Axwɛ 15

Banɔkpɛkpɛ ba ni ɔsɔli ha lɔ Banɔtsi ba Kutsatsa ní Yerusalem

1Banɔatɔ bɛdɔ Yudea gi bɛba Antioxia a, lɛ bɛzɛbasɛ benemi ba bidɔ ɔ si, “Xegi bátsa ɔyaʋi aki mlɔ ní Mose ɔsã nɔ onu i, mlatrámɔ kubúbú u.” 2Liboe lɛ ya limani kuboehe ni eboe me kukyakya glegle ní Paulo ni Banaba ani ba kusi. Lɛ loso baʋaziŋa ba bɛtrɔ lɛ si Paulo, Banaba kɔpɔni bamɛ batɔ batrɛ ní banɔkpɛkpɛ ba ni ɔha lɔ mɛ banɔtsitsi ba gi bali ní Yerusalem i, klɔ tɔ bazɛmɔ ba ní liboe lɛ ya su.

3Baʋaziŋa ba bɛkpɛ ba kude lɛ bɛga Foenike ni Samaria a, gi bɛzɛpani ní kiliɛ ɛ gi banama a gi bénu Yudanɛ ɛ bekyi vu Ɔkaɛ su u. Gi lidzi isami ʋidi ki baʋaziŋa ba petee e. 4Gi beku Yerusalem i, baʋaziŋa ba ni banɔkpɛkpɛ ba ani ɔsɔli ha lɔ banɔtsitsi ba bɛzi ba: lɛ bɛbɔ ba amani yɛ ní kidɔ kakaa ɛliɛ gi Aya abitɛ gani ba aʋa su u.

5Pɔ̀ banɔatɔ gi bɛdɔ Farisianɛ ma likpɔ lɛ mɛ ɛ, banama gi bakɔ bɛzi ŋa ɛ, bɛyɔ kedu, lɛ bɛpani si, “Lilɛ si, batsà ɔyaʋi aki banama gi bénu Yudanɛ ɛ, tɔ batrɔ aki ba si, bevu Mose ɔsã nɔ mɛ ní awla.”

6Nite si banɔkpɛkpɛ ba ni banɔtsitsi ba bɛtsa tɔ beevu liboe le edi. 7Agi bevu liboe le edi kɔna ni lipoetɔ ɛ, Petro ayɔ alɛɛ kedu ya lɛ apani si, “Beneminyime ba, mlete si tsã ɛ Aya akya mɛ adɔ ní mlɔ kusi tɔ banama gi bénu Yudanɛ ɛ, bianu liboe Gbã nɛ dɔni mɛ onu, atɔ biazɛ ŋa. 8Lɛ Aya gi yɛ ete ɔnɔ kakaa yɛ ɔna nɔ mɛ ɛ, abasi si yɛ azɛ ba gi akɔ Yɛ Ɔfuɛfuɛ nɔ aki ba kiliɛ gi aki blɔ fɛ ɛ. 9Ɔ́kpɛ lidzegaga ní blɔ ni ba kusi i, lɛ akɔ ba eboe zimizi na akyɛ ba kɔkpɛ ba kuziŋa a. 10Abla ɛ, ege lɛ loso mleekeni Aya edi i, gi mlɛɛtrɔ adɔtu nyipu ni ba aʋa a, adɔtu ala gi blɔ bakatsi ba loo blɔ kútani kutu u? 11Owo! Kwizi ŋa lɛ kwimɔ kubúbú gani Ɔkaɛ Yesu yɛ lipomepɛpɛ nɛ mɛ ŋwisi kiliɛ gi ba kyɛ bɛmɔ kinɛ ɛ.”

12Ɔha lɔ petee ɛgɔ tsriɖi gi benu Banaba ni Paulo ba eboe klakla la a, ni enugutseboe la ni eboe mamɔ edi ala pɔ́ gi Aya abitɛ gani ba aʋa ní banama gi bénu Yudanɛ ma kusi i. 13Agi bɛgù i, Yakobo ata atrɔ si, “Benemi ba, mlata mɛ kutu! 14Simon asrɔ mlɔ, kiliɛ gi Aya akɔ litɔ lɛ mɛ akí banama gi bénu Yudanɛ ɛ, gi akya banɔ adɔ ni ba mɛ tɔ beze yɛ banɛ ɛ. 15Beboedoplɛ ba eboe la ɛsrɔni liboe lɛ ya ɖii ŋwisi kiliɛ gi bɛ ŋwlimi plɛ kinɛ si, 16‘Aya apani si,

“Lɛ ya kede e, maadziba,

tɔ madzini Dawid kukusi yo kudu.

Maalulɔ kudɔkpa liɔ gi kwizizi i,

lɛ maaki kwiaze gagla dzɛ ɛ.

17Atɔ kelea banɔ gɔgɔ ba pɔ́ biapɛ́ Ɔkaɛ klɔ kudeo,

banama petee gi bénu Yudanɛ ɛ,

pɔ̀ xe maxwa si beze mɛ banɛ ɛ.

Nite Ɔkaɛ gi izɛbitɛ eboa la ya a,

18gi bete dɔni okpese klɔ ke e apani.

19“Mɔkɔ mɛ kugyodi yo kunu si, kukíkpɛ banama a, gi bénu Yudanɛ ɛ, pɔ xe bekyi vu Aya ɛ, kunugu, 20boŋu tɔ ku ŋwlimi ɔki ba si, bekyri kiŋaŋa kakaa gi bɛɛdɔnɔ kabupe me e, ni kihasi, lɛ bakítà baga gi bɛwɔ ika mɛ ɛ, lɛ bakíŋwɛ ba ika lɛ fɛ ɛ. 21Lɛ ese linu si dɔnɔ tsã ke e, bizɛklà, lɛ bizɛpani ní Mose ɔsã nɔ su ní ɔma kakaa mɛ ní Lizemɔniwe kakaa aʋa ní Yudanɛ ma itsaklɔ.”

Keplekpaa lia gi Baka ba Bɛŋwlimi tsisi Baʋaziŋa ba ní Antioxia ɛ

22Lɛ banɔkpɛkpɛ ba ni ɔha lɔ banɔtsitsi ba kɔpɔni ɔsɔli ha lɔ pɔ́ bɛtrɔ lɛ si, biabu benyimeatɔ ní ba kusi tsisi ní Antioxia kɔpɔni Paulo ni Banaba: bá benu Yuda gi bɛzɛxwa si Barsaba ni Sila a, benyime gi benu baka ní benemi ba kusi i. 23Lɛ bɛŋwlimi keplekpa ɛkpɛ ní ba awla a si,

Blɔ banɔkpɛkpɛ ba ni ɔsɔli ha lɔ mɛ banɔtsitsi ba gi kunu mlɔ benemi i,

kwitsisi kunɔpanɔ kí benemi ba gi bénu Yudanɛ, gi bali ní Aya kusumu yo me e,

gi bali ní Antioxia, Siria ni Kilikia a.

24Kwinu si, banɔatɔ gi bɛdɔ blɔ kusi i, babɛpisa mlɔ begyodi ʋa gani eboa la gi bɛɛpani mɛ ɛ. Aní blɔ kwikpɛ banɔ ba ya a. 25Lɛ loso blɔ pɔ́ kwitrɔ likla lɛ aʋa si kwiakpɛ benyimeatɔ kɔpɔni blɔ baʋia Banaba ni Paulo tsisi mlɔ, 26banama gi bɛkɔ ba ligbã́ nɛ kyɛ ɛ, kɔkpɛ Yesu Kristo yɛ linyi ne. 27Abla ɛ, kwikpɛ Yuda ni Sila ɛtsisi mlɔ, banama gi ba tutɔ biapani eboa la a, gi kwiŋwlimi si mlɔ ɔ, ni ba tutɔ ba inugu le. 28Lɛ ese linu si liku Aya Ɔfuɛfuɛ Dradra nɔ ni blɔ aŋu si, kukítrɔ ɔsã nɔ lidɔtu ʋidi itɔtɔ ní mlɔ aʋa a sani eveve a la ya ko, 29mlekyri bidɔ gi bɛki babu ʋa a, ni ika ani baga gi bɛwɔ ika mɛ ɛ ba kigyaɛ, ni kihasi; xe mledi isu ya aʋa mumɔ ní la mɛ ɛ, kɔlɔ mlɔ isu iayɔ.

Mleze mumɔ.

30Gi bɛkpɛ ba kude pɔ́ ɛ, bɛba Antioxia, lɛ bɛkpɛ baʋaziŋa ba petee likpɔ ɛ, lɛ bɛkɔ keplekpaa ɛki ba a. 31Agi bɛkla ka ɛ, kɛkpɛ ɔna ní ba lipo lɛ bɛmɔ isami i. 32Lɛ Yuda ni Sila gi benu beboedoplɛ ɛ, bɛgba benemi ba ni eboe glegle kɔki lipoe gblamadza: lɛ bɛkpɛ kifu ni kigagla ba mɛ ɛ. 33Agi beze niklɔ taʋɛ ɛ, benemi ba bɛkpɛ ba kude ni kusuyɔ lɛ bedzitrɛ ní banama gi bɛkpɛ ba klɔ ɛ. 34Sila kɔɔ atrɔ si yiwɔ niklɔ ɔ. 35Pɔ̀ Paulo ni Banaba beze ní Antioxia a, gi ba ni banɔ glegle dzedze e, bɛzɛbasɛ bidɔ lɛ bɛzɛpani Ɔkaɛ yɛ liboe gbã nɛ ɛ.

Paulo ni Banaba ba kusi kulɛlɛɔ

36Lipoetɔ kede e, Paulo asi Banaba si, “Abla ɛ, kitɔ kudzi itrɛ tɔ kuzeedi benemi ba ní ɔma kakaa mɛ gi kwipani Ɔkaɛ yɛ liboe le e, si kitɛ balɛ na a.” 37Barnaba apɛ si bagbani Yohanes gi bɛzɛxwa si Marko pɔni ba isu ya. 38Pɔ̀ Paulo amɔ si lípɛ si ba gbani ɔniliɛ ya gi adɔ ni ba kude edzino ní Pamfilia a, xe ɔ́wa axwɛ na pɔni ba pɔni isu u. 39Kuboesemonu gagla kwiku ba kusi, lɛ bɛlɛ ní ba ahanuglɔ ba su i. Banaba agbani Marko apɔni isu ya, lɛ beku onitsahu lo etrɛ ní Kipro e. 40Lɛ Paulo akya Sila pɔni isu ya ɛ, lɛ gi baʋaziŋa ba bɛkɔ ba ɛkpɛ ní Aya iwla mɛ ɛ, bɛsɛ. 41Lɛ azɛɛga Siria ni Kilikia xe azaakpɛ baʋaziŋa ba iha lɛ kigagla ɛ.

Currently Selected:

Axwɛ 15: avn

Highlight

Copy