Yohane 15

Yesu ndiyo mpheska yenecho

1“Ine ndine mpheska yenecho, ndipo Ŵadada mbalimi ŵa mpheska. 2Munthavi wose wa mwa ine, uwo ukuwura kupambika vipambi ŵakuwuskako. Ndipo munthavi wose uwo ukupambika vipambi ŵakuwuphatilira mwakuti upambike vinandiko. 3Imwe muli ŵakutowa kale chifukwa cha mazgu agho ndayowoya kwa imwe. 4Kharani mwa ine, ndipo ine mwa imwe. Nga ndi umo munthavi ungatondekera kupambika vipambi pa iwo wekha kwambula kuti ukhare mwa mpheska, ntheura namweso mungapambika vipambi chara, kwambula kuti mwakhara mwa ine.

5“Ine ndine mpheska, imwe ndimwe minthavi. Munthu yose uyo wakukhara mwa ine ndipo ine mwa iyo, ndiyo wapambikenge vipambi vinandi. Pakuti kwambula ine, kuti mungamanya kuchita kanthu chara. 6Yose uyo wakuwura kukhara mwa ine wakuponyeka kuwaro nga ndi munthavi na komira. Minthavi yikuwunjikika na kuponyeka mu moto na kuphya. 7Usange mukukhara mwa ine, ndipo mazgu ghane nagho ghakukhara mwa imwe, rombani chilichose icho mukukhumba ndipo chiti chichitikirenge imwe. 8Mu ichi ndimo Ŵadada ŵakuchindikikiramo chakuti mupambike vipambi vinandi, ntheura muti muŵenge ŵasambiri ŵane. 9Nga ndi umo Ŵadada ŵanditemwera ine ndimo nane ndamutemwerani imwe. Kharani mu kutemwa kwane. 10Usange mukusungilira marango ghane, mukharenge mu kutemwa kwane nga ndi umo ine nkhasungilira marango gha Ŵadada ndipo nkhukhara mu kutemwa kwawo.

11“Ndayowoya vinthu ivi kwa imwe mwakuti chimwemwe chane chiŵenge mwa imwe, na kuti chimwemwe chinu chiŵe chakufikapo. 12Dango lane kwa imwe ndakuti, mutemwanenge nga ndi umo ine nkhumutemwerani.#Yoh 13.34, 15.17; 1 Yoh 3.23; 2 Yoh 5 13Palije munthu uyo wali na kutemwa kukuru kwakuruska uku, kwakuti waŵikire pasi umoyo wakhe chifukwa cha ŵabwezi ŵakhe. 14Ndimwe ŵabwezi ŵane usange mukuchita ivyo nkhumulangulani. 15Kuti nkhumuchemaniso ŵateŵeti chara, chifukwa muteŵeti kuti wakumanya chara icho sekuru wakhe wakuchita. Kweni ndamuchemani ŵabwezi, chifukwa vyose ivyo nkhapulika ku Ŵadada ndamumanyiskani. 16Kuti ndimwe mukandisora ine chara, kweni ndine nkhamusorani, ndipo nkhamwimikani kuti murute na kupambika vipambi, ndipo kuti vipambi vyinu vikhalirire. Mwakuti chose icho mukuromba Ŵadada mu zina lane ŵamupani imwe. 17Ichi ndicho nkhumulangulani kuti, ‘Mutemwanenge.’

Tinkho la charu

18“Usange charu chikutinkha imwe, manyani kuti chadanga kutinkha ine pambere chindatinkhe imwe. 19Nga muŵenge ŵa mu charu, mphanyi charu chamutemwani nga mbanthu ŵakhe. Kweni pakuti ndimwe ŵa mu charu chara, pakuti nkhamusankhani kufuma mu charu, rekani charu ichi chikumutinkhani. 20Kumbukani mazgu agho nkhamuphalirani, ghakuti, ‘Muteŵeti kuti ndi mukuru kuruska sekuru chara.’ Usange ŵakandizikizga ine, imwe namwe ŵamkumuzikizgani. Usange ŵakasunga mazgu ghane, ŵamkusunga na mazgu ghinu wuwo.#Mat 10.24; Luk 6.40; Yoh 13.16 21Kweni vyose ivi, ŵamkumuchitirani chifukwa cha ine, pakuti ŵakumanya chara uyo wakandituma ine. 22Ndirekenge kwiza na kuyowoya nawo, mphanyi ŵalije zakwananga. Kweni sono ŵalije na chifukwa cha kudapilira zakwananga zawo. 23Yose uyo wakunditinkha ine, wakutinkha na Ŵadada wuwo. 24Ndiwurenge kuchita milimo mukati mwawo yeneiyo palije na munthu yunji uyo wakayichitapo, mphanyi ŵalije zakwananga. Kweni sono ŵayiwona milimo, ndipouli, ŵakurutilira kunditinkha ine na Ŵadada wuwo. 25Kweni ichi chikufiska icho chili kulembeka mu marango ghawo kuti, ‘Ŵakanditinkha kwambula chifukwa.’#Mas 35.19, 69.4

26“Para Msanguruski wiza, uyo ndamkumutumirani kufuma kwa Ŵadada, uyo ndiyo Mzimu wa unenesko, mweneuyo wakufumira mu Ŵadada, ndiyo wizamkundipanikizgira ukaboni ine. 27Imwe ndimwe ŵakaboni ŵane, pakuti mwaŵa nane kufuma pakwamba.

Currently Selected:

Yohane 15: Tumbuka

Highlight

Copy