Yona 3
3
Yona wakupulikira Fumu
1Mazgu gha Fumu ghakiza kwa Yona kachiŵiri, ghakati, 2“Wuka, urute ku msumba ura ukuru wa Nineve ndipo ukawupharazgire uthenga uwo nkhukuphalira.”
3Yona wakapulikira ndipo wakaruta ku Nineve kwakuyana na umo Fumu yikamuphalirira. Nineve ukaŵa msumba ukuru, weneuwo mu usani wakhe ukaŵa wa ulendo wa mazuŵa ghatatu. 4Pa zuŵa lakudanga Yona wakamba kupharazga uthenga ura mukati mu msumba wakati, “Kwakhara mazuŵa 40 pera kuti Nineve wabwanganduke.”#Mat 12.41; Luk 11.32
5Ŵanthu ŵa ku Nineve ŵakagomezga uthenga wa Chiuta. Ŵakaphalirana kuti waliyose waziŵizge kurya ndipo ŵavware vigudulu kwamba ŵakuru na ŵachoko wuwo.
6Para uthenga uwu ukamufika karonga wa charu cha Nineve, iyo wakafumapo pa chizumbe chakhe cha ufumu, wakavura munjilira wakhe ndipo wakavwara chigudulu na kukhara pasi pa vyoto. 7Penepapo karonga yura wakatuma uthenga ku ŵanthu wose mu msumba wa Nineve kuti, “Languro la karonga na ŵarongozgi ŵakhe ndi ili, ‘Munthu waliyose nanga chingaŵa chinyama chilichose, ng'ombe, mberere panji mbuzi, vingachetanga chakurya chilichose chara nesi kumwa maji. 8Ŵanthu ŵavware vigudulu ndipo vyakuŵeta navyo ŵavivwarike vigudulu. Ŵanthu ŵachemerezge chomene pakuromba kwa Chiuta na kureka nthowa zawo ziheni ndiposo na vya nkhaza ivyo ŵakuchita. 9Ndi njani wakumanya, panji Chiuta wangagowoka ku ukari wakhe wakofya kuti tireke kumara?’ ”
10Para Chiuta wakawona icho ŵakachita, na umo ŵakawererako ku nthowa zawo ziheni, wakagowoka pakureka kupereka chilango icho wakatenge waŵamare nacho.
Currently Selected:
Yona 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
