Zefaniya 1
1
1Agha ndi mazgu gha Fumu agho ghakiza kwa Zefaniya mwana wa Kushi, mwana wa Gedaliya, mwana wa Amariya, mwana wa Hezekiya, mu nyengo iyo Yosiya mwana wa Amoni wakaŵa karonga wa charu cha Yuda.#2 Kar 22.1—23.30; 2 Mid 34.1—35.27
Zuŵa la kweruzga kwa Fumu
2 Fumu yikuti,
“Nditi ndiparanye nkhanira vyose
ivyo vili pa charu cha pasi.
3Nditi ndimare petu
ŵanthu na vikoko.
Nditi ndimare petu viyuni vya mudera
na somba za mu nyanja.
Nditi ndiŵapankhure ŵaheni,
na kuŵamalirathu ŵanthu pa charu cha pasi.”
Ntheura ndimo yikuyowoyera Fumu.
4“Ndinyoroskenge woko lane
kuti ndilange ŵanthu ŵa mu Yuda
na wose awo ŵakukhara mu Yerusalemu.
Ndiwuskengemo mu malo agha
chisopo cha Baala icho chakharako,
na ŵasofi ŵakusopa iyo.
5Ndiŵamarenge wose awo ŵakusindama pa mtenje
kusopa dazi, mwezi, na nyenyezi.
Ndimarengeso awo ŵakusopa Fumu
na kupangana kuti ŵagomezgekenge kwa iyo
kweni ŵakupanganaso kwa chiuta Milikomu.
6Ndiŵamarenge awo ŵawerera nyuma
pakureka kurondezga Fumu,
awo ŵakumupenja Fumu chara
nesi kufumbako kwa iyo.”
7Muŵe chete panthazi pa Fumu Chiuta!
Zuŵa la Fumu laneng'enera.
Fumu yanozgera sembe
ndipo yapatuliska ŵakuchemeka ŵakhe.
8Ndipo pa zuŵa la sembe ya Fumu,
“Ndilangenge nduna na ŵana ŵa ŵakaronga
na wose awo ŵakutorera makhaliro gha chilendo.
Ntheura ndimo yikuyowoyera Fumu.
9Pa zuŵa ilo ndilangenge
yose uyo wakusopa vikozgo
ndiposo na awo ŵakuzuzga nyumba ya sekuru wawo
na nkhaza na upusikizgi.”
10 Fumu yikuti,
“Mu zuŵa ilo nchemerezgo yamupulikikwa
kufuma mu Chipata cha Somba.
Kwamkupulikikwa kulira
kufumira ku Chigaŵa cha Chiŵiri cha msumba,
chongo cha kuwa kwa vinthu
kufuma pa mapiri.
11Tengerani, imwe muli mu chidika cha msumba,
chifukwa ŵamalonda wose ŵafwa,
awo ŵakuguliska siliva ŵakomeka.
12Pa nyengo iyo nditi ndipenjerezgenge
mu Yerusalemu na nyali.
Nditi ndiŵalange ŵanthu
awo ŵakujikhalira waka chete
kwambula kulorako kalikose.
Iwo ŵakuti mu mitima yawo,
‘Fumu yichitengepo uweme chara,
nanga nkhuchitapo uheni.’
13Mphango zawo zamkuskogheka,
ndipo nyumba zawo zamkupasuka.
Nanga ŵazenge zinyumba
kuti ŵamkukharamo chara.
Nanga ŵapande minda ya mpheska,
kuti ŵamkumwa vinyo lakhe chara.
14Zuŵa likuru la Fumu laneng'enera,
liri pafupi ndipo likwiza maluŵiro.
Kamphomo ka zuŵa la Fumu nkhakuŵaŵa,
nanga nchinkhara chamkulira kwenekura.
15Ili ndi zuŵa la ukari wa Fumu,
zuŵa la suzgo na kukweŵeka mtima,
zuŵa la phasulo na pharaniko,
zuŵa la chisi na mdima,
zuŵa la maŵingu na chisi chikuru.
16Ili ndi zuŵa la kulira kwa mbata
na kulalata kwa ŵasilikari,
kulimbana na misumba ya malinga
ndipo na vigongwe vitali.
17Ndizenge na suzgo pa ŵanthu,
mwakuti ŵizamkwenda nga mbachiburumutira
chifukwa ŵanangira Fumu.
Ndopa zawo zithikenge nga ndi fuvu,
mathupi ghawo ghamkuŵa ngundangunda nga mbulongwe.
18Siliva panji golide lawo
kuti vyamkumanya kuŵathaska chara
pa zuŵa la ukari wa Fumu.
Charu chose chamkuphya
mu moto wa sanje ya ukari wakhe.
Nadi maluŵiro iyo yamkuŵamara petu,
wose awo ŵakukhara mu charu.”
Currently Selected:
Zefaniya 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
