Luka 17

Kwananga

(Mat 18.6-7, 21-22; Mrk 9.42)

1 Yesu wakati ku ŵasambiri ŵakhe, Viyezgo vyakutorera munthu ku kwananga viŵengeko mazuŵa ghose, kweni soka kwa munthu mweneuyo vikwiziramo! 2Mphanyi nkhuweme kwa iyo kuti lwara lukuru lukakiririke mu singo yakhe, na kuponyeka mu nyanja, kwakuruska kuti wanangiske kamoza ka twana utu tuchoko. 3Ntheura chenjerani!

“Usange mubali wako wananga, umuchenye. Ndipo usange wazomera zakwananga zakhe, umugowokere.#Mat 18.15 4Usange wakwanangira kankhonde na kaŵiri mu zuŵa limoza, ndipo kankhonde na kaŵiri wakwiza wakuti, ‘Phepani nkhuzomera kwananga kwane,’ umugowokere.”

Chipulikano

5 Ŵakutumika ŵakayowoya na Fumu ŵakati, “Kuzgani chipulikano chithu.”

6Fumu yikazgora yikati, “Usange mungaŵa na chipulikano nanga chingaŵa chichoko nga nkha njere ka matubeni, mungayowoya ku khuni la chikuyu ili kuti, ‘Zgurika ndipo ukapandike mu nyanja!’, ndipo limupulikiraninge.”

Mlimo wa muteŵeti

7“Usange yumoza wa imwe, wali na muteŵeti uyo wakulima mu munda, panji wakuliska mberere, kasi wangamuphalira muteŵeti uyu para wakuwera ku munda kuti, ‘Zanga kuno luŵiro, urye chakurya?’ 8Chara nadi, asi wati wamuphalire kuti, ‘Ndinozgera chakurya cha na mise ndipo ujiphinye mukhuzi na kunditeŵetera ndisuke ndirye na kumwa. Sono pamanyuma ndipo iwe wize karye na kumwa.’ 9Kasi wakumuwonga muteŵeti yura chifukwa wakachita ivyo wakalangulika kuchita? 10Ntheura ndimo kuliri na imwe wuwo, para mwachita vyose ivyo mukalangurika, muyowoyenge kuti, ‘Ise tili ŵateŵeti waka. Tachita ivyo vyanguŵa nchito yithu.’ ”

Yesu wakutozga ŵavyoni khumi

11Apo Yesu wakaŵa pa ulendo wakhe kuya ku Yerusalemu, wakasorota pakati pa Samariya na Galileya. 12Para wakanjira mu chikaya chinji, wakakumana na ŵanthu khumi awo ŵakaŵa na nthenda ya vyoni, ŵeneawo ŵakimilira kutali, na 13kuchemerezga kuti, “Yesu! Musambizgi! Mutilengere lusungu.”

14Para Yesu wakaŵawona wakati, “Rutani mukajirongore ku ŵasofi.”

Apo ŵakarutanga, ŵakatozgeka.#Lev 14.1-32 15Yumoza wa iwo wakati wawona kuti wachizgika, wakawerera nyuma ndipo wakachemerezga uku wakuchindika Chiuta. 16Wakaya kawa kavunama pa malundi gha Yesu na kumuwonga. Ndipo wakaŵa mu Samariya. 17Yesu wakafumba wakati, “Asi ŵangutozgeka ŵanthu khumi? Kasi ŵankhonde na ŵanayi ŵali nkhu? 18Kasi kulije kusangika na yumoza wakwiza kamuchindika Chiuta, kweni mulendo uyo pera?” 19Ntheura wakati kwa iyo, “Wuka, urutenge, chipulikano chako chakuchizga.”

Kwiza kwa Ufumu wa Chiuta

(Mat 24.23-28, 37-41)

20 ŴaFarisi ŵanji ŵakamufumba Yesu na nyengo iyo Ufumu wa Chiuta wizirenge, ndipo wakazgora wakati, “Ufumu wa Chiuta kuti ukwiza na vimanyikwiro vyakuti viwoneke na maso chara. 21Panji ŵanthu ŵayowoyenge kuti, ‘Wonani, uli pano, panji wonani, uli para,’ pakuti Ufumu wa Chiuta uli mukati mwinu.”

22Ntheura Yesu wakati ku ŵasambiri ŵakhe, “Mazuŵa ghakwiza apo mwamkukhumbisiska kuti mphanyi mwanguwona zuŵa limoza mu mazuŵa gha Mwana wa Munthu, kweni kuti mwamkuliwona chara. 23Ŵanthu ŵamkumuphalirani kuti, ‘Wonani, wali kuno, panji wonani, wali kura!’, mungayangako chara, panji kuŵarondezga. 24Pakuti nga ndi umo leza wakumwetukira na kupereka ungweru kufuma ku chigaŵa chimoza cha kuchanya kuya ku chinyakhe, ndimo Mwana wa Munthu wizamkuchitira pa zuŵa la kwiza kwakhe. 25Kweni wakwenera danga kukomwa mu vinandi na kukanika na ŵanthu ŵa muwiro uwu. 26Nga ndi umo kukaŵira mu mazuŵa gha Nowa, ntheuraso ndimo kwamkuŵira mu mazuŵa gha Mwana wa Munthu.#Mut 6.5-8 27Ŵanthu ŵakaryanga, ŵakamwanga, ŵanarume ŵakatoranga, ndipo ŵanakazi ŵakatengwanga, kufikira zuŵa ilo Nowa wakanjirira mu ngaraŵa. Penepapo chigumura chikiza na kuŵamara wose.#Mut 7.6-24 28Ndimo kukaŵiraso mu mazuŵa gha Loti. Ŵanthu ŵakaryanga na kumwa, ŵakagulanga na kuguliska ndipo ŵakapandanga na kuzenga zinyumba.#Mut 18.20—19.25 29Kweni pa zuŵa ilo Loti wakafumiramo mu Sodomu, moto na mawe gha sulufure vikarokwa nga ndi vura kufuma kuchanya, ndipo vikaŵamara wose. 30Ndimo kwamkuŵira na pa zuŵa ilo Mwana wa Munthu wamkwizira.

31“Pa zuŵa leneilo uyo wati waŵe pa nyumba pachanya, na katundu wakhe mu nyumba wareke kukhira kuya kawuskamo katundu yura. Ndiposo na uyo wali ku munda nayo wareke kuwerera ku kaya.#Mat 24.17-18; Mrk 13.15-16 32Kumbukani muwoli wa Loti!#Mut 19.26 33Yose uyo wakukhumba kuponoska umoyo wakhe, wati wawutayenge. Kweni yose uyo wakuwutaya umoyo wakhe, wati wawusungilirenge.#Mat 10.39, 16.25; Mrk 8.35; Luk 9.24; Yoh 12.25 34Nkhumuphalirani kuti, mu usiku wenewura ŵanthu ŵaŵiri ŵamkugona pa chitara chimoza, yumoza wamkutorekapo, ndipo munyakhe wamkusidika. 35Ŵanakazi ŵaŵiri ŵamkupulanga pamoza, yumoza wamkutorekapo, ndipo munyakhe wamkusidika.” [36Ŵanthu ŵaŵiri ŵamkuŵa mu munda umoza, yumoza wamkutorekapo ndipo munyakhe wamkusidika.]

37Ŵasambiri ŵakamufumba ŵakati, “Ndi nkhu, Fumu?”

Yesu wakaŵaphalira wakati, “Apo pali chitanda, ndipo makuŵi ghakuwungana pamoza.”

Currently Selected:

Luka 17: Tumbuka

Highlight

Copy