Luka 9
9
Yesu wakutuma ŵasambiri 12
(Mat 10.5-15; Mrk 6.7-13)
1 Yesu wakaŵachemera pamoza ŵasambiri ŵakhe 12, ndipo wakaŵapa nkhongono na mazaza vyakufumyira viŵanda vyose na kuchizga ŵarwari. 2Wakaŵatuma kuti ŵakapharazge Ufumu wa Chiuta na kuchizga ŵanthu ŵarwari. 3Wakaŵaphalira kuti, “Pa ulendo uwu mungayeghanga kanthu chara, nga ndi ndodo, thumba, chakurya, ndarama. Ndipo mureke kuŵa na malaya ghaŵiri.#Luk 10.4-11; Mil 13.51 4Mu nyumba yose iyo mwamkunjiramo, kharani mwenemumo mpaka mufumemo mu msumba ura. 5Usange ŵakumupokererani chara, para mukufumamo mu muzi ura kung'unthani fuvu la ku malundi ghinu kuti chiŵenge chipanikizgo kwa iwo.”
6Ŵasambiri ŵara ŵakaruta, ŵakaporota mu vikaya kupharazga Uthenga Uweme na kuchizga ŵanthu kosekose.
Kwenjerwa kwa Herode
(Mat 14.1-12; Mrk 6.14-29)
7Sono Herode uyo wakawusanga mu Galileya yikapulika vyose ivyo Yesu wakachitanga, yikazizikika chomene, pakuti ŵanthu ŵanji ŵakayiphalira kuti ndi Yohane Mubapatizi wali kuwuka ku ŵakufwa.#Mat 16.14; Mrk 8.28; Luk 9.19 8Ŵanji ŵakatenge ndi Eliya wali kwiza, ŵanjiso ŵakatenge njumoza wa nchimi za kale wawuka ku ŵakufwa. 9Kweni Herode wakati, “Yohane nkhamudumula mutu. Kweni uyu ndi njani mweneuyo nkhumupulika na vya ntheura?” Ndipo wakanwekanga kuti wamuwone.
Yesu wakuryeska ŵanthu vikwi vinkhonde
(Mat 14.13-21; Mrk 6.30-44; Yoh 6.1-14)
10Para ŵakutumika ŵakawera, ŵakamuphalira Yesu ivyo ŵakaya kachita. Ndipo wakaŵatora na kuruta nawo ku udesi ku msumba zina lakhe Betesaida. 11Kweni ŵanthu ŵakati ŵamanya ichi, ŵakamurondezga. Ndipo iyo wakaŵapokerera, na kuŵaphalira vya Ufumu wa Chiuta, na kuŵachizga awo ŵakakhumbanga kuchizgika.
12Apo zuŵa likaŵa pafupi kunjira, ŵasambiri ŵakhe, 12 ŵakiza kwa iyo ŵakati, “Ŵawezgani ŵanthu, mwakuti ŵarute ku vikaya na malo agho ghali pafupi kuti ŵakasange malo gha kugona na chakurya, pakuti pano tili, mpha mapopa.”
13Kweni iyo wakaŵaphalira wakati, “Imwe ndimwe muŵape chakurya.”
Ŵakamuzgora ŵakati, “Ise tili navyo vingwa vinkhonde pera na somba ziŵiri. Kasi tirute kuya kaŵagulira vyakurya ŵanthu wose aŵa?” 14(Pakuti ŵanthu ŵara ŵakaŵa ŵanarume vikwi vinkhonde.)
Kweni Yesu wakaŵaphalira ŵasambiri ŵakhe wakati, “Ŵakharikani pasi ŵanthu mu viwuruviwuru vya 50.”
15Ndipo ŵakachita ntheura, ŵakaŵakhazika wose pasi. 16Ndipo wakati watora vingwa vinkhonde vira na somba ziŵiri zira, wakalaŵiska kuchanya, wakawonga Chiuta, wakavimenya ndipo wakavipereka ku ŵasambiri kuti ŵakharikire ŵanthu. 17Ndipo ŵanthu wose ŵakarya na kukhuta, ndipo ŵasambiri ŵakasora vimenyu ivyo vikakharapo ndipo vikazura vidunga 12.
Petrosi wakuphara pakweru za Yesu
(Mat 16.13-19; Mrk 8.27-29)
18Apo Yesu wakarombanga pa yekha, ŵasambiri ŵakhe ŵakaŵa nayo. Ndipo wakaŵafumba wakati, “Kasi ŵanthu ŵakuti ine ndine njani?”
19Ŵakazgora ŵakati, “Ŵanthu ŵanji ŵakuti ndimwe Yohane Mubapatizi, ŵanji ŵakuti ndimwe Eliya, kweni ŵanyakheso ŵakuti ndimwe yumoza wa nchimi za kale iyo yili kuwuka ku ŵa kufwa.”#Mat 14.1-2; Mrk 6.14-15; Luk 9.7-8
20Wakaŵafumbaso wakati, “Kweni imwe mukuti ndine njani?”#Yoh 6.68-69
Petrosi wakazgora wakati, “Imwe ndimwe Mesiya wa Chiuta.”
21Yesu wakaŵachinyinthizga na kuŵalangula kuti ŵareke kuphalirapo munthu nanga njumoza pa cheneichi.
Yesu wakuphara vya nyifwa na kuwuka kwakhe
(Mat 16.20-28; Mrk 8.30—9.1)
22 Yesu wakati, “Mwana wa Munthu wakwenera kukomwa pa vinandi na kukanika na ŵarara ŵa ŵaYuda, na ŵasofi ŵarara pamoza na ŵamanyi-marango, na kukomeka, ndipo na kuwuskika ku ŵakufwa pa zuŵa la chitatu.”
23Ntheura wakati kwa iwo wose, “Usange munthu wakukhumba kundirondezga, wakwenera kujipata na kunyamura mphinjika yakhe zuŵa na zuŵa na kundirondezga.#Mat 10.38; Luk 14.27 24Pakuti yose uyo wakukhumba kuponoska umoyo wakhe wati wawutayenge, ndipo yose uyo wati wawutayenge chifukwa cha ine, wati wawuponoskenge.#Mat 10.39; Luk 17.33; Yoh 12.25 25Kasi kungamovwirachi munthu, kwandula charu chose cha pasi, kweni wataye umoyo wakhe? 26Pakuti yose uyo wati waŵenge na soni na ine na mazgu ghane, Mwana wa Munthu nayo wamkuŵa nayo na soni para wamkwiza mu uchindami wakhe na mu uchindami wa Ŵawiske na wa ŵangelo ŵatuŵa. 27Kweni nkhumuphalirani unenesko, ŵalipo ŵanji awo ŵakwimilira pano, awo kuti ŵati ŵafwenge chara ŵasuke ŵawone Ufumu wa Chiuta.”
Kusinthika kwa mawonekero gha Yesu pa phiri
(Mat 17.1-8; Mrk 9.2-8)
28Sono pakati pajumphapo mazuŵa pafupi ghankhonde na ghatatu, wakati waŵayowoyera mazgu agha, Yesu wakatora Petrosi, Yohane na Yakhobe, wakakwera nawo ku phiri kuya karomba.#2 Pet 1.17-18 29Ndipo apo wakaŵa ŵachali kuromba, kawonekero ka chisko chakhe kakasintha ndipo malaya ghakhe ghakabuta na kugadima. 30Penepapo ŵanthu ŵaŵiri ŵakiza, ŵakayowoyanga nayo, ŵeneawo ŵakaŵa Mozesi na Eliya. 31Ŵanthu aŵa kawonekero kawo kakaŵa ka uchindami, ndipo ŵakadumbanga na vya ulendo wakhe uwo wakenera kufiska mu Yerusalemu. 32Petrosi na ŵanyakhe ŵaŵiri ŵakaŵa mu tulo twakufwa nato. Kweni ŵakati ŵawuka ŵakawona uchindami wa Yesu, ndiposo na ŵanthu ŵaŵiri awo ŵakimilira nayo. 33Apo ŵanthu ŵara ŵakafumangapo, Petrosi wakayowoya na Yesu wakati, “Musambizgi, nkhuweme kuti ise tili pano. Tizomerezgani kuti tizenge misasa yitatu, umoza winu, unyakhe wa Mozesi ndiposo unyakhe wa Eliya.” (Wakamanya chara icho wakayowoyanga.)
34Ŵachali kuyowoya vyeneivi, kukiza bingu ilo likaŵabenekerera ndipo ŵasambiri ŵara ŵakatenthemanga apo wakanjiranga mu bingu. 35Mazgu ghakafuma mu bingu ghakati, “Uyu ndi Mwana wane wakusankhika. Mupulikani iyo.”#Yes 42.1; Mat 3.17, 12.18; Mrk 1.11; Luk 3.22
36Mazgu ghakati ghareka kupulikikwa, Yesu wakasangika kuti wali yekha. Ndipo ŵakakhara chete mazuŵa gheneghara kwambula kuphalirapo munthu nanga njumoza na ivyo ŵakaviwona.
Yesu wakuchizga msepuka wa mzimu uheni
(Mat 17.14-18; Mrk 9.14-27)
37Na machero ghakhe, apo ŵakati ŵikha kufuma ku phiri kura, ŵanthu ŵanandi ŵakakumana nayo. 38Ndipo munthu yumoza mu mzinda wakachemerezga wakati, “Musambizgi, nkhumuŵeyani kuti mundiwonere mwana wane msepuka. Pakuti ndi mwana wane yekha na yekha. 39Ndipo mzimu ukumukora, ndipo wakuchirukira waka kuti wakulira, na kumunyutuska mpaka wamokore mphovu. Ukurutilira kumusuzga mpaka umupweteke ndipo ukufumamo na unonono chomene. 40Ndanguŵeya ŵasambiri ŵinu kuti ŵawufumye, kweni ŵatondeka.”
41 Yesu wakazgora wakati, “Okwe! Imwe ŵamuwiro wambula chipulikano, na wakubendera! Kasi nditi ndiŵe namwe na kumuzizipizgirani kufikira pauli? Zanga nayo kuno mwana wako.”
42Wiske wa mwana wachali kwiza nayo, chiŵanda chikamuthenyura pasi mwana ndipo wakazirikanga chomene. Kweni Yesu wakachenya mzimu uheni ura na kumuchizga msepuka. Ndipo wakamuwezgera ku ŵawiske. 43Ŵanthu wose ŵakazizwa na ukuru wa Chiuta.
Yesu wakuphara kachiŵiri vya nyifwa na kuwuka kwakhe
(Mat 17.22-23; Mrk 9.30-32)
Apo wose ŵakazizwanga na vinthu vyose ivyo wakachitanga, Yesu wakayowoya na ŵasambiri ŵakhe wakati, 44“Rekani mazgu agha ghanjire mu makutu ghinu. Mwana wa Munthu wamkuperekeka mu mawoko gha ŵanthu.” 45Kweni kuti ŵakapulikiska mazgu agha chara, chifukwa ghakabisika kwa iwo, mwakuti ŵareke kughamanyiska. Ndipo ŵakopanga na kumufumba wuwo pa mazgu agha.
Ndi njani mukuru wakuruska wose?
(Mat 18.1-5; Mrk 9.33-37)
46Ndipo mphindano yikawuka mukati mu ŵasambiri ŵa Yesu yakuti, mukuru kuruska wose ndi njani mukati mwawo.#Luk 22.24 47Kweni Yesu wakati wamanya maghanoghano ghawo, wakatora mwana na kumwimika pafupi na iyo. 48Ndipo wakaŵaphalira wakati, “Yose uyo wakupokerera mwana muchoko uyu mu zina lane, wakupokerera ine. Ndipo yose uyo wakupokerera ine, wakupokerera uyo wakandituma. Chifukwa uyo ndi muchoko chomene mukati mwinu, ndiyo wati waŵenge mukuru.”#Mat 10.40; Luk 10.16; Yoh 13.20
Uyo wakwimikana namwe chara, wali kumoza namwe
(Mrk 9.38-40)
49Yohane wakati, “Musambizgi, ise tikawona munthu wakufumya viŵanda mu zina linu, ndipo tikamukanizga chifukwa wakaŵa yumoza wa ise chara.”
50Kweni Yesu wakati, “Mungamukanizganga chara, chifukwa uyo ngwambula kwimikana namwe, wali pamoza namwe.”
ŴaSamariya ŵakana kumupokerera Yesu
51Apo mazuŵa ghakhe ghakaneng'enera kuti iyo wakapokerereke, Yesu wakadumula kuti warute ndipera ku Yerusalemu. 52Wakatuma nthumi munthazi mwakhe kuti ŵarute ku chikaya cha ŵaSamariya, kuti ndiko ŵakamunozgere malo. 53Kweni ŵanthu ŵa mu muzi ura kuti ŵakamupokerera chara chifukwa ŵakawona kuti mtima wakhe ukarata pa Yerusalemu. 54Para ŵasambiri ŵakhe, Yohane na Yakhobe ŵakawona ichi, ŵakamufumba Yesu ŵakati, “Fumu, kasi mukukhumba kuti ticheme moto kufuma kuchanya kuti uŵamare ŵanthu aŵa?”#2 Kar 1.9-16
55Kweni Yesu wakang'anamuka na kuŵachenya. [Ndipo wakati, “Imwe mukumanya chara kuti muli na mzimu wa mtundu uli. Pakuti mwana wa Munthu wakiza kuti waparanye umoyo wa ŵanthu chara kweni kuti wawuponoske.”] 56Penepapo Yesu na ŵasambiri ŵakhe ŵakarutilira kuya ku chikaya chinyakhe.
Awo ŵakukhumba kurondezga Yesu
(Mat 8.19-22)
57Apo ŵakendanga mu nthowa, munthu yunji wakati kwa Yesu, “Fumu, ndimurondezganinge kose uko mukuruta.”
58Yesu wakati, “Ŵakambwe ŵali na michembo yawo, ndipo viyuni vya mudera vili na vivimbo, kweni Mwana wa Munthu walije malo apo wangagoneka mutu wakhe.”
59Ku munthu munyakhe Yesu wakati, “Rondezga ine.”
Kweni wakazgora wakati, “Fumu, rekani nkhasunge danga ŵadada.”
60Kweni Yesu wakati kwa iyo, “Ŵareka ŵakufwa ŵasunge ŵakufwa ŵawo. Kweni iwe rutanga ukapharazge mazgu gha Ufumu wa Chiuta.”
61Munthu munyakheso wakaphalira Yesu wakati, “Nkhukhumba kumurondezgani, Fumu. Kweni rekani danga nkhaŵalayire ŵa mu nyumba yane.”#1 Kar 19.20
62Yesu wakati, “Munthu uyo wakora jembe kuti wagawule ndipo wakulaŵiska kumanyuma walije kwenera kuŵa mu Ufumu wa Chiuta.”
Currently Selected:
Luka 9: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
