Luka 12

Yesu wakuchenjezga ŵanthu na vya upusikizgi

(Mat 10.26-27)

1Pa nyengo yeneyira, vikwi vinandinandi vya ŵanthu vikawungana, mwakuti ŵanthu ŵakakandananga waka. Yesu wakadanga kuyowoya ku ŵasambiri ŵakhe kuti, “Chenjerani na chirungo cha ŵaFarisi cheneicho mbupusikizgi.#Mat 16.6; Mrk 8.15 2Palije kanthu kakubenekerereka ako karekenge kuvumbukwa, panji kanthu kakubisika ako kamkureka kumanyikwa.#Mrk 4.22; Luk 8.17 3Ntheura vyose ivyo mwayowoya mu chisi, vizamkupulikikwa na muhanya, ndipo icho mwaphwepwerezgana mu vipinda vya mukati, chizamkupharazgika pachanya pa nyumba.”

Uyo mukwenera kumopa

(Mat 10.28-31)

4“Nkhumuphalirani mwa ŵabwezi ŵane kuti mureke kopa awo ŵakukoma thupi, ndipo pamanyuma pakhe ŵalije kumanya kuchita kanthu kanyakhe. 5Kweni ndimurongorani uyo mukwenera kumopa. Mopani uyo para wakoma thupi wali na mazaza kuliponya mu Gehena Inya nadi nkhumuphalirani kuti, mweneuyo ndiyo mukwenera kumopa.

6“Asi twadunduru tunkhonde tukugulika na tundarama tuŵiri? Kweni palije na kamoza ka twadunduru utu ako kakuruwika na Chiuta. 7Nanga ndi masisi gha mitu yinu ghali kupendeka ghose. Mureke kopa, imwe muli ŵakuzirwa kuruska twadunduru tunandi.”

Kuzomera na kukana Khristu panthazi pa ŵanthu

(Mat 10.19-20, 32-33, 12.32)

8“Nkhumuphalirani kuti yose uyo wakundizomera panthazi pa ŵanthu, Mwana wa Munthu nayo wamkumuzomera panthazi pa ŵangelo ŵa Chiuta. 9Kweni uyo wakundikana panthazi pa ŵanthu, nane ndamkumukana panthazi pa ŵangelo ŵa Chiuta.

10“Yose uyo wakuyowoya matusi kwa Mwana wa Munthu, wamkugowokereka kweni uyo wakutuka Mzimu Mutuŵa, wamkugowokereka chara.#Mat 12.32; Mrk 3.29

11“Para ŵamkumutorerani kuya keruzgika mu nyumba zakusoperamo panji panthazi pa ŵakuru ŵa vigaŵa, panyakhe pa ŵakuwusa, mureke kwenjerwa kuti mwamkuzgora uli, kuti mwamkuzgora vichi, ndipo kuti mwamkuyowoya vichi?#Mat 10.19-20; Mrk 13.11; Luk 21.14-15 12Chifukwa Mzimu Mutuŵa ndiyo wamkumusambizgani pa nyengo yeneiyo ivyo mukwenera kuyowoya.”

Ntharika ya musambazi wakupusa

13Munthu yumoza mukati mu mzinda wakayowoya na Yesu wakati, “Musambizgi, muphalirani mukuru wane kuti wandigaŵireko chiharo chane.”

14Kweni wakati kwa iyo, “Iwe wa munthu, kasi ndi njani wali kundimika ine kuŵa mweruzgi, panji wakugaŵa chiharo chinu?” 15Yesu wakaŵaphalira wose wakati, “Muŵe maso ndipo chenjerani na udokezi uliwose, pakuti umoyo wa munthu kuti uli mu unandi wa ivyo wali navyo chara.”

16Yesu wakaŵatayira ntharika wakati, “Munda wa munthu yunji musambazi ukaŵa na vyakurya vinandi. 17Wakaghanaghana mu mtima wakhe wakati, ‘Ndichite uli pakuti ndilije apo ndingaronga vyakurya vyane?’ 18Ntheura wakati, ‘Nditi ndichite ichi. Nditi ndipankhule nthamba zane na kuzenga zikuruko. Ndipo mwenemumo nditi ndirongemo vyakurya vyane na katundu wane. 19Ntheura nditi ndiyowoye ku ndamwene kuti, mzimu wane uli na vyuma vinandi ivyo wajiwunjikira kwa virimika vinandi. Sono ufwasenge, uryenge, umwenge na kusekerera.’ 20Kweni Chiuta wakati kwa iyo, ‘Wa chindere iwe! Usiku wenewuno umoyo wako ukhumbikenge, ndipo ivyo ukasunganga viti viŵenge vya njani?’

21“Ndimo waliri uyo wakujisungira usambazi, kweni kuti ndi musambazi kwa Chiuta chara.”

Kwenjerwa na kukweŵeka

(Mat 6.25-34)

22 Yesu wakati ku ŵasambiri ŵakhe, Ntheura nkhumuphalirani kuti, mungenjerwanga na umoyo winu, kuti muryengechi, panji thupi linu kuti muvwarengechi. 23Chifukwa umoyo ukuruska vyakurya, ndipo thupi nalo likuruska vyakuvwara. 24Ghanaghanani na ŵachihoŵe, kuti ŵakumija chara, nesi kuvuna. Iwo ŵalije chipinda chakuŵikamo vyakurya vyawo panji nthamba, kweni Chiuta wakuŵalera. Imwe muli ŵakuzirwa kwakuruska viyuni! 25Ndipo ndi njani mwa imwe uyo chifukwa cha kwenjerwa, wangasazgirako mazuŵa ku umoyo wakhe? 26Ntheura usange mulije kumanya kuchita nanga ndi ako nkhachoko nkhanira, mukwenjerwerachi na vinthu vinyakhe? 27Ghanaghanani na maluŵa na umo ghakukulira, kuti ghakugwira nchito chara nesi kuruka. Kweni nkhumuphalirani kuti, nanga ndi Solomoni mu uchindami wakhe wose, kuti wakavwarapo vyakutowa nga ndi umo ghaliri maluŵa agha chara.#1 Kar 10.4-7; 2 Mid 9.3-6 28Kweni usange Chiuta wakuvwarika ntheura utheka wa mu thengere, uwo muhanya uno ngwamoyo ndipo na machero ukuponyeka pa moto, asi chomene kwakuruska wati wamuvwarikaninge imwe mwa ŵa chipulikano chichoko!

29“Mureke kwenjerwa kuti muryengechi, panji mumwengechi, nanga nkhuŵa na mtima wakwenjerwa. 30Pakuti mafuko ghose gha mu charu ghakupenja vinthu ivi. Ŵawiskemwe ŵakumanya kuti mukusoŵerwa vyeneivi. 31Kweni imwe penjani danga Ufumu wa Chiuta ndipo vyose vyeneivi viti vipikenge kwa imwe.

Usambazi kuchanya

(Mat 6.19-21)

32“Mungopanga, imwe kamskambo kachoko. Pakuti Ŵawiskemwe ŵakukondwa kumupani Ufumu. 33Guliskani ivyo muli navyo ndipo ndarama zakhe mupereke ku ŵakavu. Jinozgerani vibeta vya ndarama ivyo kuti vikuvukupara chara, ivyo mbusambazi wa kuchanya uwo ngwambula kumara. Munkhungu nayo kuti wakufikako chara ndipo fufuzi nazo zikuwunanga chara. 34Pakuti uko kuli usambazi winu, kwenekuko ndiko kuti kuŵengeso mtima winu.

Ŵateŵeti awo ŵali maso

35“Vwarani zikhore mu maluwunda ghinu, ndipo nyali zinu zigolerenge.#Mat 25.1-13 36Muŵe nga mbanthu awo ŵakulindirira sekuru wawo, para wakuwera kufuma ku chiphikiro cha nthengwa, mwakuti para iyo wiza na kukhung'uska, ŵangamanya kumujulira luŵiro.#Mrk 13.34-36 37Mbakutumbikika ŵateŵeti awo para sekuru wawo wiza, wizamkuŵasanga ŵali maso. Nadi nkhumuphalirani kuti sekuru wawo wizamkunozgeka na kuŵakharika pa kurya ndipo wamkwiza na kuŵateŵetera. 38Mbakutumbikika ŵateŵeti awo sekuru wawo wamkuŵasanga ŵali maso nanga wize pakati pa usiku panji ku matandakucha. 39Kweni manyani ichi kuti, mwene-nyumba nga wamanyenge nyengo iyo munkhungu wakwizira, mphanyi wakumurekerera chara munkhungu kuti wagumure nyumba yakhe.#Mat 24.43-44 40Ntheura imwe namwe, kharani ŵakunozgeka, pakuti Mwana wa Munthu wamkwiza pa ora ilo imwe mukulighanaghanira chara.”

Muteŵeti wakugomezgeka na wambula kugomezgeka

(Mat 24.45-51)

41 Petrosi wakamufumba Yesu kuti, “Fumu, kasi mukuyowoyera ise ntharika yeneiyi, panji mukuyowoyera ŵanthu wose?”

42Fumu yikazgora yikati, “Kasi ndi muteŵeti nju uyo ngwa kugomezgeka na wa mahara, mweneuyo sekuru wakhe wamkumwimika pachanya pa vya nyumba yakhe, kuŵagaŵira chakurya pa nyengo ya kwenerera? 43Ngwakutumbikika muteŵeti uyo para sekuru wakhe wakwiza wamkusanga wakuchita ntheura. 44Nadi nkhumuphalirani kuti, sekuru wakhe wamkumwimika kuŵa mulinda pa vyose ivyo wali navyo. 45Kweni usange muteŵeti yura wakughanaghana kuti, ‘Sekuru wane wachedwa kwiza,’ ndipo wakwamba kutimba ŵateŵeti ŵanyakhe ŵanarume na ŵanakazi, na kurya na kumwa na kuloŵera, 46penepapo sekuru wa muteŵeti yura, wati wizenge pa zuŵa ilo iyo walije kugomezga, na pa nyengo iyo walije kuyimanya. Ndipo penepapo sekuru wakhe wizamkumulanga na kumuŵika pamoza na ŵambula kupulikana.

47“Ndipo muteŵeti uyo wakamanya khumbo la mwene-nchito wakhe, kweni kuti wakanozgapo kanthu chara nesi kuchita kwakuyana na khumbo la mwene-nchito wakhe, wamkuthyapulika chomene. 48Kweni muteŵeti uyo wakawura kumanya ivyo mwene-nchito wakhe wakukhumba ndipo wakachita vyakwenerera nthimbo, wamkuthyapulika pachoko waka. Ndipo munthu yose uyo wakupika vinandi wafumbikenge kuti wapereke vinandi. Ndipo munthu uyo ŵakamusungiska vinandi, ŵamkumufumba kuti wapereke vinandi chomene.

Ŵanthu ŵizamkupatukana chifukwa cha Yesu

(Mat 10.34-36)

49“Nkhizira kuponya moto pa charu, ndipo ndakhumbanga kuti mphanyi wagolera kale! 50Kweni ndili na ubapatizo weneuwo nkhwenera kubapatizika nawo, ndipo ndafyenyeka chomene kuti mpaka ufiskike.#Mrk 10.38 51Kasi mukughanaghana kuti ine ndili kwizira kupereka mutende pa charu? Chara, nkhumuphalirani, kweni mphatukano ndiyo. 52Chifukwa kufuma sono, ŵanthu ŵankhonde awo mba mu nyumba yimoza ŵati ŵagaŵikanenge. Ŵatatu ŵati ŵapindanenge na ŵaŵiri, ndipo ŵaŵiri ŵati ŵapindanenge na ŵatatu. 53Nadi ŵati ŵagaŵikanenge. Wiske wati wawukire mwana mwanarume, ndipo mwana mwanarume nayo wati wawukire wiske. Nyina wati wawukire mwana wakhe mwanakazi, nayo mwana mwanakazi wati wawukire nyina. Nyinavyara wati wawukire mukamwana wakhe, nayo mukamwana wati wawukire nyinavyara wakhe.”#Mik 7.6

Kumanya nyengo

(Mat 16.2-3)

54 Yesu wakatiso ku mzinda wa ŵanthu, Para mukuwona bingu likukwera kufuma ku manjiliro gha dazi, mukuyowoya penepapo kuti, vura yikwiza ndipo yikwiza nadi. 55Para mphepo ya ku mwera yikuputa, mukuyowoya kuti kuŵenge chithukivu, ndipo chikuŵako. 56Mwa ŵapusikizgi imwe! Mukumanya kutanthaula kawonekero ka charu na mtambo. Kweni kasi mukutondekerachi kuphara ching'anamulo cha nyengo iyi ya sono.

Kuphemana na wa mrandu wako

(Mat 5.25-26)

57“Kasi mukutondeka uli kujeruzgira mwekha pa icho nchakunyoroka? 58Chifukwa para ukurongozgana na wa chimphindikwa wako kuya ku mweruzgi, yezga kuphemana nayo apo muchali mu nthowa mzire wakutorere ku mweruzgi, ndipo mweruzgi nayo wakupereke ku musilikari, ndipo musilikari wakuponye mu gadi. 59Nkhukuphalira kuti, uti ufumengemo chara usuke ulipe kandarama ako kangukharako.”

Currently Selected:

Luka 12: Tumbuka

Highlight

Copy