Mariko 6

Yesu wakuyuyurika ku Nazarete

(Mat 13.53-58; Luk 4.16-30)

1 Yesu wakafumako ku malo ghara, wakiza ku muzi wa kwawo, ndipo ŵasambiri ŵakhe ŵakarongozgana nayo. 2Pa zuŵa la Sabata iyo wakamba kusambizga mu nyumba ya kusoperamo. Ŵanthu ŵanandi awo ŵakamupulika ŵakazizwa ndipo ŵakafumba ŵakati, “Kasi munthu uyu wali kuvisanga nkhu vyose ivi? Kasi ndi vinjeru uli ivyo wali kupika kuti wachite milimo ya minthondwe nga ndi iyi? 3Asi uyu ndiyo muŵaji wa mathabwa, mwana wa Mariya, mukuru wa Yakhobe, Yose, Yudasi na Simoni? Ndipo asi ŵadumbu ŵakhe ŵali na ise pano?” Ntheura ŵakakhuŵazgika mwa iyo.

4Ndipo Yesu wakati kwa iwo, “Nchimi njakuchindikika kosekose, kweni mu charu cha kwakhe na mukati mu ŵabali ŵakhe na mu mbumba yakhe, ndimo yikuchindikika chara.”#Yoh 4.44

5Ndipo wakatondeka kuchitako mlimo wankhongono, kweni wakaŵika mawoko ghakhe pa ŵarwari ŵachoko waka na kuŵachizga. 6Iyo wakazizwa chomene chifukwa ŵanthu ŵakaŵavye chipulikano.

Yesu wakutuma ŵasambiri 12

(Mat 10.5-15; Luk 9.1-6)

Yesu wakenda mu vikaya zingirizge uku wakusambizga ŵanthu. 7Wakachema ŵasambiri ŵakhe 12, ndipo wakamba kuŵatuma ŵaŵiriŵaŵiri. Wakaŵapa mazaza ghakufumiskira mizimu yiheni. 8Wakaŵalangula kuti, “Mungayeghanga kanthu kalikose chara pa ulendo winu kweni ndodo pera. Murekeso kuyegha chingwa panji thumba nesi ndarama mu vibeta vyinu.#Luk 10.4-11 9Vwarani viryato kweni mungavwaranga malaya ghaŵiri chara.” 10Yesu wakaŵaphaliraso wakati, “Kose uko mwamkufika na kupokerereka, kharani mu nyumba mwenemumo musuke mufumemo mu msumba ura. 11Usange mu mizi yinyakhe ŵakumupokererani chara, nanga nkhumupulikani, fumanimo. Ndipo para mukufumamo kung'unthani fuvu la ku malundi ghinu kuti chiŵenge chipanikizgo kwa iwo.”#Mil 13.51

12Ntheura ŵasambiri ŵakaruta ndipo ŵakapharazga kuti ŵanthu ŵang'anamuke mu mtima. 13Ŵakafumya viŵanda vinandi, ndipo ŵakaŵaphakazga mafuta ŵarwari ŵanandi na kuŵachizga.#Yak 5.14

Nyifwa ya Yohane Mubapatizi

(Mat 14.1-12; Luk 9.7-9)

14Karonga Herode wakapulika makani agha, pakuti lumbiri lwa Yesu lukatandazgika kosekose. Ŵanthu ŵanji ŵakayowoya kuti, “Yohane Mubapatizi wawuka ku ŵakufwa, ndicho chifukwa nkhongono izi zikuchita nchito mwa iyo.”#Mat 16.14; Mrk 8.28; Luk 9.19

15Kweni ŵanji ŵakati, “Ndi Eliya.”

Ŵanyakheso ŵakati, “Ndi nchimi yimoza ya nchimi za kale.”

16Para Herode wakati wapulika ichi, wakati, “Yohane uyo nkhamudumula mutu yura ndiyo wali kuwuskika ku ŵakufwa!” 17Chifukwa Herode wakalangula kale kuti Yohane wakoreke na kukakika na kumuŵika mu gadi. Wakachita ichi chifukwa cha Herodiya muwoli wa Filipu munung'una wakhe, uyo iyo wakamutora kuŵa muwoli wakhe.#Luk 3.19-20 18Pakuti Yohane wakamuphalira Herode kuti, “Nchambula kulangurika kuti iwe utore muwoli wa munung'una wako.”

19Ntheura Herodiya wakamutinkha Yohane, ndipo wakakhumbanga kumukoma, kweni wakatondekanga. 20Pakuti Herode wakopanga Yohane ndipo wakamuvikiriranga pakumanya kuti wakaŵa munthu murunji na mutuŵa. Ntheura wakamusunganga makora. Nyengo zinandi wakatemwa kumutegherezga Yohane nangauli wakazizikikanga chomene para wakamupulikanga.

21Pa umaliro Herodiya wakasanga mwaŵi. Pakaŵa pa zuŵa lakukumbukira kubabika kwa Herode apo Herode wakanozgera chiphikiro ndipo wakachema nduna zakhe, ŵarongozgi ŵa nkhondo ndiposo ŵararaŵarara ŵa mu chigaŵa cha Galileya. 22Mwana msungwana wa Herodiya wakanjira mu chiphikiro na kuvina, ndipo wakamukondweska Herode pamoza na awo ŵakaŵa nayo pa chiphikiro chira. Ntheura Karonga Herode wakamuphalira msungwana yura wakati, “Romba chose icho ukukhumba ndipo nditi ndikupenge.” 23Ndipo wakapangana nayo wakati, “Nditi ndikupenge chose icho ukukhumba nanga ndi kukugaŵirako pakati ufumu wane.”

24Ntheura msungwana yura wakafuma na kuya kafumba ŵanyina kuti, “Kasi nkharombe vichi?”

Ŵanyina ŵakazgora ŵakati, “Ukarombe mutu wa Yohane Mubapatizi.”

25Msungwana yura wakawerera luŵiro kwa karonga na kuti, “Nkhukhumba kuti mundipe sono pano mutu wa Yohane Mubapatizi pa mbale apa.”

26Ndipo karonga wakaŵa na chitima chikuru chomene, chifukwa cha chirapo chakhe icho wakachita pa maso pa awo ŵakachemeka pa chiphikiro. Ntheura wakatondeka kusintha. 27Sono karonga wakatuma yumoza wa ŵasilikari nyengo yeneiyo na kumulangula kuti wakize na mutu wa Yohane. Musilikari wakaruta ku gadi na kudumula mutu wa Yohane. 28Ndipo wakiza nawo mutu pa mbale. Karonga wakapereka ku msungwana, ndipo nayo wakapereka ku ŵanyina.

29Ŵasambiri ŵa Yohane ŵakati ŵapulika ichi, ŵakiza na kutora thupi kuti ŵakaliŵike mu dindi.

Yesu wakuryeska ŵanthu vikwi vinkhonde

(Mat 14.13-21; Luk 9.10-17; Yoh 6.1-14)

30 Ŵakutumika ŵara ŵakawerera kwa Yesu na kumuphalira vyose ivyo ŵakachita na kusambizga. 31Yesu wakaŵaphalira wakati, “Tiyeni imwe mwekha tirutenge ku malo ghambula ŵanthu kuti mukapumulepo pachoko waka.” Pakuti ŵanthu ŵanandi chomene ŵakizanga na kuruta, Yesu na ŵasambiri ŵakhe kuti ŵakaŵa na nyengo ya kuryera chara. 32Ntheura ŵakanjira mu ngaraŵa na kuruta kwa ŵekha ku malo ghambula ŵanthu.

33Kweni ŵanthu ŵanandi ŵakaŵawona ŵakuruta ndipo ŵakaŵamanya. Ntheura ŵakenda luŵiro pa mlima kufuma ku mizi yose na kumudangirira Yesu na ŵasambiri ŵakhe na kuya kafika pa malo ghara. 34Para Yesu wakati wafuma mu ngaraŵa, wakawona mzinda ukuru wa ŵanthu ndipo wakaŵa na chiwuravi na iwo pakuti ŵakaŵa nga ndi mberere zambula muliska. Ntheura wakamba kuŵasambizga vinthu vinandi.#Kup 27.17; 1 Kar 22.17; 2 Mid 18.16; Eze 34.5; Mat 9.36

35Apo dazi likaŵa pafupi kunjira, ŵasambiri ŵakhe ŵakiza kwa iyo ŵakamuphalira ŵakati, “Kuno ndi malo ghambula ŵanthu, ndiposo ndi mise kale. 36Muŵawezge ŵanthu kuti ŵarute ku vikaya vya pafupi ivi mwakuti ŵakajigulire ako ŵangarya.”

37Yesu wakaŵazgora wakati, “Ŵapani chakurya ndimwe kuti ŵarye.”

Ŵakamufumba ŵakati, “Kasi tirute tikagule vyakurya vya mtengo wa ndarama za madenari 200 kuti ndivyo tiŵape ŵarye?”

38Yesu wakaŵafumba wakati, “Kasi muli na vingwa vilinga? Rutani mukawoneko.”

Ŵakaya kasanga kuti, “Kuli vingwa vinkhonde na somba ziŵiri.”

39Yesu wakaŵalangula ŵasambiri ŵakhe kukharika ŵanthu pasi mu viwuruviwuru pa utheka wakubiriŵira. 40Ŵanthu ŵakakhara pasi mu mizere ya ŵanthu 100 na ŵanthu 50. 41Ndipo wakati watora vingwa vinkhonde vira na somba ziŵiri, wakalaŵiska kuchanya, wakawonga Chiuta ndipo wakati wamenya wakavipereka ku ŵasambiri kuti ŵakharikire ŵanthu. Ndipo wakaŵagaŵiraso wose somba ziŵiri zira. 42Ndipo wose ŵakarya na kukhuta. 43Pa umaliro ŵasambiri ŵakasora vimenyu vya vingwa na somba ivyo vikakharapo ndipo vikazura vidunga 12. 44Ndipo unandi wa ŵanthu awo ŵakarya ukaŵa ŵanarume pera vikwi vinkhonde.

Yesu wakwenda pa maji

(Mat 14.22-33; Yoh 6.15-21)

45Mwaluŵiro Yesu wakaŵaphalira ŵasambiri ŵakhe kuti ŵanjire mu ngaraŵa na kudangirako ku sirya linyakhe ku Betesaida, apo iyo wakawezganga mzinda wa ŵanthu. 46Yesu wakati walayirana nawo, wakakwerera ku phiri kuya karomba. 47Ndipo kukati kwaŵa mise ngaraŵa yikaŵa pakatikati pa nyanja, apo Yesu wakaŵa yekha ku mlima. 48Yesu wakaŵawona ŵasambiri ŵakhe ŵakusuzgika kuvuŵa ngaraŵa, chifukwa mphepo yikaŵajandizganga. Ku matandakucha pa ora la chinayi iyo wakiza kwa iwo uku wakwenda pa nyanja, wakatenge waŵajumphe, 49kweni ŵakati ŵamuwona wakwenda pa nyanja, ŵakaghanaghana kuti ndi muzguka. Penepapo ŵakachemerezga na wofi ukuru. 50Wose ŵakamuwona ndipo ŵakatenthema. Penepapo wakayowoya nawo wakati, “Khwimani mtima! Ndine, mungopanga.” 51Mbwenu wakanjira mu ngaraŵa pamoza nawo ndipo mphepo yikareka. Ndipo ŵasambiri ŵakazizwa chomene, 52chifukwa chakuwura kupulikiska ivyo vikachitika pa vingwa, mitima yawo yikaŵa yinonono.

Yesu wakuchizga ŵarwari ku Mutezarete

(Mat 14.34-36)

53Ndipo para Yesu na ŵasambiri ŵakhe ŵakati ŵambuka nyanja, ŵakafika ku charu cha Mutezarete ndipo ŵakimika ngaraŵa. 54Ŵakati ŵafuma mu ngaraŵa, luŵiro ŵanthu ŵakamupanikizga Yesu. 55Ŵanthu ŵa mu chigaŵa chose chira ŵakachimbira na kwiza na ŵarwari kwa Yesu. Ŵakaŵayeghanga pa kasarasara kwiza nawo kose uko ŵakapulika kuti Yesu wali. 56Ntheura na kose uko Yesu wakaruta, mu vikaya, mu misumba, ŵanthu ŵakagoneka ŵarwari ŵawo mu maluwugha. Ŵakamuŵeya Yesu kuti ŵakhwaske nanga ndi mphonje za laya lakhe, ndipo wose awo ŵakazikhwaska ŵakachira.

Currently Selected:

Mariko 6: Tumbuka

Highlight

Copy