Zakariya 11
11
Kuwa kwa ŵakutombozga
1Jura miryango yako iwe Lebanoni,
mwakuti moto umyangure makuni ghako gha milanje!
2Tegherezga iwe khuni la mulombwa,
chifukwa khuni la milanje lawa,
pakuti makuni ghakuchindikika ghanangika!
Tengerani imwe misoro mu charu cha Bashani
pakuti nkhorongo ya kukhora yawiskikira pasi!
3Pulikani, kutengera kwa ŵaliska
pakuti uchindami wawo wapankhuka.
Pulikani kubangura kwa nkharamu,
pakuti matundu gha Yorodani ghazgoka chiparamba.
Ŵaliska ŵaŵiri
4Ntheura Fumu, Chiuta wane wakuti, “Uliskenge mskambo wa mberere na mbuzi uwo wapimikira ku kukomeka. 5Awo ŵakuwugula ŵakujikomera umo ŵakhumbira kwambula kulangika. Ndipo awo ŵakuwuguliska ŵakuti, ‘Yitumbikike Fumu, sono ndine musambazi.’ Kweni iwoŵene ŵaliska ŵakuŵa nawo na chiwuravi chara.”
6Ndipo Fumu yikuti, “Nane kuti ndiŵe na chiwuravi chara nanga nkhu yumoza awo ŵakukhara mu charu cha pasi. Kweni munthu yose waŵenge pasi pa mazaza gha mliska wakhe. Ndipo waliyose waŵenge pasi pa mazaza gha karonga wakhe. Iwo ŵamkuchibwangandula charu, ndipo ndamkumuthaska chara nanga ndi munthu yumoza kufuma mu mazaza ghawo.”
7Ntheura nkhaŵa mliska wa mskambo wa mberere na mbuzi izo zikenera kukomekera awo ŵakaguliskanga. Ndipo nkhatora ndodo ziŵiri. Yakudanga yikachemeka, “Uchizi,” yinyakhe yikachemeka, “Umoza.” Ndipo nkhawuska mberere na mbuzi zira. 8Mu mwezi umoza nkhaŵakanizga ŵaliska ŵatatu. Kweniso nkhatondeka kuŵazizipizgira. Iwo nawo ŵakanditinkha. 9Ntheura nkhati, “Ndiŵenge muliska winu chara. Rekani chifwe icho chikwenera kufwa, rekani chiparanyike, icho chikwenera kuparanyika, ndipo rekani awo ŵakharako ŵarye nyama ya yumoza na munyakhe.”
10Ndipo nkhatora ndodo yane yakuchemeka “Uchizi,” ndipo nkhayiphyora, kurongora kuswa phangano leneilo nkhapangana na mafuko ghose. 11Ntheura phangano likasweka nadi pa zuŵa lenelira, ndipo ŵakaguliskananga mberere. Awo ŵakandiraŵiriranga, ŵakamanya kuti ghakaŵa mazgu gha Fumu.
12Ntheura nkhati kwa iwo, “Usange chikuwoneka chiweme kwa imwe, mundipe njombe yane, kweni usange chara, sungani.” Ndipo ŵakapima ndarama za siliva 30 kuŵa njombe yane.#Mat 26.15#Mat 27.9-10
13Ndipo Fumu yikati kwa ine, “Ukaghaponye mu chakusungiramo ndarama, njombe iyo ŵakandigula. Ntheura nkhatora ndarama za siliva 30 na kughaponya mu chakusungiramo ndarama mu Nyumba ya Chiuta.”
14Ndipo nkhaphyora ndodo yane ya chiŵiri yakuchemeka Umoza, kurongora kumazga wenenawene pakati pa Yuda na Israele.
15Penepapo Fumu yikati kwa ine, “Toraso viteŵetero vya mliska wakupusa. 16Wona nkhukhazikiska mliska mu charu mweneuyo wati wapwererere mberere zakufwa chara nanga nkhupenja izo zikuyingayinga, panji kuchizga za kugontha, nanga nkhuziryeska zamoyo, kweni wakurya nyama ya izo nzakututuŵa chomene, wakurya na vikandiro vyawo uwo.”
17“Soka kwa mliska wawakawaka,
uyo wakusida mskambo wakhe!
Rekani lupanga ludumure woko lakhe,
na ku dorora jiso lakhe.”
Ntheura woko lakhe liphapenge
ndipo jiso lakhe la maryero lidorokenge.
Currently Selected:
Zakariya 11: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
