Luka 24

Yesu wawuka ku ŵakufwa

(Mat 28.1-10; Mrk 16.1-8; Yoh 20.1-10)

1Pa zuŵa lakudanga la sabata na mulenje chomene, ŵanakazi ŵara ŵakaruta ku dindi na vyakununkhiskira ivyo ŵakanozga. 2Ŵakasanga kuti libwe lagadabulikapo pa dindi. 3Ntheura ŵakanjira kweni kuti ŵakasangamo thupi la Fumu Yesu chara. 4Ndipo ŵachali kuzukuma na ichi, ŵanarume ŵaŵiri ŵakimilira pafupi na iwo, ŵavwara malaya ghakugabuka. 5Pakuti wakachiruskika, ŵanakazi ŵara ŵakasindama. Kweni ŵanthu ŵara ŵakati kwa iwo, “Chifukwa uli mukupenja uyo ngwamoyo mukati mu ŵakufwa? 6Kuti wali pano chara kweni wawuka! Kumbukani ivyo wakamuphalirani apo wakaŵa wachali namwe mu Galileya kuti,#Mat 16.21, 17.22-23, 20.18-19; Mrk 8.31, 9.31, 10.33-34; Luk 9.22, 18.31-33 7‘Mwana wa Munthu wakwenera kuperekeka mu mawoko gha ŵanthu ŵakwananga, kupayikika pa mphinjika, na kuwuka ku ŵakufwa pa zuŵa la chitatu.’ ”

8Ŵanakazi ŵakakumbuka mazgu gha Yesu. 9Ndipo ŵakati ŵawerako ku dindi, ŵakaya kaŵaphalira vyose ivi ŵasambiri 11 na ŵanyakhe wose. 10Sono iwo ŵakaŵa Mariya wa ku Magadala, Yohana, Mariya ŵanyina wa Yakhobe. Aŵa pamoza na ŵanakazi ŵanyakhe ŵakaya kaŵaphalira ŵakutumika ŵara makani agha. 11Kweni kwa iwo, mazgu agha ghakaŵa nga nga uchindere. Ndipo ŵakaŵagomezga ŵanakazi ŵara chara.

12Kweni Petrosi wakawuka na kuchimbilira ku dindi. Wakati wakotama na kulingizgamo, wakawona sanda pera, ndipo wakawerera ku nyumba uku wakuzukuma na icho chikachitika.

Ŵasambiri ŵaŵiri ŵa ku Emawusi

(Mrk 16.12-13)

13Zuŵa lenelira ŵasambiri ŵanyawo ŵaŵiri ŵakayanga ku chikaya zina lakhe Emawusi, icho pakunji chikaŵa pa mtunda wa makilomita ghankhonde na ghaŵiri kufuma ku Yerusalemu. 14Iwo ŵakadumbiskananga pa vyose ivyo vikachitika. 15Ŵachali kudumbiskana na kufumbana, Yesu mwenecho wakasenderera kufupi ndipo wakarongozgana nawo. 16Ŵakamuwona, kweni kuti ŵakamumanya chara. 17Yesu wakaŵafumba wakati, “Ndi makani uli agho mukudumbiskana uku mukwenda?”

Iwo ŵakimilira na kurongora visko vya chitima. 18Penepapo yumoza zina lakhe Kleopa, wakamuzgora wakati, “Kasi iwe ndiwe wekha mulendo mu Yerusalemu uyo wakureka kumanya ivyo vyachitika mwenemura mu mazuŵa agha?”

19Yesu wakafumba wakati, “Vinthu uli?”

Ŵakati kwa iyo, “Vya Yesu wa ku Nazarete, mweneuyo wakaŵa nchimi ya nkhongono mu milimo na mu mazgu panthazi pa Chiuta na pa ŵanthu wose, ndipo 20na umo ŵasofi ŵithu ŵarara pamoza na awo ŵakutiwusa ŵakamupereka ku weruzgi kuti wakomeke, ndipo ŵakamupayika pa mphinjika. 21Kweni ise tikagomezganga kuti ndiyo waŵawombolenge ŵaIsraele. Pa dera pa vyose ivi, muhanya uno ndi zuŵa la chitatu kufuma apo ichi chikachitikira. 22Kweniso ŵanakazi ŵanji ŵa mu mpingo withu ŵangutizukumiska. Ŵangucherera ku dindi mulenje uno, 23kweni kuti ŵangulisanga thupi lakhe chara. Ŵangwiza katiphalira kuti ŵawona mboniwoni ya ŵangelo, awo ŵanguti ngwamoyo. 24Ntheura ŵanyithu ŵanji ŵanguruta ku dindi, ndipo ŵanguya kasanga nga ndi umo ŵanakazi ŵara ŵanguyowoyera, kweni iyo Yesu kuti ŵangumuwona chara.”

25Yesu wakati kwa iwo, “Okwe! Mwa ŵakupusa imwe, na ŵachizita mu mtima pakupulikana na vyose ivyo nchimi zikayowoya. 26Asi kukenera kuti Mesiya wakomwe mu vyose vyeneivi, ndipo wanjirenge mu uchindami wakhe?” 27Ntheura Yesu wakamba kuŵarongosorera vyose ivyo malembo ghakuyowoya kuphara na vya iyo, kwamba dango la Mozesi ndiposo na malembo gha nchimi.

28Apo ŵakaneng'enera ku chikaya uko ŵakarutanga, Yesu wakachita nga ndi para wakukhumba kurutilira. 29Kweni ŵakamukoserezga ŵakati, “Mupanjwe nase, pakuti ndi mise sono, zuŵa nalo laruta.” Ntheura wakanjira kuti wapanjwe nawo. 30Para Yesu wakakhara nawo pa chakurya, wakatora chingwa, wakawonga Chiuta na kuchimenya ndipo wakaŵapa. 31Penepapo maso ghawo ghakajurika ndipo ŵakamumanya, kweni iyo wakazgeŵerekera waka mu maso ghawo. 32Ŵakafumbana ŵakati, “Asi mitima yithu yaphyanga chara apo iyo wayowoyanga nase mu nthowa na apo warongosoranga vya malembo?”

33Ŵakawuka pa ora leneilo ŵakawerera ku Yerusalemu, ŵakaya kasanga 11 ŵawungana pamoza na awo ŵakaŵa nawo, 34ndipo ŵakati kwa iwo, “Fumu yawuka nadi! Ndipo yamuwonekera Simoni.”

35Ndipo ŵaŵiri ŵara ŵakakonkhoska ivyo vikaŵawira mu nthowa, na umo wakamanyikwira pakumenya kwa chingwa.

Yesu wakuwoneka ku ŵasambiri ŵakhe

(Mat 28.16-20; Mrk 16.14-18; Yoh 20.19-23; Mil 1.6-8)

36Apo ŵakaŵa ŵachali kuyowoya vyeneivi, Yesu mwenecho wakimilira mukati mwawo wakati, “Mutende uŵe namwe.”

37Ŵakopa na kuchiruka, ŵakaghanaghananga kuti ŵawona muzguka. 38Yesu wakaŵafumba wakati, “Chifukwa nchichi mukukweŵeka na kukayika mu mitima yinu? 39Laŵiskani mu mawoko ghane na malundi ghane. Ndine nadi! Ndipapaskani na kuwona, pakuti muzguka ulije munofu na viwangwa nga ndi umo mukundiwonera ine.”

40Wakati wayowoya mazgu gheneagha, wakaŵarongora mawoko ghakhe na malundi ghakhe. 41Ŵasambiri ŵakaŵa ŵachali ŵandagomezge, pakuti ŵakazura na chimwemwe na kuzizwa, wakati kwa iwo, “Kasi chakurya muli nacho pano?” 42Ŵakamupa chipitika cha somba yakuphika, 43yeneiyo wakapoka na kurya uku wose ŵakuwona.

44Yesu wakati kwa iwo, “Agha ndiwo mazgu agho nkhamuyowoyerani apo nkhaŵa ndichali namwe, kuti vyose ivyo vili kulembekera ine mu Dango la Mozesi na mu malembo gha nchimi na MaSalimo vikwenera kufiskika.”

45Penepapo wakajula maghanoghano ghawo kuti ŵaghapulikiske malembo. 46Wakaŵaphalira wakati, “Ivi ndivyo vili kulembeka kuti, Mesiya wakwenera kukomwa na kuwuka ku ŵakufwa pa zuŵa la chitatu, 47mwakuti mu zina lakhe, kung'anamuka kwa mtima na kugowokereka kwa zakwananga kupharazgike ku mafuko ghose kwamba mu Yerusalemu. 48Imwe muli ŵakaboni ŵa vyeneivi. 49Ine ndaya kumutumirani icho Ŵadada ŵakapangana kutuma. Ntheura mukwenera kukhara mu msumba, musuke mupokere nkhongono kufumira kuchanya.”#Mil 1.4

Kukwera kwa Yesu

(Mrk 16.19-20; Mil 1.9-11)

50Penepapo Yesu wakaŵarongozgera kuwaro kwa msumba, pafupi na muzi wa Betaniya. Wakawuska mawoko ghakhe na kuŵatumbika.#Mil 1.9-11 51Apo wakaŵatumbikanga, wakapatukana nawo, ndipo wakayeghekera kuchanya. 52Ntheura ŵakamulambira na kuwerera ku Yerusalemu na chimwemwe chikuru. 53Nyengo yose ŵakakharanga mu Nyumba ya Chiuta, kuchindika Chiuta.

Currently Selected:

Luka 24: Tumbuka

Highlight

Copy