Čơdơ̆ng Phŭn 26

Isak Dŏ Pơ Gêrar

1Rơngiao kơ tơlơi rơpa prŏng hmâo truh laih hlâo adih amăng rơnŭk Abraham, ră anai amăng čar ăt hmâo dơ̆ng mơ̆n tơlơi rơpa prŏng truh. Yua kơ anŭn, Isak nao pơ Gêrar, bưp Abimêlek, pơtao Philistin. 2Yêhôwa pơrơđah rai kơ ñu laih anŭn laĭ: “Anăm trŭn nao pơ Êjip ôh, brơi ih dŏ bĕ amăng čar Kâo či črâo brơi kơ ih. 3Brơi ih dŏ jang jai ƀơi čar anai, Kâo či dŏ hrŏm hăng ih laih anŭn brơi tơlơi mơyun hiam kơ ih; yua kơ Kâo či pha brơi kơ ih laih anŭn kơnŭng djuai ih abih bang lŏn čar anai laih anŭn Kâo či ngă pơgiơ̆ng hĭ abih tơlơi Kâo hmâo ƀuăn rơ̆ng laih hăng Abraham, ama ih.#Čơd 22:16-18. 4Kâo či ngă brơi ană tơčo ih lu kar hăng pơtŭ amăng adai laih anŭn pha brơi kơnŭng djuai ih abih bang tring anai. Abih djuai mơnuih amăng lŏn tơnah či dưi hmâo tơlơi mơyun hiam yua mơ̆ng kơnŭng djuai ih; 5yua kơ Abraham hmâo gưt laih hiăp Kâo, ngă tui abih tơlơi Kâo hmâo pơtô pơhrăm, khul tơlơi Kâo pơtă, tơlơi pơđar laih anŭn tơlơi juăt Kâo.”

HʼRêbêka laih anŭn pơtao Abimêlek

6Anŭn yơh Isak dŏ hĭ pơ Gêrar. 7Yua kơ HʼRêbêka hmâo tơlơi hiam rŏ anŭn yơh tơdang ƀing mơnuih amăng plei tơña Isak kơ bơnai ñu, ñu laĭ: “Ñu jing adơi kâo”. Ñu ƀu kiăng laĭ ôh: “Ñu jing bơnai kâo” yua kơ ñu hwĭ ƀing đah rơkơi amăng plei anŭn či pơdjai hĭ ñu yua kơ đah kơmơi anŭn.#Čơd 12:13; 20:2. 8Isak dŏ pơ anŭn sui laih, Abimêlek, pơtao Philistin, lăng mơ̆ng amăng phă laih anŭn ñu ƀuh Isak hlăk hơ-on bơnai ñu HʼRêbêka. 9Abimêlek iâu Isak rai laih anŭn laĭ: “Sĭt pô anŭn jing bơnai ih! Yua hơgĕt ih laĭ: ‘Ñu jing adơi kâo’?” Isak laĭ glaĭ kơ pơtao: “Yua kơ kâo pơmĭn amăng pran jua hwĭ dah kâo či djai hĭ yua kơ đah kơmơi anŭn.” 10Abimêlek tơña: “Hơgĕt ih hmâo ngă laih kơ ƀing gơmơi? Tơdah hmâo hlơi nao đih hơbĭt hăng bơnai ih, tui anŭn ih hmâo ngă brơi ƀing gơmơi jing soh hĭ laih!” 11Yua kơ anŭn, Abimêlek pơtă kơ abih bang ană plei pla tui anai: “Hlơi pô bơ̆t djơ̆ pô anai ƀôdah bơnai ñu, pô anŭn či tŭ tơlơi djai.”

Isak dưi jing pơdrŏng

12Isak sai pơjeh amăng čar anŭn laih anŭn thŭn anŭn ñu hơpuă mă sa rơtuh wơ̆t lu hloh, yua kơ Yêhôwa tuh tơlơi mơyun hiam kơ ñu. 13Ñu jing hĭ pô pơdrŏng, dram gơnam ñu hmâo ƀrư̆ hrơi lu tui tơl ñu jing hĭ sa čô mơnuih pơdrŏng biă mă. 14Ñu hmâo lu drơi triu, rơmo laih anŭn hmâo lu ding kơna biă mă yua kơ anŭn ƀing Philistin moañ kơ ñu. 15Abih bang khul ia dơmun ƀing ding kơna Abraham, ama ñu hmâo klơi laih hlâo adih, ră anai ƀing mơnuih Philistin mă lŏn lŏp hĭ. 16Abimêlek laĭ kơ Isak: “Brơi ih đuaĭ ataih mơ̆ng ƀing gơmơi, yua kơ ih jing laih mơnuih kơtang hloh kơ ƀing gơmơi.”

17Tui anŭn, Isak lui hĭ anih anŭn, nao pơdơ̆ng sang khăn ñu ƀơi klŭng Gêrar laih anŭn dŏ hĭ pơ anŭn. 18Isak klơi glaĭ khul ia dơmun hmâo klơi laih amăng rơnŭk Abraham, ama ñu. Khul ia dơmun ƀing mơnuih Philistin hmâo lŏp hĭ laih tơdơi kơ Abraham djai. Ñu iâu khul ia dơmun anŭn tui hăng anăn ama ñu hmâo pơanăn laih. 19Samơ̆ tơdang ƀing ding kơna Isak klơi ia dơmun amăng klŭng anŭn laih anŭn bưp hĭ sa akŏ ia ƀlĕ bluh đĭ, 20ƀing mơnuih wai triu pơ Gêrar rai pơrơsua hăng ƀing wai triu Isak. Gơñu laĭ: “Akŏ ia anai jing lơ̆m kơ ƀing gơmơi”, hnŭn yơh ñu pơanăn ia dơmun anai jing Êsek,#26:20 Êsek kiăng laĭ “pơrơsua”. yua kơ gơñu pơmiă hăng ñu. 21Giơ̆ng anŭn, ƀing ding kơna ñu klơi sa boh ia dơmun pơkŏn dơ̆ng laih anŭn gơñu ăt rai pơmiă mơ̆n, hnŭn yơh ñu pơanăn hĭ ia dơmun anŭn jing Sitna.#26:21 Sitna kiăng laĭ: “hil bơrơmŭt”. 22Isak lui hĭ anih anŭn nao klơi sa boh ia dơmun pơkŏn dơ̆ng laih anŭn ia anai gơñu huaĭ rai pơrơsua dơ̆ng tah, hnŭn yơh ñu pơanăn hĭ jing Rêhôbôt,#26:22 Rêhôbôt kiăng laĭ: “anih rơhaih rơhông”. laih anŭn laĭ: “Ră anai Yêhôwa hmâo pha brơi gơmơi sa boh anih rơhaih rơhông, laih anŭn gơmơi či jing pơdrŏng amăng čar anai.”

Ơi Adai Ƀuăn Dơ̆ng Hăng Isak

23Mơ̆ng anih anŭn, Isak đĭ nao pơ Bêrsêba. 24Mlam anŭn, Yêhôwa pơrơđah rai laih anŭn laĭ hăng ñu: “Kâo jing Ơi Adai kơ Abraham, ama ih. Anăm hwĭ ôh, yua kơ kâo dŏ hăng ih. Kâo či tuh tơlơi mơyun hiam kơ ih laih anŭn ngă brơi kơnŭng djuai ih lu tui, yua kơ Abraham jing ding kơna Kâo!” 25Isak pơdơ̆ng sa boh kơƀang ngă yang, iâu laĭ kơ anăn Yêhôwa laih anŭn pơdơ̆ng sang khăn ƀơi anŭn. Giơ̆ng anŭn ƀing ding kơna ñu klơi pơ anŭn sa boh ia dơmun.

Isak pơjing tơlơi pơgop hăng Abimêlek

26Pơtao Abimêlek mơ̆ng Gêrar rai čuă ngui Isak. Nao hơbĭt hrŏm ñu hmâo Ahusat pô kơčĕ bruă brơi ñu laih anŭn Pikôl khua ƀing tơhan ñu.#Čơd 21:22. 27Isak tơña: “Ƀing gih areh hil kơ kâo laih anŭn puh pơđuaĭ kâo mơ̆ng ƀing gih, yua hơgĕt ƀing gih ăt hơduah sem kâo dơ̆ng?” 28Gơñu laĭ glaĭ: “Ƀing gơmơi ƀuh rơđah Yêhôwa hmâo djru ih, yua kơ anŭn yơh ƀing gơmơi pơmĭn tơ̆ng krah ih hăng ƀing gơmơi khŏm hmâo sa tơlơi ƀuăn rơ̆ng kiăng ngă kơnol pơgop hăng tơdruă. 29Ih khŏm ƀuăn rơ̆ng ih ƀu či ngă tơlơi sat kơ ƀing gơmơi ôh kar hăng ƀing gơmơi ăt ƀu hmâo bơ̆t djơ̆ ih lơi, kơđai glaĭ, gơmơi hmâo ngă hiam laih anŭn brơi ih tơbiă đuaĭ hăng tơlơi rơnŭk rơnua. Ră anai ih jing mơnuih hmâo Yêhôwa tuh tơlơi mơyun hiam.” 30Isak prăp rơmet sa tơlơi ƀơ̆ng huă prŏng laih anŭn gơñu ƀơ̆ng huă hrŏm hơbĭt. 31Mơguah hrơi tơdơi gơñu tơgŭ mơ̆ng ưm, pơdơ̆ng pơjing tơlơi ƀuăn rơ̆ng hrŏm hơbĭt. Giơ̆ng anŭn Isak atăt ƀing mơnuih anŭn rơbat glaĭ laih anŭn gơñu rơbat nao hăng tơlơi rơnŭk rơnua.

32Ăt amăng hrơi anŭn mơ̆n, ƀing ding kơna Isak rai laĭ pơthâo kơ ñu kơ tơlơi ia dơmun gơñu phrâo klơi. Gơñu laĭ: “Ƀing gơmơi hmâo hơduah ƀuh laih ia.” 33Ñu pơanăn ia dơmun anŭn jing Siba.#26:33 Siba kiăng laĭ: “boh pơhiăp ƀuăn rơ̆ng”. Yua kơ anŭn yơh plei anŭn hmâo anăn jing Bêrsêba#26:33 Bêrsêba: Amăng tơlơi Hêbrơ, boh hră anai kiăng laĭ: “Ia dơmun kơ tơlơi ƀuăn rơ̆ng”. truh pơ hrơi anai.

Êsâo dŏ bơnai

34Êsâo dŏ bơnai hlăk ñu pă pluh thŭn, sa čô mơnuih anăn ñu HʼYudit, ană đah kơmơi Bêri, mơnuih Hitit, laih anŭn sa čô mơnuih anăn ñu HʼBasmat, ană đah kơmơi Êlon, mơnuih Hitit mơ̆n. 35Dua čô hơđŭ anai jing tơlơi ruă pran jua kơ tơlơi hơdip Isak hăng HʼRêbêka.

Currently Selected:

Čơdơ̆ng Phŭn 26: JRA2016

Highlight

Copy