Nahumu 2

Kubwanganduka kwa msumba wa Nineve

1Mwa ŵanthu ŵa msumba wa Nineve,

uyo wati wabwangandulire pasi msumba winu wafika.

Khozgani malinga, khazgani pa msewu,

muvware zikhore ndipo murongore nkhongono zinu zose.

2Pakuti Fumu yikuwezgera uchindami kwa Yakhobe

wakuyana na uchindami wa Israele,

chifukwa ŵakuskogha ŵakawupoka wose,

na kwananga minthavi ya mpheska.

3Nguru za vinkhara vya uyo wakubwangandula ndi ziswesi,

ŵasilikari ŵakhe ŵavwara vichesamu.

Magareta ghakuduka nga ndi dimi la moto,

para ŵaghandandika kunozgekera nkhondo,

mahachi ghakuduka waka pakuchimbira.#2.3 mahachi ghakuduka waka pakuchimbira: Mazgu agha ghangayowoyekaso kuti, “mikondo yikukwekera muchanya”.

4Magareta ghakuchimbirachimbira mu misewu,

ghakuchimbira uku na uku mu mabaraza.

Ghakugadima nga ndi vyenje vya moto,

ghali waka phuliphuli nga ndi leza.

5Ŵarongozgi ŵa nkhondo ŵakuchemeka,

ndipo ŵakukhuŵara chifukwa ŵakuphinda.

Ŵakwenda luŵiroluŵiro kurazga ku linga,

ndipo nguru ya chivikiriro yaŵikika kale.

6Vipata vya mironga vyajurika,

ndipo mu nyumba ya ufumu mwathika lusoko.

7Fumukazi yakhe yakoreka,

ŵakuruta nayo ku umikori.

Ŵateŵeti-kazi ŵakhe ŵakutengera,

ŵakulira nga ndi nkhunda,

na kujitimba pa vifuŵa vyawo.

8Msumba wa Nineve uli nga ndi chiziŵa,

icho maji ghakhe ghakukhutulikira pasi.

Ŵakuchemerezga ŵakuti, “Imilirani! Imilirani!”

Kweni kulije na yumoza wakuwerera.

9Skoghani siliva!

Skoghani golide!

Muli usambazi wambula kumara,

muli chuma chose chakuzirwa.

10Kuli mayiyi!

Msumba wazgoka mayiyi na kubwanganduka.

Ŵanthu ŵathika lusoko,

makongono ghati waka dewedewe.

Kuŵinya kuli mu maluwunda mose,

visko vyawo vyabwanthuka!

11Kasi mphanji ya nkharamu yilinkhu,

muchembo uko yikaryeskeranga twana twakhe?

Kweneuko nkharamu yanarume na yanakazi zikakharanga,

uko twana twakhe tukakharanga, kwambula wofi.

12Nkharamu yikakomanga nyama zakukwanira,

kukomera twana twakhe.

Yikakora nyama pa singo,

kuyeghera nkharamu zanakazi.

Yikazuzga mphanji zakhe na nyama pera,

ndipo michembo yakhe na nyama izo yikakoma.

13 Fumu Mwenenkhongono zose yikuti, “Wonani, nkhumikana namwe. Nditi ndoche magareta ghinu kuti ghazgoke josi, ndipo lupanga luti lukome tunkharamu uto mbana wako. Nditi ndiwuskeko vyose ivyo mukatora ku vyaru vinyakhe, ndipo mazgu gha mathenga ghako kuti ghamkupulikikwa chara.”

Currently Selected:

Nahumu 2: Tumbuka

Highlight

Copy