Axwɛ 12

Herodes Ayɔ kedu ní Banɔkpɛkpɛ ba su

1Ní lipoe lɛ klɔ mɛ ɛ, Okusi ye Herodes aki si bevu ɔha lɔ banɔatɔ lɛ ese linu si apɛ si yibu kini kí baʋaziŋa ba. 2Aki si beye Yakobo gi onu Yohanes yenemi nyimee ni ihɛ ɛ. 3Gi amɔ si liku Yudanɛ ma liŋu i, atrɛ lɛ aʋa lɛ aki si bevu Petro fɛ ɛ. Liba lɛ mɛ lipoe lɛ klɔ mɛ gi bɛzɛŋa aklãmɔnyasi na liwe le e. 4Gi bevu Petro e, bɛkpɛ yɛ ligba, gi baguta tiene iha tine gi izɛtsrɛ iglɔ lɛ ɛ, izepe ye. Herodes atrɔ si yɛ amani yɛ ní otsixwa kɔ ní ɔha kusi xegi bɛŋa Kutselidɔzawe le pɔ́ ɛ. 5Lɛ loso Petro eze ligba lɛ, pɔ̀ ɔhamɛ banɛ ma bɛzɛxwa Aya ni kimbi kyíkyĩ ní yɛ litukpo o.

Aya ebu Petro ní Ligba Lɛ

6Liwe lɛ klɔ gi Herodes atrɔ si yimani yɛ ní otsixwaklɔ lɛ elesi la ɛ, Petro afɛ banɔpe tiaʋa kusi. Bɛkpɛ yɛ bibɔ iwla lɛ tiʋa, lɛ banɔpe ba bezeepe ligba lɛ kevunu ya a. 7Kyɔŋ klɔ ko e, Ɔkaɛ yɛ ɔxwɛdzɛ aŋwi, lɛ yɛ kuklekleo kwizi ligba lɛ mɛ ɛ. Aya yɛ ɔxwɛdzɛɛ agbɔni Petro opoʋa nɔ, lɛ ahwani yɛ ɛ, xe apani si, “Kɔsi tɔ yɔ ɔ!” Bibɔ ʋɛ biwɔli ní Petro kuwlakpɔnu yo ní bɛ ɔtutɔ bɛ isuwla mɛ. 8Lɛ ɔxwɛdzɛɛ asi yɛ si, “Nya wɔ liwu le aʋa tɔ kpɛ wɔ afɔkpa ʋa a.” Petro abitɛ ní te lɛ ɔxwɛdzɛɛ asi yɛ dzɛ si, “Kɔ wɔ liwu le aʋa liwu le xla isu ya tɔ kuni mɛ kude e!” 9Lɛ Petro ekuni yɛ kude edono ní ligba lɛ mɛ ɛ, óte xe kidiliɛ gi ɔxwɛdzɛɛ ɛɛbitɛ ɛ, kinu kanɔgbagbe me bidɔ ɔ, egyo le edi si kububasɛ yɛ ɛɛmɔ. 10Bɛdɔ banɔpe tɔpu ba ɛza, lɛ bɛza baʋla ba aʋa a, xe bɛba ɛna bala ʋa opupo lo gi ebu aŋu mɛ kpɛ ɔma nɔ ablɔɛ aʋa ɛ. Opupo lo ɛdra ɛki ba ní lɔ tutɔ isuwla mɛ lɛ bɛga kevunu ya edo e. Gi bɛga ablɔ tole aʋa ɛza ko e, lɛ ɔxwɛdzɛɛ alila ní Petro su i.

11Gi Petro aŋu na mɛ ɛdra ɛ, apani si ableke mete si etepɔ kanɔgbã mɛ! Aya atsisi yɛ ɔxwɛdzɛɛ si obu me dɔni Herodes kigaglaɛ ese ni dɔni kidiliɛ petee gi Yudanɛ ma begyodi si kiaba kɛ mɛ mɛ̀ ɛ.

12Gi edzi eku sinɔ mɛ ɛ, atrɛ ní Maria gi onu Yohanes Marko yene kepea mɛ niklɔ gi baʋaziŋa glegle bɛtsa xe bɛɛxwa Aya ní yɛ litukpo e. 13Petro asa ablɔ yɛ su opupo lo, lɛ ɔnɔsumu ye ɔdisami gi bɛxwa si Roda ɛ, yɛ aba si yidi si nyaŋwɛ ɛsa opupo lo na. 14Enu Petro ole lo egyesi lɛ isami iku ye gbɛgbɛ nite si edzì ese atrɛ ní ligba lɛ mɛ gi ɔ́dra opupo lo o, lɛ apani si, Petro ɔlɛɛ ní opupo lo onu u. 15Lɛ bɛsi yɛ si, “Wɔ aŋu mɛ eezizi!” Pɔ̀ edu ɔkli kese si linu anukwarɛ ɛ. Lɛ bebu le onu si, “Litráze Petro boŋu i, liaze Aya yɛ ɔxwɛdzɛɛ gi izepe Petro e.”

16Pɔ̀ Petro eze lɛ aʋa azɛɛsa opupo lo. Gɔgɔɛ gi bɛdra opupo lo o, xe bɛmɔ yɛ ɛ, ba inugu itse. 17Petro emuni yɛ ɔwla lɔ si badɔ zii, lɛ adra lɛ su aki ba kiliɛ gi Ɔkaɛ ebu ye ní ligba lɛ ɛ. Lɛ asi ba si, “Mlasi Yakobo ni baʋaziŋa gɔgɔ ba kyɛ liboe lɛ gi masi mlɔ ɛ.” Lɛ asɛ xe atrɛ ní ɔkɔ dzedze e.

18Gi kelea kɛti i, banɔpe ba bɛpisa dɔ isu ya onu i zanɔ lɛ beʋi si kitɛ Petro aga na a? 19Lɛ Herodes aki ɔsã si bapɛ́ yɛ ɛ mɔmɔmɔ, pɔ̀ bátani yɛ kumɔ ɔ. Lɛ gi eʋi banɔpe ba igbè e, aki ɔsã si beye ba a. Lɛ ya kede e, Herodes asɛ Yudea lɛ azeeze ni Kaisarea lipoetɔ onu i.

Herodes yɛ Kutseo

20Lipoe lɛ klɔ mɛ ɛ, Herodes amɔ kusuyeʋi gagla ni Tiro banɛ ma ni Sidonanɛ ma, lɛ gi eze ní Kaisarea ɛ, bɛtrɛ ní likpɔkpɛkpɛ mɛ si bɛɛmɔ yɛ. Kpɛ ɔtɔ ɛ, beʋi Blasto gi onu ɔnɔ gi okusi ye azɛ yɛ aʋa aŋa a, xe eze kekusipea ɔʋadi ye si ɔpɔni ba a. Lɛ bɛtrɛ ní Herodes klɔ ɔ, xe beʋi ye si ɔki tɔ babitɛ kusuyɔ ɔ, lɛ ese linu si okusi ye kesea mɛ ba kesea kizɛmɔ ka kiŋaŋaɛ dɔnɔ.

21Ní liwe trɔtrɔ lɛ aʋa ɛ, Herodes eze ní sikusi me ní yɛ likusigbo le aʋa xe apani aki banima a. 22Lɛ banima bɛkpɛ ozi lo si i, “Aní ɔnɔ eegu kunugu yo o, pɔ̀ Aya a!” 23Kyɔŋ klɔ ko e, Aya ɔxwɛdzɛɛ aki si Herodes adɔ kunya, lɛ ese linu si ɔ́kɔ kukɔkɔ ɔki Aya a. Ata asu lɛ etse e.

24Pɔ̀, banɔ glegle benu Aya yɛ liboe le lɛ bɛziŋa ɛ. 25Banaba ni Saulo bebloni ba lixwɛ nɛ, lɛ bɛgbani Yohanes gi onu Marko epɔni isu ya a, xe bɛsɛ ní Yerusalem i.

Currently Selected:

Axwɛ 12: avn

Highlight

Copy