Axwɛ 14

Paulo ni Banaba Bɛtrɛ ní Ikonion

1Nite ke lize ní Ikonion fɛ. Gi Paulo ni Banaba bɛtrɛ ní Yudanɛ ma ɔtsaklɔ ɛ, bɛpani mumɔ nite me si Yudanɛ ni banama gi bénu Yudanɛ, banɔ glegle bɛzi ŋa. 2Pɔ̀ Yudanɛ ba ya gi báziŋa ɛ, bɛkpɛ lɛ kpɛ ní banama gi bénu Yudanɛ ɛ ba mɛ si bakízi ŋa a, lɛ bekyi ba ní Paulo ni Banaba su i. 3Pɔ̀ Paulo ni Banaba beze niklɔ lipoe gblamadzaɛtɔ ɔ, lɛ bɛpani ni kigagla ní Ɔkaɛ su u, Ɔkaɛ gi yɛ aŋa katsalia aki ba si ba liboe le ní lipomepɛpɛ nɛ su i, linu anukwarɛɛ gi aki ba kigagla a, tɔ babitɛ enugutseboe ni eboe mamɔ edi i. 4Banima ní ɔma nɔ mɛ ɛ bɛlɛ kupɛ tuʋa, batɔ beze ni Yudanɛ ma kude, lɛ batɔ fɛ beze ní Paulo ni Banaba kude e.

5Lɛ Yudanɛ atɔ ni banama gi bénu Yudanɛ ani ba onu bezeze ba bɛtrɔ si biawa Paulo ni Banaba nyɔnyɔɛ tɔ biasa ba akla. 6Gi Paulo ni Banaba benu liboe le e, bese trɛ ní Listra ni Derbe gi inu ima ʋidi ní Likonia kesea mɛ ni kumami uliɔ klɔ gi kwiklani lɛ mɛ ɛ. 7Niklɔ bɛtrɛ ní Liboe gbã nɛ kupaniɔ aʋa.

Paulo ni Banaba Bɛtrɛ ní Listra ni Derbe

8Ní Listra ɛ, onyime ɔtɔ eze gi agbà adɔ ni yene lipo le me e lɛ ɔ́tani kuga di i. 9Eze niklɔ lɛ enu Paulo eboe la a. Gi Paulo amɔ si aziŋa a, xe biatani yɛ kupɔnɔ ɛ, edu aŋu ní yɛ aʋa, 10lɛ nì ole gagla ɛ, apani si, “Yɔ tɔ lɛɛ ní wɔ ikli lɛ aʋa.” Onyimee ayɔ lixu lɛ ekpese kuga klanɔ ɛ.

11Gi linɔkpi le limɔ kidiliɛ gi Paulo abitɛ ɛ, bekpese ozi kukpɛ ní ba Likonia siya sɛ mɛ si, “Babu ba bedzi banɔ lɛ beple eku blɔ kusi i!” 12Bɛki Banaba linyi si Zeus, lɛ bɛki Paulo linyi si Hermes#14:12 Zeus ni Hermes beze Roma banɛ ma babu ʋidi ʋa, Hermes yɛ azɛɛsa pani. i, lɛ ese linu si Paulo yɛ onu ɔniliɛ gi yɛ azɛɛsa kupani i. 13Ɔbunetee gi odi ní Zeus obu yɛ ɛ, gi yɛ lisumugba lɛ lilɛɛ ní ɔma nɔ kutu yɔ ɛ, amani egume gi bɛkpɛ seƒoƒo aga kí la a, ní ɔma nɔ kevunu ya, lɛ ese linu si yɛ ni linɔkpi le bɛpɛ si beeyi busu ikí Paulo ni Banaba.

14Gi Paulo ni Banaba benu kidiliɛ gi bɛpɛ si bɛɛbitɛ ɛ, bɛkyì ba ewu la lɛ bese eku linɔkpi le kusi i ni ozí si, 15“Ege loso mlɛbitɛ nite e? Blɔ ɔtutɔ fɛ banɔ ko kunu mlɔ kiniɛ! Kulí ní ya tɔ kupani Liboe Gbã nɛ kí mlɔ, tɔ mladɔ edzini bidɔ pluplu bɛ ya elu kude, tɔ mlekuni Aya gi yɛ awla ligbã́ nɛ lilɛ ɛ kude e. Yɛ abitɛ lifunu ne ni kesea ni axu la ni kidɔ kakaa gi kikpasi ní bɛ mɛ ɛ. 16Tsã ɛ, aki kude si ɔnɔ kakaa ɔbitɛ ní yɛ ɔtutɔ yɛ kupɛ́pɛɔ aʋa a. 17Pɔ̀ izeki si kute si Yɛ ɔlɛ lipoe kakaa gani bidɔ gbã kubitɛ mɛ ɛ, lɛ izɛki dzeni dɔni lifune ní bidɔ likpɛpoe le, izɛki kiŋaŋa ani isami ní mlɔ ina nɛ mɛ.” 18Nì eboa la ya kyɛ ɛ, Paulo ni banaba bepe xe ableke bɛtani kude kutsi ki linɔkpi le si likíyi busu aki ba a.

19Yudanɛ atɔ gi bɛdɔ Antioxia ní Pisidia ni Ikonion e, bɛba lɛ bekyi linɔkpi le lɛ begyodi ba ɛmani ba kapɛa, lɛ bɛsa Paulo akla, xe behe ye dono ɔma nɔ mɛ ni kugyodi si etse e. 20Pɔ̀ gi baʋaziŋa ba bɛba ɛkpɛ likpɔ ní yɛ su i, ayɔ, lɛ edzi atrɛ ní ɔma nɔ mɛ ɛ. Gi kelea kɛti i, yɛ ni Banaba bɛsɛ trɛ ní Derbe.

Paulo ni Banaba Bedziba Antioxia ní Siria

21Paulo ni Banaba bɛpani Liboe Gbã nɛ ní Derbe ɔma nɔ mɛ, lɛ bɛmɔ baʋaziŋa glegle niklɔ ɔ. Lɛ bedzi trɛ ní Listra ni Ikonion ani Antioxia ní Pisidia ɛ, 22bɛkpɛ ɔna ní baʋaziŋa ba lipo lɛ bɛkpɛ ba kigagla tɔ beze ní anukwarɛ ni kuziŋa mɛ, ani tɔ betè si, “Linu si kuga baxixa glegle me xe kwiatiku Aya yɛ kaʋaŋaa mɛ ɛ.” 23Ní baʋaziŋa ba ɔha kakaa mɛ ɛ, bedu baka, lɛ gani Aya kuxwaxwa ni onugu nyanya mɛ ɛ, bɛkɔ ba ɛkpɛ Ɔkaɛ ɔniliɛ aʋa gi bɛka ɛ iwla mɛ ɛ.

24Gi bɛga Pisidia bidɔ mɛ mɛ̀ ɛza ɛ, bɛba Pamfilia. 25Niklɔ bɛpani liboe gbã nɛ ní Perga lɛ beple etrɛ ní Atalia ɛ, 26dɔni niklɔ ɛ, beku onitsahu lo etrɛ ni Antioxia. Niklɔ gi bɛkɔ ba ɛkpɛ ní Aya iwla mɛ kɔkpɛ axwɛ a na gi bɛgù i. 27Gi bɛba Antioxia ɛ, bɛkpɛ baʋaziŋa ba likpɔ lɛ bɛsi ba kidɔ kakaa a, gi Aya abitɛ gani ba aʋa a, ni kiliɛ gi adra kudeonu aki banama gi bénu Yudanɛ ma fɛ tɔ bazɛ ŋa a. 28Lɛ beze niklɔ lipoe gblamadza ni baʋaziŋa ba a.

Currently Selected:

Axwɛ 14: avn

Highlight

Copy