Bruă Mơnuă 9

Sôl Wơ̆t Glaĭ Đaŏ

(Bruă 22:6-16; 26:12-18)

1Hlăk anŭn, Sôl tŭt kơ pơhwĭ hăng pơdjai ƀing ding kơna kơ Khua Yang. Ñu nao pơ khua ngă yang prŏng hloh, 2rơkâo mơ̆ng ñu čih hră pơthâo kơ abih bang sang bơjơnum pơ plei Damas, kiăng kơ tơdah ñu ƀuh ƀing tui Jơlan Khua Yang,#9:2 Ƀing đaŏ kơ Yêsu Krist. đah rơkơi ƀôdah đah kơmơi, ñu dưi mă čaŏ dui ba ƀing anŭn pơ plei Yêrusalem.

3Samơ̆ tơdang Sôl hlăk nao ƀơi jơlan jĕ truh pơ plei Damas, blĭp truh hmâo tơlơi bơngač kơmlă mơ̆ng adai pơčrang jum dar ñu. 4Ñu rơbuh lĕ pơ lŏn hăng hmư̆ asăp pơhiăp laĭ kơ ñu: “Ơ Sôl, Ơ Sôl, yua hơgĕt ih ngă sat kơ Kâo?” 5Ñu laĭ glaĭ: “Ơ Khua, hlơi Ih?” Khua Yang laĭ: “Kâo jing Yêsu pô ih hlăk dŏ ngă sat. 6Samơ̆ tơgŭ bĕ mŭt amăng plei, laih anŭn arăng či laĭ brơi abih bang bruă kơ ih khŏm ngă.”

7Ƀing mơnuih nao hrŏm hơbĭt hăng Sôl leng kơ dŏ dơ̆ng glaĭ tơngo, ƀu pơhiăp sa boh ôh, gơñu hmư̆ asăp pơhiăp samơ̆ ƀu ƀuh hlơi ôh. 8Sôl tơgŭ mơ̆ng lŏn, wơ̆t dah mơta ñu dŏ blang, samơ̆ ñu ƀu thâo ƀuh ôh. Tui anŭn arăng djă tơngan ñu hăng dui ba pơ plei Damas. 9Ñu dŏ pơ anŭn amăng klâo hrơi ƀu thâo ƀuh ôh, kŏn ƀơ̆ng huă hăng mơñum lơi.

10Hlăk anŭn pơ plei Damas hmâo sa čô ding kơna anăn ñu Ananias. Khua Yang pơhiăp hăng ñu amăng tơlơi pơƀuh: “Ơ Ananias.” Ñu laĭ: “Kâo pơ anai, Ơ Khua Yang.” 11Khua Yang laĭ: “Tơgŭ bĕ hăng nao pơ jơlan arăng pia Jơlan Tơpă, amăng sang Yudas sem hơduah sa čô mơnuih anăn ñu Sôl, mơ̆ng plei Tars, ñu dŏ iâu laĭ. 12Laih anŭn amăng tơlơi pơƀuh ñu hmâo ƀuh sa čô mơnuih anăn Ananias, mŭt amăng sang ah tơngan ƀơi ñu kiăng kơ mơta ñu dưi ƀuh glaĭ dơ̆ng.” 13Samơ̆ Ananias laĭ glaĭ: “Ơ Khua Yang, kâo hmâo hmư̆ lu mơnuih laĭ djơ̆ kơ pô anai hmâo ngă sat kơ ƀing rơgoh hiam Ih pơ plei Yêrusalem. 14Ră anai ñu dŏ pơ anai, hmâo abih tơlơi dưi mơ̆ng ƀing khua ngă yang prŏng jao brơi kiăng mă čaŏ hĭ abih ƀing iâu laĭ kơ anăn Ih.”

15Samơ̆ Khua Yang laĭ: “Nao bĕ, yua kơ ñu jing pô Kâo hmâo ruah laih kiăng yua ñu pơhaih anăn Kâo ƀơi anăp ƀing djuai tuai, ƀing pơtao, laih anŭn ƀing ană Israel. 16Laih anŭn Kâo či pơrơđah brơi ñu thâo, ñu khŏm tŭ lu tơlơi tơnap tap yua anăn Kâo.” 17Tui anŭn Ananias tơbiă nao hăng mŭt amăng sang, ñu ah tơngan ƀơi Sôl hăng laĭ: “Ơ ayŏng Sôl, Khua Yang Yêsu Pô hmâo pơƀuh laih kơ ih ƀơi rŏk jơlan ih rai, hmâo pơkiaŏ kâo kiăng kơ mơta ih dưi ƀuh glaĭ dơ̆ng laih anŭn bă blai hăng Yang Bơngăt Hiam.” 18Tañ mơtam, hmâo sa mơnơ̆ng kar hăng kơmoh akan lĕ hĭ mơ̆ng mơta Sôl, laih anŭn mơta ñu rơđah glaĭ yơh. Ñu tơgŭ hăng tŭ ƀatem. 19Giơ̆ng ñu ƀơ̆ng huă, pran ñu hmâo tơlơi kơtang glaĭ.

Sôl Pơtô Pơ Plei Damas

Sôl dŏ glaĭ ƀiă hrơi hrŏm hăng ƀing ding kơna pơ plei Damas. 20Ñu čơdơ̆ng pơtô mơtam amăng sang bơjơnum pơhaih Yêsu jing Ană Ơi Adai.

21Abih bang ƀing hmư̆ ñu, gơñu leng kơtuă hling biă mă hăng laĭ: “Ƀu djơ̆ ôh hă mơnuih anai jing pô hmâo ngă sat laih kơ ƀing iâu laĭ kơ anăn anai pơ plei Yêrusalem, laih anŭn ñu hmâo rai pơ anai kiăng mă čaŏ ƀing đaŏ dui ba pơ ƀing khua ngă yang prŏng?”

22Samơ̆ Sôl jai kơjăp kơtang hloh dơ̆ng, pơrơjah pơgăl hăng ƀing ană Yuđa dŏ pơ plei Damas hăng ngă gơ̆ng jơlan pơklă tơlơi Yêsu jing Yang Krist.

23 # II Kôr 11:32,33. Rơgao sui hrơi mơ̆ng anŭn, ƀing ană Yuđa dưm tơlơi mơneč kiăng pơdjai ñu. 24Samơ̆ hmâo mơnuih nao laĭ pơthâo hĭ Sôl kơ tơlơi mơneč gơñu anŭn. Hrơi mlam gơñu dŏ krăp ƀơi amăng jang kiăng pơdjai Sôl. 25Samơ̆ amăng mlam, ƀing ding kơna pioh Sôl amăng bai hăng pơañreng trŭn gah rơngiao kơ pơnăng plei.

Sôl Pơ Plei Yêrusalem

26Tơ truh pơ plei Yêrusalem ñu kiăng nao bưp ƀing ding kơna pơkŏn; samơ̆ abih bang gơñu leng kơ hwĭ kơ ñu, yua kơ ƀing gơñu ƀu đaŏ ôh kơ ñu jing ding kơna sĭt. 27Tui anŭn, Barnabas nao djru hăng ba nao ñu pơ ƀing khua ding kơna, laih anŭn ră ruai brơi kơ ƀing gơñu kơ tơlơi Sôl hmâo ƀuh Khua Yang ƀơi rŏk jơlan, tơlơi Khua Yang hmâo pơhiăp laih kơ Sôl, laih anŭn hyư̆m Sôl hmâo pơtô laih anăn Yêsu hăng tơlơi khĭn amăng plei Damas. 28Mơ̆ng anŭn, Sôl dŏ hrŏm hơbĭt, nao rai hăng ƀing ding kơna amăng Plei Yêrusalem, laih anŭn pơtô hăng tơlơi khĭn amăng anăn Khua Yang. 29Ñu pơhiăp hăng pơgăl hăng ƀing Hêlênist, samơ̆ ƀing anŭn hơduah tơlơi kiăng pơdjai ñu. 30Tơ ƀing adơi ayŏng thâo tơlơi anŭn gơñu ba Sôl nao pơ plei Sêsarê hăng brơi ñu nao pơ plei Tars.

31Tui anŭn, abih Phung Sang Ơi Adai amăng tring Yuđa, tring Galilê hăng tring Samari hmâo tơlơi rơnŭk rơnua, prŏng đĭ tui; Phung Sang Ơi Adai rơbat amăng tơlơi hwĭ pơpŭ kơ Khua Yang laih anŭn mơ̆ng tơlơi Yang Bơngăt Hiam djru, hmâo mơnuih đaŏ thim lu jai.

Pêtrôs Pơ Plei Lida Hăng Plei Jôpa

32Tơdang Pêtrôs hyu djŏp djang anih, ñu ăt trŭn nao mơ̆n pơ ƀing rơgoh hiam pơ plei Lida. 33Pơ anŭn Pêtrôs ƀuh sa čô mơnuih rơwen anăn gơ̆ Ênê; dŏ đih ƀơi sưng hmâo sapăn thŭn laih. 34Pêtrôs laĭ kơ ñu: “Ơ Ênê, Yêsu Krist pơsuaih brơi ih; tơgŭ bĕ hăng rơmet sưng pĭt ih.” Gơ̆ tơgŭ mơtam. 35Abih bang ƀing amăng plei Lida hăng plei Sarôn ƀuh gơ̆, laih anŭn gơñu leng kơ wơ̆t glaĭ kơ Khua Yang.

36Pơ plei Jôpa hmâo sa čô đah kơmơi ding kơna anăn ñu HʼTabitha, arăng iâu dơ̆ng HʼDôrkas (kiăng laĭ kơtŏng). Gơ̆ ngă lu bruă hiam hăng brơi lu mơnơ̆ng pap. 37Hlăk anŭn ñu ruă laih anŭn djai hĭ. Arăng rao drơi jan gơ̆ hăng pơđih hĭ pơ adŭ tal glong. 38Yua kơ plei Lida jĕ hăng plei Jôpa, ƀing ding kơna hmư̆ kơ Pêtrôs dŏ pơ anŭn, laih anŭn pơkiaŏ dua čô đah rơkơi nao laĭ kơ ñu: “Rơkâo kơ ih rai hrŏm hơbĭt hăng gơmơi tañ mơtam.” 39Tui anŭn Pêtrôs tơgŭ nao hrŏm hơbĭt hăng ƀing anŭn. Tơ Pêtrôs truh laih, arăng ba ñu pơ adŭ tal glong anŭn. Abih bang ƀing đah kơmơi djai rơkơi dŏ hia jĕ Pêtrôs, brơi ñu lăng ao phyung hăng khăn ao pơkŏn HʼDôrkas hmâo čoh brơi gơñu hlăk ñu dŏ hơdip. 40Pêtrôs pơtă abih bang mơnuih tơbiă pơ gah rơngiao. Ñu tŏ tơŭt, iâu laĭ giơ̆ng anŭn ñu wir lăng drơi jan mơnuih djai hăng laĭ: “Ơ HʼTabitha, tơgŭ bĕ!” Gơ̆ blang mơta, laih anŭn tơ ñu ƀuh Pêtrôs, tañ mơtam gơ̆ pyut tơgŭ dŏ ber. 41Pêtrôs yơr tơngan rŭ gơ̆ tơgŭ; hăng iâu ƀing rơgoh hiam hăng ƀing đah kơmơi djai rơkơi brơi gơñu ƀuh gơ̆ dŏ hơdip. 42Bruă anŭn arăng hmư̆ hing hyu amăng abih plei Jôpa, laih anŭn lu mơnuih đaŏ kơ Khua Yang. 43Pêtrôs dŏ glaĭ pơ plei Jôpa lu hrơi amăng sang Simôn, sa čô mơnuih ngă bruă lok klĭ.

Currently Selected:

Bruă Mơnuă 9: JRA2016

Highlight

Copy