Mariko 3

Yesu wakuchizga munthu wakufwa woko

(Mat 12.9-14; Luk 6.6-11)

1 Yesu wakaya kanjiraso mu nyumba ya kusoperamo, mwenemumo mukaŵa munthu wakufwa woko. 2ŴaFarisi ŵanji awo ŵakaŵapo ŵakamulaŵisiskanga Yesu, kuwona kuti panji wangamuchizga munthu yura pa zuŵa la Sabata mwakuti ŵamupe mrandu. 3Yesu wakamuphalira munthu mweneuyo wakaŵa na woko la kuphapa kuti, “Zakuno kunthazi.” 4Yesu wakaŵafumba wakati, “Kasi nchichi icho chikulangurika pa zuŵa la Sabata? Kuchita uweme panji kuchita uheni? Kuponoska umoyo panji kukoma?”

Kweni ŵakati waka chete. 5Mu ukari, Yesu wakalaŵiska uku na uku pa awo ŵakaŵa mwenemumo, ndipo wakakwenyerera chifukwa cha unonono wa mitima yawo. Penepapo wakamuphalira munthu yura wakati, “Nyoroska woko lako.” Wakanyoroska woko lakhe, ndipo likawereramo. 6ŴaFarisi ŵakafumira kuwaro, ndipo maluŵiro ŵakapangana na wupu wa ŵaHerode umo ŵangamukomera Yesu.

Mzinda ukurondezga Yesu ku nyanja

7 Yesu wakafumapo pamoza na ŵasambiri ŵakhe na kuya ku nyanja ndipo mzinda ukuru wa ŵanthu ukamurondezga kufumira mu Galileya. Kufumaso ku Yudeya, 8Yerusalemu na Idumeya, ku sirya linyakhe la mronga wa Yorodani, ndiposo na kuzingirizga vigaŵa vya Ture na Sidoni, ŵanthu ŵanandi ŵakiza kwa iyo ŵakati ŵakapulika vyose ivyo wakachitanga. 9Pakuti mzinda wa ŵanthu ukaŵa ukuru, Yesu wakaŵaphalira ŵasambiri ŵakhe kuti ŵamunozgere ngaraŵa pafupi na iyo, mwakuti ŵanthu ŵareke kumufinyirizga.#Mrk 4.1; Luk 5.1-3 10Pakuti Yesu wakachizga ŵanthu ŵanandi, ntheura ŵarwari wose ŵakamufinyirizganga kuti ŵamukhwaske. 11Para ŵanthu ŵa mizimu yiheni ŵakamuwona, ŵakawa pasi ndipo ŵakachemerezga ŵakati, “Imwe ndimwe Mwana wa Chiuta!”

12Kweni wakaŵachinyinthizga chomene kuti ŵareke kumupharazga.

Yesu wakusora ŵasambiri 12

(Mat 10.1-4; Luk 6.12-16)

13 Yesu wakakwerera ku phiri ndipo wakajichemera awo wakaŵakhumbanga, ndipo ŵakiza kwa iyo. 14Wakimika 12 na kuŵathya, “Ŵakutumika.” Wakaŵaphalira wakati, “Ndamusorani kuti mukharenge nane na kuti ndimutumaninge kuya kapharazga, 15na kutiso muŵenge na mazaza gha kufumyira viŵanda.”

16Mazina ghawo ndi agha: Simoni (mweneuyo Yesu wakamuthya zina lakuti Petrosi) 17Yakhobe na Yohane munung'una wakhe, ŵana ŵa Zebediya, (ŵeneawo Yesu wakaŵathya zina lakuti Bowanerege leneilo likung'anamula kuti, “Ŵana ŵa chidudumira cha Leza.”) 18Pakaŵaso Andreya, Filipu, Baratolomeyu, Mateyu, Tomasi, Yakhobe mwana wa Alifeyu, Tadeyu, Simoni wa chipani cha Zeloti. 19Ndiposo na Yudasi Isikariyoti, mweneuyo wakamwendera mphiska Yesu.

Yesu na Belezebule

(Mat 12.22-32; Luk 11.14-23, 12.10)

20Ntheura Yesu wakiza ku kwawo, ndipo ŵanthu ŵanandi ŵakawunganaso mwakuti iyo na ŵasambiri ŵakhe kuti ŵakaŵa na nyengo ya kuryera chara. 21Para ŵa mbumba yakhe ŵakapulika ichi, ŵakaruta kuya kamutora pakuti ŵakati, “Wafuntha.”

22 Ŵamanyi-marango awo ŵakafuma ku Yerusalemu ŵakati, “Munthu uyu wali na Belezebule! Wakufumya viŵanda na nkhongono za mukuru wa viŵanda.”#Mat 9.34, 10.25

23Ntheura Yesu wakaŵachema ŵanthu kuti ŵize kufupi na iyo na kuyowoya nawo mu ntharika wakati, Kasi Satana wangafumya uli Satana? 24Usange ŵanthu ŵa ufumu umoza ŵagaŵikana, ufumu uwu kuti ungakhora chara. 25Usange ŵanthu ŵa nyumba yimoza ŵagaŵikana, nyumba iyo kuti yingakhora chara. 26Usange Satana wakujisuska yekha na kugaŵikana, wangakhora chara. Umaliro wakhe ngweneuwu.

27“Kulije munthu uyo wanganjira mu nyumba ya chinkhara na kuphanga chuma chakhe kwambula kuti wadange wakake chinkhara chira. Penepapo ndipo waphange chuma chira.

28“Nadi nkhumuphalirani kuti, kwananga kose na matusi agho ŵanthu ŵakuyowoya kwa Chiuta viti vigowokereke. 29Kweni uyo wakutuka Mzimu Mutuŵa wati wagowokereke chara. Wali na mrandu wa kwananga kwa muyirayira.”#Luk 12.10 30(Yesu wakayowoya ivi chifukwa ŵanthu ŵara ŵakatenge, “Wali na mzimu uheni.”)

Ŵanyina ŵa Yesu na ŵanung'una ŵakhe

(Mat 12.46-50; Luk 8.19-21)

31Ŵanyina ŵa Yesu na ŵanung'una ŵakhe ŵakafika. Ŵakimilira kuwaro kwa nyumba, ndipo ŵakatuma munthu yunji kuya kamuchema. 32Kweni mzinda wa ŵanthu ukakhara na kumuzingirizga, ndipo ŵakamuphalira ŵakati, “Ŵanyinamwe na ŵanung'una ŵinu ŵali kuwaro ŵakumukhumbani.”

33Yesu wakaŵazgora wakati, “Amama na ŵanung'una ŵane mbanjani?” 34Pakulaŵiska ŵanthu awo ŵakamuzingirizga wakayowoya wakati, “Aŵa ndiwo amama na ŵanung'una ŵane! 35Uyo wakuchita khumbo la Chiuta ndiyo munung'una wane, mudumbu wane, na amama.”

Currently Selected:

Mariko 3: Tumbuka

Highlight

Copy