Nahumu 1
1
1Agha ndi mazgu gha Fumu ghakuchima vya msumba wa Nineve. Ndi buku umo muli mboniwoni ya Nahumu wa ku Elikoshi.#Yes 10.5-34, 14.24-27; Zef 2.13-15
Ukari wa Fumu pa ŵanthu ŵa msumba wa Nineve
2 Fumu ndi Chiuta wa sanje na wakuwezgera nduzga,
Fumu njakuwezgera nduzga ndiposo njakuzura na ukari.
Fumu yikuwezgera nduzga pa ŵarwani ŵakhe,
yikusungilira ukari wakhe pa awo ŵakupindikana nayo.
3 Fumu njakuziwurika kukaripa
ndipo nja nkhongono chomene.
Ndipouli yikureka chara
kulanga awo ŵakuchita uheni.
Iyo yikwendera mu kavuruvuru na mu chimphupuru,
ndipo maŵingu ndigho fuvu la ku malundi ghakhe.
4Yikuchenya nyanja na kuyikamuska,
yikomizga mironga yose.
Vyakumera vya charu cha Bashani,
na vya Phiri la Karimele vikufota,
maluŵa gha ku Lebanoni nagho ghakufota.
5Mapiri ghakusunkhunyika panthazi pakhe,
ndipo tumapiri tukusongonoka.
Charu chikutenthema panthazi pakhe,
charu chose pamoza na vyose ivyo vikukhara mwenemumo.
6Kasi ndi njani wangachintha panthazi pa ukari wakhe?
Ndi njani wangazizipizga para yaphya mtima?
Ukari wakhe ukumyangura nga ndi moto,
majarawe ghakusweka tuchokotuchoko panthazi pakhe.
7 Fumu njiweme,
ndi linga lakukhora mu nyengo ya suzgo,
yikumanya awo ŵakubisama mwa iyo.
8Kweni na maji gha chigumura,
yiti yimare petu, ŵarwani ŵakhe,
yiti yiŵachimbizgire ku mdima, ŵarwani ŵakhe.
9Kasi nchifukwa uli mukuyichitira chiŵembu Fumu?
Yiti yimumarani mose petu.
Ŵarwani ŵakhe kuti yiŵawezgerenge nduzga kaŵiri chara.
10Iwo ŵali nga ndi ŵaloŵevu.
Nga ndi minga yakuzingikazingika na maphekese,
ŵati wocheke na moto.
11Imwe ŵanthu ŵa ku Nineve,
asi yumoza wakafuma mukati mwinu,
uyo wakanozgekera kuchitira chiheni Fumu,
na kusambizga ŵanthu machitiro ghaheni?
12Ntheura Fumu yikuti,
“Nangauli ŵarwani ŵangaŵa ŵankhongono na ŵanandi,
ŵamkukomeka na kumara petu.
Nangauli ndamusuzgani imwe ŵaYuda,
kweni kuti ndimusuzganiso chara.
13Ntheura sono nditi ndiphyore goliwoli la Asiriya,
na kulifumyako kwa imwe,
ndipo nditi ndibanthure vikondo kwa imwe.”
14 Fumu yalangula kuti, “Vya imwe ŵanthu ŵa msumba wa Nineve,
zina linu kuti lirutilirenge mu mphapu yinu chara.
Vikozgo vyakuŵaja na vyakusongonora,
ivyo vili mu nyumba ya ŵachiuta ŵinu,
ndamkuviwiskira pasi.
Ndamkunozga dindi lako,
pakuti ndiwe wakukazuzgika.”
15“Laŵiskani pa mapiri,
thenga likwiza na uthenga uweme,
ilo likupharazga vya mutende!
Imwe ŵaYuda, sekererani na viphikiro vyinu,
fiskani mapangano ghinu.
Pakuti muheni wati wizengeso mu charu chinu chara,
wati wamarenge petu.”#Yes 52.7
Currently Selected:
Nahumu 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
