Markôs 8

Yêsu Čem Pă Rơbâo Čô Mơnuih

(Mat 15:32-39)

1Amăng hơdôm hrơi anŭn, sa wơ̆t dơ̆ng ƀing mơnuih lu pơtŭm glaĭ, laih anŭn gơñu ƀu hmâo mơnơ̆ng ƀơ̆ng huă ôh, Yêsu iâu ƀing ding kơna Ñu rai pơ Ñu hăng laĭ kơ gơñu, 2“Kâo pap kơ ƀing mơnuih lu anai, yua kơ gơñu hmâo dŏ hrŏm hơbĭt hăng Kâo klâo hrơi laih, laih anŭn ƀu hmâo mơnơ̆ng ƀơ̆ng huă ôh. 3Tơdah Kâo brơi gơñu glaĭ hăng tơlơi rơpa, gơñu či rơwet rŏk jơlan; yua kơ hmâo đơđa amăng ƀing gơñu rai mơ̆ng ataih.”

4Ƀing ding kơna Ñu laĭ glaĭ: “Amăng tơdrŏn tač anai hyư̆m dưi hmâo ƀañ tơpŭng čem ƀing anai lĕ?”

5Yêsu tơña kơ gơñu: “Hơdôm klŏ ƀañ tơpŭng ƀing gih hmâo?” Gơñu laĭ: “Tơjuh klŏ.”

6Yêsu pơtă brơi ƀing mơnuih lu dŏ ber ƀơi lŏn. Ñu mă tơjuh klŏ ƀañ tơpŭng, laih bơni hơơč kơ Ơi Adai, Ñu wơ̆k ƀañ tơpŭng brơi kơ ƀing ding kơna Ñu pơpha brơi; laih anŭn gơñu pơpha brơi kơ ƀing mơnuih lu. 7Gơñu ăt hmâo mơ̆n ƀơƀiă drơi akan anĕt, laih bơni hơơč kơ Ơi Adai, kar kaĭ mơ̆n Ñu pơtă kơ ƀing ding kơna Ñu pơpha brơi akan anŭn kơ ƀing mơnuih lu. 8Abih bang mơnuih ƀơ̆ng trơi soh sel, laih anŭn gơñu duñ djah dŏ glaĭ bă tơjuh bai. 9Ƀing ƀơ̆ng anŭn hmâo giăm pă rơbâo čô. Giơ̆ng anŭn Yêsu brơi ƀing mơnuih glaĭ, 10laih anŭn tañ mơtam Yêsu đĭ sŏng hrŏm hơbĭt hăng ƀing ding kơna Ñu, laih anŭn nao pơ tring Dalmanutha.

Rơkâo Gru Kơnăl Mơyang

(Mat 16:1-4)

11 # Mat 12:38; Luk 11:16. Ƀing Pharisi rai laih anŭn pơrơjah hăng Yêsu. Gơñu rơkâo Yêsu ngă sa gru kơnăl mơyang mơ̆ng adai kiăng lông lăng Ñu. 12#Mat 12:39; Luk 11:29.Yêsu kơhôih amăng bơngăt jua hăng laĭ: “Yua hơgĕt ƀing mơnuih rơnŭk anai hơduah sa gru kơnăl mơyang? Sĭt biă mă Kâo laĭ kơ ƀing gih, ƀu či hmâo sa gru kơnăl mơyang brơi kơ ƀing rơnŭk anai ôh.”

13Giơ̆ng anŭn Yêsu lui gơñu, wơ̆t glaĭ đĭ sŏng hăng găn nao pơ hang gah adih.

Tơpơi Ƀing Pharisi Hăng Hêrôt

(Mat 16:5-12)

14Ƀing ding kơna wơr bĭt djă ba ƀañ tơpŭng; amăng sŏng gơñu kơnơ̆ng hmâo sa klŏ ƀañ tơpŭng đôč. 15#Luk 12:1.Yêsu pơtă kơ gơñu hăng laĭ: “Răng bĕ kơ tơpơi ƀing Pharisi hăng tơpơi Hêrôt.”

16Gơñu črŏng sai tơdruă gơñu kơ tơlơi anŭn hăng laĭ: “Ñu pơhiăp tui anŭn yua kơ ƀing ta ƀu hmâo djă ƀañ tơpŭng ôh.”

17Yêsu thâo tơlơi anŭn hăng laĭ kơ gơñu: “Hyư̆m ƀing gih črŏng sai kơ tơlơi ƀing gih ƀu hmâo ƀañ tơpŭng lĕ? Ƀing gih aka thâo hăng aka hluh ôh hă? Pran jua ƀing gih ăt dŏ khăng hă? 18#Yêr 5:21; Êsê 12:2; Mar 4:12.Ƀing gih hmâo mơta hyư̆m ƀing gih ƀu ƀuh ôh hă? Ƀing gih hmâo tơngia hyư̆m ƀing gih ƀu hmư̆ hă? Ƀing gih ƀu hơdơr ôh hă? 19Tơ Kâo wơ̆k rơma klŏ ƀañ tơpŭng brơi kơ rơma rơbâo čô mơnuih, ƀing gih duñ glaĭ hơdôm bai čơđeh meh ƀañ rơbeh?” Gơñu laĭ glaĭ: “Pluh dua bai.”

20“Laih anŭn tơjuh klŏ ƀañ tơpŭng brơi kơ pă rơbâo čô mơnuih, ƀing gih duñ glaĭ hơdôm bai čơđeh meh ƀañ rơbeh?” Gơñu laĭ glaĭ: “Tơjuh bai.”

21Yêsu laĭ kơ gơñu: “Ƀing gih ăt aka thâo hluh ôh hă?”

Mơnuih Bum Pơ Plei Bêtsaida

22Laih anŭn gơñu truh pơ plei Bêtsaida. Arăng ba rai pơ Yêsu sa čô đah rơkơi bum mơta, hăng rơkâo kơwưh kơ Yêsu ruaih gơ̆. 23Yêsu djă tơngan pô bum anŭn, ba gơ̆ pơ gah rơngiao plei. Laih anŭn tơ Ñu kơčuh ia bah ƀơi mơta gơ̆ hăng ah tơngan ƀơi ñu, Ñu tơña gơ̆: “Ih ƀuh mơnơ̆ng hơgĕt mơ̆?”

24Gơ̆ angak lăng hăng laĭ: “Kâo ƀuh mơnuih, samơ̆ gơñu kar hăng phŭn kơyâo hlăk dŏ rơbat.”

25Sa wơ̆t dơ̆ng Yêsu ah tơngan Ñu ƀơi mơta gơ̆, laih anŭn gơ̆ lăng ƀu kơ ƀleh ôh laih anŭn gơ̆ hlao mơtam hăng ƀuh klă rơđah abih bang mơnơ̆ng. 26Yêsu brơi gơ̆ glaĭ pơ sang hăng pơtă: “Anăm mŭt glaĭ ôh amăng plei.”

Tơlơi Pêtrôs Pơhaih Yêsu

(Mat 16:13-20; Luk 9:18-21)

27Yêsu hrŏm hơbĭt hăng ƀing ding kơna Ñu đuaĭ mơ̆ng anŭn, laih anŭn nao pơ lu boh plei amăng tring Sêsarê Philip. Tơdang rơbat rŏk jơlan Yêsu tơña kơ ƀing ding kơna Ñu: “Hlơi Kâo jing tui hăng arăng laĭ?”

28 # Mar 6:14-15; Luk 9:7-8. Gơñu laĭ glaĭ: “Yôhan Ƀatem, laih anŭn ƀing pơkŏn laĭ Êli, ƀing pơkŏn dơ̆ng laĭ sa čô amăng ƀing pô laĭ lui hlâo.”

29 # Yô 6:68-69. Yêsu tơña kơ ƀing gơ̆: “Samơ̆ ƀing gih laĭ hlơi Kâo jing?”

Pêtrôs laĭ glaĭ kơ Ñu: “Ih jing Yang Krist.”

30Laih anŭn Khua Yang Yêsu khă kơtang tĭt kơ ƀing gơñu, anăm pơhaih kơ arăng ôh hlơi Ñu jing.

Yêsu Pơthâo Hlâo Kơ Tơlơi Ñu Djai Laih Anŭn Hơdip Glaĭ

(Mat 16:21-28; Luk 9:22-27)

31Hlăk anŭn Yêsu čơdơ̆ng pơtô kơ gơñu tơlơi Ană Mơnuih khŏm tŭ lu tơlơi ruă nuă, laih anŭn ƀing kŏng tha, ƀing khua ngă yang prŏng, ƀing nai pơtô tơlơi juăt či hơngah lui Ñu, hăng pơdjai hĭ Ñu, laih anŭn klâo hrơi tơdơi Ñu či hơdip glaĭ dơ̆ng. 32Yêsu laĭ tơlơi anŭn klă rơđah biă mă. Pêtrôs ba Yêsu pơ anih pơkŏn hăng khă kơ Ñu anăm laĭ tui anŭn ôh. 33Samơ̆ Yêsu wir lăng kơ ƀing ding kơna Ñu, hăng ƀuah Pêtrôs: “Ơ Satan, kơdŭn bĕ gah klon Kâo. Yua kơ ih ƀu pơmĭn kơ bruă Ơi Adai ôh samơ̆ kơnơ̆ng pơmĭn kơ bruă ană mơnuih đôč.”

34 # Mat 10:38; Luk 14:27. Giơ̆ng anŭn Yêsu iâu ƀing mơnuih lu hrŏm hơbĭt hăng ƀing ding kơna Ñu laih anŭn laĭ: “Tơdah hlơi pô kiăng đuaĭ tui Kâo brơi ñu khŏm hơngah hĭ tơlơi pô ñu kiăng, glăm kơyâo bơrơkal ñu pô, hăng đuaĭ tui Kâo. 35#Mat 10:39; Luk 17:33; Yô 12:25.Yua kơ hlơi kiăng pơklaih tơlơi hơdip ñu, ñu či rơngiă hĭ; samơ̆ hlơi rơngiă tơlơi hơdip ñu yua kơ Kâo hăng yua kơ Tơlơi Phrâo Hiam, ñu či pơklaih tơlơi hơdip ñu. 36Yua kơ, hơgĕt tơlơi tŭ yua kơ sa čô mơnuih tơdah ñu hmâo abih lŏn tơnah, samơ̆ rơngiă hĭ bơngăt ñu? 37Hăng mơnơ̆ng hơgĕt ñu dưi brơi kiăng song glaĭ bơngăt ñu? 38Yua kơ hlơi pô mlâo kơ Kâo hăng kơ tơlơi Kâo pơhiăp amăng rơnŭk rih răm hăng soh sat anai, kar kaĭ mơ̆n Ană Mơnuih či mlâo kơ pô anŭn hlăk Ñu rai amăng tơlơi ang yang Ama Ñu hrŏm hơbĭt hăng ƀing ling jang rơgoh hiam Ñu.”

Currently Selected:

Markôs 8: JRA2016

Highlight

Copy