Yona 1
1
Yona wakukana kupulikira Fumu
1Zuŵa limoza mazgu gha Fumu ghakiza kwa Yona mwana wa Amitayi, ghakati,#2 Kar 14.25 2“Wuka, urute ku msumba ukuru ura wa Nineve, ukachemerezge pakuŵapharazgira ŵanthu mazgu ghakuŵasuska chifukwa ndawona kuti ŵananga chomene.” 3Kweni Yona wakachimbilira ku Tarishishi mwakuti wawukepo panthazi pa Fumu. Wakakhilira ku dowoko la ku Yopa ndipo kwenekura wakasanga ngaraŵa iyo yikarutanga ku charu chira. Wakati walipira ndarama zakwendera, wakakwera kuti warute ku Tarishishi mwakuti wareke kuwonekera kwa Fumu.
4Kweni Fumu yikawuska mphepo yikuru pa nyanja, ndipo kukaŵa chimphupuru chankhongono chomene mwakuti ngaraŵa nayo yikaŵa pafupi na kusweka. 5Ŵendeski ŵa ngaraŵa ŵakopa chomene ndipo waliyose wakachemerezga kwa chiuta wakhe na wakhe. Ntheura ŵakamba kutaya ŵakatundu awo ŵakaŵa mu ngaraŵa mwakuti ŵayipepuske. Pa nyengo iyi Yona wakaŵa kuti wakhilira mu vipinda vya pasi mu ngaraŵa ndipo wakagona tulo twa kafwe na kafwe.
6Murara wa ngaraŵa wakakhilira kwenekura ndipo wakati wamusanga wakati kwa Yona, “Kasi iwe ukung'anamulachi pakugona tulo? Wuka! Nawe chemerezga kwa chiuta wako. Panji chiuta wako wangatipulika kuti tireke kufwa.”
7Ntheura ŵendeski ŵa ngaraŵa ŵara ŵakati ku yumoza na munyakhe, “Tiyeni tose pamoza tichite mphenduzgo mwakuti timanye kuti kasi nchifukwa cha njani soka ili latiwira?” Ntheura ŵakachita mphenduzgo ndipo yikawira Yona. 8Penepapo ŵakamufumba Yona ŵakati, “Kasi nchifukwa cha njani kuti soka ili latiwira? Nchito iyo ukuchita nja mtundu uli? Kasi ukufumirankhu? Charu chako ndi nchi? Ndiwe munthu wa mtundu uli?” 9Iyo wakazgora wakati, “Ine ndine muHebere. Ndipo nkhusopa Fumu, Chiuta wa kuchanya, uyo wakalenga nyanja na mtunda.” 10Penepapo ŵendeski ŵa ngaraŵa ŵara ŵakopa chomene ndipo ŵakamufumba ŵakati, “Kasi icho wachita nchithu uli?” Kweni iwo ŵakamanya kuti wakachimbiranga Fumu, pakuti wakaŵaphalirapo kale za cheneichi.
11Chimphupuru chira chikakulirangakuliranga Ntheura ŵakati kwa iyo, “Kasi sono tichite chivichi kwa iwe mwakuti nyanja yitikhalire bata?” 12Yona wakaŵazgora wakati, “Mundinyamure na kundiponya mu nyanja ndipo yiti yimukhaliraninge bata. Pakuti nkhumanya kuti chimphupuru chikuru ichi chamuwirani chifukwa cha ine.” 13Ŵendeski ŵa ngaraŵa ŵara ŵakayezga chomene kuvuŵa kuti ŵayiwezgere ngaraŵa yira ku mtunda, kweni ŵakatondeka chifukwa chimphupuru chikakulirangakuliranga pa nyanja kuŵajandizga. 14Ntheura ŵakaromba kwa Fumu ŵakati, “Mwe Fumu tikumuŵeyani kuti tireke kufwa chifukwa cha kumara umoyo wa munthu uyu, ndipo mureke kuŵika mrandu wa nyifwa yakhe pa ise, pakuti imwe Fumu mwachita icho nchakumukondweskani.” 15Ntheura ŵakamutora Yona na kumuponya mu nyanja. Penepapo nyanja yikaŵakhalira bata. 16Ŵendeski ŵa ngaraŵa ŵakati ŵawona ichi, ŵakopa Fumu chomene ndipo ŵakapereka sembe kwa Fumu na kupangana kuti ŵati ŵateŵetere Fumu.
17 Fumu yikanozgera chisomba chikuru kuti chimumire Yona. Yona wakaŵa mu nthumbo ya chisomba mazuŵa ghatatu muhanya na usiku.#Mat 12.40
Currently Selected:
Yona 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
