Yona 4
4
Kukwiya kwa Yona na lusungu lwa Chiuta
1Pa chifukwa ichi Yona wakakwenyerera ndipo wakakwiya chomene. 2Wakaromba kwa Fumu wakati, “Mwe Fumu, asi ichi ndicho nkhayowoya apo nkhaŵa ndichali mu charu cha kwithu? Ichi ndicho ine nkhachimbiliranga ku Tarishishi. Nkhamanya kuti imwe ndimwe Chiuta wa uchizi na wa chiwuravi, wakuziwurika kukaripa na wakuzura na chisungusungu, Chiuta uyo wakugowoka pakureka kupereka chilango.#Kuf 34.6 3Sono imwe, Mwe Fumu nkhumuŵeyani, wuskanimo umoyo wane, chifukwa nkhuweme kwa ine kuti ndifwe kuruska kuŵa wamoyo.”#1 Kar 19.4
4Kweni Fumu yikamuzgora yikati, “Kasi iwe wachiwona kuti nchakwenerera kuti ukwiye?”
5Penepapo Yona wakawukamo mu msumba na kuya kakhara pasi ku mafumiro gha dazi kwa msumba ura. Kwenekura wakajizengera ka msasa ndipo wakakhara pasi pa mufwiri mwakuti wawone icho chitichichitikenge na msumba ura.
6 Fumu Chiuta wakamezga khuni la mono, ndipo wakalichitiska kuti lutandazge minthavi yakhe pa kamtenje kuti lupereke mufwiri pa Yona. Wakachita ichi mwakuti wamuthaske ku kocha kwa zuŵa. Ndipo Yona wakakondwa chomene chifukwa cha lunyungu lura. 7Kweni na machero ghakhe ku mulenje Chiuta wakatuma chibungu kurya lunyungu lura mwakuti lunyungu lukafota. 8Para dazi likafuma, Chiuta wakatuma mphepo yakuthukira ya ku mafumiro gha dazi. Dazi likaŵalira pa mutu wa Yona mwakuti Yona wakazinduka. Ntheura wakaromba kuti wafwe, ndipo wakati, “Nkhuweme kuti ndifwe kuruska kuŵa na umoyo.”
9Kweni Chiuta wakati kwa Yona, “Kasi wachita makora kuti ukwiye chifukwa cha lunyungu ulu?”
Yona wakati, “Inya, ndachita makora kukwiya ndipo nkhenera na kufwa wuwo.”
10Ndipo Fumu yikati, “Waŵa na chitima na lunyungu ulo ukalupanda nesi kulukuzga chara, lwene ulo lukamera mu usiku umoza ndipo lukomiraso mu usiku umoza! 11Msumba wa Nineve uli na ŵanthu ŵakujumpha 120,000 ŵeneawo kuti ŵakumanya uweme panji uheni chara ndipo uliso na ng'ombe zinandi chomene. Asi ine nane nkhwenera kuŵa na chitima na msumba ukuru uwu?”
Currently Selected:
Yona 4: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
