Luka 10

Yesu wakutuma ŵasambiri 72

1Pamanyuma pa vyeneivi, Fumu yikasankha ŵanthu ŵanji 72#10.1 72: Malembo ghanyakhe ghakuti 70. yikaŵatuma munthazi mwakhe ŵaŵiriŵaŵiri kuruta mu mizi, na ku malo ghose uko wakaŵa pafupi kurutako. 2Ndipo wakati kwa iwo, “Nadi vuna njinandi chomene, kweni ŵanchito mbachoko. Ntheura rombani ku Fumu ya vuna kuti yitumeko ŵanchito kuti ŵakavunenge mu munda wakhe.#Mat 9.37-38 3Rutaninge! Ine nkhumutumani nga ŵana-mberere mukati mu mphumphi. #Mat 10.16 4Mungayeghanga chibeta cha ndarama, panji chikwama, panji skapato, mungendakatauzganga munthu mu nthowa chara.#Mat 10.7-14; Mrk 6.8-11; Luk 9.3-5 5Mu nyumba yose iyo mwamkunjiramo mukadange kuyowoya kuti, ‘Mutende uŵe mu nyumba iyi.’ 6Usange mu nyumba umo muli nadi munthu wa mutende, mutende winu wamkuŵa pa iyo. Kweni usange mulije, mutende winu wamkuwerera kwa mwaŵene. 7Ndipo khalirirani mu nyumba yeneiyo, mukaryenge na kumwa ivyo ŵamupani, pakuti wanchito wakwenera njombe yakhe. Mukareke kwenda pa nyumba iyi na iyi.#1 Kor 9.5-14; 1 Tim 5.18 8Para mwamkunjira mu muzi uliwose ndipo ŵamupokererani, mukaryenge ivyo ŵamukhalikirani. 9Mukachizge ŵarwari awo ŵali mwenemumo, ndipo mukaŵaphalire kuti, ‘Ufumu wa Chiuta wiza pafupi namwe.’ 10Kweni para mwamkunjira mu muzi uliwose ndipo kuti ŵamupokererani chara, mukarute mu misewu ya mu muzi ura na kuyowoya kuti,#Mil 13.51 11‘Fuvu nalo la mu muzi winu ilo lademerera ku malundi ghithu, tikumukung'unthirani imwe. Kweni manyani kuti, Ufumu wa Chiuta waneng'enera.’ 12Nkhumuphalirani kuti, pa zuŵa la weruzgi, Chiuta wamkuŵazizipizgira ŵanthu ŵa mu Sodomu kuruska muzi ura.”#Mut 19.24-28; Mat 11.24, 10.15

Soka ku ŵanthu ŵa mu misumba yambula kuzgoka

(Mat 11.20-24)

13“Soka kwa iwe Korazini! Soka kwa iwe Betesaida! Pakuti milimo ya nkhongono iyo yikachitika mwa imwe, nga yichitikenge mu Ture na Sidoni, mphanyi ŵanthu mu misumba yira ŵakang'anamuka kale na kuvwara vigudulu na kujithilira vyoto, kurongora kung'anamuka ku zakwananga zawo.#Yes 23.1-18; Eze 26.1—28.26; Yoy 3.4-8; Amo 1.9-10; Zak 9.2-4 14Kweni pa zuŵa la weruzgi, Chiuta wamkuŵazizipizgira ŵanthu ŵa ku Ture na Sidoni kuruska imwe. 15Na iwe Kaperenaumu, kasi ukukhumba kujikwezga kuya kafika kuchanya! Chara, uti ukhizgikire pasi mpaka ku Gehena.”#Yes 14.13-15

16“Uyo wakumupulikani imwe, wakundipulika ine, uyo wakukana imwe, wakundikana ine. Ndipo uyo wakukana ine, wakumukana uyo wakandituma.”#Mat 10.40; Mrk 9.37; Luk 9.48; Yoh 13.20

Ŵasambiri 72 ŵawerako

17Ŵasambiri ŵara 72 ŵakaya kawera na chimwemwe ndipo ŵakati, “Fumu, nanga ndi viŵanda vikatipulikira mu zina linu.”

18Ndipo wakati kwa iwo, “Nkhawona Satana wakuwa kufuma kuchanya nga ndi leza. 19Tegherezgani! Ndamupani mazaza ghakukandira zinjoka na ŵakalizga, ndiposo na ghakutondera nkhongono zose za murwani. Palije kanthu ako kizamkumupwetekani.#Mas 91.13 20Ndipouli, mureke kusekerera na ichi, pakuwona kuti mizimu yiheni yikumupulikirani. Kweni sekererani chifukwa mazina ghinu ghalembeka kuchanya.”

Yesu wakukondwa

(Mat 11.25-27, 13.16-17)

21Pa nyengo yeneyira, Yesu wakakondwa mwa Mzimu Mutuŵa ndipo wakati, Nkhumuwongani imwe Ŵadada, Fumu ya kuchanya na pasi, chifukwa mukabisa vinthu ivi ku ŵamahara na ŵakusambira, ndipo mukaŵavumbulira ŵabonda. Inya Ŵadada, pakuti ntheura ndimo likaŵira khumbo linu.

22“Ŵadada ŵali kupereka vinthu vyose kwa ine, ndipo palije munthu uyo wakumanya Mwana, kweni Ŵawiske ndiwo. Ndipo palije uyo wakumanya Ŵawiske, kweni Mwana ndiyo, na waliyose uyo Mwana wakusankha kumuvumbulira Ŵawiske.”#Yoh 3.35, 10.15

23Ntheura Yesu wakang'anamukira ku ŵasambiri ŵakhe, wakayowoya nawo ku udesi wakati, “Ngakutumbikika maso agho ghakuwona ivyo imwe mukuviwona. 24Chifukwa nkhumuphalirani kuti nchimi zinandi na ŵakaronga ŵanandi ŵakadokanga kuwona ivyo imwe mukuviwona, kweni kuti ŵakaviwona chara. Ndiposo ŵakadokanga kupulika vyeneivyo imwe mukuvipulika, ndipo kuti ŵakavipulika chara.”

Ntharika ya muSamariya muweme

25Mumanyi-marango yunji wakawuka na kumuyezga Yesu. Ndipo wakafumba wakati, “Musambizgi, kasi ndichitechi kuti ndihare umoyo wa muyirayira?”#Mat 22.35-40; Mrk 12.28-34

26Yesu wakamuzgora wakati, “Kasi mu marango muli kulembeka vichi? Ndipo ukuŵazga uli?”

27Mumanyi-marango wakazgora wakati, “Utemwenge Fumu Chiuta wako na mtima wako wose, na mzimu wako wose, na nkhongono zako zose, na vinjeru vyako vyose. Ndiposo utemwenge muzengezgani wako nga ndi umo ukujitemwera wamwene.”#Mar 6.5; Lev 19.18

28Yesu wakamuzgora wakati, “Wazgora makora. Uchitenge ntheura, ndipo uti uŵenge na umoyo.”#Lev 18.5

29Kweni munthu yura pakukhumba kujirunjiska wakamufumba Yesu wakati, “Kasi muzengezgani wane ndi njani?”

30Yesu wakamuzgora wakati, “Munthu yunji wakafuma ku Yerusalemu wakakhiranga kuya ku Yeriko. Ndipo pa nthowa, ŵankhungu ŵakamukora, na kumuvura, na kumutimba, ndipo ŵakamusida wakhara pa singo pera ndipo ŵakaruta. 31Sono mwa mwaŵi musofi yunji wakakhilira mu nthowa yeneyira, ndipo wakati wamuwona, wakalambalala ku mphepete yinyakhe. 32Ntheura pera muLevi nayo wakafika penepara, wakamuwona, wakalambalala ku lwegha lunyakhe. 33Kweni muSamariya yunji uyo wakaŵa pa ulendo wakhe, wakafika apo wakaŵa munthu yura. Wakati wamuwona, wakazura na chiwuravi.#2 Mid 28.15 34Wakiza apo munthu yura wakaŵa, wakakakamo mu vilonda vyakhe na kupungulirapo mafuta na vinyo. Ntheura wakaŵika munthu yura pa mbunda yakhe, wakiza nayo ku nyumba ya ŵalendo ndipo wakamupwererera. 35Na machero ghakhe, wakatora ndarama ziŵiri wakamupa msungiliri wa nyumba ya ŵalendo, wakati, ‘Umupwererere munthu uyu. Ndarama zose izo uti utayenge pachanya pa izi, ine ndizamkuwezgerapo para ndaya kawerako.’ ”

36Penepapo Yesu wakamufumba wakati, “Mu maghanoghano ghako, kasi ndi njani mwa aŵa ŵatatu, uyo wakaŵa muzengezgani wa munthu uyo wakatimbika na ŵankhungu?”

37Iyo wakazgora wakati, “Uyo wakamulengera lusungu.”

Yesu wakamuphalira wakati, “Rutanga, nawe ukachitenge ntheura pera.”

Yesu wakuchezga na Marita na Mariya

38Apo Yesu na ŵasambiri ŵakhe ŵakaŵa pa ulendo wawo, wakiza mu chikaya chinji, umo mukaŵa mwanakazi yunji zina lakhe Marita uyo wakamupokerera Yesu mu nyumba yakhe.#Yoh 11.1 39Iyo wakaŵa na munung'una wakhe zina lakhe Mariya, mweneuyo wakakhara musi mu malundi gha Fumu, uku wakupulikizga mazgu ghakhe. 40Kweni Marita wakatangwanikanga na milimo yinandi, ndipo wakiza kwa Fumu na kufumba kuti, “Fumu, chifukwa uli mukureka kupwelererako pakuwona kuti munung'una wane wandisidira ndekha milimo? Mumuphalire wize kandovwire!”

41Fumu yikamuzgora yikati, “Marita! Marita! Nthunandi uto ukwenjerwa na kukweŵeskeka nato. 42Kweni chinthu chimoza pera ndicho chikukhumbikwa. Ndipo Mariya wasora chigaŵa chiweme icho kuti chipokekenge kwa iyo chara.”

Currently Selected:

Luka 10: Tumbuka

Highlight

Copy