Markôs 16

Yêsu Hơdip Glaĭ

(Mat 28:1-8; Luk 24:1-12; Yô 20:1-10)

1Tơdơi kơ hrơi Saƀat, HʼMari Madala, HʼMari amĭ Yakơ, hăng HʼSalômê blơi ia ƀâu mơngưi kiăng nao pik drơi jan Yêsu. 2Hrơi tal sa amăng hrơi kơ̆m, sêng brêng ưm mơguah, hlăk yang hrơi phrâo tơbiă gơñu nao pơ pơsat. 3Rŏk jơlan gơñu bơlaĭ tơdruă: “Hlơi či tơglung hĭ boh pơtâo kơđơ̆l bah amăng pơsat brơi kơ ƀing ta?” 4Samơ̆ tơ gơñu angak lăng, gơñu ƀuh boh pơtâo prŏng biă mă anŭn arăng tơglung hĭ laih mơ̆ng bah amăng pơsat. 5Tui anŭn yơh gơñu mŭt amăng pơsat, gơñu ƀuh sa čô tơdăm buh ao phyung kŏ dŏ ber gah hơnuă, gơñu hwĭ biă mă. 6Ñu laĭ kơ gơñu: “Anăm hwĭ ôh. Kâo thâo ƀing gih sem Yêsu plei Nasaret, Pô arăng pơ̆ng laih ƀơi kơyâo bơrơkal. Ñu hơdip glaĭ laih. Ñu ƀu dŏ pơ anai dơ̆ng tah. Lăng bĕ, anai jing anih arăng pơđih Ñu. 7#Mat 26:32; Mar 14:28.Ră anai nao laĭ pơthâo bĕ kơ ƀing ding kơna Ñu hăng Pêtrôs: ‘Yêsu nao hlâo kơ ƀing gih pơ kwar Galilê. Pơ anŭn ƀing gih či ƀuh Ñu, tui hăng ñu hmâo laĭ laih kơ ƀing gih.’” 8Tui anŭn gơñu tơbiă mơ̆ng pơsat laih anŭn đuaĭ kơdŏp hĭ, yua kơ gơñu hwĭ bral tơtư̆ drơi jan hăng kơtuă hling hlang đơi. Gơñu ƀu khĭn pơhaih kơ hlơi hlơi ôh.#16:9-20 Đơđa hră Ơi Adai Pơhiăp so đưm Tơlơi phrâo hiam Markôs dơ̆ anai abih laih, ƀu hmâo ôh jơlan 9-20.

Yêsu Pơƀuh Ñu Pô Kơ HʼMari Madala

(Mat 28:9-10; Yô 20:11-18)

[ 9Giơ̆ng Yêsu hơdip glaĭ laih, hlăk ưm mơguah hrơi tal sa amăng hrơi kơ̆m anŭn, Ñu pơƀuh Ñu pô blŭng hlâo kơ HʼMari Madala, jing pô Yêsu hmâo puh pơđuaĭ tơjuh čô yang sat mơ̆ng gơ̆. 10HʼMari Madala nao laĭ pơthâo tơlơi anŭn kơ ƀing hmâo dŏ hrŏm hơbĭt laih hăng Yêsu. Ƀing anai hlăk dŏ čŏk hia rơngot hơning. 11Samơ̆ tơ gơñu hmư̆ laih tơlơi đah kơmơi anŭn laĭ pơthâo kơ tơlơi Yêsu hmâo hơdip glaĭ laih anŭn gơ̆ hmâo ƀuh laih Yêsu, gơñu ƀu đaŏ ôh kơ tơlơi anŭn.

Yêsu Pơƀuh Ñu Pô Kơ Dua Čô Ding Kơna

(Luk 24:13-35)

12Giơ̆ng tơlơi anŭn Yêsu pơƀuh Ñu pô hăng rup pơkŏn kơ dua čô ƀing ding kơna tơdang gơñu rơbat rŏk jơlan glaĭ pơ plei. 13Gơñu wơ̆t glaĭ laĭ pơthâo tơlơi anŭn kơ ƀing ding kơna pơkŏn, samơ̆ ƀing ding kơna anŭn ƀu đaŏ kơ tơlơi gơñu laĭ pơthâo ôh.

Yêsu Pơƀuh Ñu Pô Kơ Pluh Sa Čô Ding Kơna

(Mat 28:16-20; Luk 24:36-49; Yô 20:19-23; Bruă 1:6-8)

14Tơdơi kơ abih bang, Yêsu pơƀuh Ñu pô dơ̆ng kơ pluh sa čô ƀing ding kơna tơdang gơñu dŏ ƀơ̆ng huă. Yêsu ƀuah gơñu yua kơ tơlơi gơñu ƀu đaŏ hăng pran jua khăng gơñu; yua kơ gơñu ƀu đaŏ ôh kơ ƀing hmâo ƀuh Ñu hmâo hơdip glaĭ laih. 15#Bruă 1:8.Ñu laĭ hăng ƀing gơ̆: “Nao bĕ pơ djŏp djang lŏn tơnah, pơtô Tơlơi Phrâo Hiam kơ abih bang mơnuih. 16Hlơi pô đaŏ laih anŭn tŭ ƀatem či klaih, samơ̆ hlơi pô ƀu đaŏ ôh či tŭ tơlơi klă kơđi. 17Ơi Adai či brơi ƀing đaŏ hơdôm gru kơnăl tui anai: Hăng anăn Kâo gơñu či puh pơđuaĭ ƀing yang sat, gơñu či pơhiăp tơlơi tuai, 18tơdah gơñu mă djơ̆ ala, ƀôdah mơñum djơ̆ ia kăm, gơñu ƀu či ruă ôh, gơñu či ah tơngan ƀơi mơnuih duăm ruă, mơnuih duăm ruă či suaih.”

Yêsu Đĭ Glaĭ Pơ Adai

(Luk 24:50-53; Bruă 1:9-11)

19 # Bruă 1:9-11. Giơ̆ng kơ Khua Yang Yêsu hmâo pơhiăp laih hăng gơñu, Ơi Adai pŭ ba Ñu pơ adai, laih anŭn Ñu dŏ ber gah hơnuă kơ Ơi Adai. 20Ƀing ding kơna hyu pơtô djŏp djang anih, Khua Yang mă bruă hrŏm hơbĭt hăng gơñu laih anŭn yua khul tơlơi gru kơnăl mơsêh mơyang nao hrŏm hơbĭt kiăng pơsĭt tơlơi gơñu pơtô.]

Currently Selected:

Markôs 16: JRA2016

Highlight

Copy