Axwɛ 13
13
Bɛkya Banaba nì Saulo lɛ Bɛkpɛ ba ɛ
1Ní baʋaziŋaa ba gi bizesumu Ɔkaɛ kusi ní Antioxia ɛ, Aya yɛ beboedoplɛ ba ni badɔbasɛ ba beze, gi ba benu Banaba ni Simeon i, gi bizɛxwa si Ogo ye e, ani Lukio gi ádɔ ní Kirene e, ni Manahem, ɔniliɛ gi bɛganɔ ni Okusi ye Herodes i, ani Saulo. 2Gi bɛzɛnya onugu u, xe bezesumu Ɔkaɛ ɛ, Aya Ɔfuɛfuɛ nɔ ɛsi ba si, “Mlebu Banaba ni Saulo lidze aki mɛ tɔ bawa lixwɛ nɛ gi lɛ loso maxwa ba ɛ.”
3Gi bɛnya onugu u, xe bɛxwa Aya kede e, bɛtrɔ awla ní ba aʋa, lɛ bɛkpɛ ba kude e.
Paulo ni Banaba Bɛtrɛ ní Kipro
4Aya Ɔfuɛfuɛ nɔ ɛsi ba níklɔ gi biatrɛ ɛ, lɛ loso Banaba ni Saulo bɛtrɛ ní Selukia, lɛ beku onitsahu lo dɔni níklɔ tsini Kipro kunisi yo kesea aʋa ɛ. 5Gi beku Salami i, bɛpani Aya liboe le ní Yudanɛ ma ɔtsaklɔ. Lɛ Yohanes Marko fɛ apɔni ba ní axwɛwawa la mɛ ɛ.
6Gi bɛklani kesea mɛ ɛ, xe beku Pafo e, bɛtsani Yudanɛ ɔtɔ gi eze ɔwanete ni asia oboedoplɛ ɛ, ɔniliɛ klɔ yɛ linyi si Bar Yesu. 7Eze ɔʋia nɛ aki ɔʋaŋaɛ Sergio Paulo ní kesea klɔ aʋa. Sergio Paulo eze onyime oboete e. Ɔʋaŋa yɛ axwa Banaba ni Saulo amanɔ lɛ ese linu si apɛ si yinu Aya yɛ Liboe le e. 8Pɔ̀ Elima yɛ linyi ne ní si Hela sɛ mɛ, gi onu ɔwanete e, ayɔ kedu lɛ apɛ si yitsi kudeonu iki ɔʋaŋa yɛ tɔ ɔki ziŋa a. 9Saulo gi bizɛxwa kyɛ si Paulo e, xe Aya Ɔfuɛfuɛ nɔ ɔlɛ ní yɛ aʋa ɛ, edu aŋu ní ɔwanetee aʋa a, 10lɛ apani si i, “Wonu ozimizi ye Yebi! Wɔ ahwafiɔnɛ kí kidɔ kakaa gi kipɛ ɛ. Woyi ni kelea mɛ asia ni ìmɔ kakaa, lɛ wuzɛɛpɛ lipoe kakaa si tɔ wúkyi Ɔkaɛ yɛ anukwarɛɛ tɔ odzi asia! 11Abla ɛ, Ɔkaɛ atráhe kutu iiki wɔ, wɔtradzi kaŋupo lɛ wɔtramɔ liwo le kuklekle kɔna ni lipoetɔ ɔ.” Ní lɛ onu klɔ ko e, Elima amɔ si debleku ye ni litumu ne liwe yɛ bimbi ʋe aʋa lɛ azɛɛga klanɔ ni kukenidi si yɛ amɔ ɔnutɔ gi aavu yɛ awla la tsinɔ niklɔ gi apɛ si yi trɛ ɛ. 12Gi ɔʋaŋa yɛ amɔ kidiliɛ gi kiba kɛ mɛ ɛ, azɛ aŋa lɛ ese linu si bidɔbasɛbasɛ ʋɛ ní Ɔkaɛ su bize linugutseboe kí yɛ.
Banaba ni Paulo ní Antioxia ní Pisidia Kesea mɛ
13Lɛ ya kede e, Paulo ni yɛ bagaglɔnɛ ba beku onitsahu i dɔni Pafo lɛ bɛba Perga ɔma ʋidi lo ní Pamfilia kesea mɛ ɛ, niklɔ Yohanes Marko asɛ ní ba su xe edzì aba Yerusalem i. 14Pɔ̀ ba kɔ bɛklani dɔni Pɛrga lɛ bɛba ɛna Antioxia ní Pisidia kesea mɛ ɛ. Lɛ gi bɛtrɛ ni Yudanɛ ma ɔtsaklɔ ní Lizemɔniwe le aʋa ɛ, beze kesea. 15Gi bɛkla bidɔ ɛdɔni Mose ɔsã nɔ ni beboedoplɛ ba bidɔ ŋwlimiŋwlimi ʋɛ mɛ pɔ ɛ, baka ba ní Yudanɛ ma ɔtsaklɔ bɛki ba ole si, “Benemi ba kwipɛ si mlegu kunugu aki banima, xe kugbagba kutɔ kuli ní mlɔ awla kí ba ɛ, tɔ mlapani.”
16Paulo ayɔ ɔlɛɛ lɛ abasi banima ɔwla lɔ si badɔ zii, lɛ ekpese kupani si, “Benemi Israelbanɛ ma ni mlɔ banɔaya gi mlénu Yudanɛ pɔ̀ mleesumu Aya a, mlata mɛ kutu! 17Israelbanɛ ma, Aya yɛ akya blɔ bakatsi ba lɛ aki si banima bɛsrɛ ni lipoe lɛ klɔ mɛ ɛ, gi beze ŋwisi bababa ní Egipte kinɛ ɛ. Lɛ Aya ebu ba dɔni Egipte ni yɛ kigagla ʋidi ye e. 18Lɛ yɛ edi ba aʋa agɔ avitene ní ɔyaya klɔ. 19Aki si bɛkyrɔ amade tegloele ní Kanaa kesea mɛ, lɛ akɔ ba kuseo aki yɛ banima ŋwisi ba kaŋase kinɛ ɛ. 20La ya petee ɛba la mɛ ní agɔ alafatiene ni avitetsu me.
“Lɛ kede e, aki ba betsixwa kɔzɛna nani Oboedoplɛ Samuel lipoe le. 21Lɛ gi beʋi ye si ɔki ba okusi i, Aya aki ba Saulo gi onu Kis Yebi i, gi ádɔ ni Benyamin okú no me e, eze okusi ba aʋa agɔ avitene. 22Gi Aya ebu ye azanɔ ɛ, Aya aki si Dawid edzì okusi. Liboe lɛ ya Aya apani ní yɛ su si, ‘Mamɔ Dawid gi onu Isai yebinyime e si onu onyime gi malɔ ɛ, onyime gi aabitɛ kidɔ kakaa a gi mapɛ si ɔbitɛ ɛ.’ 23“Dɔni Dawid yɛ lipo me bebi ba mɛ ɛ, Aya aki Yesu gi yɛ onu onɔbu ye ki Israɛl banɛ ma a, ŋwisi kiliɛ gi apani aplɛ kinɛ ɛ. 24Xe ableke Yesu aakpese yɛ axwɛ na ɛ, Yohanes asɔli aki Israɛl banɛ ma petee si bekyi adɔ ni ba eboe zimizi na mɛ, tɔ yikpɛ kuni ɔki ba a. 25Lɛ gi Yohanes yɛ axwɛ na ɛɛtrɛ la ɔgũ kɔ ɛ, azeeʋi banima si, ‘Nyaŋwɛ mlegyo edi si menu u? Aní mɛ menu ɔniliɛ gi mlepe e. Pɔ̀ mlata mɛ kutu u! Yɛ atrába ní mɛ kede lɛ mégyeno fɛ si maabu afɔkpa ní yɛ kukliseo o.’
26“Mɛ benemi Israelbanɛ ma, Abraham yɛ besoebi ni mlɔ banama gi mlénu Yudanɛ ɛ pɔ̀ mleese Aya a, blɔ bɛmani kubúbú yo ole ɔ lɔ ya! 27Lɛ banama gi beze ní Yerusalem ni banama gi bali ní ba onu i, bámɔ Yesu si yɛ onu ɔnɔbu ye e, pɔ̀ gi bebu ye lipɔ ɛ, bɛki si beboedoplɛ ba eboa la gi bizɛklà ní Lizemɔniwe kakaa aʋa ɛ, ɛba la mɛ. 28Lɛ gi bámɔ kesetataa tɔtɔ ɔ gi biakɔtsà kutsépia ki Yesu kyɛ ɛ, beʋi Pilato si ɔki tɔ beye ye. 29Lɛ gi bɛbitɛ kidɔ kakaa a gi kuŋwlimi dradra kwipani plɛ ní yɛ su pɔ́ ɛ, bɛti yɛ ní ose lo su lɛ bɛkɔ yɛ kpɛ ní ɔdrɔ lɔ mɛ ɛ. 30Pɔ̀ Aya aki si edzì ligbã dzɛ ɛ, 31lɛ kɔkí ewe glegle e, ebu isu ya abasi banama gi yɛ ni ba bɛga ɛdɔni Galilea ɛtsini Yerusalem i. Ba benu yɛ katsalia abla kí Israelbanɛ ma.
32“Lɛ blɔ kwipani liboe gbã nɛ si mlɔ ɔ, kidiliɛ gi Aya aka plɛ ki blɔ baka ba ɛ, 33bɛ Aya abitɛ aki blɔ ba bebi ba gi ayɔni Yesu adɔ ni bekpo ʋa mɛ ŋwisi kiliɛ gi bɛŋwlimi kpɛ ní psalomo ʋlaɛ mɛ kinɛ ɛ si, ‘Mobi wonu; omono kelea medzi wɔka.’ 34Liboe lɛ ya Aya apani aplɛ ní yɛ kuyɔyɔ dɔni bekpo ʋa mɛ su si, Aayɔ dzi ligbã lɛ ɔ́tratse liwewe tɔ ɔ, ‘Maaki mlɔ kukrira gi kɔsu kwidra a ni kumokyimokyi kakaa gi maka aplɛ kí Dawid i.’ 35Lɛ mɛ ke Dawid apani ní yɛ Psalomo dzedze me si, ‘Wɔtraki si wɔ ɔnɔ dradra yɛ aafumu ní ɔdrɔ lɔ mɛ ɛ.’
36“Pɔ̀ gi Dawid esumu Aya ní yɛ kupɛ́pɛ onu ní yɛ lipoe le me e, lɛ etse e, xe bevive ye pɔni yɛ bakatsi ba a, lɛ yɛ kisugyaɛ kifumu ní ɔdrɔ lɔ mɛ ɛ. 37Pɔ̀ lɛ ya líba lɛ mɛ ɛki ɔniliɛ gi Aya ayɔnɔ dɔni bekpo ʋa mɛ ɛ.
38“Lɛ loso kwipɛ si mlɔ petee mlete, si gani Yesu aʋa ɛ, Aya aaplo mlɔ su, mlaŋwɛ oyi 39lɛ ɔnɔ kakaa gi azɛ yɛ aʋa ŋa ɛ, bɛkɔ yɛ kuzimizi kakaa ɛkyɛ yɛ. Eboe zimizia na mɛ gi Mose ɔsã nɔ ɔ́tani mlɔsu kuplo e. 40Abla ɛ mledi mumɔ tɔ, eboa la gi beboedoplɛ ba bɛpani i, akíba mlɔ aʋa a.
41“Aya apani si, ‘Mledi, mlɔ banama gi mlɛzɛkpɛ mɛ kakpaa ɛ,
litu mlo kugyɔ tɔ mletse,
lɛ ese linu si mátrabitɛ kiditɔ ní ewe a la ya mɛ
gi xe ɔnutɔ asi mlɔ kura kyɛ ɛ,
mlatrázi lɛ aʋa ɛɛŋa a.’ ”
42Gi Paulo ni Banaba bɛzɛsɛ̀ ní Yudanɛ ma ɔtsaklɔ ɛ, banima bekpe ba tɔ bedzi aba ní Lizemɔniwe ʋla ɛ aʋa tɔ bagatrɛ ní eboa la su gi Paulo apani i, aʋa aki ba.
43Gi banima bɛsɛ ni kutsatsa mɛ pɔ́ ɛ, Yudanɛ glegle ni banama gi bénu Yudanɛ ɛ, pɔ̀ bedzi Yudanɛ ɛ, bekuni Paulo ni Banaba kude. Lɛ Paulo ni Banaba beegu kunugu iiki ba a, lɛ bɛkpɛ ba kigagla tɔ beze ligbã́ ní Aya yɛ lipomepɛpɛ nɛ mɛ ɛ.
44Ní Lizemɔniwe lɛ gi ligba ni lɛ ɛkpɛ aʋa ɛ, ɔnɔ kakaa kloe ní ɔma nɔ mɛ aba si yinu Aya yɛ liboe le. 45Gi Yudanɛ ma bɛmɔ linɔkpi le e, kaŋuza keku ba lɛ bɛnada Paulo liboe le e gi azaapani i, lɛ bekpini ye e. 46Pɔ̀ Paulo ni Banaba bɛpani ni kigagla ɛ sanɔ ɔ si, “Liziã si bapani Aya liboe le aki mlɔ kpɛ ɔtɔ. Pɔ̀ gi mlázi lɛ ɛ, xe mlebù isu si mlegyeno ɛki ligbã moblo le e, kwiayurɔ mlɔ tɔ kwiatrɛ ní banama gi bénu Yudanɛ ma klɔ ɔ. 47Lɛ linu ɔsã nɔ gi Aya aki blɔ ɔ si, ‘Mabitɛ wɔ tɔ ze kuklekle ki banama gi bénu Yudanɛ ɛ, tɔ kelea petee kamɔ kubúbú.’ ”
48Gi banama gi bénu Yudanɛ benu liboe le e, isami iku ba lɛ bɛkpɔ̀ Ɔkaɛ liboe le e, lɛ banama gi Aya akya aki ligbã moblo le e, bedzi baʋaziŋa ɛ. 49Lɛ Ɔkaɛ liboe le lizeehle eku ɔkɔ kakaa ní kusio klɔ ʋa mɛ. 50Pɔ̀ Yudanɛ ma bɛkpɛ ɔpisáse ní banama gi bedi ɔma nɔ eboe la onu ni badzɛ gi bɛɛdzi aŋu mɛ baklɔ ɔ, gi beesumu Aya mɛ ɛ. Bekpese kedu kuyɔ ní Paulo ni Banaba su lɛ bɛkpikpini ba edono ní ba kesea mɛ ɛ. 51Lɛ loso Paulo ni Banaba besugu ovugbo lo ní ba kuklikpɔɔ ɛplɛ ki ba tɔ lize gyesi ki ba si Aya aahe kutu ki ba a, lɛ bɛsɛ ɛtrɛ ní Ikonion e. 52Pɔ̀ baʋaziŋa ba ni Antioxia beyi ni isami ní Aya Ɔfuɛfuɛ nɔ mɛ ɛ.
Currently Selected:
Axwɛ 13: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
