Zakariya 1

Fumu yikuchema ŵanthu kuwerera kwa Iyo

1Mu mwezi wa chinkhonde na chitatu, mu chirimika cha chiŵiri cha kuwusa kwa Dariyusi, karonga wa charu cha Peresiya, mazgu gha Fumu ghakiza kwa Nchimi Zakariya, mwana wa Berekiya, muzukuru wa Ido, ghakati,#Ezira 4.24—5.1, 6.14 2“Fumu yikaŵa yikari chomene na ŵawiskemwekuru. 3Ntheura uŵaphalire ŵanthu kuti Fumu Mwenenkhongono zose yikuti, ‘Wererani kwa ine, ndipo ine nane nditi ndiwerere kwa imwe.’ Ntheura ndimo yikuyowoyera Fumu. 4Mungaŵanga nga ŵawiskemwekuru, ku ŵeneawo nchimi za kale zikapharazganga kuti, Fumu Mwenenkhongono zose yikuti ŵawereko ku nthowa zawo ziheni, na ku milimo yawo yiheni. Kweni kuti ŵakapulika chara nesi kulorako. 5Kasi ŵawiskemwekuru ŵalinkhu? Ndipo nchimi, kasi zikukhalirira kwa muyirayira? 6Kweni mazgu ghane na marango ghane agho nkhalangula nchimi, ŵateŵeti ŵane, asi ghakaŵasanga ŵawiskemwekuru? Ntheura ŵakang'anamuka ndipo ŵakati, ‘Nga ndi umo Fumu Mwenenkhongono zose yikaghanaghanira kutichitira ise kwakuyana na nthowa na milimo yithu, ndimo yatichitira.’ ”

Nchimi yikuwona mboniwoni ya mahachi

7Pa zuŵa la 24 la mwezi wa 11, uwo ndi mwezi wa Shebati, mu chirimika cha chiŵiri cha kuwusa kwa Dariyusi, mazgu gha Fumu ghakiza kwa nchimi Zakariya, mwana wa Berekiya, muzukuru wa Ido. Ndipo Zakariya wakati, 8“Mu usiku umoza, wonani, nkhawona munthu wakwera pa hachi liswesi mweneuyo wakimilira mukati mu makuni gha kachere mu dambo. Kunyuma kwakhe kukaŵa mahachi ghaswesi, ghachesamu na ghatuŵa.”#Uvu 6.2-8

9Penepapo nkhati, “Sekuru wane, kasi aŵa mbanjani?” Ndipo mungelo uyo wakayowoyanga nane wakati kwa ine, “Ndikurongorenge kuti mbanjani.” 10Munthu uyo wakimilira mukati mu makuni gha kachere wakati, “Aŵa ndi awo Fumu yaŵatuma kwendera charu cha pasi.”

11Ndipo iwo ŵakazgora mungelo wa Fumu uyo wakimilira mukati mu makuni gha kachere, “Tendendeka uku na uko mu charu, ndipo tawona kuti charu chose chichali mu kufwasa.”

12Ndipo mungelo wa Fumu wakati, “Mwe Fumu Mwenenkhongono zose, kasi mpaka pauli muti muŵavyenge lusungu pa Yerusalemu na pa misumba ya Yuda, pa ŵeneawo mwanguŵa na ukari pa iwo virimika 70?” 13Fumu yikazgora na mazgu ghakusanguruska kwa mungelo mweneuyo wakayowoyanga na ine.

14Ntheura mungelo uyo wakayowoyanga nane wakandiphalira kupharazga mazgu agha, kuti, “Fumu Mwenenkhongono zose yikuti, ‘Ndili na sanje yikuru na Yerusalemu na Ziyoni. 15Ndili wakukwiya chomene na ŵamitundu ŵeneawo ŵali mu kufwasa. Pakuti apo nkhaŵakwiyira pachoko ŵanthu ŵane, iwo ŵakarutilira kuŵachitira nkhaza.’ ”

16“Pa chifukwa ichi, Fumu yikuti, ‘Ndawerera ku Yerusalemu na mtima wa chiwuravi. Nyumba yane yizengekenge mwenemumo, ndipo chingwe chakupimira chiti chinyoroskekenge pakuzengaso Yerusalemu.’ ”

Ntheura ndimo yikuyowoyera Fumu Mwenenkhongono zose.

17Ntheura Fumu Mwenenkhongono zose yikuti, “Pharazgaso uti, ‘Misumba yane yizurengeso na usakati, ndipo Fumu yiŵengeso na lusungu na Ziyoni na kusankhaso Yerusalemu.’ ”

Mboniwoni ya masengwe

18Nkhinuska maso ghane, ndipo wonani, nkhawona masengwe ghanayi!

19Ndipo nkhati kwa mungelo uyo wakayowoyanga nane, “Kasi ivi ndi vinthu uli?”

Ndipo wakazgora wakati, “Masengwe agha ndi mafuko agho ghikaparanya Yuda, Israele na Yerusalemu.”

20Penepapo Fumu yikandirongora ŵafuzi ŵanayi. 21Ndipo nkhafumbiska nkhati, “Kasi aŵa ŵiza kwizakachitachi?” Iyo wakati, “Agha ndi mafuko agho ghakaparanya Yuda, mwakuti paŵavye munthu na yumoza wakulimbana nagho, ndipo ŵafuzi aŵa ŵiza kuti wofye na kukandira pasi ŵamitundu awo ŵakinuska masengwe ghawo kulimbana na charu cha Yuda kuti ŵachiparanye.”

Currently Selected:

Zakariya 1: Tumbuka

Highlight

Copy