Zakariya 7

Fumu yikususka kuziŵizga kwa upusikizgi

1Mu chirimika cha chinayi cha muwuso wa Karonga Dariyusi, mazgu gha Fumu ghakiza kwa Zakariya mu zuŵa la chinayi, la mwezi wa chinkhonde na chinayi, uwo ndi Kisilevu. 2Sono ŵanthu ŵa ku Betele ŵakatuma Sharezara na Regemumeleki na ŵanthu ŵakhe kuya kaŵeyerera uchizi wa Fumu, 3na kufumba ŵasofi ŵa Nyumba ya Fumu Mwenenkhongono zose na nchimi, kuti “Kasi nkhwenera kutengera na kuziŵizga kurya mu mwezi wa chinkhonde nga ndi umo nkhachitiranga virimika ivi vinandi?”

4Penepapo mazgu gha Fumu Mwenenkhongono zose ghakiza kwa ine, ghakati, 5“Ukaŵafumbe ŵanthu wose ŵa mu charu na ŵasofi ukati, ‘Kasi para mukaziŵizganga vyakurya, na kutengera mu mwezi wa chinkhonde, ndiposo na mu mwezi wa chinkhonde na chiŵiri, pa virimika 70, mukaziŵizganga kurya chifukwa cha ine? 6Ndipo para mukurya na kumwa, asi mukujiryera na kujimwera mwaŵene? 7Para Yerusalemu wakazura na ŵanthu ndiposo na usakati unandi, na misumba yikati waka zingirizge, apo mu charu cha ku mwera na mu chakuwa mukakharanga ŵanthu, asi agha ndigho ghakaŵa mazgu agho Fumu agho yikapharazgira mwa nchimi za kale?’ ”

Kuruta ku umikori, ndi chifukwa chakureka kupulikira

8Mazgu gha Fumu ghakiza kwa Zakariya ghakuti, 9“Fumu Mwenenkhongono zose yikuti, ‘Pa kweruzga mirandu, yeruzgani mu urunji, rongorani lusungu na chiwuravi ku yumoza na munyakhe. 10Mungasuzganga chokoro, mulanda, mulendo, panji mukavu. Ndipo kuŵavye yumoza mwa imwe uyo mu mtima wakhe wamughanaghanire chiheni munyakhe.’ ”

11“Kweni ŵakakana kupulikira, pakusunkhunya viŵegha vyawo, na kujara makutu ghawo kuti ŵareke kupulika. 12Ŵakanonofya mitima yawo nga ndi libwe, mzire ŵapulike marango na mazgu agho Fumu Mwenenkhongono zose yikatuma mwa mzimu wakhe mu nchimi za kale. Chifukwa cha ichi ukari ukuru wa Fumu Mwenenkhongono zose ukaŵizira.”

13“Nga ndi umo ŵakapulikira chara apo ine nkhaŵachemanga, ntheura ndimo naneso nkhaŵapulika chara apo iwo ŵakandichemanga. Ntheura ndimo yikuyowoyera Fumu Mwenenkhongono zose. 14Ndipo nkhaŵambininiska nga ndi kavuruvuru mukati mu mafuko agho kuti ŵakaghamanya chara. Charu icho ŵakachileka chikazgoka mapopa, mwakuti mukaŵavye na munthu wakwendamo uku na uku. Ntheura charu chakutowa chira ŵakachizgora nadi kuŵa mapopa.”

Currently Selected:

Zakariya 7: Tumbuka

Highlight

Copy