Markôs 14

Ngă Mơneč Pơkơdơ̆ng Hăng Yêsu

(Mat 26:1-5; Luk 22:1-2; Yô 11:45-53)

1 # Tơb 12:1-27. Dŏ dua hrơi hlâo kơ phĕt Tơlơi Găn hăng phĕt Ƀañ Tơpŭng Ƀu Hmâo Tơpơi, ƀing khua ngă yang prŏng hăng ƀing nai pơtô tơlơi juăt hơduah jơlan kiăng mă Yêsu hăng tơlơi hơgơ̆m laih anŭn pơdjai hĭ Gơ̆. 2Yua kơ gơñu laĭ: “Ta ƀu dưi ngă ôh hlăk hrơi phĕt, hwĭ kơ ƀing ană plei pla rŭng răng.”

HʼMari Truač Ia Ƀâu Mơngưi Kơ Yêsu Pơ Plei Bêthani

(Mat 26:6-13; Yô 12:1-8)

3 # Luk 7:37-38. Hlăk Yêsu dŏ pơ Plei Bêthani amăng sang Simôn pô djơ̆ phŭng. Tơdang Ñu dŏ ƀơ̆ng huă hmâo sa čô đah kơmơi djă sa boh get boh pơtâo yom pioh ia ƀâu mơngưi ngă hăng kơyâo nard sĭt, yom biă mă. Đah kơmơi anŭn taih pơčah hĭ get hăng tuh ia klôñ ƀơi akŏ Yêsu. 4Samơ̆ hmâo đơđa hil laĭ tơdruă gơñu: “Yua hơgĕt plai hĭ đôč đač ia ƀâu mơngưi kar hăng anŭn? 5Yua kơ arăng dưi sĭ ia mơngưi anai rơbeh klâo rơtuh đơniê kiăng kơ pha hĭ brơi ƀing mơnuih ƀun rin.” Tui anŭn gơñu ƀuah kơ đah kơmơi anŭn kơtang biă mă.

6Samơ̆ Yêsu laĭ: “Lui măk ai ñu. Yua hơgĕt ƀing gih pơrŭng gơ̆? Ñu ngă tơlơi hiam kơ Kâo. 7#Mơñă 15:11.Ƀing gih hmâo ƀing mơnuih ƀun rin hrŏm hăng ƀing gih nanao, mông pă ƀing gih kiăng, ƀing gih dưi ngă hiam kơ gơñu yơh. Samơ̆ ƀing gih ƀu hmâo Kâo nanao ôh. 8Đah kơmơi anai ngă tui hăng tơlơi ñu dưi ngă. Ñu tuh ia klôñ ƀơi drơi jan kâo prăp rơmet hlâo kơ tơlơi arăng dơr kâo. 9Kâo laĭ sĭt biă mă kơ ƀing gih, amăng djŏp djang lŏn tơnah, pơpă anih arăng pơtô Tơlơi Phrâo Hiam, arăng či ră ruai glaĭ bruă đah kơmơi anai hmâo ngă kiăng pơhơdơr kơ ñu.”

Yudas Pơblư̆ Khua Yang

(Mat 26:14-16; Luk 22:3-6)

10Giơ̆ng anŭn Yudas Iskariôt, sa čô amăng pluh dua čô ƀing khua ding kơna nao pơ ƀing khua ngă yang prŏng kiăng pơblư̆ hăng jao hĭ Yêsu kơ gơñu. 11Tơ hmư̆ tơlơi anŭn gơñu hơ̆k mơak biă mă, laih anŭn ƀuăn či brơi prăk kơ Yudas. Tui anŭn Yudas hơduah mông gal kiăng kơ pơblư̆ hĭ Yêsu.

Khua Yang Pơhơdơr Phĕt Tơlơi Găn

(Mat 26:17-25; Luk 22:7-14,21-23; Yô 13:21-30)

12Hrơi tal sa amăng phĕt Ƀañ Tơpŭng Ƀu Hmâo Tơpơi, hrơi arăng pơdjai ană triu phĕt Tơlơi Găn, ƀing ding kơna tơña kơ Yêsu: “Pơpă anih Ih kiăng gơmơi nao pơkra brơi kơ Ih ƀơ̆ng phĕt Tơlơi Găn?”

13Ñu pơkiaŏ nao dua čô ƀing ding kơna Ñu hăng laĭ kơ gơñu: “Nao bĕ mŭt amăng plei, či hmâo sa čô đah rơkơi đua sa boh čeh ia či bưp ƀing gih. Đuaĭ tui ñu bĕ. 14Sang pă ñu mŭt, brơi ƀing gih laĭ kơ pô sang anŭn: ‘Nai laĭ, pơpă anih kâo či ƀơ̆ng phĕt Tơlơi Găn hrŏm hăng ƀing ding kơna Kâo?’ 15Mơnuih anŭn či črâo brơi kơ ƀing gih sa boh anih prŏng amăng adŭ tal glong arăng hmâo prăp pơkra brơi laih. Ƀơi anih anŭn ƀing gih prăp rơmet bĕ kơ ƀing ta.”

16Ƀing ding kơna anŭn nao mŭt amăng plei hăng ƀuh abih bang tơlơi tui hăng Yêsu hmâo laĭ laih kơ gơñu. Laih anŭn gơñu pơkra phĕt Tơlơi Găn.

17Tơ adai mơmŏt laih, Yêsu nao hrŏm hăng pluh dua čô khua ding kơna. 18Tơdang gơñu dŏ ƀơ̆ng huă ƀơi kơƀang, Yêsu laĭ: “Sĭt biă mă Kâo laĭ kơ ƀing gih, sa čô amăng ƀing gih dŏ ƀơ̆ng huă hrŏm hơbĭt hăng Kâo, či pơblư̆ lui Kâo.”#Adoh 41:9.

19Ƀing gơñu rơngot biă mă, rĭm čô gơñu čơdơ̆ng tơña kơ Yêsu: “Ƀu djơ̆ kâo ôh, djơ̆ mơ̆?”

20Yêsu laĭ glaĭ: “Pô anŭn jing sa čô amăng pluh dua čô, jing pô hlăk añrŭ ƀañ tơpŭng ñu amăng jam hrŏm hơbĭt hăng Kâo. 21Ană Mơnuih či djai tui hăng Hră Ơi Adai Pơhiăp hmâo čih djơ̆ kơ Ñu, samơ̆ răm ƀăm yơh kơ pô pơblư̆ lui Ană Mơnuih! Hiam hloh arăng ƀu tơkeng ôh pô anŭn.”

Yêsu Pơjing Tơlơi Ƀơ̆ng Pơgop Rơgoh Hiam

(Mat 26:26-30; Luk 22:15-20; I Kôr 11:23-25)

22Tơdang gơñu dŏ ƀơ̆ng huă, Yêsu mă ƀañ tơpŭng, iâu laĭ bơni hơơč, Ñu wơ̆k ƀañ tơpŭng brơi kơ ƀing gơñu hăng laĭ: “Mă bĕ; anai jing drơi jan Kâo.”

23Ñu mă kơčok, iâu laĭ bơni hơơč, giơ̆ng anŭn Ñu brơi kơ ƀing gơñu, laih anŭn abih bang gơñu mơñum. 24#Tơb 24:8; Yêr 31:31-34.Yêsu laĭ kơ gơñu: “Anai jing drah Kâo, drah kơ tơlơi kơnol pơgop hmâo tuh brơi kơ lu mơnuih. 25Sĭt biă mă Kâo laĭ kơ ƀing gih, Kâo ƀu či mơñum tơpai boh kơƀâu anai dơ̆ng ôh tơl hrơi Kâo či mơñum tơpai boh kơƀâu phrâo amăng Dêh Čar Pơtao Ơi Adai.”

26Giơ̆ng gơñu adoh sa tơlơi adoh bơni hơơč, gơñu tơbiă nao pơ čư̆ Ôliwơ.

Yêsu Laĭ Hlâo Tơlơi Pêtrôs Či Hơngah Ñu

(Mat 26:31-35; Luk 22:31-34; Yô 13:36-38)

27Yêsu laĭ hăng ƀing ding kơna Ñu: “Abih bang ƀing gih či đuaĭ lui Kâo; yua kơ Hră Ơi Adai Pơhiăp hmâo čih:

‘Kâo či taih pô wai triu,

Laih anŭn abih bang triu či čơlah bru bra.’#Sak 13:7.

28 # Mat 28:16. Samơ̆ giơ̆ng Kâo hơdip glaĭ, Kâo či nao hlâo kơ ƀing gih pơ kwar Galilê”.

29Pêtrôs laĭ hăng Ñu: “Wơ̆t dah abih bang či lui hĭ Ih, kâo ƀu či lui Ih ôh.”

30Yêsu laĭ kơ ñu: “Sĭt biă mă Kâo laĭ kơ ih, mlam anai yơh, hlâo kơ mơnŭ tơdjô̆ dua wơ̆t, ih či hơngah Kâo klâo wơ̆t.”

31Samơ̆ Pêtrôs laĭ hăng tơlơi khŭt khăt hloh dơ̆ng: “Wơ̆t dah kâo djai hrŏm hơbĭt hăng Ih tŭ mơ̆n, kâo ƀu či hơngah Ih ôh.” Laih anŭn abih bang gơñu ăt laĭ hrup hăng anŭn.

Yêsu Iâu Laĭ Amăng Đang Gêtsêmanê

(Mat 26:36-46; Luk 22:39-46)

32Gơñu nao pơ anih arăng pia Gêtsêmanê, laih anŭn Yêsu laĭ kơ ƀing ding kơna Ñu: “Dŏ ber bĕ ƀơi anai tơdang Kâo nao iâu laĭ.” 33Yêsu jak ba Pêtrôs, Yakơ hăng Yôhan nao hrŏm hơbĭt hăng Ñu, Ñu čơdơ̆ng hmâo tơlơi rơngot hăng rŭng răng kơtang biă mă. 34Ñu laĭ hăng gơñu: “Pran jua Kâo rơngot biă mă tơl či djai, dŏ pơ anai laih anŭn dŏ krŏng bĕ.” 35Ñu nao ataih ƀiă, Ñu bon ƀơi lŏn laih anŭn iâu laĭ, kiăng kơ tơdah dưi rơkâo mông anŭn anăm truh kơ Ñu ôh. 36Ñu laĭ: “Aba, Ơ Ama, abih bang tơlơi Ih dưi ngă soh sel. Rơkâo kơ Ih mă pơđuaĭ hĭ kơčok anai mơ̆ng Kâo. Ƀu djơ̆ tui hăng tơlơi Kâo kiăng ôh samơ̆ tui hăng tơlơi Ih kiăng.” 37Giơ̆ng anŭn, Ñu wơ̆t glaĭ hăng ƀuh gơñu dŏ pĭt; Ñu laĭ kơ Pêtrôs: “Ơ Simôn, ih dŏ pĭt hă? Ih ƀu dưi dŏ krŏng amăng sa mông ôh hă? 38Dŏ krŏng hăng iâu laĭ bĕ, kiăng kơ ƀing gih ƀu lĕ amăng tơlơi plư ôh. Bơngăt jua kiăng biă mă, samơ̆ asar đeh tơdu.” 39Yêsu nao sa wơ̆t dơ̆ng hăng iâu laĭ kar hăng hlâo mơ̆n. 40Yêsu wơ̆t glaĭ dơ̆ng hăng ƀuh ƀing ding kơna Ñu ăt dŏ pĭt, yua kơ mơta gơñu ƀu dưi blang ôh. Gơñu ƀu thâo hyư̆m či laĭ glaĭ kơ Yêsu ôh. 41Tơ Yêsu wơ̆t glaĭ tal klâo hăng laĭ kơ gơñu: “Ƀing gih ăt dŏ pĭt hăng dŏ pơdơi hă? Dôm anŭn djŏp yơh, mông truh yơh. Arăng čơdơ̆ng jao lui Ană Mơnuih amăng tơngan ƀing soh. 42Ƀing ta tơgŭ nao bĕ. Lăng adih, pô pơblư̆ lui Kâo truh yơh.”

Arăng Mă Yêsu

(Mat 26:47-56; Luk 22:47-53; Yô 18:3-12)

43Ƀơi mông Yêsu hlăk dŏ pơhiăp, Yudas, sa čô amăng ƀing pluh dua čô khua ding kơna, truh mơtam hrŏm hơbĭt hăng sa phung lu djă đao gưm, djă gai, mơ̆ng ƀing khua ngă yang prŏng, ƀing nai pơtô tơlơi juăt hăng ƀing kŏng tha pơkiaŏ rai. 44Pô pơblư̆ hmâo brơi sa gru kơnăl kơ ƀing phung lu, laĭ: “Hlơi pô kâo čŭm, ñu yơh anŭn. Čaŏ hĭ ñu hăng atăt ba răng wai kơjăp bĕ.” 45Tơ Yudas truh, ñu nao pơ Yêsu mơtam hăng laĭ: “Ơ Nai” Ñu čŭm Yêsu. 46Ƀing anŭn mă čaŏ Yêsu. 47Samơ̆ sa čô dŏ giăm suă đao ñu hăng koh tơĭ tơngia sa čô hlŭn khua ngă yang prŏng hloh. 48Yêsu laĭ kơ gơñu: “Yua hơgĕt ƀing gih djă đao gưm hăng gai kiăng mă čaŏ kâo hrup hăng sa čô mơnuih klĕ? 49#Luk 19:47; 21:37.Rĭm hrơi kâo dŏ hrŏm hơbĭt hăng ƀing gih, pơtô amăng Sang Kơkuh Pơpŭ, samơ̆ ƀing gih ƀu mă čaŏ kâo ôh. Samơ̆ anai jing tơlơi khŏm pơsĭt kơ Hră Ơi Adai Pơhiăp hmâo čih laih.” 50Hlăk anŭn abih bang ƀing ding kơna lui hĭ Yêsu hăng đuaĭ kơdŏp.

51Hmâo sa čô tơdăm kơnơ̆ng sŏm sa blah khăn kơbuă đuaĭ tui Yêsu. 52Gơñu mă tơdăm anŭn, samơ̆ ñu blač hĭ mơ̆ng khăn kơbuă anŭn hăng đuaĭ drơi mơhlŭn.

Yêsu Ƀơi Anăp Ƀing Phat Kơđi

(Mat 26:57-68; Luk 22:54-55; Yô 18:13-14,19-24)

53Gơñu ba Yêsu pơ sang khua ngă yang prŏng hloh. Abih bang ƀing khua ngă yang prŏng, ƀing kŏng tha, laih anŭn ƀing nai pơtô tơlơi juăt hmâo pơƀŭt glaĭ laih pơ anŭn. 54Pêtrôs đuaĭ tui Yêsu mơ̆ng ataih ataih, mŭt amăng wăl sang khua ngă yang prŏng hloh. Ñu dŏ ber hrŏm hơbĭt hăng ƀing tơhan gak dŏ mơdang apui pơ anŭn. 55Ƀing khua ngă yang prŏng hăng abih bang tơpul khua gĭt gai ană plei pla hơduah tơhnal tơlơi pơkơdơ̆ng glaĭ hăng Yêsu kiăng pơdjai hĭ Ñu, samơ̆ gơñu ƀu dưi sem ƀuh tơlơi hơgĕt ôh. 56Yua kơ hmâo lu mơnuih ngă gơ̆ng jơlan pơkơdơ̆ng hăng Yêsu, samơ̆ abih tơlơi gơñu pơčŭt ƀu hmâo sa hơnơ̆ng ôh. 57Hmâo đơđa mơnuih tơgŭ dơ̆ng pơčeh pơkơdơ̆ng hăng Yêsu, laĭ, 58#Yô 2:19.“Gơmơi hmâo hmư̆ Ñu laĭ: ‘Kâo či pơrai hĭ Sang Kơkuh Pơpŭ tơngan ană mơnuih ngă anai, laih anŭn amăng klâo hrơi Kâo či pơdơ̆ng glaĭ sa boh sang kơkuh pơpŭ pơkŏn dơ̆ng, ƀu djơ̆ hăng tơngan ană mơnuih ôh.’” 59Samơ̆ wơ̆t amăng tơlơi anai, tơlơi gơñu ngă gơ̆ng jơlan anŭn ăt ƀu hơnơ̆ng ôh.

60Khua ngă yang prŏng hloh tơgŭ dŏ dơ̆ng ƀơi anăp gơñu hăng tơña kơ Yêsu: “Ih ƀu hmâo tơlơi laĭ glaĭ ôh hă kơ abih tơlơi ƀing anai pơčŭt kơ Ih?” 61Samơ̆ Yêsu ăt dŏ rơiăt, ƀu pơhiăp sa boh ôh. Sa wơ̆t dơ̆ng khua ngă yang prŏng hloh tơña Yêsu: “Djơ̆ mơ̆ Ih jing Yang Krist Ană Ơi Adai Pô arăng hơơč bơni?” 62Yêsu laĭ glaĭ: “Sĭt Kâo gơ̆ yơh,

Laih anŭn ƀing gih či ƀuh Ană Mơnuih

Dŏ ber gah hơnuă Pô Dưi Kơtang,

Laih anŭn trŭn rai dơ̆ng ƀơi hiăng amăng adai.”#Adoh 110:1; Đaniel 7:13.

63Khua ngă yang prŏng hloh hek hĭ ao ñu pô hăng laĭ: “Hơgĕt ƀing ta dŏ kiăng kơ tơlơi ƀing arăng ngă gơ̆ng jơlan dơ̆ng? 64#Lêwi 24:16.Ƀing gih hmư̆ laih tơlơi Ñu pơhiăp pơgao hmiah hăng Ơi Adai. Hyư̆m tơlơi ƀing gih khư̆p ư lĕ?” Abih bang gơñu leng klă kơđi Yêsu jing lăp kơ tơlơi djai. 65Hmâo đơđa amăng gơñu čơdơ̆ng kơčuh ia bah kơ Yêsu, gom ƀô̆ mơta Ñu, čok Ñu hăng laĭ: “Ih đaŏ lăng hlơi pô taih Ih!” Ƀing tơhan gak mă hăng pah meng Gơ̆.

Pêtrôs Hơngah Yêsu

(Mat 26:69-75; Luk 22:56-62; Yô 18:15-18,25-27)

66Hlăk Pêtrôs dŏ ƀơi gah yŭ amăng wăl sang, sa čô ding kơna đah kơmơi khua ngă yang prŏng hloh rai giăm. 67Ñu ƀuh Pêtrôs dŏ mơdang apui, ñu lăng kơ Pêtrôs hăng laĭ: “Ih ăt jing pô dŏ hrŏm hơbĭt hăng Yêsu plei Nasaret.” 68Samơ̆ Pêtrôs hơngah hăng laĭ: “Kâo ƀu thâo ôh kŏn thâo hluh lơi hơgĕt ih laĭ anŭn.” Pêtrôs tơbiă nao pơ bah amăng wăl sang. Hlăk anŭn mơnŭ tơdjô̆.#14:68 Đơđa hră Ơi Adai Pơhiăp so đưm ƀu hmâo: Hlăk anŭn mơnŭ tơdjô̆. 69Ding kơna đah kơmơi anŭn ƀuh ñu dơ̆ng, hăng laĭ kơ ƀing dŏ giăm anŭn: “Pô anai jing sa čô amăng ƀing anŭn mơ̆n.” 70Samơ̆ sa wơ̆t dơ̆ng Pêtrôs hơngah. Tơdơi ƀiă kơ anŭn ƀing dŏ giăm laĭ kơ Pêtrôs: “Sĭt biă mă ih jing sa čô amăng ƀing anŭn, yua kơ ih jing mơnuih Galilê.” 71Samơ̆ Pêtrôs čơdơ̆ng hơtơ̆m tơĭ hăng ƀuăn rơ̆ng ñu pô: “Kâo ƀu thâo krăn ôh mơnuih ƀing gih laĭ anŭn!”

72Hlăk anŭn mơtam, mơnŭ tơdjô̆ tal dua. Pêtrôs hơdơr glaĭ kơ tơlơi Yêsu hmâo laĭ kơ ñu: “Hlâo kơ mơnŭ tơdjô̆ tal dua ih či hơngah Kâo klâo wơ̆t.” Ñu rơngot biă mă hăng hia.

Currently Selected:

Markôs 14: JRA2016

Highlight

Copy