Axwɛ 10

Kɔnelio akpɛ banɔ ní Petro ese

1Ní lipoe lɛ klɔ mɛ ɛ, Onyime ɔtɔ eze ní Kaisarea gi bɛzɛxwa si Kɔnelio o, eze baguta ba ɔka ní Roma banɛ ma bagutaa ba gi bɛzɛxwa si “Italia baguta ba ɔha lɔ” kusi i. 2Eze ɔnɔ gbã lɛ yɛ ni yɛ kepea petee bizesumu Aya a lipoe kakaa. azɛɛki bepiplinete ba bidɔ lɛ azɛɛxwa Aya lipoe kakaa a. 3Liwe le e, liaze ŋwisi kemize inyɔ tita kinɛ ɛ, amɔ kububasɛ gi amɔ tsra si, Aya yɛ ɔxwɛdzɛ aba yɛ kɔ, lɛ axwa yɛ si, “Kɔnelio o.”

4Lɛ edu aŋu ni Aya yɛ ɔxwɛdzɛɛ aʋa ní lifu me e, lɛ apani si, “Ɔka, liboe woli liba a?”

Ɔxwɛdzɛɛ ebu le onu si, wɔ Aya kuxwaxwa ni wɔ axwɛwawa kí bazianete ba biku Aya aŋu lɛ aplɛ aŋu ní wɔ aʋa a. 5Abla ɛ, kpɛ banɔ tsisi ɔka ɔtɔ ní Yopa si ɔba. Yɛ linyi zizi nɛ linu Simon Petro. 6Onu ɔbaba ní Simon kugaplekpa ɔxwɛwa yɛ kepea mɛ gi ketipɔni axu la ɛ. 7Gi Aya ɔxwɛdzɛɛ asɛ ɛ, Kɔnelio axwa yɛ kepea mɛ banɔsumu tiaʋa, ni ɔguta tole gi izeesumu Aya a, xe onu yɛ ɔtutɔ yɛ ɔpɔnɔpɔnɔɛ. 8Asi ba liboe lɛ gi liba ɛ lɛ akpɛ ba tsisi Yopa e.

9Kele titia mɛ kemizea gi bali ní kudeo aʋa a, xe bíha Yopa kuku i, Petro emu atrɛ ní ligba lɛ aʋa tɔ yixwa Aya. 10Kuʋɛ kwizeeku ye lɛ apɛ si yiŋa bidɔ ɔ. Pɔ̀ gi bɛzɛtɔ bidɔ mɛ ɛ, atsini sra lɛ amɔ kububasɛ kutɔ ɛ. 11Amɔ si lifunu ne lidra, lɛ kiditɔ ŋwisi kusa ʋidi gi bɛka ní igyrɔ tine ne onu kinɛ ɛ, kize ple ba kesea. 12Ikli tine baga ede ede, kesea baga klɔ gi bizeti ba epò la aʋa ani liwɔ lɛ mɛ kudzɔʋi yɔ petee bizee kpɛ likpɔ ní kusaa mɛ ɛ. 13Lɛ ole ɔtɔ ɛsi yɛ si, “Petro, Yɔ, ye tɔ ta!”

14Pɔ̀ Petro apani si, “Owo lítraze ní te e, Ɔkaɛ! Maʋíŋa kidɔ gi kɛ su kídra loo kilulu ní ɔkɔ lɔ onu oʋídi i.”

15Ole lo egu kunugu yo ɛki yɛ kuʋla si, “Wukíkɔ kididɔ gi Aya adra kɛ su i, si kídra.” 16Liba lɛ mɛ ní te tatá zizi, ko lɛ bedzini kusa emuni tsini lifunu ne e.

17Petro apisa lɛ gi azeegyo kububasɛɔ edi si yinu kɔ mɛ ɛ, banama gi Kɔnelio akpɛ ɛ, bɛmɔ niklɔ gi Simon kepea kalɛ ɛ, lɛ balɛ ní kepea kevunu ya ɛ. 18Bɛxwa ɛtsisi lɛ beʋi si i, “Ɔbaba ɔtɔ gi bizɛxwa si Simon Petro ɔlɛ ní klɔ na a?”

19Gi Petro azeegyo kububasɛɔ edi si yinu kɔ ese e, Aya Ɔfuɛfuɛ nɔ ɛpani si, “Ta kutu! benyime tiata bali ní ya gi bɛɛpɛ wɔ ɛ. 20Lɛ loso bla, ple tɔ zɛɛtsani ba a. Wukídzi kede ní ba su u, mɛ makpɛ ba.” 21Petro eple aba lɛ asi benyime ba si, “Mɛ menu ɔniliɛ gi mlɛɛpɛ ɛ, liboe woli loso mlɛba a?”

22Bebu le onu si, “Baguta ba ɔka, Kɔnelio yɛ akpɛ blɔ, onu ɔnɔ gbã gi izeesumu Aya a, lɛ Yudanɛ ma petee bizɛki yɛ kubùbù glegle e. Aya yɛ ɔxwɛdzɛɛ asi yɛ si ɔxwa wɔ mani yɛ kepea mɛ tɔ aanu liboe lɛ gi wɔapani i.” 23Petro agbani ba akpɛ kepea mɛ lɛ azɛ ba ŋwisi yɛ bababa kinɛ ɛ, lɛ aki si bɛza ɛ.

Keletitia mɛ ɛ, abla lɛ yɛ ni ba bɛsɛ ɛ, lɛ baʋaziŋaatɔ gi bɛdɔ ní Yopa e, bekuni ba kude. 24Ní keletitia mɛ ɛ, bezeku Kaisarea níklɔ gi Kɔnelio ni yɛ baŋanɛ ba ni yɛ baʋia vevea ba gi axwa ɛ bɛzeepe ba. 25Gi Petro eti eku ní kepea mɛ ko e, Kɔnelio atsani yɛ lɛ gi apani yɛ ɛ, adɔ yɛ aklamasi na aʋa ni kubùbù ní Petro ikli lɛ onu. 26Pɔ̀ Petro apɔni yɛ si ɔyɔ ɔlɛ ɛ, lɛ apani si i, “Yɔ tɔ lɛɛ ɔnɔ ko mɛ fɛ menu.” 27Petro azeegu kunugu yo ni Kɔnelio gi eti eku kepea mɛ ɛ, níklɔ amɔ banɔ kpaŋukpaŋua ba gi bɛtsa a. 28Lɛ asi ba si, “Mlɔ ɔtutɔ mlete mɔmɔmɔ si liyɔ kedu ní blɔ ɔsã nɔ su si Yudanɛ ɔdzɛ banama gi bénu Yudanɛ kepe me loo ɔkɔ isu ɔpɔni ba a. Pɔ̀ Aya abasi mɛ si líma si mibù ɔnɔnɔ si ɔ́dra loo si elulu u. 29Lɛ loso, gi wɔkpɛ banɔ ní mɛ ese ko e mégbe si maaba a. Abla ɛ, meeʋi wo si ege loso wɔkpɛ banɔ ní mɛ ese e?”

30Lɛ Kɔnelio apani si, “liaze ŋwisi ome liwe nene ni lipoe lɛ ya ɖii me e, gi mazɛɛxwa Aya ní mɛ kepea mɛ ní kemizea inyɔ tita mɛ ɛ, onyime ɔtɔ gi eze ní liwu klekle me e, alɛɛ ní mɛ aŋu mɛ. 31Lɛ apani si, ‘Kɔnelio! Aya enu wɔ kuxwaxwa lɛ aplɛ aŋu ní wɔ kupɔnɔ kí bepiplinete ba aʋa a. 32Kpɛ ɔnɔ tsisi ní Yopa tɔ bagbani onyime ɔtɔ gi yɛ linyi zizi nɛ linu Simon Petro amanɔ ɔ. Onu ɔbaba ní Simon gi izɛwa kugaplekpa su axwɛ ɛ, yɛ kepea mɛ ní axu la kutu yɔ ɔ.’ 33Lɛ loso makpɛ banɔ atsisi wɔ kyɔŋ lɛ wɔbitɛ lɛ mumɔ gi wɔba ɛ. Abla ɛ, blɔ petee kuli ní ya ní Aya aŋu mɛ, gi kwipɛ si kunu liboe kakaa gi Ɔkaɛ Aya asi wɔ si pani ki blɔ ɛ.”

Petro apani Liboe Gbã nɛ

34Lɛ Petro apani si i, “Abla ɛ, mamɔ si linu anukwarɛ si Aya óʋidi ɔnɔ aŋu mɛ ɛ. 35Pɔ̀ ní kese kakaa aʋa ɛ, ɔniliɛ gi izeepleni isu ní Aya yɛ aŋu mɛ ɛ, xe izɛɛbitɛ kidiliɛ gi kigyɔ ɛ, yɛ izeeku yɛ aŋu. 36Mlete liboe lɛ gi atsisi Israelbanɛ ma a, xe asi ba kusuyɔɔ Liboe Gbã nɛ gani Yesu Kristo gi onu Ɔkaɛ kí ɔnɔ kakaa aʋa a. 37Mlete liboe ʋidi lɛ gi liba lɛ mɛ ní Israel kesea mɛ ɛ, gi likpese ní Galilea a, gi Yohanes asɔli yɛ liboe le ní kunikpɛkpɛɔ kede e. 38Mlete liboe ní Yesu Nazaret ɔnɛɛ su, ani kiliɛ gi Aya akya yɛ ɛ, xe aki si yɛ Aya yɛ Ɔfuɛfuɛ nɔ ɔ, eze yɛ aʋa a ni kigagla. Ɔkɔ kakaa gi adzɛ ɛ, azɛɛbitɛ eboe gbã, lɛ ayɔ ni banama petee gi bali ní ozimizi ye kigaglaɛ ese e, lɛ ese linu si Aya eze yɛ aʋa a. 39Blɔ kunu katsalia kí kidɔ kakaa gi abitɛ ɛ ní Yerusalem ni Yudanɛ ma kesea petee me. Lɛ beye ye gi beku ye ní ose lo su u. 40Pɔ̀ Aya ayɔni yɛ dɔni bekpo ʋa mɛ ní liwe tanɛ nɛ aʋa a, lɛ aki si ebu isu abasɛ 41aní kí ɔnɔ kakaa a, pɔ̀ kí banama gi beze yɛ katsalia a, gi ba Aya ebu aplɛ ɛ, ba benu blɔ gi kwiŋa a, xe kwiŋwɛ ni yɛ ɛ, gi ayɔ adɔ ni bekpo ʋa mɛ ɛ. 42Lɛ akpɛ ɔsã aki blɔ sì kusɔli liboe le aki banima, nì tɔ kuŋa katsalia si yɛ onu ɔniliɛ gi Aya akya otsixwa yɛ ki bagbagbe ba ni bekpo ʋa a. 43Beboedoplɛ ba petee bedo eboe plɛ ní yɛ su gi bɛŋwlimi si, ɔnɔ kakaa gi aazi yɛ aʋa ŋa ɛ, Aya akɔ yɛ eboe zimizi na kɔ kyɛ yɛ gani Yesu linyi ne kigaglaɛ mɛ.”

Banama gi bénu Yudanɛ kyɛ ɛ bɛzi Aya yɛ Ɔfuɛfuɛ dradra nɔ

44Gi Petro azeegu kunugu yo e, Aya yɛ Ɔfuɛfuɛ Dradra nɔ eple edɔ ní banama petee gi bɛzɛɛta liboe le kutu aʋa a. 45Yudanɛ baʋaziŋa ba gi bezeni Petro kude dɔ ní Yopa e, litu ba kugyɔ si Aya akɔ yɛ Ɔfuɛfuɛ nɔ bidɔ kɔkɔ ʋɛ aki banama gi bénu Yudanɛ kyɛ ɛ. 46Lɛ ese linu si benu gi bɛzɛɛpani ní siya ede ede me, lɛ bɛzɛɛkpɔ̀ Aya kukemeo o. Lɛ Petro apani si i, 47“Aya aki banɔ ba ya ba Yɛ Ɔfuɛfuɛ nɔ blɔ kiniɛ ɖii. Ɔnutɔ aatani kude kutsi kí ba kunikpɛkpɛɔ na a?” 48Lɛ loso akpɛ ɔsã si bakpɛ kuni aki ba ní Yesu Kristo linyi ne me. Lɛ beʋi dɔni yɛ awla si oze ní ba su ewe atɔ ɔ.

Currently Selected:

Axwɛ 10: avn

Highlight

Copy