuvu i, kiliɛ gi Aya apani gani yɛ beboedoplɛ dradra ba a, gi bezee zanɔ aʋa a. 22Mose apani si, ‘Mlɔ Ɔka Aya aatsisi mlɔ oboedoplɛ kiliɛ gi akpɛ mɛ ɛ, lɛ aaze mlɔ tutɔ mlɔ ɔnɔ ɔ. Linu si mlabitɛ ní kidɔ kakaa gi asi mlɔ si mlabitɛ ɛ, aʋa. 23Ɔnɔ kakaa gi ɔ́zɛ oboedoplɛ yɛ liboe le e, biabu ye zanɔ ní Aya banima kusi lɛ biakyrɔ yɛ ɛ.’

24“Sugba Aya beboedoplɛ ba petee dɔni Samuel aʋa gi bɛpani liboe plɛ ɛ, bɛpani ní kidiliɛ gi kiba kɛ mɛ ní ewe ala ya mɛ ɛ su. 25Aya yɛ kakaplɛa gani yɛ beboedoplɛ ba aʋa ɛ, kenu mlɔ kanɛ, lɛ mlɛmɔ ɔŋakɔ ní kunyanya gi Aya abitɛ aplɛ ní mlɔ bakatsi ba mɛ ɛ, kiliɛ gi apani aki Abraham si i, ‘gani wɔ besoebi ba aʋa ɛ, maakrira banima petee ní kesea aʋa.’ 26Lɛ loso Aya akya Yebi ye, xe atsisi yɛ mlɔ klɔ kpɛ ɔtɔ ɔ, tɔ aakrira mlɔ tɔ aabitɛ mlɔmɛ ɔkakaa tɔ aamɔni yɛ eboe zimizi na.”

Currently Selected:

Axwɛ 3: avn

Highlight

Copy