Mateyu 22
22
Ntharika ya chiphikiro cha nthengwa
(Luk 14.15-24)
1 Yesu wakayowoyaso na ŵanthu ŵara mu ntharika wakati, 2“Ufumu wa kuchanya uli nga ndi karonga uyo wakanozga chiphikiro pa nthengwa ya mwana wakhe. 3Wakatuma ŵateŵeti ŵakhe kuti ŵakacheme awo ŵakachemeka ku chiphikiro cha nthengwa, kweni kuti ŵakakhumba kwizako chara. 4Wakatumaso ŵateŵeti ŵanyakhe kuti ŵakaŵaphalire awo ŵakachemeka kuti, ‘Ndanozga chiphikiro chane, ndakoma nkhaŵi yane na ng'ombe zakututuŵa, ndipo vyose vyanozgeka. Zaninge ku chiphikiro cha nthengwa!’ 5Kweni ŵakuchemeka ŵara kuti ŵakalorako chara, yumoza wakaruta ku munda wakhe, munyakhe ku nchito yakhe ya malonda. 6Ŵanyakhe awo ŵakakharako ŵakakora ŵateŵeti ŵa karonga yura ndipo ŵakaŵatimba na kuŵakoma. 7Karonga wakakaripa na kutuma ŵankhondo ŵakhe, ndipo ŵakaya kakoma vigeŵenga vyose na kocha msumba wawo. 8Penepapo wakaŵaphalira ŵateŵeti ŵakhe wakati, ‘Nadi chiphikiro cha nthengwa chanozgeka, kweni awo ŵakachemeka kuti ŵakenerera chara. 9Ntheura rutani mu nkhumano za misewu ya mu msumba na kuŵachemera ku chiphikiro ichi wose awo mwamkuŵasanga.’ 10Ndipo ŵateŵeti ŵara ŵakaruta mu misewu yose ya mu msumba na kuŵawunganya wose awo wakaŵasanga, ŵaheni na ŵaweme. Ntheura nyumba ya chiphikiro yikazura na ŵanthu awo ŵakachemeka.
11“Para karonga wakati wanjira kukawona awo ŵakachemeka, wakawona munthu yumoza uyo kuti wakavwara malaya gha pa nthengwa chara. 12Karonga wakamufumba wakati, ‘Nganya we! Kasi wangunjira uli muno kwambula kuvwara malaya gha pa nthengwa?’ Ndipo iyo wakati waka chete. 13Ntheura karonga wakaŵaphalira ŵateŵeti ŵakhe wakati, ‘Mukakani mawoko na malundi, ndipo mumutaye kuwaro ku mdima, kwenekuko kwamkuŵa kulira na kuska mino.’#Mat 8.12, 25.30; Luk 13.28
14“Chifukwa ŵanandi ŵakuchemeka, kweni ŵakusankhika ŵachoko waka.”
Fumbo pa za kupereka msonkho
(Mrk 12.13-17; Luk 20.20-26)
15Penepapo ŵaFarisi ŵakaruta kuya kapangana na umo ŵangamukorera Yesu mu kayowoyero kakhe. 16Ŵakatuma ŵasambiri ŵawo kwa Yesu pamoza na ŵanji ŵa chipani cha ŵaHerode. Iwo ŵakati, “Musambizgi, tikumanya kuti muli ŵakuneneska ndipo mukusambizga nthowa ya Chiuta mu unenesko, ndipo imwe kuti mukulorako na munthu chara, chifukwa kuti mukurumba chisko cha munthu chara. 17Sono mutiphalire ivyo mukughanaghana. Kasi kukulangurika kupereka msonkho kwa karonga wa ku Romu panji chara?”
18Kweni Yesu wakamanya uheni wawo, ndipo wakati, “Mwa ŵapusikizgi imwe, kasi chifukwa uli mukundiyezga? 19Ndirongorani ndarama ya msonkho.”
Ŵakamutorera ndarama. 20Ndipo Yesu wakaŵafumba wakati, “Kasi chikozgo ichi na zina ili nvya njani?”
21Ŵakazgora ŵakati, “Nvya karonga wa ku Romu.”
Yesu wakati kwa iwo, “Ipo perekani kwa karonga wa ku Romu ivyo nvya karonga wa ku Romu, ndipo kwa Chiuta ivyo nvya Chiuta.”
22Ŵakati ŵapulika ichi, ŵakazizwa, ndipo ŵakamusida na kuruta.
Fumbo pa za chiwuka cha ŵakufwa
(Mrk 12.18-27; Luk 20.27-40)
23Pa zuŵa lenelira ŵaSaduki, awo ŵakati chiwuka cha ŵakufwa kulije ŵakiza kwa Yesu ndipo ŵakamufumba ŵakati,#Mil 23.8 24“Musambizgi, Mozesi wakati, ‘Usange munthu wafwa wambula ŵana, mubali wakhe wakwenera kuhara chokoro chira na kuwuskira mphapu mukuru wakhe.’#Mar 25.5 25Sono ŵakaŵako ku kwithu ŵana ŵankhonde na ŵaŵiri pa wiskewo. Wakudanga wakatora mwanakazi, ndipo wakafwa kwambula ŵana, ndipo muwoli wakhe wakaharika na munung'una wakhe. 26Kukaŵa ntheura pera na wa chiŵiri, ndiposo na wa chitatu, kuya kafika na ku wa chinkhonde na chiŵiri. 27Ndipo pamanyuma pa wose, mwanakazi nayo wakafwa. 28Sono kasi pa chiwuka cha ŵakufwa, mwanakazi uyu wamkuŵa muwoli wa njani pakuti wose ŵakamutorapo?”
29Kweni Yesu wakaŵazgora wakati, “Imwe mukwananga, chifukwa mulije kumanya malembo nanga ndi nkhongono za Chiuta. 30Pakuti mu chiwuka cha ŵakufwa, kuti ŵakutora chara, nanga nkhutengwa, kweni ŵali nga mbangelo kuchanya. 31Kweni sono vya kuwuka kwa ŵakufwa, kasi mundaŵazge ivyo Chiuta wakayowoya kwa imwe kuti, 32‘Ine ndine Chiuta wa Abrahamu, na Chiuta wa Yisake, na Chiuta wa Yakhobe. Iyo kuti ndi Chiuta wa ŵakufwa chara, kweni wa ŵamoyo.’ ”#Kuf 3.6
33Ndipo para mizinda yikapulika ichi, yikazizwa na kusambizga kwakhe.
Dango likuru
(Mrk 12.28-34; Luk 10.25-28)
34Kweni ŵaFarisi ŵakapulika zgoro la Yesu kuti lachetamiska ŵaSaduki, ŵakawungana pamoza. 35Yumoza wa iwo wakaŵa mumanyi-marango ndipo pakumuyezga Yesu wakamufumba wakati,#Luk 10.25-28 36“Musambizgi, kasi dango likuru mu marango ghose ndi ndi?”
37Ndipo Yesu wakati kwa iyo, “ ‘Utemwenge Fumu Chiuta wako na mtima wako wose, na mzimu wako wose, ndipo na vinjeru vyako vyose.’#Mar 6.5 38Ili ndi dango likuru na lakudanga. 39Ndipo la chiŵiri lakukozgana nalo ndi ilo likuti, ‘Utemwenge muzengezgani wako nga ndi umo ukujitemwera wamwene.’#Lev 19.18 40Pa marango ghaŵiri agha ndipo pali kwima Dango lose la Mozesi na visambizgo vyose vya nchimi.”
Fumbo pa za Mesiya
(Mrk 12.35-37; Luk 20.41-44)
41Para ŵaFarisi ŵakawungana, Yesu wakaŵafumba wakati, 42“Kasi mukughanaghana vichi na za Mesiya? Kasi ndi Mwana wa njani?”
Ŵakazgora ŵakati, “Ndi Mwana wa Davide.”
43Yesu wakati kwa iwo, “Chifukwa uli Davide pakukhuŵirizgika na Mzimu, wakamuchema kuti, ‘Fumu’, apo wakati,
44Fumu yikati kwa Fumu yane,
‘Ukhare ku woko lane la maryero,
ndisuke ndizgore ŵarwani ŵako
kuŵa chitambaliro cha malundi ghako.’#Mas 110.1
45Ntheura usange Davide wakumuchema, ‘Fumu’, kasi wangaŵa uli mwana wakhe?”
46Pakaŵavye nanga njumoza uyo wakazgorapo mazgu, ndipo kufuma pa nyengo yeneyira, pakaŵavye nanga njumoza uyo wakakangarizga kumufumba kanthu.
Currently Selected:
Mateyu 22: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
