Yôhan 12

HʼMari Pik Ia Klôñ Kơ Yêsu Pơ Bêthani

(Mat 26:6-13; Mar 14:3-9)

1Năm hrơi hlâo kơ phĕt Tơlơi Găn, Yêsu nao pơ Bêthani jing plei Lasar, pô Yêsu hmâo pơhơdip glaĭ mơ̆ng tơlơi djai. 2Pơ anŭn arăng pơkra mơnơ̆ng ƀơ̆ng huă jum Yêsu. HʼMart buih bruă pŭ mơnơ̆ng ƀơ̆ng huă, laih anŭn Lasar jing sa čô amăng ƀing dŏ ƀơ̆ng huă hrŏm hơbĭt hăng Ñu. 3Hlăk anŭn HʼMari mă sa mơkrah lit ia klôñ ngă hăng kơyâo nard sĭt, yom biă mă, pik tơkai Yêsu laih anŭn sut hăng ƀuk gơ̆, amăng sang bă hăng mơnâo ƀâu hiam.#Luk 7:37-38. 4Samơ̆ Yudas Iskariôt jing sa čô amăng ƀing ding kơna Yêsu (pô tơdơi anai či pơblư̆ lui Yêsu), ñu laĭ, 5“Hyư̆m ƀu sĭ hĭ ia klôñ ƀâu hiam anŭn hăng nua klâo rơtuh đơniê#12:5 Sa đơniê jing nua apah kơ sa hrơi mă bruă. laih anŭn pha brơi kơ ƀing mơnuih ƀun rin?” 6Ñu laĭ tui anŭn ƀu djơ̆ yua kơ ñu bơngơ̆t kơ ƀing mơnuih ƀun rin ôh, samơ̆ yua kơ ñu jing mơnuih klĕ dŏp. Ñu jing pô djă kơdŭng prăk, hăng juăt kơđeo mă prăk arăng pioh amăng kơdŭng anŭn.

7Samơ̆ Yêsu laĭ: “Lui măk ai gơ̆ bĕ, ñu hmâo pioh ia klôñ ƀâu hiam anai kơ hrơi dơr kâo. 8Ƀing gih dŏ hmâo mơnuih ƀun rin hrŏm hăng ƀing gih nanao, samơ̆ ƀing gih ƀu hmâo kâo nanao ôh.”#Mơñă 15:11.

Arăng Črŏng Sai Kiăng Pơdjai Lasar

9Sa phung lu ƀing ană Yuđa hmâo hmư̆ Yêsu pơ Bêthani, anŭn yơh gơñu rai, ƀu djơ̆ kơnơ̆ng yua kơ Yêsu pơ anŭn đôč ôh samơ̆ ăt kiăng lăng Lasar mơ̆n, pô Yêsu hmâo pơhơdip glaĭ laih mơ̆ng tơlơi djai. 10Tui anŭn ƀing khua ngă yang prŏng črŏng sai kiăng pơdjai wơ̆t hăng Lasar mơ̆n. 11Yua kơ mơ̆ng Lasar yơh hmâo lu ƀing ană Yuđa čơlah mơ̆ng gơñu hăng đaŏ kơ Yêsu.

Yêsu Đĭ Aseh Kle Mŭt Plei Yêrusalem

(Mat 21:1-11; Mar 11:1-11; Luk 19:28-40)

12Hrơi tơdơi kơ anŭn, hmâo sa phung lu rai kơ hrơi phĕt hmư̆ Yêsu hlăk rai pơ plei Yêrusalem. 13Tui anŭn gơñu mă than gol hăng nao drông Yêsu, hăng ur dreo: “Hôsana, mơyun hiam kơ pô rai amăng anăn Khua Yang, jing Pơtao ƀing Israel!”#Adoh 118:25, 26.

14Yêsu ƀuh sa drơi ană aseh kle, Ñu đĭ ƀơi gơ̆, tui hăng Hră Ơi Adai Pơhiăp hmâo čih laih:

15“Anăm hwĭ ôh! Ơ ană dra plei Siôn;

Anai nê, pơtao ih rai, đĭ ƀơi ană aseh kle.”#Sak 9:9; Êsai 62:11.

16Hlăk anŭn ƀing ding kơna Ñu ƀu thâo hluh ôh kơ tơlơi anŭn; samơ̆ tơ Ơi Adai pơ-ư pơang laih Yêsu, hlăk anŭn gơñu hơdơr kơ Hră Ơi Adai Pơhiăp hmâo čih laih tơlơi anŭn djơ̆ kơ Ñu, hăng hmâo ngă laih kơ Ñu tui anŭn.

17Phung mơnuih lu hmâo dŏ hrŏm hơbĭt hăng Yêsu hlăk Ñu iâu Lasar tơbiă mơ̆ng pơsat hăng pơhơdip glaĭ gơ̆ mơ̆ng tơlơi djai, leng ngă gơ̆ng jơlan kơ tơlơi hmâo truh laih. 18Phung mơnuih lu nao drông Yêsu, yua kơ gơñu hmâo hmư̆ Yêsu ngă tơlơi mơsêh mơyang anŭn. 19Hnŭn yơh ƀing Pharisi bơlaĭ tơdruă gơñu: “Lăng adih, ƀing ta ƀu dưi ngă hơgĕt ôh. Lăng bĕ, abih lŏn tơnah hmâo đuaĭ tui Ñu soh sel.”

Ƀing Mơnuih Grek Kiăng Bưp Yêsu

20Amăng ƀing mơnuih nao kơkuh pơpŭ amăng hrơi phĕt tơlơi găn hmâo đơđa ƀing Grek. 21Gơñu nao pơ Philip plei Bêtsaida amăng tring Galilê, hăng laĭ kơ ñu: “Ơ khua, gơmơi kiăng bưp Yêsu.”

22Philip nao laĭ kơ Andrê, laih anŭn Andrê nao hrŏm hơbĭt hăng Philip nao laĭ kơ Yêsu. 23Yêsu laĭ glaĭ kơ gơñu: “Mông Ană Mơnuih mă tŭ tơlơi ư-ang truh yơh. 24Kâo laĭ sĭt biă mă kơ ƀing gih tơdah sa asar pơdai ƀu lĕ pơ lŏn hăng djai hĭ, ñu ăt dŏ kơnơ̆ng sa sar đôč; samơ̆ tơdah ñu djai hĭ, ñu či mơboh lu. 25Hlơi pô khăp kơ tơlơi hơdip ñu, ñu či rơngiă hĭ. Samơ̆ hlơi pô bơrơmŭt kơ tơlơi hơdip ñu amăng lŏn tơnah anai, ñu či hmâo glaĭ tơlơi hơdip hlŏng lar.#Mat 10:39; 16:25; Mar 8:35; Luk 9:24; 17:33. 26Hlơi pô mă bruă Kâo, ñu khŏm đuaĭ tui Kâo. Pơpă anih Kâo dŏ, ding kơna Kâo ăt dŏ pơ anŭn mơ̆n. Hlơi pô mă bruă Kâo, Ama kâo či pơpŭ pơyom kơ ñu.”

Yêsu Laĭ Djơ̆ Kơ Tơlơi Djai Ñu

27“Ră anai bơngăt jua Kâo rŭng răng biă mă. Hơgĕt Kâo či laĭ: ‘Ơ Ama, pơklaih Kâo mơ̆ng mông anai?’ Ơ ơh, samơ̆ yua kơ mông anai yơh Kâo hmâo rai laih. 28Ơ Ama, brơi tơlơi ư-ang kơ anăn Ih bĕ.” Hlăk anŭn hmâo asăp pơhiăp mơ̆ng adai: “Kâo hmâo ư-ang laih kơ anăn Kâo, laih anŭn Kâo či pơ-ư ang anăn Kâo dơ̆ng.” 29Phung mơnuih lu dŏ jĕ hmư̆ jua hiăp anŭn laĭ: “Anŭn jing dơnai grơ̆m.” Ƀing pơkŏn laĭ: “Sa čô ling jang adai pơhiăp hăng Ñu.” 30Yêsu laĭ: “Asăp anai hmâo truh yua kơ ƀing gih, ƀu djơ̆ yua kơ Kâo ôh. 31Ră anai tơlơi phat kơđi truh laih kơ lŏn tơnah, laih anŭn Ơi Adai či pơglưh hĭ khua wai lăng lŏn tơnah anai. 32Bơ Kâo, tơ arăng yol đĭ drơi jan Kâo mơ̆ng lŏn, Kâo či dui ba abih bang mơnuih rai pơ Kâo.” 33Ñu laĭ tơlơi anŭn kiăng pơrơđah hyư̆m Ñu či djai.

34Phung mơnuih lu laĭ glaĭ: “Ƀing gơmơi hmâo hmư̆ laih amăng hră tơlơi juăt laĭ kơ Yang Krist dŏ hlŏng lar. Hyư̆m Ih dưi laĭ arăng khŏm yol đĭ Ană Mơnuih pơ glong lĕ? Hlơi Ană Mơnuih anŭn?”#Adoh 110:4; Êsai 9:7; Êsê 37:25; Đaniel 7:14.

35Yêsu laĭ glaĭ: “Tơlơi bơngač dŏ hrŏm hăng ƀing gih ƀu sui dơ̆ng ôh. Rơbat nao bĕ tơdang ƀing gih dŏ hmâo tơlơi bơngač, hwĭ kơ tơlơi kơnăm mơmŏt plŭt gom hĭ ƀing gih. Hlơi pô rơbat amăng tơlơi kơnăm mơmŏt ñu ƀu thâo ôh pơpă anih ñu nao. 36Tơdang gih dŏ hmâo tơlơi bơngač, đaŏ bĕ kơ tơlơi bơngač anŭn, kiăng kơ ƀing gih dưi jing ƀing ană kơ tơlơi bơngač.”

Tơlơi Ƀu Đaŏ Ƀing Ană Yuđa

Giơ̆ng Yêsu pơhiăp tơlơi anŭn, Ñu đuaĭ kơdŏp mơ̆ng ƀing gơñu. 37Wơ̆t dah Ñu hmâo ngă laih lu tơlơi mơsêh mơyang ƀơi anăp gơñu, gơñu ăt kŏn đaŏ kơ Ñu lơi. 38Tơlơi anŭn kiăng pơsĭt tơlơi pô laĭ lui hlâo Êsai hmâo pơhiăp laih:

“Ơ Khua Yang, hlơi hmâo đaŏ laih kơ tơlơi gơmơi pơtô,#Êsai 53:1.

laih anŭn kơ hlơi pô tơngan Khua Yang hmâo pơrơđah brơi laih lĕ?”

39Yua kơ anŭn yơh, gơñu ƀu dưi đaŏ ôh, yua kơ Êsai hmâo laĭ dơ̆ng mơ̆n,

40“Ơi Adai pơbum hĭ mơta gơñu,

Pơkhăng hĭ pran jua gơñu,

Hwĭ dah mơta gơñu thâo ƀuh,

Pran jua gơñu thâo hluh, laih anŭn gơñu wơ̆t glaĭ pơ Kâo,

Kiăng kơ Kâo pơsuaih hĭ gơñu.”#Êsai 6:10.

41Êsai pơhiăp tơlơi anŭn yua ñu ƀuh tơlơi ang yang Yang Krist, laih anŭn pơhiăp djơ̆ kơ Ñu.

42Wơ̆t dah tui anŭn ăt hmâo lu mơnuih amăng ƀing khua đaŏ kơ Yêsu, samơ̆ gơñu ƀu khĭn pơhaih tơlơi anŭn ôh, yua kơ gơñu hwĭ ƀing Pharisi puh pơđuaĭ gơñu mơ̆ng sang bơjơnum. 43Yua kơ gơñu khăp kơ tơlơi ư-ang mơ̆ng ană mơnuih hloh kơ tơlơi ư-ang mơ̆ng Ơi Adai.

Boh Pơhiăp Yêsu Phat Kơđi Arăng

44Yêsu pơhiăp kraih: “Hlơi pô đaŏ kơ Kâo, ƀu djơ̆ ñu kơnơ̆ng đaŏ kơ Kâo đôč ôh, samơ̆ đaŏ kơ Pô hmâo pơkiaŏ rai Kâo kar kaĭ mơ̆n. 45Bơ hlơi pô ƀuh Kâo, ñu ăt ƀuh Pô hmâo pơkiaŏ rai Kâo mơ̆n. 46Kâo jing tơlơi bơngač hmâo rai laih amăng lŏn tơnah, kiăng kơ hlơi pô đaŏ kơ Kâo ñu ƀu dŏ amăng tơlơi kơnăm mơmŏt dơ̆ng ôh. 47Tơdah hlơi pô hmư̆ boh pơhiăp Kâo laih anŭn ƀu gưt tui ôh, Kâo ƀu phat kơđi kơ ñu ôh; yua kơ Kâo rai ƀu djơ̆ kiăng kơ phat kơđi kơ lŏn tơnah ôh, samơ̆ kiăng pơklaih lŏn tơnah. 48Hlơi pô hơngah Kâo laih anŭn ƀu mă tŭ ôh boh pơhiăp Kâo, hmâo laih sa čô phat kơđi kơ ñu; boh pơhiăp Kâo hmâo pơhiăp anŭn yơh či phat kơđi kơ ñu ƀơi hrơi đŭt tơdơi. 49Yua kơ kâo ƀu pơhiăp hăng tơlơi dưi Kâo pô ôh; samơ̆ Ama, Pô hmâo pơkiaŏ rai Kâo, pơđar Kâo pơhiăp tơlơi hơgĕt Kâo khŏm pơhiăp laih anŭn hơgĕt tơlơi Kâo khŏm pơhaih. 50Kâo thâo tơlơi Ñu pơđar anŭn jing tơlơi hơdip hlŏng lar. Yua kơ anŭn yơh hơgĕt tơlơi Kâo pơhiăp, Kâo pơhiăp tui hăng Ama hmâo pơđar laih kơ Kâo.”

Currently Selected:

Yôhan 12: JRA2016

Highlight

Copy