Yôhan 17

Yêsu Iâu Laĭ Kơ Ƀing Ding Kơna Ñu

1Giơ̆ng kơ Yêsu pơhiăp hơdôm tơlơi anai, Ñu angak mơta pơ adai hăng laĭ: “Ơ Ama, mông truh laih; pơ-ư pơang bĕ kơ Ană Ih, kiăng kơ Ană dưi pơ-ư pơang kơ Ama. 2Yua kơ Ama hmâo brơi laih kơ Ană tơlơi dưi wai lăng abih bang mơnuih kiăng kơ Ană dưi brơi tơlơi hơdip hlŏng lar kơ abih bang ƀing mơnuih Ama hmâo brơi laih kơ Ană. 3Tơlơi hơdip hlŏng lar jing thâo krăn Ama kơnơ̆ng Ih yơh jing Ơi Adai laih anŭn Pô sĭt, laih anŭn thâo krăn Yêsu Krist Pô Ih hmâo pơkiaŏ rai laih. 4Kâo hmâo pơ-ư pơang laih Ih amăng lŏn tơnah laih anŭn Kâo hmâo ngă pơgiơ̆ng laih bruă Ih hmâo jao brơi Kâo. 5Ơ Ama, ră anai rơkâo kơ Ih pơ-ư pơang Kâo ƀơi anăp Ih hăng tơlơi guh kơang Kâo hmâo laih hrŏm hơbĭt hăng Ih hlâo kơ hrih lŏn tơnah.

6Kâo hmâo pơrơđah laih anăn Ih kơ ƀing mơnuih Ih hmâo brơi kơ Kâo mơ̆ng lŏn tơnah. Gơñu lơ̆m kơ Ih, Ih hmâo brơi laih gơñu kơ Kâo laih anŭn gơñu hmâo gưt tui boh pơhiăp Ih. 7Ră anai gơñu thâo laih kơ abih bang tơlơi Ih hmâo brơi laih kơ Kâo leng kơ tơbiă mơ̆ng Ih. 8Yua kơ Kâo hmâo brơi laih kơ gơñu boh pơhiăp Ih hmâo brơi laih kơ Kâo. Gơñu hmâo mă tŭ laih hăng thâo Kâo hmâo rai mơ̆ng Ih sĭt, hăng đaŏ kơ Ih hmâo pơkiaŏ rai Kâo.

9Kâo iâu laĭ brơi kơ gơñu. Kâo ƀu iâu laĭ brơi kơ lŏn tơnah ôh, samơ̆ iâu laĭ kơ ƀing mơnuih Ih hmâo brơi laih kơ Kâo, yua kơ gơñu lơ̆m kơ Ih. 10Abih bang tơlơi mơnơ̆ng lơ̆m kơ Kâo jing lơ̆m kơ Ih, laih anŭn abih tơlơi mơnơ̆ng lơ̆m kơ Ih jing lơ̆m kơ Kâo mơ̆n, laih anŭn Kâo hmâo tơlơi pơ-ư pơang mơ̆ng gơñu. 11Ră anai Kâo či glaĭ pơ Ih; Kâo ƀu dŏ amăng lŏn tơnah dơ̆ng ôh, samơ̆ gơñu ăt dŏ amăng lŏn tơnah. Ơ Ama Rơgoh Hiam, rơkâo kơ Ih wai lăng gơñu amăng anăn Ih, jing anăn Ih hmâo brơi laih kơ Kâo, kiăng kơ gơñu dưi jing sa kar hăng Ƀing Ta. 12Tơdang Kâo dŏ hrŏm hơbĭt hăng gơñu, Kâo hmâo wai lăng gơñu amăng anăn Ih, jing anăn Ih hmâo brơi laih kơ Kâo. Kâo hmâo pơgang gơñu, ƀu pơrơngiă sa čô hlơi ôh, kơnơ̆ng ană kơ tơlơi răm rai đôč, kiăng kơ krĕp djơ̆ tui hăng Hră Ơi Adai Pơhiăp hmâo čih laih.#Adoh 41:9; Yô 13:18. 13Samơ̆ ră anai Kâo wơ̆t glaĭ pơ Ih. Kâo pơhiăp hơdôm tơlơi anai tơdang Kâo ăt dŏ amăng lŏn tơnah, kiăng kơ tơlơi hơ̆k mơak Kâo dưi bă blai amăng pran jua gơñu. 14Kâo hmâo brơi laih boh pơhiăp Ih kơ gơñu. Lŏn tơnah bơrơmŭt kơ gơñu, yua kơ gơñu ƀu lơ̆m kơ lŏn tơnah ôh, kar hăng Kâo ƀu lơ̆m lŏn tơnah mơ̆n. 15Kâo ƀu rơkâo kơ Ih mă hĭ gơñu mơ̆ng lŏn tơnah ôh, samơ̆ rơkâo Ih pơgang gơñu mơ̆ng pô sat ƀai.#17:15 Dưi pơblang dơ̆ng: tơlơi sat; ƀôdah: yang sat 16Gơñu ƀu lơ̆m kơ lŏn tơnah ôh, kar hăng Kâo ƀu lơ̆m kơ lŏn tơnah mơ̆n. 17Rơkâo kơ Ih yua tơlơi sĭt pơrơgoh hĭ gơñu; Boh Pơhiăp Ih jing tơlơi sĭt. 18Kar hăng Ih hmâo pơkiaŏ Kâo rai amăng lŏn tơnah, Kâo ăt pơkiaŏ gơñu nao amăng lŏn tơnah mơ̆n. 19Yua kơ ƀing gơñu yơh Kâo pơyơr hĭ Kâo pô, kiăng kơ gơñu ăt dưi pơrơgoh amăng tơlơi sĭt mơ̆n.

20Kâo ƀu kơnơ̆ng iâu laĭ brơi kơ ƀing gơñu đôč ôh, samơ̆ ăt iâu laĭ kơ ƀing či đaŏ kơ Kâo yua mơ̆ng tơlơi gơñu gơ̆ng jơlan mơ̆n. 21Kiăng kơ abih bang gơñu leng kơ jing hĭ hasa. Ơ Ama, kar hăng Ih dŏ amăng Kâo, laih anŭn Kâo dŏ amăng Ih, kar kaĭ mơ̆n kiăng kơ gơñu dŏ amăng Ƀing Ta; kiăng kơ lŏn tơnah đaŏ kơ Ih hmâo pơkiaŏ rai Kâo. 22Kâo hmâo brơi laih kơ gơñu tơlơi ang yang Ih hmâo brơi kơ Kâo, kiăng kơ gơñu dưi jing hasa kar hăng Ƀing Ta jing hasa. 23Kâo dŏ amăng gơñu, laih anŭn Ih dŏ amăng Kâo, kiăng kơ gơñu dưi jing hasa klă tum, kiăng kơ lŏn tơnah dưi thâo kơ Ih hmâo pơkiaŏ rai laih Kâo, laih anŭn Ih hmâo khăp laih gơñu kar hăng Ih hmâo khăp laih kơ Kâo.

24Ơ Ama, kâo kiăng pơpă Kâo dŏ, ƀing mơnuih Ih hmâo brơi laih kơ Kâo ăt dưi dŏ hrŏm hơbĭt hăng Kâo pơ anŭn mơ̆n, kiăng kơ gơñu dưi ƀuh tơlơi ang yang Ih hmâo pha brơi laih kơ Kâo, yua kơ Ih hmâo khăp laih kơ Kâo hlâo kơ hrih lŏn tơnah. 25Ơ Ama tơpă hơnơ̆ng, lŏn tơnah ƀu thâo krăn Ih ôh, samơ̆ Kâo thâo krăn Ih laih, laih anŭn ƀing anai thâo krăn Ih yơh Pô hmâo pơkiaŏ Kâo rai. 26Kâo hmâo pơrơđah laih anăn Ih kơ gơñu, laih anŭn Kâo ăt či pơrơđah brơi kơ gơñu thâo krăn anăn Ih dơ̆ng, kiăng kơ tơlơi khăp Ih hmâo khăp laih kơ Kâo dŏ amăng ƀing gơñu, laih anŭn Kâo ăt dŏ amăng ƀing gơñu mơ̆n.”

Currently Selected:

Yôhan 17: JRA2016

Highlight

Copy