Mariko 4

Ntharika ya mumiji

(Mat 13.1-9; Luk 8.4-8)

1 Yesu wakambaso kusambizga mu mphepete mwa Nyanja ya Galileya. Mzinda ukuru wa ŵanthu ukawungana na kumuzingirizga, ndipo wakanjira na kukhara mu ngaraŵa pa nyanja apo ŵanthu ŵakaŵa pa mlima mu mphepete mwa nyanja.#Luk 5.1-3 2Wakaŵasambizga vinthu vinandi mu ntharika, ndipo mu usambizgi wakhe wakati,

3“Tegherezgani! Mumiji yunji wakaruta kuya kaseŵa mbuto yakhe. 4Ndipo apo wakaseŵanga, mbuto yinyakhe yikawa mu mphepete mwa nthowa, ndipo tuyuni tukiza na kusora. 5Mbuto yinyakhe yikawa pa lusokorowe, penepapo pakaŵavye dongo linandi. Mbuto yira yikamera luŵiro chifukwa pakaŵavye dongo linandi. 6Kweni dazi likati lakwera, yikaŵawuka na komira pakuti yikaŵavye nkhorozi. 7Mbuto yinyakhe yikawa mukati mu minga, iyo yikakura na kuyifyoronganiska, ndipo kuti yikapambika vipambi chara. 8Kweni yinyakhe yikawa mu dongo liweme, yikamera na kukura, ndipo yikapambika vipambi vinandi. Yinyakhe yikapambika 30, yinyakhe 60, ndipo yinyakhe 100.”

9Ntheura Yesu wakati, “Uyo wali na makutu ghakupulikira, wapulike.”

Urato wa zintharika

(Mat 13.10-17; Luk 8.9-10)

10Para Yesu wakaŵa pa yekha, ŵasambiri ŵakhe 12 pamoza na ŵanthu ŵanji ŵakamufumba na urato wa zintharika. 11Wakaŵaphalira wakati, “Kwa imwe kwapika kuti mumanye vya muchindindi vya Ufumu wa Chiuta. Kweni kwa awo ŵali kuwaro, vyose vikuyowoyeka mu ntharika, 12mwakuti,

‘Kulaŵiska, ŵalaŵiske nadi,

kweni ŵawone kanthu chara,

Kupulika ŵapulike nadi,

kweni kupulikiska kanthu chara.

Mzire ŵang'anamuke mu mtima,

ndipo ŵagowokereke!’ ”#Yes 6.9-10 (LXX)

Yesu wakurongosora ntharika ya mumiji

(Mat 13.18-23; Luk 8.11-15)

13Ntheura Yesu wakaŵafumba wakati, “Kasi mukupulikiska chara ntharika iyi? Ipo sono mupulikiskenge uli ntharika yinyakhe yiliyose? 14Mumiji wakuseŵa mazgu gha Chiuta. 15Mbuto izo zikawa mu mphepete mwa nthowa, ndi ŵanthu awo ŵakupulika mazgu gha Chiuta ndipo nyengo yeneiyo Satana wakwiza na kukwapura mazgu agho ghaseŵeka mwa iwo. 16Ntheura pera ŵanthu ŵanyakhe ŵali nga ndi mbuto izo zikaseŵeka pa lusokorowe. Nyengo yeneiyo ŵakughapulika mazgu gha Chiuta na kughapokerera na chimwemwe. 17Kweni kuti mazgu ghara ghakujintha nkhorozi mwa iwo chara. Ntheura ŵanthu ŵara ŵakuŵa na chipulikano kwa kanyengo kachoko waka. Para kwaŵa visuzgo panji kuzikizgika chifukwa cha mazgu gha Chiuta, nyengo yeneiyo ŵakuwerera nyuma mu chipulikano chawo. 18Ŵanyakhe ŵali nga ndi mbuto izo zikawa mu minga, ŵeneawo ŵakupulika mazgu gha Chiuta. 19Kweni vyakwenjezga vya umoyo uno, kutemweska usambazi na makhumbiro gha vinthu vinyakhe vikunjiramo mwa iwo na kufyoronganiska mazgu gha Chiuta. Ndipo mazgu ghara ghakupambika vipambi chara. 20Kweni ŵanyakhe ŵali nga ndi mbuto izo zikaseŵeka pa dongo liweme, awo ŵakupulika mazgu gha Chiuta na kughapokerera. Ntheura ŵakupambika vipambi vinandi, ŵanji 30, ŵanji 60, ndipo ŵanjiso 100.”

Nyali yakubenekerereka na chiŵiya

(Luk 8.16-18)

21 Yesu wakaŵafumba wakati, “Kasi ŵanthu ŵakutora nyali na kuyibenekerera na chidunga panji kuyiŵika kusi ku chitara? Asi ŵakuyiŵika pa malo ghakuwonekera?#Mat 5.15; Luk 11.33 22Pakuti chinthu chose chakubisika chizamkuvumbukwira pakweru, ndipo chose icho nchakubenekerereka chiti chibenukenge.#Mat 10.26; Luk 12.2 23Uyo wali na makutu ghakupulikira, wapulike!”

24Yesu wakayowoyaso nawo wakati, “Chenjerani pa ivyo mukupulika! Chipimo icho mukweruzgira ŵanyinu, chenechicho ndicho Chiuta wizamkweruzgira imwe kwakuruska.#Mat 7.2; Luk 6.38 25Pakuti uyo wali navyo kuti kupikenge vinandi kwa iyo. Kweni uyo walije, wizamkupokeka nanga nkhachokochoko ako wali nako.”#Mat 13.12, 25.29; Luk 19.26

Ntharika ya kakuliro ka mbuto

26 Yesu wakaŵaphalira wakati, “Ufumu wa Chiuta ukulingana waka na munthu uyo wakuseŵa mbuto yakhe mu munda. 27Na usiku wakugona ndipo na mulenje wakuwuka. Nyengo yose mbuto yira yikumera na kukura. Kweni mwenecho kuti wakumanya chara umo yikumerera. 28Dongo ilolene ndilo likumezga mbuto na kuyipambikiska vipambi, pakudanga musonga, pamanyuma chisasuni, ndiposo na lumphuzi mu chisasuni. 29Kweni para mbuto yakhoma, wakutora chigeru na kudumula mbuto pakuti nyengo yavuna yakwana.”#Yoy 3.13

Ntharika ya njere la matubeni

(Mat 13.31-32, 34; Luk 13.18-19)

30 Yesu wakayowoyaso wakati, “Kasi tiwulinganizge na vichi Ufumu wa Chiuta? Panji tingawuyowoyera mu ntharika uli? 31Uli nga ndi njere la matubeni ulo para laseŵeka mu dongo, nduchoko chomene kuruska mbuto zose mu charu. 32Ndipouli para laseŵeka, lukumera na kukura ndipo lukuŵa chivwati chikuru kuruska vivwati vyose vya mu munda. Likuŵa na minthavi yikuru, mwakuti viyuni vya mudera vikwiza na kuzenga vivimbo vyawo mu minthavi yakhe.”

33Yesu wakasambizganga ŵanthu mazgu gha Chiuta mu ntharika zinandi nga ndi izi, kwakuyana na kapulikiskiro kawo. 34Iyo kuti wakaŵayowoyeranga kanthu chara kwambula ntharika. Kweni ku udesi ndiko wakaŵafwatuliranga vyose ŵasambiri ŵakhe.

Yesu wakuchetamiska chimphupuru

(Mat 8.23-27; Luk 8.22-25)

35Zuŵa lenelira nyengo ya mise, Yesu wakaŵaphalira ŵasambiri ŵakhe wakati, “Tiyeni tambukire ku sirya linyakhe la nyanja.” 36Ntheura ŵakati ŵasida mzinda wa ŵanthu, ŵasambiri ŵakhe ŵakanjira mu ngaraŵa umo wakaŵa Yesu, ndipo ŵakaruta nayo pamoza. Pakaŵaso ngaraŵa zinyakhe izo zikarongozgana nayo. 37Chimphupuru chikuru chikawuka, majigha ghakamba kutimba ngaraŵa na kunjira mukati, ndipo ngaraŵa yikamba kuzura na maji. 38Kweni Yesu wakagona pa musamiro ku umaliro wa ngaraŵa, ndipo ŵasambiri ŵakamuwuska ŵakati, “Musambizgi, kasi mukulorako chara kuti tikufwa?”

39Yesu wakawuka mu tulo na kuyichenya mphepo na kuti ku majigha, “Chetama! Kuti waka yii.” Mphepo yikareka kuputa ndipo kukaŵa bata likuru. 40Yesu wakati ku ŵasambiri ŵakhe, “Chifukwa uli mukopa? Kasi muchalije chipulikano?”

41Ŵasambiri ŵakazura na wofi ukuru chomene, ndipo ŵakayowoyeskana yumoza na munyakhe ŵakati, “Ndi njani munthu uyu mweneuyo nanga ndi mphepo na nyanja vikumupulikira?”

Currently Selected:

Mariko 4: Tumbuka

Highlight

Copy