Čơdơ̆ng Phŭn 8
8
Abih Hĭ Ia Lip
1Ơi Adai hơdơr nao kơ Nôê hăng khul hlô glai laih anŭn khul hlô rong dŏ amăng kompăn hrŏm hăng Nôê, yua kơ anŭn Ñu ngă brơi angĭn thut găn lŏn tơnah laih anŭn ia hrŏ hĭ. 2Ƀing hlâo ia mơ̆ng hlŭng dlam laih anŭn khul amăng bơnư̆ pơ adai krư̆ glaĭ hĭ, hơjan mơ̆ng adai ƀu ruh trŭn dơ̆ng tah. 3Ia hrŏ ƀrư̆ ƀrư̆ mơ̆ng lŏn tơnah. Tơdơi kơ sa rơtuh rơma pluh hrơi, anŭn kah ia hrŏ trŭn hĭ. 4Amăng lơ pluh tơjuh, blan tơjuh, kompăn dŏ hĭ ƀơi čư̆ Ararat. 5Ia hrŏ tui nanao tơl truh blan pluh. Lơ sa blan pluh, ƀing čŏng čư̆ čơdơ̆ng thâo ƀuh yơh.
6Tơdơi kơ pă pluh hrơi Nôê pŏk bah amăng phă ñu pô hmâo ngă laih, 7laih anŭn pơklaih sa drơi čĭm ă. Ñu pơr nao pơr rai tơl ia thu abih laih mơ̆ng lŏn tơnah. 8Ñu ăt pơklaih sa drơi čĭm kơtrâo kiăng thâo ia hrŏ laih ƀôdah akă mơ̆ng lŏn tơnah. 9Samơ̆ čĭm kơtrâo ƀu hơduah ƀuh anih ñu či găm ôh yua kơ anŭn ñu pơr wơ̆t glaĭ pơ kompăn, yua kơ ia ăt dŏ gom abih lŏn tơnah. Nôê yơr tơngan mă čĭm kơtrâo ba mŭt amăng kompăn. 10Ñu dŏ tơguan tơjuh hrơi dơ̆ng, giơ̆ng anŭn ñu pơklaih dơ̆ng čĭm kơtrâo mơ̆ng kompăn. 11Truh klam, čĭm kơtrâo wơ̆t glaĭ pơ ñu, laih anŭn anai nê, ñu gong ƀơi kơƀoč ñu sa pŏk hla ôliwơ săt! Nôê thâo ia hmâo hrŏ ƀiă laih mơ̆ng lŏn tơnah. 12Ñu tơguan tơjuh hrơi dơ̆ng, giơ̆ng anŭn ñu pơklaih čĭm kơtrâo; laih anŭn tal anai čĭm kơtrâo ƀu wơ̆t glaĭ pơ ñu dơ̆ng tah.
13Lơ sa, blan sa, thŭn tal năm rơtuh sa,#8:13 Hră pơblang Tơjuh Pluh thim mŭt: rơnŭk Nôê. ia hmâo thu laih ƀơi lŏn tơnah. Nôê pŏk bơbŭng kompăn, laih anŭn ñu ƀuh rŏng lŏn tơnah thu laih. 14Lơ dua pluh tơjuh blan dua, lŏn hmâo thu hĭ abih bang laih.
Nôê tơbiă mơ̆ng kompăn
15Ơi Adai laĭ kơ Nôê: 16“Tơbiă bĕ mơ̆ng kompăn hrŏm hăng bơnai ih, ƀing ană đah rơkơi laih anŭn hăng ƀing hơđŭ ih. 17Ba tơbiă bĕ mơ̆ng kompăn khul hlô mơnơ̆ng hmâo dŏ laih hrŏm hăng ih, jing khul hlô hơdip kar hăng čĭm, khul hlô mơnơ̆ng, khul hlô hro rui ƀơi lŏn, kiăng kơ gơñu či tuh čeh lar laih anŭn thim lu hloh amăng lŏn tơnah.” 18Tui anŭn, Nôê hăng bơnai ñu, ƀing ană đah rơkơi ñu laih anŭn ƀing hơđŭ ñu tơbiă mơ̆ng kompăn. 19Abih bang khul hlô glai, hlô hro rui ƀơi lŏn, khul čĭm hrŏm hăng abih mơnơ̆ng pơpư̆ pơgơi ƀơi lŏn tơnah tơbiă mơ̆ng kompăn, djuai pă tui djuai anŭn.
Nôê Pơyơr Mơnơ̆ng Ngă Yang Čuh
20Hlăk anŭn Nôê pơdơ̆ng sa boh kơƀang ngă yang brơi kơ Yêhôwa. Ñu mă khul hlô rơgoh laih anŭn khul čĭm rơgoh ngă mơnơ̆ng ngă yang čuh pơyơr đĭ ƀơi kơƀang ngă yang. 21Yêhôwa mơak mă tŭ mơnâo ƀâu mơngưi laih anŭn laĭ: “Kâo ƀu či hơtơ̆m pah kơ lŏn tơnah yua kơ ană mơnuih dơ̆ng ôh, wơ̆t dah pran jua ană mơnuih ăt dŏ soh sat mơ̆ng hrơi gơñu ăt dŏ čơđai. Kâo ƀu či pơrai dơ̆ng ôh kơ khul hlô mơnơ̆ng hơdip kar hăng Kâo hmâo ngă laih.
22Tơdang lŏn tơnah ăt dŏ,
bơyan sai pơjeh laih anŭn bơyan hơpuă, bơyan rơŏt laih anŭn bơyan pơ-iă
Bơyan hla răng laih anŭn bơyan puih, hrơi laih anŭn mlam,
Ƀu či đŭt hĭ ôh.”
Currently Selected:
Čơdơ̆ng Phŭn 8: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
